Luk

5 Vwẹ ọke ọvo rẹ otu na vwo keke, rẹ ayen je vwọ kerhọ rẹ ota rẹ Ọghẹnẹ, jẹ o mudia vwẹ orhoma rẹ ẹtẹrhe ame ri Gẹnẹsarẹt.* 2 Ọ da mrẹ ekọ ivẹ re churu si orhoma rẹ ẹtẹrhe ame na, ẹkẹvuọvo ihwiyerin na vrẹn nẹ evun rayen, kẹ ayen hworhẹ iriri rayen. 3 Rọ vwọ ro ọvo vwẹ usun rẹ ekọ na rọ dia ọ ri Saimọn, ọ da vuẹ nẹ o bi ro evunrẹ abadi na emerha. O de chidia totọ, ko yono otu na, jẹ ọ hẹ evunrẹ okọ na. 4 Ọke rọ vwọ dunuji, ọ da ta kẹ Saimọn nẹ: “Bi kpo asan ro kodori rere ovwan do ariri rẹ ovwan phiyọ, rere o mu iyerin.” 5 Ẹkẹvuọvo Saimọn da kpahen kẹ nẹ: “Oyono, avwanre wianre gangan vwẹ ason na eje, jẹ avwanre mu orọnvwọn vuọvo-o, ẹkẹvuọvo rọ vwọ dianẹ wẹ yen tarọ na, mi che do ariri na phiyọ.” 6 Ọke rẹ ayen vwo ru ọnana, ayen de mu iyerin buebun. Vwọrẹ uyota, ariri rayen na kọ bẹrẹ. 7 Ọtiọyena ayen da vwẹ obọ vwo se irivẹ rayen rehẹ okọ ochekọ na nẹ ayen rhe, rhe cha ayen uko, ayen da rhe, iyerin na da vọn ekọ ivẹ na, te ẹdia rẹ enana ki shuẹ. 8 Rọ vwọ mrẹ ọnana, Saimọn Pita de shiguẹ totọ vwẹ obaro ri Jesu, ọ da tanẹ: “Yanjẹ uvwe vwo, Ọrovwori, kidie mẹvwẹ orumwemwu.” 9 Kidie iyerin rẹ ayen muru na gbe re vẹ ihwo re vẹ ọyen gba herọ unu mamọ, 10 ọtiọyen ọ je hepha vwọ kẹ Jems vẹ Jọn, emọ ri Zẹbẹdi re vẹ Saimọn gba wian kuẹgbe. Ẹkẹvuọvo Jesu da ta kẹ Saimọn nẹ: “Wo rhe jẹ oshọ mu we-e. Nẹ ọke nana yanran, wo che rhe muẹ ihworakpọ ekpokpọ.” 11 Ọtiọyena ayen de bi ekọ na rhivwin rhe otọ, ayen da yanjẹ erọnvwọn eje vwo, ayen de nene.

12 Vwẹ ọke ọfa rọ vwọ hẹ ọvo vwẹ usun rẹ irere na, nighere! ọshare ọvo rọ vọnre vẹ oti hẹ etiyin! Ọke rọ vwọ mrẹ Jesu, o de she bọvwọn opharo rhuotọ, ọ da rẹ nẹ: “Ọrovwori, wọ da guọnọ, wo se ru vwe fon.” 13 Ọtiọyena ọ da rionbọ rọyen phia, o de djobọte, ọ da tanẹ: “Me guọnọre! Gba fon.” Ugege yena oti na da ranvwiẹ nẹ oma rọyen. 14 Ọ da vwẹ iji kẹ ọshare na nẹ ọ vuẹ ohwo vuọvo-o. Ẹkẹvuọvo ọ da ta kẹ nẹ: “Yanran re dje oma wẹn kẹ orherẹn na, wọ vwẹ okẹ vwọ kpahotọ vwọ kẹ orufon rẹ oma wẹn kirobo ri Mosis tare, rọ vwọ dia oseri kẹ ayen.” 15 Ẹkẹvuọvo iyẹnrẹn rọyen kọ hra nene asan eje, otu buebun mi koko rẹ ayen vwọ kerhọ, re ji vwo sivwin ega rayen. 16 Jẹ ọke buebun na, o kpo asan rẹ ohwo vuọvo hepha-a ra nẹrhovwo.

