Jọn

14 Ovwan jẹ ẹwẹn rẹ ovwan kpokpo ovwa-an. Ovwan vwo esegbuyota kpahen Ọghẹnẹ; ovwan ji vwo esegbuyota kpahen ovwẹ. 2 Asan ra dia buebun hẹ evunrẹ uwevwin rẹ Ọsẹ mẹ. Ọ rha dia ọtiọye-en, me rha vuẹ ovwan, kidie me yanran re muegbe rẹ asan kẹ ovwan. 3 Vwọba, ọ da dianẹ me yanran re muegbe rẹ asan kẹ ovwan, me cha rhoma rhe je reyọ ovwan ro uwevwin, rere asan me hepha, ovwan je sa vwọ dia etiyin. 4 Asan me ra, ovwan riẹn idjerhe na.”

5 Tọmọs da ta kẹ nẹ: “Ọrovwori, avwanre riẹn asan wọ ra-a. Kẹ mavọ yen avwanre sa vwọ riẹn idjerhe na?”

6 Jesu da ta kẹ nẹ: “Mẹvwẹ yen idjerhe na kugbe uyota na kugbe arhọ na. O vwo ohwo vuọvo ro se bru Ọsẹ na rhe-e jokpanẹ kọ wan oma mẹ. 7 Ọ da dianẹ ovwan riẹn vwẹ, mane jẹ ovwan je riẹn Ọsẹ na; nẹ ọke nana yanran, ovwan riẹnrẹ, ovwan je mrẹ re.”

8 Filip da ta kẹ nẹ: “Ọrovwori, dje Ọsẹ na kẹ avwanre, ọyena te kẹ avwanre.”

9 Jesu da ta kẹ nẹ: “Vwẹ ọke nana eje ri mi nene ovwan ghwọrọ kugbe na, Filip, wọ je rhe riẹn vwẹ? Kohwo kohwo rọ mrẹ vwẹ je mrẹ Ọsẹ na re. Kẹ diesorọ wọ vwọ tanẹ, ‘Dje Ọsẹ na kẹ avwanre’? 10 Wo rhe segbuyota nẹ mẹ vẹ Ọsẹ na vwo oyerinkugbe, nẹ Ọsẹ na vẹ ovwẹ ji vwo oyerinkugbe? Erọnvwọn re me ta kẹ ovwan na, ọ dia ọhọ robọ mẹ yen me vwọ ta aye-en, ẹkẹvuọvo Ọsẹ na rọ vẹ ovwẹ gbe vwo oyerinkugbe na yen ruiruo rọyen. 11 Se vwe gbuyota nẹ mẹ vẹ Ọsẹ na vwo oyerinkugbe, Ọsẹ na vẹ ovwẹ ji vwo oyerinkugbe; ọ rha dia ọtiọye-en, gbe segbuyota fikirẹ iruo na komobọ. 12 Uyota, uyota me ta kẹ ovwan nẹ, kohwo kohwo ro vwo esegbuyota kpahen ovwẹ ji che ruiruo ri mi ruẹ na; o che ruiruo re rho vrẹ enana, kidie mi brẹ Ọsẹ na ra. 13 Vwọba, kemu kemu rẹ ovwan nọre vwẹ odẹ mẹ, mi che ruo rere a sa vwọ vwẹ urinrin kẹ Ọsẹ na womarẹ Ọmọ na. 14 Korọnvwọn korọnvwọn rẹ ovwan nokpẹn rọyen vwẹ odẹ mẹ, mi che ruo.

