Luk

7 Ọke rọ vwọ vuẹ ihwo na obo rọ guọnọ vuẹ ayen nu, ọ da ro Kepanọm. 2 Asaọkiephana odibo rẹ onotu rẹ isodje ọvo rọ ghanre kẹ mamọ muọga gangan, ọ guọnọ ghwẹ re. 3 Ọke ro vwo nyo kpahen Jesu, o de ji evo vwẹ usun rẹ ekpako rẹ ihwo ri Ju bro ra, ra vuẹ nẹ ọ rhe rhi sivwin odibo rọyen na. 4 Ayen de bru Jesu rhe, kẹ ayen rẹ gangan nẹ: “O fo ohwo ru wo ru ọnana kẹ, 5 kidie o vwo ẹguọnọ rẹ ẹkuotọ rẹ avwanre na, ọyen komobọ yen bọn sinagọg rẹ avwanre.” 6 Ọtiọyena Jesu de nene ayen. Ẹkẹvuọvo ọke ro vwo sikẹre uwevwin na re, jẹ onotu rẹ isodje na ji igbeyan rọyen ra ta kẹ re nẹ: “Ọga, wo kpokpo oma wẹ-ẹn, kidie mi fo ohwo ru wọ ro uwevwin rọye-en. 7 Kọyensorọ mi vwo no nẹ mi fo ohwo ro bru we rhe-e. Ẹkẹvuọvo ta ota na rere wọ nẹrhẹ oma rẹ odibo mẹ gan. 8 Kidie mẹvwẹ jẹ ohwo re phi phiyọ otọ rẹ ogangan rẹ usuon, ro vwo isodje vwẹ obotọ rọyen, me ta kẹ ọnana nẹ, ‘Yanran!’ ọ me yanran, vwọ kẹ ọfa nẹ, ‘Yanrhe!’ ọ me yanrhe, vwọ kẹ ọviẹn mẹ nẹ, ‘Ru ọnana!’ o mi ruo.” 9 Ọke ri Jesu vwo nyo eta nana, o de gbe unu, o de kuomarhẹriẹ ni otu ri nene na, ọ da tanẹ: “Me ta kẹ ovwan nẹ, me je tobọ mrẹ oka rẹ esegbuyota ọgangan ọtiọna vwẹ Izrẹ-ẹl.” 10 Ọke rẹ ihwo ro jiri na vwo rhivwin rhe uwevwin na, ayen da mrẹ nẹ oma rẹ odibo na gan re.

11 Ọyena vwọ wan nu, o kriri-i o de kpo orere ọvo re se Nen, jẹ idibo rọyen kugbe otu buebun nene. 12 Ro vwo sikẹre anurhoro rẹ orere na, nighere! e muẹ orivwin rẹ ọshare ọvo cha, ọyen ọvo yen oni rọyen vwiẹre. Vwọba, aye na ayeuku. Otu buebun ri nẹ orere na rhe vẹ ọyen je herọ. 13 Ọke rẹ Ọrovwori na vwọ mrẹ aye na, aro rọyen da dọn, ọ da ta kẹ nẹ: “Wọ rha viẹ-ẹ.” 14 Ọtiọyena ọ da yanran, o de djobọte ehwa re vwo mu orivwin na, ihwo ri muro na de mudia. Ọ da tanẹ: “Eghene ọshare, me ta kẹ wẹ, vrẹn!” 15 Ọshare ro ghwuru na de vrẹn chidia, kọ ta ota, Jesu da vwọ kẹ oni rọyen. 16 Asaọkiephana oshọ de mu ayen eje, kẹ ayen vwẹ urinrin kẹ Ọghẹnẹ, rẹ ayen vwọ tanẹ: “A vwẹ ọmraro rode vwo mu vwẹ ohri rẹ avwanre re,” kugbe nẹ, “Ọghẹnẹ karophiyọ ihwo rọyen re.” 17 Iyẹnrẹn nana ro shekpahọn na da hrabọ ro Judia ejobi kugbe irere eje re riarierẹ phiyọ.

