Vwo Rhe Ihwo ri Hibru

10 Kidie rọ vwọ dianẹ Urhi na ọyen uhoho rẹ erọnvwọn iyoyovwin re cha, ẹkẹvuọvo ọ dia erọnvwọn na dẹ-ẹn na, ọ* cha sa womarẹ izobo re ze ọkieje kukpe kukpe na, vwo ru ihwo ri brẹ Ọghẹnẹ ra gbagba-a. 2 Ọ rha dia ọtiọyen jovwo-o, mane jẹ a je rhe dobọ rẹ izobo eze na ji? Kidie ihwo re ga ẹga ọfuanfon de ru oma rayen fon obọ ọvo nu, ayen rha cha riẹn obo re se imwemwu ọfa-a. 3 Ukperẹ ọtiọyen, izobo nana ẹkarophiyọ rẹ imwemwu nẹ ukpe ra ro ukpe, 4 kidie ọbara rẹ erhuẹn kugbe ọ rẹ ẹvwe che se si imwemwu no-o.

5 Ọtiọyena ọke rọ vwọ rhe akpọ na, ọ da tanẹ: “‘Wọ guọnọ izobo vẹ okẹ efa-a, ẹkẹvuọvo wo muegbe rẹ ugboma vwọ kẹ vwẹ. 6 Wo rhiabọreyọ izobo rẹ ẹtorhẹ kugbe izobo rẹ umwemwu-u.’ 7 Me da tanẹ: ‘Nighere! Me rhere (vwevunrẹ ukpirhin ọbe na, e siro kpahen ovwẹ) rhi ru ọhọre wẹn, E Ọghẹnẹ.’” 8 Ọke rọ ka vwọ ta nu nẹ: “Wọ guọnọre yẹrẹ wo rhiabọreyọ izobo kugbe okẹ kugbe izobo rẹ ẹtorhẹ kugbe izobo rẹ umwemwu-u nu”—izobo re ze vwo nene Urhi na— 9 ọ da tanẹ: “Nighere! Me rhere rhi ru ọhọre wẹn.” O si obo re dia ọrẹsosuọ na no rere ọ sa vwọ vwẹ ọrivẹ na vwo mu. 10 Womarẹ “ọhọre” nana, e ru avwanre fon womarẹ ugboma ri Jesu Kristi ra vwọ kpahotọ ẹsiẹvo goi.

11 Vwọba, korherẹn korherẹn muẹdia kẹdi kẹdẹ vwọ ga ẹga ọfuanfon* ji ze izobo ọvuọvo na kọke kọke, ro che se si imwemwu no karekare-e. 12 Ẹkẹvuọvo, ọshare nana ze izobo ọvuọvo fikirẹ imwemwu ẹsiẹvo goi, o de chidia obọrhen rẹ Ọghẹnẹ, 13 vwo nẹ ọke yena rhe ọyen ọ vwọ hẹrhẹ bẹsiẹ ra vwọ vwẹ ivwighrẹn rọyen hwotọ* kẹ chiyin. 14 Kidie womarẹ izobo ọvuọvo ro zeri na yen o vwo ru ihwo re ruẹ fuan na gbagba ọkieje. 15 Vwọba, ẹwẹn ọfuanfon na ji soseri kẹ avwanre, kidie ọke rọ vwọ ta nu nẹ: 16 “‘Ọnana yen ọphọ ri mi che nene ayen re ẹdẹ yena da wan nu,’ ọtiọyen Jihova* tare. ‘Mi che phi irhi mẹ phiyọ ubiudu rayen, mi che si ayen phiyọ ẹwẹn rayen.’” 17 Ọ da tanẹ: “Me rha cha karophiyọ imwemwu kugbe irueru ri jurhi ẹyọnrọn rayen ọfa-a.” 18 Asaọkiephana, a da vwẹ erọnvwọn nana vwo ghovwo ohwo nu, e rhe che ze izobo fikirẹ umwemwu-u.