15 Ọ da dianẹ ovwan vwo ẹguọnọ mẹ, ovwan cha yọnrọn iji mẹ. 16 Ke me cha nọ mie Ọsẹ na, kọ cha kẹ ovwan ọchuko* ọfa ro che nene ovwan dia bẹdi bẹdẹ, 17 ẹwẹn rẹ uyota na, rẹ akpọ na che se vwo-o, kidie ọ mrẹ-ẹ, ọ je riẹ-ẹn. Ovwan riẹnrẹ kidie ọ vẹ ovwan herọ, ọ jehẹ evunrẹ ovwan. 18 Me cha yanjẹ ovwan vwo vwẹ ẹdia rẹ uvweri-i.* Mi brẹ ovwan cha. 19 Chekemerha akpọ na rha cha mrẹ vwẹ ọfa-a, ẹkẹvuọvo ovwan cha mrẹ vwẹ, kidie nẹ mi yerẹn, ovwan ki ji yerin. 20 Vwẹ ẹdẹ yena, kẹ ovwan cha riẹn nẹ mẹ vẹ Ọsẹ na vwo oyerinkugbe, ovwan vẹ ovwẹ vwo oyerinkugbe, mẹ vẹ ovwan ji vwo oyerinkugbe. 21 Kohwo kohwo ro vwo iji mẹ rọ je yọnrọn ayen, yen ohwo ro vwo ẹguọnọ mẹ. Kohwo kohwo ro vwo ẹguọnọ mẹ, Ọsẹ mẹ che vwo ẹguọnọ rọyen, mi che vwo ẹguọnọ rọyen ji dje oma mẹ kẹ.”

22 Judas, ọ dia Iskariọti-i, da ta kẹ nẹ: “Ọrovwori, die yen phiare wọ vwọ guọnọ dje oma wẹn phia phephẹn kẹ avwanre ukperẹ akpọ na?”

23 Jesu da kpahen kẹ nẹ: “Ọ da dianẹ ohwo vwo ẹguọnọ mẹ, o che ru nene ota mẹ, Ọsẹ mẹ che vwo ẹguọnọ rọyen, avwanre che bro rhe, avwanre mi nene dia. 24 Kohwo kohwo ro vwo ẹguọnọ mẹ-ẹ, ruẹ nene ota mẹ-ẹ. Ota rẹ ovwan nyo na dia ọmẹ-ẹ, ẹkẹvuọvo ọ rẹ Ọsẹ ro ji vwe rhe na.

25 “Me vuẹ ovwan erọnvwọn nana re me vẹ ovwan je vwọ herọ na. 26 Ẹkẹvuọvo ọchuko na, ẹwẹn ọfuanfon na, rẹ Ọsẹ na che ji rhe vwẹ odẹ mẹ na, ọyena che yono ovwan erọnvwọn ejobi je nẹrhẹ ovwan karophiyọ erọnvwọn eje re me vuẹ ovwan. 27 Me yanjẹ ufuoma vwo kẹ ovwan; me kẹ ovwan ufuoma mẹ. Me vwerọ kẹ ovwan vwẹ idjerhe rẹ akpọ na reyọ vwọ kẹ ohwo-o. Ovwan jẹ ẹwẹn rẹ ovwan kpokpo ovwa-an yẹrẹ ovwan djoshọ-ọ. 28 Ovwan nyoro me vwọ ta kẹ ovwan nẹ, ‘Me yanran, mi ji rhivwin brẹ ovwan cha.’ Ọ da dianẹ ovwan vwo ẹguọnọ mẹ, ovwan cha ghọghọ nẹ mi brẹ Ọsẹ na ra, kidie Ọsẹ na rho nọ vwẹ. 29 Ọtiọyena me vuẹ ovwan asaọkiephana tavwen ọ ke phia, rere ovwan se vwo segbuyota ọke rọ da phia. 30 Me rha cha ta ota buebun kẹ ovwan ọfa-a, kidie osun rẹ akpọ na cha, o vwo ogangan vuọvo vwẹ enu mẹ-ẹ. 31 Ẹkẹvuọvo rere akpọ na vwọ riẹn nẹ mi vwo ẹguọnọ rẹ Ọsẹ na, mi ruẹ kirobo rẹ Ọsẹ na ghwe ji iji kẹ vwẹ nẹ mi ru. Ovwan vrẹn rere e nẹ etinẹ.