18 Asaọkiephana idibo ri Jọn da niyẹnrẹn rẹ erọnvwọn nana eje kẹ. 19 Ọtiọyena Jọn de se idibo rọyen ivẹ, o de ji ayen bru Ọrovwori na ra, ra nọ nẹ: “Wẹwẹ yen Ohwo rọ Cha na, gbanẹ avwanre rhẹro rẹ ohwo ọfa?” 20 Ọke rẹ ayen vwo bro rhe, eshare na da tanẹ: “Jọn ro Brẹ Ihwo Phiyame ji avwanre bru we rhe, rhe nọ wẹ nẹ, ‘Wẹwẹ yen Ohwo rọ Cha na, gbanẹ avwanre rhẹro rẹ ohwo ọfa?’” 21 Vwẹ unọke yena, o de sivwin ihwo buebun re họnvwa ọga, ihwo ri vwo emiavwe egangan kugbe ihwo rẹ ẹwẹn umwemwu kpokpo, ọ da vwẹ okẹ rẹ orẹmrẹ vwọ kẹ ihwo buebun ri rhuẹro. 22 Ọ da kpahen kẹ ayen nẹ: “Ovwan yanran ra niyẹnrẹn rẹ oborẹ ovwan nyori kugbe oborẹ ovwan mrẹre na kẹ Jọn: Irhuẹro mrorẹ asaọkiephana, ikpono yan, e ruẹ ehọnvwoti fuan, idierhọ nyẹme, a kpare ihwo ri ghwuru vrẹn, e ji ghwoghwo iyẹnrẹn esiri na kẹ igbere. 23 Omavwerhovwẹn dia vwọ kẹ ohwo rọ mrẹ emu vuọvo rọ so ekprowọ kẹ vwẹ oma mẹ-ẹ.”

24 Ọke rẹ ihwo ri Jọn ji rhe na vwọ yanran nu, Jesu kọ ta ota kẹ otu na kpahan Jọn nẹ: “Die yen ovwan kpo evunrẹ aton na re ni? Okankọn* rẹ odju djuẹ? 25 Kẹ die yen ovwan tobọ re ni? Ọshare ro ku iwun iyoyovwin* phiyọ? Nighere, ihwo ri kuẹ iwun iyoyovwin phiyọ ri ji vwo erọnvwọn iyoyovwin eje rẹ ayen guọnọre hẹ evunrẹ iwevwin rẹ ivie. 26 Kẹ die yen ovwan ghini kpo otafe re ni? Ọmraro? E, me ta kẹ ovwan nẹ, ọ rho vrẹ ọmraro shesheri. 27 Ọnana yen ohwo re si kpahen nẹ: ‘Nighere! mi jẹ ikọn mẹ kobaro kẹ wẹ, ohwo rọ cha rhuẹrẹ idjerhe wẹn phiyotọ hẹrhẹ owẹ.’ 28 Me ta kẹ ovwan nẹ, vwẹ usun rẹ ihwo rẹ eya vwiẹre, o vwo ohwo vuọvo rọ rho nọ Jọni-i, ẹkẹvuọvo ohwo rọ hanvwere vwẹ Uvie rẹ Ọghẹnẹ na rho nọ.” 29 (Ọke rẹ ihwo na eje kugbe ihwo ri phi osa uyovwin na vwo nyo ọnana, ayen de se Ọghẹnẹ ọvwata, kidie ayen bromaphiyame vẹ omaebrophiyame ri Jọn. 30 Ẹkẹvuọvo ihwo ri Farisi na kugbe otu re nabọ riẹn Urhi na da jẹ uchebro* rẹ Ọghẹnẹ vwọ kẹ ayen na fia, kidie o ji rhi bru ayen phiyame-e.)

31 “Ọtiọyena amono yen me cha vwẹ ihwo rẹ uvwiẹ nana vwo dje, amono yen ayen họhọre? 32 Ayen họhọ imitete ri chidia vwẹ afieki ri kperẹ se ohwohwo nẹ: ‘Avwanre hworo iflutu kẹ ovwan, ẹkẹvuọvo ovwan gbeha-a; avwanre vwerhe oma, ẹkẹvuọvo ovwan viẹre-e.’ 33 Vwẹ idjerhe vuọvo na, Jọn ro Brẹ Ihwo Phiyame na rhere, ọ re ibrẹdi-i, ọ da iwaini-i, ẹkẹvuọvo ovwan tanẹ: ‘O vwo ẹwẹn rẹ Idẹbono.’ 34 Ọmọ rẹ ohwo rhere, ọ ria, ọ je da, ẹkẹvuọvo ovwan tanẹ: ‘Nighere! Ọgbọre kugbe ọgbaudi yen o ruẹ, ugbeyan rẹ ihwo ri phi osa uyovwin kugbe irumwemwu!’ 35 Dedena e dje aghwanre phiyọ ọvwata* womarẹ emọ* rọyen.”

