Iruo rẹ Iyinkọn Na

10 Asaọkiephana o vwo ọshare ọvo vwẹ Sizaria re se Kọniliọs, onotu rẹ isodje* vwẹ ẹko ọvo re se ẹko rẹ Itali.* 2 Ọ vẹ evwruwevwin rọyen eje muọghọ okokodo kẹ Ọghẹnẹ je djoshọ rọyen, ọ vwẹ okẹ rẹ arodọnvwẹ buebun kẹ ihwo na, ọ je nẹrhovwo rhe Ọghẹnẹ ọkieje. 3 Omarẹ unọke rirhirin rẹ ẹdẹ na,* ọ da nabọ mrẹ amakashe rẹ Ọghẹnẹ ọvo ro bruro rhe vwẹ emramrẹ, rọ ta kẹ nẹ: “Kọniliọs!” 4 Kọniliọs da tẹnrovio vẹ oshọ, ọ da nọ nẹ: “Die, Ọrovwori?” Ọ da ta kẹ nẹ: “Ọghẹnẹ nyo ẹrhovwo wẹn re, ọ je mrẹ okẹ rẹ arodọnvwẹ ru wọ vwọ kẹ ihwo. 5 Asaọkiephana gbe ji ihwo kpo Jọpa re se ọshare ọvo rẹ odẹ rọyen dia Saimọn re ji se Pita. 6 Ọshare nana won asan ri Saimọn, osiophiẹn* rẹ uwevwin rọyen kẹrẹ abadi na.” 7 Ugege rẹ amakashe rọ ta ota kẹ na vwọ yanran nu, o de se idibo rọyen ivẹ kugbe isodje ọvo ro vwo ẹwẹn rẹ ẹga mamọ vwẹ usun rẹ ihwo ri gbodibo kẹ, 8 o de gbikun na ejobi kẹ ayen, o de ji ayen kpo Jọpa.

9 Vwẹ ẹdẹ rọ vwọ kpahọn rẹ ayen vwọ hẹ idjerhe yanran, rẹ ayen vwo siẹkẹrẹ orere na re, Pita de kpo obenu rẹ uwevwin na ra nẹrhovwo vwẹ omarẹ unọke resan.* 10 Ẹkẹvuọvo owẹnvwe ko hwe gangan, kọ guọnọ riemu. Rẹ ayen vwo chere emu na, ọ da mrẹ emramrẹ ọvo, 11 vwevunrẹ emramrẹ na, ọ da mrẹ odjuvwu ro rhiephiyọ kugbe orọnvwọn ọvo* rọ họhọ amwa rode ra vwẹ igogo ẹne rọyen lọrọ cha otọrakpọ na; 12 koka koka rẹ eranvwe ri vwo awọ ẹne vẹ i ri kpono vwẹ otọrakpọ na kugbe emephran rẹ obodjuvwu yen evun rọyen. 13 Urhuru ọvo da ta kẹ nẹ: “Vrẹn Pita, hwe rere wọ re!” 14 Ẹkẹvuọvo Pita da tanẹ: “Ẹjo kakaka, Ọrovwori, kidie me je rhe riemu rẹ ẹgua kugbe ọ ro jẹfuọn dẹvo-o.” 15 Urhuru na da rhoma ta kẹ obọ rivẹ nẹ: “Wo se erọnvwọn rẹ Ọghẹnẹ ru fon nure, emu rẹ ẹgua-a.” 16 Ọnana da phia obọ rerha, ugege yena, e de mu orọnvwọn* na kpo obodjuvwu.