19 Ọtiọyena iniọvo, rọ vwọ dianẹ avwanre vwo uduoyivwin* ra vwọ ro idjerhe ra wan rua asan ọfuanfon na womarẹ ọbara ri Jesu, 20 ro rhiephiyọ* kẹ avwanre kerẹ idjerhe kpokpọ ro suẹn kpo arhọ womarẹ ikọtini na, kọyen, uvwo rọyen, 21 rọ je vwọ dianẹ avwanre vwo orherẹn rode vwẹ enu rẹ uwevwin rẹ Ọghẹnẹ na, 22 e gbe jẹ avwanre bro ra vẹ ubiudu rẹ avwanre eje kugbe esegbuyota ọgbagba, rọ vwọ dianẹ e ru ubiudu rẹ avwanre fon vwo nẹ ẹwẹn obrorhiẹn umwemwu nure, a je vwẹ ame rọ fonro vwọ họ ugboma rẹ avwanre re na. 23 E jẹ avwanre yọnrọn aghwoghwo rẹ azagba rẹ iphiẹrophiyọ rẹ avwanre na kokoroko vwọrẹ jẹ ephieghe, kidie ohwo ro ve ive na fuevun. 24 E jẹ avwanre roro kpahen* ohwohwo, rere e se vwo phi oruru phiyọ ohwohwo oma* re vwo vwo ẹguọnọ, ji ruiruo esiri, 25 e jẹ avwanre kpairoro vrẹ emẹvwa rẹ avwanre kirobo rẹ ihwo evo ruẹ-ẹ, ẹkẹvuọvo e rhe phiuduphiyọ ohwohwo awọ, ma rho rẹ ovwan vwọ mrẹvughe nẹ ẹdẹ na siẹkẹrẹ re na.

26 Kidie ọ da dianẹ avwanre vwẹ arogba vwo ruẹ umwemwu rẹ avwanre vwo vwo erianriẹn ọgbagba rẹ uyota na nure na, o rhe vwo izobo ọfa re che ze fikirẹ imwemwu-u, 27 ẹkẹvuọvo avwanre hẹrhẹ ẹdjọeguo ọvo vẹ oshọ kugbe ophu rọ tuan kerẹ erhanre rọ cha torhẹ ihwo re vwọsua. 28 Kohwo kohwo rọ jẹ Urhi ri Mosis fia, e gbe arodọnvwẹ kẹ-ẹ, e hwe siẹrẹ a da mrẹ iseri ivẹ yẹrẹ erha. 29 Kẹ mavọ yen ovwan rorori nẹ oja ra cha vwọ re ohwo ro chiyin Ọmọ rẹ Ọghẹnẹ na muotọ cha gan te, ohwo rọ vwẹ ẹro ri saka vwo ni ọghanrovwẹ rẹ ọbara rẹ ọphọ na, ra wan oma rọyen vwo ruo fon, rọ je nẹrhẹ ivun miovwo ẹwẹn rẹ ẹse re muwan rọye-en na fikirẹ uruemu rẹ ọjẹfia rọyen? 30 Kidie avwanre riẹn Ohwo rọ tare nẹ: “Orukeri* ọmẹ; mẹvwẹ yen cha hwosa.” Ọ da je ta: “Jihova* che guẹdjọ rẹ ihwo rọyen.” 31 Ọyen emu rẹ imuoshọ re vwo she phiyọ obọ rẹ Ọghẹnẹ ro jeghwo na.

32 Ẹkẹvuọvo, ovwan rha karophiyọ ẹdẹ re wanre, ọke rẹ ovwan vwọ mrẹ urhukpẹ na nu, ovwan de chirakon rẹ erọnvwọn buebun dede nẹ ovwan rhiẹromrẹ ojaẹriọ. 33 Vwẹ ọke evo, a hanrhe ovwan, ovwan ji rhiẹromrẹ ukpokpogho vwẹ azagba, vwẹ ọke efa, ovwan mudia cha ihwo ri rhiẹromrẹ oka rẹ erọnvwọn tiọyena. 34 Kidie ovwan gbe arodọnvwẹ kẹ* ihwo rehẹ evunrẹ uwodi, oma je vwerhen ovwan ọke re vwo gborho ekuakua rẹ ovwan, kidie ovwan riẹnre nẹ ovwan komobọ vwo ekuakua ri yovwin vrẹ eyena re je cha tọn.

35 Ọtiọyena, ovwan siobọnẹ uduoyivwin* rẹ ovwan ra cha vwẹ fiki rọyen hwosa kẹ ovwan vọnvọn na-a. 36 Kidie ovwan guọnọ akoechiro rere ọke rẹ ovwan de ru ọhọre rẹ Ọghẹnẹ nu, ovwan sa vwọ mrẹ orugba rẹ ive na. 37 Kidie “ọmọke krẹn” yen chekọ “ohwo rọ cha na kọ cha rhe, o che hwọke-e.” 38 “Ẹkẹvuọvo odibo mẹ rọ dia ọvwata cha rhọ womarẹ esegbuyota,” “o de si kpuko, oma rọyen cha vwerhen ovwẹ-ẹ.”* 39 Asaọkiephana, avwanre dia ihwo ri siẹ kpuko vwo kpo oghwọrọ-ọ, ẹkẹvuọvo ihwo ri vwo esegbuyota rọ cha nẹrhẹ e sivwin arhọ* rẹ avwanre.