Luk

10 Enana vwọ wan nu, Ọrovwori na da sane 70 efa, o de ji ayen ivivẹ kobaro kẹ oma rọyen kpo korere korere kugbe kasan kasan rẹ ọyen komobọ cha ra. 2 Ọ da ta kẹ ayen nẹ: “E, orhọ na rhoro, ẹkẹvuọvo ewiowian na bunru-u. Ọtiọyena ovwan rẹ Onini rẹ orhọ na nẹ o ji ewiowian ro evunrẹ orhọ rọyen. 3 Ovwan yanran! Nighere! mi jẹ ovwan yanran kerẹ igodẹ vwẹ ohri rẹ iwofu.* 4 Ovwan ghwa ekpu rẹ igho yẹrẹ ekpu rẹ emu yẹrẹ isabato-o, ovwan ji yeren ohwo vuọvo* vwẹ idjerhe-e. 5 Kasan kasan rẹ ovwan da ro uwevwin, ovwan ka tanẹ: ‘E jẹ uwevwin nana vwo ufuoma.’ 6 Ọ da dianẹ ugbeyan rẹ ufuoma hẹ etiyin, ufuoma rẹ ovwan kọ dia enu rọyen. Ẹkẹvuọvo ọ rha herọ-ọ, ko rhivwin bru ovwan rhe. 7 Ọtiọyena ovwan dia evunrẹ uwevwin yena, rere ovwan rha ria je da erọnvwọn rẹ ayen vwọ kẹ ovwan, kidie ofori nẹ a hwosa rẹ ọwiowian kẹ. Ovwan nẹ uwevwin ọvo kpo ọfa-a.

8 “Vwọba, kasan kasan rẹ ovwan da ro orere, ayen de rhiabọreyọ ovwan, ovwan re oborẹ ayen mu phiyọ obaro rẹ ovwan 9 ovwan sivwin ihwo re họnvwa ọga vwẹ evun rọyen rere ovwan vuẹ ayen nẹ: ‘Uvie rẹ Ọghẹnẹ na sikẹre ovwan re.’ 10 Ẹkẹvuọvo kasan kasan rẹ ovwan da ro orere, ayen rhe rhiabọreyọ ovwa-an, ovwan ro evunrẹ irhuvwun ride rọyen rere ovwan tanẹ: 11 ‘Avwanre tue ekpẹn rẹ orere rẹ ovwan re tamu awọ rẹ avwanre kuotọ vwọso ovwan. Dedena ovwan riẹn ọnana nẹ, Uvie rẹ Ọghẹnẹ na sikẹre re.’ 12 Me ta kẹ ovwan nẹ, ọ cha bra vwọ kẹ orere yena vwẹ ẹdẹ yena vwọ vrẹ Sodọm.

13 “Okpetu rode kẹ wẹ, Korazin! Okpetu rode kẹ wẹ, Bẹtsaida! kidie ọ da dianẹ e ruiruo rẹ igbevwunu re ruru vwevunrẹ ovwan vwẹ Taya kugbe Saidọn, mane jẹ ayen kurhẹriẹ ọke grongron re, vẹ emwa rẹ esiso rẹ ayen kuphiyọ, jẹ ayen chidia iwurhie. 14 Ọtiọyena, ọ cha bra vwọ kẹ ovwan vwevunrẹ ẹdjọeguo na vwọ vrẹ Taya kugbe Saidọn. 15 Kugbe owẹ, Kepanọm, a cha kpare owẹ kpenu kpo odjuvwu? Obotọ vwevunrẹ Ushi* ọyen wọ cha ra!

16 “Kohwo kohwo rọ kerhọ rẹ ovwan, kerhọ mẹ. Kohwo kohwo rọ jẹ ovwan fia, je jẹ vwẹ fia. Vwọba, kohwo kohwo rọ jẹ vwẹ fia, je jẹ Ọ ro ji vwe rhe na fia.”

17 Ọyena vwọ wan nu, 70 na de rhivwin rhe vẹ aghọghọ, kẹ ayen tanẹ: “Ọrovwori, emekashe rẹ Idẹbono dede vwẹ oma kpotọ kẹ avwanre ọke rẹ avwanre vwọ reyọ odẹ wẹn vwo ruiruo.” 18 Ọtiọyena ọ da ta kẹ ayen nẹ: “Me mrẹ Eshu ro she nure kerẹ enu rọ nyavwaro nẹ obodjuvwu cha. 19 Nighere! me kẹ ovwan ogangan rẹ ovwan vwo chiyin eredekọ vẹ ekpakpasimagha muotọ, kugbe ogangan vwẹ enu rẹ ẹgba rẹ ọvweghrẹn na ejobi, o vwo emu vuọvo rọ cha wan ovwan oma kakaka-a. 20 Dedena ovwan ghọghọ kidie nẹ a nẹrhẹ ẹwẹn na vwomakpotọ kẹ ovwa-an, ẹkẹvuọvo ovwan ghọghọ kidie e si edẹ rẹ ovwan phiyọ idjuvwu na re.” 21 Vwẹ unọke vuọvo yena, ọ da ghọghọ gangan vwevunrẹ ẹwẹn ọfuanfon na, ọ da tanẹ: “Mi jiri uwe vwẹ azagba, Ọsẹ, Ọrovwori rẹ odjuvwu vẹ akpọ, kidie wọ nabọ si erọnvwọn nana nu vwọ kẹ evwaghwanre kugbe ihwo re riẹn ẹbe, wo de dje ayen phia vwọ kẹ imitete. E, Ọsẹ, kidie ọnana yen idjerhe ru wọ rhọnvwephiyọ. 22 Ọsẹ mẹ phi erọnvwọn eje phiyọ ovwẹ obọ re, o vwo ohwo vuọvo rọ riẹn ohwo rẹ Ọmọ na hepha-a jokparẹ Ọsẹ na, o ji vwo ohwo vuọvo rọ riẹn ohwo rẹ Ọsẹ na hepha-a jokparẹ Ọmọ na, kugbe kohwo kohwo rẹ Ọmọ na vwo owenvwe ro vwo dje kẹ.”