36 Asaọkiephana ọvo vwẹ usun rẹ ihwo ri Farisi na ko dje ẹrẹrẹ nẹ o rhi nene ọyen riemu. Ọtiọyena ọ da ro uwevwin rẹ ohwo ri Farisi na, o de chidia imẹjẹ. 37 Nighere! aye ọvo ra riẹn phiyọ orumwemwu vwẹ orere na de nyo nẹ ọ riemu* vwẹ uwevwin rẹ ohwo ri Farisi na, ọ da reyọ ọgọ* rẹ ori ro gbon phanphanphan rhe. 38 O de mudia obuko vwẹ asan awọ rọyen, ọ da viẹ, ameoviẹ rọyen da kpọrhọ awọ rọyen, ọ da vwẹ ẹton rẹ uyovwin rọyen vwo rien no. Vwọba, ọ da fiọnfiọn awọ rọyen vwọrẹ ẹguọnọ, o de ji ku ori ro gbon phanphanphan na ku ayen. 39 Rọ vwọ mrẹ ọnana, ohwo ri Farisi ro durhire na da ta kẹ oma rọyen nẹ: “Ọshare nana da ghene dia ọmraro, manẹ ọ rha riẹn ohwo kugbe oka rẹ aye ro djobọte na, nẹ orumwemwu yen o ruẹ.” 40 Ẹkẹvuọvo Jesu da kpahen kẹ nẹ: “Saimọn, o vwo orọnvwọn ọvo me guọnọ vuẹ wẹ.” Ọ da tanẹ: “Oyono, ta!”

41 “Eshare ivẹ riosa rẹ ohwo ọvo ro momo ihwo igho; ọvo riosa rẹ idinari* 500, ọ ro chekọ ke rha 50. 42 Ọke rẹ ayen rhe vwo orọnvwọn vuọvo rẹ ayen vwọ hwa rhivwin kẹ-ẹ, o de vwo ghovwo ayen ihwo ivẹ na ọphẹ. Ọtiọyena, ọvọ vwẹ usun rayen na yen che me vwo ẹguọnọ rọyen?” 43 Saimọn da kpahen kẹ nẹ: “Mi rorori nẹ ọ rẹ osa rọyen me bun na.” Ọ da ta kẹ nẹ: “Wọ riẹn orhiẹn na bru.” 44 Ọtiọyena o de hirhe opharo ku aye na, ọ da ta kẹ Saimọn nẹ: “Wọ mrẹ aye nana? Me ro uwevwin wẹn; wọ kẹ vwẹ ame me vwọ hworhẹ awọ mẹ-ẹ. Ẹkẹvuọvo aye nana vwẹ ameoviẹ rọyen vwọ kpọrhọ ayen, ọ da vwẹ ẹton rọyen vwo rien ayen. 45 Wọ fiọnfiọn ovwẹ-ẹ, ẹkẹvuọvo aye nana, vwo nẹ unọke re me vwọ ro uwevwin na yen ọ vwọ fiọnfiọn awọ mẹ vwọrẹ ẹguọnọ. 46 Wo ku ori ku uyovwin mẹ-ẹ, ẹkẹvuọvo aye nana ku ori ro gbon phanphanphan ku awọ mẹ. 47 Fikirẹ ọnana, me ta kẹ wẹ nẹ, dede nẹ imwemwu rọyen pha buebun, a vwẹ ayen vwo ghovwo, kidie o vwo ẹguọnọ buebun. Ẹkẹvuọvo ohwo ra vwẹ emerha vwo ghovwo, vwo ẹguọnọ emerha.” 48 Ọtiọyena ọ da ta kẹ aye na nẹ: “A vwẹ imwemwu wẹn vwo ghovwo uwe.” 49 Ihwo re vẹ ọyen gbe chidia imẹjẹ na ke ta kẹ omoma rayen nẹ: “Ono yen ọshare nana dede, rọ vwẹ imwemwu vwo ghovwo ohwo?” 50 Ẹkẹvuọvo ọ da ta kẹ aye na nẹ: “Esegbuyota wẹn sivwin uwe nure; yanran vwọrẹ ufuoma.”