17 Ọke yena, vwẹ ẹdẹ ọvo ro vwo yono, ihwo ri Farisi kugbe iyono rẹ Urhi na ri nẹ kọko kọko ri Galili vẹ Judia kugbe Jerusalẹm rhe chidia etiyin; jẹ Jihova* kẹ rẹ ẹgba ro vwo sivwin ihwo. 18 Nighere! ihwo evo vwẹ ehwa vwo mu ọshare ọvo rọ sa kpara abọ vẹ awọ-ọ, kẹ ayen guọnọ muo ro uwevwin rere ayen muo phiyọ obaro ri Jesu. 19 Ọtiọyena kidie nẹ ayen mrẹ asan vuọvo wan muo ro uwevwi-in fikirẹ otu na, ayen de yerin kpo obenu rẹ uwevwin na, ayen da lọrọ vẹ ehwa na wan erọnvwọn ra vwọ kanre uwevwin na kpotọ ro ohri rẹ ihwo rehẹ obaro ri Jesu. 20 Ọke rọ vwọ mrẹ esegbuyota rayen, ọ da tanẹ: “Ọshare, a vwẹ imwemwu wẹn vwo ghovwo uwe re.” 21 Isiẹbe na vẹ ihwo ri Farisi na ki roro, rẹ ayen vwọ tanẹ: “Ono yen ohwo nana rọ ta eta rẹ ẹgua na? Ono yen sa vwẹ imwemwu vwo ghovwo ohwo jokparẹ Ọghẹnẹ ọvo?” 22 Ẹkẹvuọvo Jesu vwọ mrẹ iroro rayen vughe, ọ da kpahen kẹ ayen nẹ: “Die yen ovwan roro vwevunrẹ ubiudu rẹ ovwan? 23 Ọvọ yen ma lọhọ, ra vwọ tanẹ, ‘A vwẹ imwemwu wẹn vwo ghovwo uwe re,’ gbanẹ ra vwọ tanẹ, ‘Vrẹn rere wọ yan’? 24 Ẹkẹvuọvo rere ovwan vwọ riẹn nẹ Ọmọ rẹ ohwo vwo ogangan vwẹ otọrakpọ na rọ vwọ reyọ imwemwu vwo ghovwo—” ọ da ta kẹ ọshare rọ sa kpara abọ vẹ awọ-ọ na nẹ: “Me ta kẹ wẹ nẹ, Vrẹn, mu ehwa wẹn rere wo kpo uwevwin wẹn.” 25 Ọtiọyena o de vrẹn mudia vwẹ obaro rayen, o de mu orọnvwọn ro sherhẹn phiyọ jovwo na, o de kpo uwevwin rọyen, jẹ ọ vwẹ urinrin kẹ Ọghẹnẹ. 26 Ọtiọyena o de gbe ayen ejobi unu, kẹ ayen vwẹ urinrin kẹ Ọghẹnẹ, oshọ de mu ayen gangan, kẹ ayen tanẹ: “Avwanre mrẹ emu rẹ igbevwunu nonẹna!”

27 Asaọkiephana rẹ ọnana vwọ wan nu, ọ da yanran, ọ da mrẹ ohwo ọvo ro phi osa uyovwin re se Livae ro chidia ọfisi ra da hwosa uyovwin, ọ da ta kẹ nẹ: “Dia odibo mẹ.” 28 Ọ da yanjẹ erọnvwọn ejobi vwo, o de vrẹn, ko nene. 29 Livae de chere emu vọn otọ vwọ kẹ vwẹ uwevwin rọyen, ihwo buebun ri phi osa uyovwin kugbe ihwo efa hẹ etiyin ri nene riemu kuẹgbe.* 30 Ọtiọyena ihwo ri Farisi kugbe isiẹbe rayen ki guẹn, ayen da ta kẹ idibo rọyen nẹ: “Diesorọ ovwan vẹ ihwo ri phi osa uyovwin kugbe irumwemwu vwọ ria je da kuẹgbe?” 31 Jesu da kpahen kẹ ayen nẹ: “Ihwo rẹ oma rayen ganre guọnọ ọbo-o, ẹkẹvuọvo ihwo rẹ oma rayen jẹ gan yen guọnọ ọbo. 32 Me rhere rhi se evwata-a, ẹkẹvuọvo irumwemwu, rere ayen kurhẹriẹ.”

33 Ayen da ta kẹ nẹ: “Idibo ri Jọn chiri owẹnvwe kọke kọke je rẹ orẹ, ọtiọyen ji te e rẹ ihwo ri Farisi na, ẹkẹvuọvo ewẹn ria je da.” 34 Jesu da ta kẹ ayen nẹ: “Ovwan cha sa nẹrhẹ igbeyan rẹ ọshare rẹ ọpha na chiri owẹnvwe rẹ ọshare rẹ ọpha na vẹ ayen je vwọ herọ na-a, gbanẹ ovwan se ru ọtiọyen? 35 Ẹkẹvuọvo vwọrẹ uyota, ọke cha ra cha vwọ reyọ ọshare ọpha na jẹ ayen vwo; ọke yena kẹ ayen che chiri owẹnvwe.”

36 O de ji ru udje ọvo kẹ ayen: “O vwo ohwo vuọvo ro brẹ ẹbẹre amwa nẹ ewun rẹ obotafe kpokpọ, o mi ko phiyọ ewun rẹ awanre-e. O de ru ọtiọyen, ẹbẹre amwa kpokpọ na cha bẹre no, ẹbẹre amwa re bru nẹ ewun kpokpọ na vẹ ọ rẹ awanre na che se shephiyọ-ọ. 37 Vwọba, o vwo ohwo vuọvo ro kuẹ iwaini kpokpọ phiyọ ekpu rẹ iwaini rẹ awanre-e. O de ru ọtiọyen, iwaini kpokpọ na cha bẹre ekpu rẹ iwaini na, iwaini na mi hwẹ kufia, ekpu rẹ iwaini na me je ghwọrọ. 38 Ẹkẹvuọvo ekpu rẹ iwaini kpokpọ yen e kuẹ iwaini kpokpọ phiyọ. 39 O vwo ohwo vuọvo rọ da iwaini rẹ awanre nẹ, ọ me guọnọ ọkpokpọ-ọ, kidie ọ tanẹ, ‘Ọ rẹ awanre na yen yovwirin.’”