17 Rẹ ẹwẹn ri Pita je vwọ yanghan ku ro vwo roro kpahan oborẹ emramrẹ na se mudiaphiyọ, ihwo rẹ Kọniliọs jiri na da rhe rhe nokpẹn rẹ asan rẹ uwevwin ri Saimọn hepha, ayen de mudia anurhoro na. 18 Ayen da kpare urhuru nọ sẹ Saimọn re se Pita wonphiyọ etiyin. 19 Rẹ Pita ji vwo roro kpahan emramrẹ na, ẹwẹn na da ta kẹ nẹ: “Nighere! Eshare erha nokpẹn wẹn. 20 Ọtiọyena gbe vrẹn, wo wontọ wo nene ayen, wo vwo ẹwẹn ivivẹ kakaka-a, kidie mẹvwẹ yen ji ayen.” 21 Pita de wontọ bru eshare na ra, ọ da tanẹ: “Mẹvwẹ na, ohwo rẹ ovwan guọnọ na. Diesorọ ovwan vwọ rhe?” 22 Ayen da kpahen kẹ nẹ: “Kọniliọs, onotu rẹ isodje, ọvwata rọ je djoshọ rẹ Ọghẹnẹ, rẹ ihwo rẹ ẹgborho ri Ju ejobi nẹ omamọ iyẹnrẹn kpahan, ọyen amakashe ọfuanfon ọvo vwẹ odjekẹ ro nẹ obọ rẹ Ọghẹnẹ rhe vwọ kẹ nẹ o ji avwanre rhi se we rhe uwevwin rọyen, rere o nyo oborẹ wọ cha ta.” 23 Ọtiọyena ọ da tanẹ ayen ro uwevwin, ayen de nene dia kerẹ erhorha.

Vwẹ ẹdẹ rivẹ o de vrẹn o de nene ayen, iniọvo evo rehẹ Jọpa de nene. 24 Vwẹ ẹdẹ rọ vwọ kpahọn ọ da ro evunrẹ Sizaria. Vwọrẹ uyota, Kọniliọs rhẹro rọyen, o ji se ihwo rẹ orua rọyen koko kugbe igbeyan rọyen re kẹrerẹ. 25 Pita vwọ ro uwevwin na, Kọniliọs da ra vwa, o de shiguẹ totọ vwẹ asan awọ rọyen, ọ da vwẹ uyovwin kpotọ kẹ. 26 Ẹkẹvuọvo Pita da kparọ vrẹn rọ vwọ tanẹ: “Vrẹn; mẹvwẹ jẹ ohworakpọ ghevweghe.” 27 Rẹ ayen vwọ ta ota na, ọ da ro evunrẹ uwevwin na, ọ da mrẹ ihwo buebun ri kokori. 28 Ọ da ta kẹ ayen nẹ: “Ovwan nabọ riẹn nẹ ọyen obo re vwọso urhi rẹ ohwo ri Ju vwo nene ohwo rẹ uvwiẹ ọfa ru kugbe yẹrẹ tobọ sikẹrẹ, ẹkẹvuọvo Ọghẹnẹ djere kẹ vwẹ nure nẹ mi se ohwo vuọvo ohwo rẹ ẹgua yẹrẹ ohwo ro jẹfuọ-ọn. 29 Ọtiọyena me rha sen ọke re rhi vwo se vwe-e. Asaọkiephana, me guọnọ riẹn oboresorọ wo vwo ji ihwo rhi se vwe.”

30 Kọniliọs da tanẹ: “Etiyin ẹdẹ ẹne re, e de kere vwo nẹ unọke nana, me vwọ nẹrhovwo vwẹ uwevwin mẹ vwẹ unọke rirhirin,* ọshare ọvo ro ku ewun ro lo phiyọ de mudia obaro mẹ 31 ọ da tanẹ: ‘Kọniliọs, Ọghẹnẹ nyo ẹrhovwo wẹn re, ọ je karophiyọ okẹ rẹ arodọnvwẹ wẹn. 32 Ọtiọyena gbe ji ihwo kpo Jọpa re se Saimọn, re ji se Pita. Ọshare nana won asan ri Saimọn, osiophiẹn* rọ dia kẹrẹ abadi na.’ 33 Ọtiọyena mi de ji ihwo rhi se we kpakpata, wọ da ghene rhe etinẹ fikirẹ ẹwẹn esiri ru wo vwori. Asaọkiephana avwanre eje hẹ obaro rẹ Ọghẹnẹ rere avwanre vwo nyo erọnvwọn eje ri Jihova* vuẹ wẹ nẹ wọ ta.”