23 Ọtiọyena ọ da ta kẹ idibo na ọke rẹ ayen ọvo vwọ herọ nẹ: “Omavwerhovwẹn dia kẹ ẹro re mrẹ erọnvwọn rẹ ovwan mrẹ na. 24 Kidie me ta kẹ ovwan nẹ, emraro kugbe ivie buebun guọnọ mrẹ erọnvwọn rẹ ovwan mrẹ na ẹkẹvuọvo ayen mrẹ aye-en, ayen guọnọ nyo erọnvwọn rẹ ovwan nyo na ẹkẹvuọvo ayen nyo aye-en.”

25 Asaọkiephana nighere! ọshare ọvo rọ nabọ riẹn Urhi na de vrẹn mudia rọ vwọ davwọn ni, ọ da tanẹ: “Oyono, die yen ofori nẹ mi ru rere mi vwo vwo arhọ ri bẹdẹ?” 26 Ọ da ta kẹ nẹ: “Die yen e si phiyọ evunrẹ Urhi na? Die yen wo se vwọ?” 27 Ọ da kpahen kẹ nẹ: “‘Wo mi vwo ẹguọnọ ri Jihova* Ọghẹnẹ wẹn vẹ ubiudu wẹn eje kugbe erhi* wẹn eje kugbe ogangan wẹn eje kugbe iroro wẹn eje kugbe ‘ọrivẹ wẹn kirobo wo vwo ẹguọnọ rẹ oma wẹn.’” 28 Ọ da ta kẹ nẹ: “Ẹkpahọnphiyọ wẹn na gbare; rhe ruẹ ọnana, ku wo che vwo arhọ.”

29 Ẹkẹvuọvo kidie nẹ ọ guọnọ dje oma rọyen phiyọ ọvwata, ọshare na da ta kẹ Jesu nẹ: “Ono yen ghene hẹ ọrivẹ mẹ?” 30 Jesu da kpahen nẹ: “Ọshare ọvo nẹ Jerusalẹm kpo Jẹriko, ọ da ro abọ rẹ iji, ayen de gborho fiotọ je reyọ iwun rọyen, hwe joma ghwu, ayen da yan jovwo. 31 Kpregede na, orherẹn ọvo kọ wan idjerhe yena, ọke rọ vwọ mrẹ, ọ da wan ẹbẹre ochekọ rẹ idjerhe na. 32 Ọtiọyen ohwo ri Livae ọvo ji ru, ọke ro vwo te asan na rọ vwọ mrẹ, ọ da wan ẹbẹre ochekọ. 33 Ẹkẹvuọvo ohwo ri Sameria ọvo rọ wan idjerhe yena de te asan rọ hepha, ọke rọ vwọ mrẹ, aro rọyen da dọn. 34 Ọtiọyena o de sikẹrẹ, ọ da gba era rọyen, o de ku ori vẹ iwaini ku ayen. O de muo phiyọ enu rẹ eranvwe robọ rọyen, o de muo kpo uwevwin ọvo rẹ erhorha wonphiyọ, ọ da vwẹrote. 35 Vwẹ ẹdẹ rọ vwọ kpahọn, ọ da reyọ idinari* ivẹ, ọ da vwẹ ayen kẹ ọrọvwẹrote uwevwin rẹ erhorha wonphiyọ na, ọ da tanẹ: ‘Vwẹrote, kemu kemu ru wọ ghwọrọre vwọ vrẹ ọnana, me cha hwosa rọyen kẹ wẹ ọke mi de rhivwin rhe.’ 36 Ọvọ vwẹ usun rẹ erha nana yen wo rorori nẹ ọ vwẹ oma rọyen vwo ru ọrivẹ kẹ ọshare rọ ro abọ rẹ iji na?” 37 Ọ da tanẹ: “Ọ ro gbe arodọnvwẹ kẹ na.” Ọtiọyena Jesu da ta kẹ nẹ: “Yanran rere wẹwẹ komobọ re ru ọtiọyen.”

38 Asaọkiephana rẹ ayen vwọ hẹ idjerhe yanran, ọ da ro ọko ọvo. Etiyin kọyen aye ọvo re se Mata de dede kerẹ ọrhorha phiyọ uwevwin rọyen. 39 Mata ji vwo oniọvo ọmọtẹ ọvo re se Meri, ro chidia totọ vwẹ asan awọ rẹ Ọrovwori na, jẹ ọ kerhọ rẹ obo rọ ta.* 40 Ẹkẹvuọvo vwọ kẹ Mata, erọnvwọn buebun ro ruẹ mu ẹwẹn rọyen reyọ. Ọtiọyena o de bro rhe, ọ da tanẹ: “Ọrovwori, o rhe fiemu vuọvo kẹ wẹ nẹ oniọvo mẹ ọmọtẹ yanjẹ uvwe vwo nẹ omẹvwẹ ọvo ru erọnvwọn na? Vuẹ nẹ ọ rhe cha vwẹ uko.” 41 Ọrovwori na da kpahen kẹ nẹ: “Mata, Mata, wọ rua ẹnwan ji kpokpo oma wẹn kpahan erọnvwọn buebun. 42 Emerọnvwọn yen a guọnọre, yẹrẹ tobọ ọvo dede. Vwọ kẹ Meri, ọ jẹ ẹbẹre ro yovwirin* nure, a cha reyọ mie-e.”