Matiu

7 “Ovwan rha vwẹ ihwo guẹdjọ-ọ rere e vwo jẹ ovwan evwo guẹdjọ; 2 kidie oborẹ ovwan reyọ ihwo efa vwo guẹdjọ wan, ọtiọyen a je cha vwẹ ovwan vwo guẹdjọ, ovwanvwọ rẹ ovwan vwọ vwanvwa kẹ ihwo yen ayen je cha vwọ vwanvwe kẹ ovwan. 3 Ọtiọyena diesorọ wo vwo nẹ ẹmẹbẹre urhe tutuno rọhẹ ẹro rẹ oniọvo wẹn, jẹ wo se vwo oniso rẹ urhe rode rọhẹ ẹro wẹ-ẹn? 4 Yẹrẹ mavọ wọ sa vwọ ta kẹ oniọvo wẹn nẹ, ‘Juvwe nene uwe si ẹmẹbẹre urhe tutuno rọhẹ ẹro wẹn na no,’ jẹ nighere! urhe rode hẹ ẹro wẹn? 5 Ohwo rẹ omeru na! Ke si urhe rode rọhẹ ẹro wẹn na no, ọke yena ku wọ sa mrorẹ fiotọ je riẹn oborẹ wo se vwo si ẹmẹbẹre urhe tutuno rọhẹ ẹro rẹ oniọvo wẹn na no.

6 “Ovwan vwẹ obo re pha fuanfon vwọ kẹ eranko-o, yẹrẹ do ivie eghanghanre* rẹ ovwan phiyọ obaro rẹ isi-i, rere ayen vwo jẹ awọ rayen e vwo chiyẹn ayen muotọ, rẹ ayen da rhẹrioma je bẹrẹ ovwan rhiephiyọ.

7 “Ovwan rha nọ, ka vwọ kẹ ovwan; ovwan rha guọnọ, kẹ ovwan cha mrẹ; ovwan rhe hworo, ke che rhie vwọ kẹ ovwan; 8 kidie kohwo kohwo rọ nọ, a vwọ kẹ, kohwo kohwo rọ guọnọ, ọ mrẹ, kohwo kohwo ro hworo, e che rhie kẹ. 9 Vwọrẹ uyota, ọvọ vwẹ usun rẹ ovwan rẹ ọmọ rọyen cha nokpẹn rẹ ibrẹdi, rọ da vwẹ ukuta kẹ? 10 Yẹrẹ rọ cha nokpẹn rẹ erin, rọ da vwẹ ọrọdekọ kẹ, o che ru ọtiọyen? 11 Ọtiọyena, ọ da dianẹ ovwan, dede nẹ ovwan irumwemwu, riẹn obo ra vwẹ okẹ esiri vwọ kẹ emọ rẹ ovwan, kẹ Ọsẹ rẹ ovwan rọhẹ obodjuvwu rhe ru vrẹ ọtiọyen, rọ da vwẹ erọnvwọn iyoyovwin vwọ kẹ otu re nọ mie!

12 “Ọtiọyena erọnvwọn eje rẹ ovwan guọnọre nẹ ihwo ru kẹ ovwan, ovwan ji ru ọtiọyen kẹ ayen. Vwọrẹ uyota, ọnana yen oborẹ Urhi na kugbe Emraro na mudiaphiyọ.

13 “Wan anurhoro ọhwahwa na, kidie idjerhe ro suẹn kpo oghwọrọ na rhiephiyọ ghwroro, anurhoro rọyen je pha hẹhẹre, ihwo buebun yen wan; 14 ẹkẹvuọvo idjerhe ro suẹn kpo arhọ na kekeri, anurhoro rọyen je pha hwahwa, imihwo krẹn yen guọnọ mrẹ.

15 “Ovwan nomaso kpahen emraro rẹ efian ri ku ewun rẹ ogegede phiyọ brẹ ovwan cha, ẹkẹvuọvo vwẹ obevun ayen iwofu* rẹ owẹnvwe ọgangan hwe. 16 Womarẹ emamọ rayen yen ovwan che vwo vughe ayen. Ihwo koko igrepu vwo nẹ idjigbẹ-ẹn yẹrẹ ifigi vwo nẹ ekpia-a, gbanẹ ayen ruẹ ọtiọyen? 17 Vwẹ idjerhe vuọvo na, kurhe kurhe esiri mọ omamọ esiri, ẹkẹvuọvo kurhe kurhe ro gbonri mọ orharhe omamọ. 18 Urhe esiri cha sa mọ orharhe omamọ-ọ, yẹrẹ kẹ urhe ogbongbon sa mọ omamọ esiri-i. 19 Kurhe kurhe rọ mọ omamọ esiri-i ka gbọ she, e mi do phiyọ erhanre. 20 Ọtiọyena, vwọrẹ uyota, womarẹ emamọ rayen yen ovwan che vwo vughe ihwo yena.

21 “Ọ dia kohwo kohwo ro se vwe, ‘Ọrovwori, Ọrovwori,’ yen cha ro Uvie rẹ idjuvwu na-a, ẹkẹvuọvo ohwo ro ru ọhọre rẹ Ọsẹ mẹ rọhẹ obodjuvwu na ọvo yen cha ruọ. 22 Ihwo buebun cha ta kẹ vwẹ vwẹ ẹdẹ yena nẹ: ‘Ọrovwori, Ọrovwori, avwanre mraro vwẹ odẹ wẹn, je djẹ ẹwẹn rẹ Idẹbono phia vwẹ odẹ wẹn, ji ruiruo rẹ igbevwunu buebun vwẹ odẹ wẹn?’ 23 Ke me cha ta kẹ ayen nẹ: ‘Me riẹn ovwan kakaka-a! Ovwan wan nẹ etinẹ, ovwan ri ruiruo ri jurhi ẹyọnrọn na!’

24 “Ọtiọyena, kohwo kohwo ro nyo eta mẹ nana ro de ji ru ayen cha họhọ ọvwaghwanre rọ bọn uwevwin rọyen phiyọ enu rẹ oragha. 25 Osio da rhọ, oghwe de ku, odju de dju uwevwin na, ẹkẹvuọvo o sheri-i kidie a bọnrọ phiyọ enu rẹ oragha. 26 Vwo kpobarophiyọ, kohwo kohwo ro nyo eta mẹ nana ro rhe ru aye-en cha họhọ ẹkpa rọ bọn uwevwin rọyen phiyọ enu rẹ ekpẹn. 27 Osio da rhọ, oghwe de ku, odju de dju, ọ da teyen uwevwin na, o de she, oghwọrọ rọyen rhoro mamọ.”

28 Ọke ri Jesu vwo ku eta nana phiyọ nu, obo ro yono wan de gbe otu buebun na unu, 29 kidie o yono ayen kerẹ ohwo ro vwo ogangan, ọ dia kerẹ isiẹbe raye-en.