34 Ọtiọyena Pita da tuẹn ota ẹta phiyọ, ọ da tanẹ: “Asaọkiephana me rhe riẹn re nẹ Ọghẹnẹ ghwomaphiyọ ẹbẹre ọvo jẹ ọvo vwo-o, 35 ẹkẹvuọvo vwẹ kẹgborho kẹgborho, ohwo rọ djoshọ rọyen ro ji ruẹ obo ri shephiyọ yen o rhiabọreyọ. 36 Ọ vwẹ ovuẹ kẹ ihwo ri Izrẹl nẹ e ghwoghwo iyẹnrẹn esiri rẹ ufuoma rọ herọ womarẹ Jesu Kristi kẹ ayen—ohwo nana yen Ọrovwori rẹ ihwo eje. 37 Ovwan riẹn ota ra tare vwẹ Judia ejobi, rọ tonphiyọ vwo nẹ Galili, ri Jọn vwo ghwoghwo kpahen omaebrophiyame nu: 38 vwọ kpahen Jesu rọ dia ohwo ri Nazarẹt, oborẹ Ọghẹnẹ vwẹ ẹwẹn ọfuanfon jẹreyọ, ọ da je kẹ ẹgba, rọ da yan vwẹ otọ na ejobi ro vwo ruẹ erhuvwu, ji sivwin ihwo eje rẹ Idẹbono shenyẹ, kidie Ọghẹnẹ vẹ ọyen herọ. 39 Avwanre iseri rẹ erọnvwọn ejobi ro ruru vwevunrẹ ẹkuotọ rẹ ihwo ri Ju kugbe Jerusalẹm; ẹkẹvuọvo ayen hwere womarẹ urhe rẹ ayen kanrerọ mu.* 40 Ọghẹnẹ kpare ohwo nana vrẹn vwẹ ẹdẹ rerha, ọ da nẹrhẹ ọ vwomaphia,* 41 ọ dia vwọ kẹ ihwo ejobi-i, ẹkẹvuọvo vwọ kẹ iseri rẹ Ọghẹnẹ vwo mu phiyotọ, vwọ kẹ avwanre ri nenire re je da, ọke ra vwọ kparọ vrẹn vwo nẹ ughwu nu. 42 Vwọba, o jurhi kẹ avwanre nẹ avwanre ghwoghwo kẹ ihwo na rere avwanre ji soseri ro fiotọ nẹ ọnana yen ohwo rẹ Ọghẹnẹ vwo mu nẹ ọ dia oguẹdjọ rẹ ihwo ri yerẹn vẹ ihwo ri ghwuru. 43 Ọyen emraro na ejobi soseri kpahen nẹ kohwo kohwo ro vwo esegbuyota kpahọn, ko vwo evwoghovwo rẹ imwemwu womarẹ odẹ rọyen.”

44 Rẹ Pita je vwọ ta ota kpahan erọnvwọn nana, ẹwẹn na da ro oma rẹ ihwo eje re kerhọ rẹ ota na. 45 O de gbe idibo* re yanvwere ri nene Pita rhe na unu, kidie e ji ku ẹserọphẹ rẹ ẹwẹn ọfuanfon na ku ihwo rẹ ẹgborho na. 46 Kidie ayen nyo ayen re jẹ ejajẹ* ọrhorha ji jiri Ọghẹnẹ. Pita da kpahen nẹ: 47 “O vwo ohwo rọ sa tanẹ e bru ihwo nana phiyame-e, rọ vwọ dianẹ a kẹ ayen ẹwẹn ọfuanfon na kirobo ra je kẹ avwanre na?” 48 Ọtiọyena ọ da tanẹ e bru ayen phiyame vwẹ odẹ ri Jesu Kristi. Ọyena vwọ wan nu ayen da vuẹ nẹ o nene ayen dia ẹdẹ evo.