Matiu

22 Obọfa Jesu da vwẹ idje vwọ ta ota kẹ ayen, ọ da tanẹ: 2 “A sa vwẹ Uvie rẹ idjuvwu na vwo dje ovie ọvo ro muegbe rẹ udemu rode fikirẹ orọnvwe rẹ ọmọ rọyen. 3 O de ji idibo rọyen re se ihwo re durhieri vwọ kẹ udemu rẹ orọnvwe na, ẹkẹvuọvo ayen rhọnvwe rhe-e. 4 Ọ da rhoma ji idibo efa nẹ, ‘Ovwan ta kẹ ihwo re durhieri na nẹ: “Nighere! mi muegbe rẹ emu ovwọnvwọn mẹ nure, mi hwe erhuẹn mẹ kugbe eranvwe re pha tubie tubie, erọnvwọn eje choma re. Ovwan yanrhe udemu rẹ orọnvwe na.” 5 Ẹkẹvuọvo ayen davwerhọ-ọ, ayen da yanran, ọvo kpo udju rọyen, ọfa de rhe kpo eki rọyen; 6 ẹkẹvuọvo i ri chekọ na de shabọ phiyọ idibo na, ayen de gboja kẹ ayen, ayen de hwe ayen.

7 “Ophu de mu ovie na gangan, o de ji isodje rọyen yanran re hwe izighẹ na je torhẹ orere rayen. 8 Ọ da ta kẹ idibo rọyen nẹ, ‘E muegbe rẹ udemu rẹ orọnvwe na re, ẹkẹvuọvo ihwo re durhieri na muwa-an. 9 Ọtiọyena, ovwan kpo idjerhe ra wan nẹ orere na, rere ovwan durhie kohwo kohwo rẹ ovwan mrẹre vwọ rhe udemu rẹ orọnvwe na.’ 10 Ọtiọyena, idibo na de kpo idjerhe na, ayen de koko ihwo eje rẹ ayen mrẹre, te ihwo ebrabra te ihwo esiri; uvun re de ruẹ irueru rẹ orọnvwe na da rhe vọn vẹ ihwo re riemu.*

11 “Ọke rẹ ovie na vwọ rhe rhi ni erhorha na, ọ da mrẹ ọshare ọvo ro ku ewun rẹ orọnvwe phiyọ-ọ. 12 Ọtiọyena ọ da ta kẹ nẹ, ‘Oko, mavọ wọ sa vwọ ro etinẹ jẹ wo ku ewun rẹ orọnvwe phiyọ-ọ?’ Ọ sa kpahen ota vuọvo-o. 13 Ọtiọyena ovie na da ta kẹ idibo rọyen nẹ, ‘Ovwan gba abọ vẹ awọ rọyen, rere ovwan do phiyọ otafe vwevunrẹ ebri. Etiyin kọyen ọ da cha rha viẹ je ria akon rọyen.’

14 “Kidie ihwo buebun yen e durhieri, ẹkẹvuọvo imihwo krẹn yen a sanere.”

15 Ọyena vwọ wan nu, ihwo ri Farisi na da yanran ra jiroro kugbe rere ayen sa vwọ vwẹ ota rọyen vwọ yọnrọn. 16 Ọtiọyena ayen de ji idibo rayen kugbe otu ri nene Hẹrọd bro ra, ayen da tanẹ: “Oyono, avwanre riẹnre nẹ wẹwẹ ohwo rẹ uyota, wo ji yono idjerhe rẹ Ọghẹnẹ vwọrẹ uyota, wọ guọnọ ẹroesiri rẹ ohwo vuọvo-o, kidie ọ dia oborẹ ihwo hepha vwẹ otafe yen wo nẹ-ẹ. 17 Ọtiọyena gba vuẹ avwanre, die wo rorori? Urhi rhọnvwere nẹ a hwosa uyovwin kẹ Siza gbanẹ ọ rhọnvwere-e?* 18 Ẹkẹvuọvo rọ vwọ dianẹ Jesu riẹn evun umwemwu rayen na, ọ da tanẹ: “Diesorọ ovwan vwọ davwan ovwẹ nẹ, ihwo rẹ omeru na? 19 Ovwan dje igho ra vwọ hwosa uyovwin na kẹ vwẹ.” Ayen da vwẹ idinarọs* ọvo kẹ. 20 Ọ da ta kẹ ayen nẹ: “Ọnana uhoho kugbe isiesi rẹ ono?” 21 Ayen da tanẹ: “I ri Siza.” Ọ da ta kẹ ayen nẹ: “Ọtiọyena ovwan hwa erọnvwọn ri Siza vwọ kẹ Siza, ẹkẹvuọvo erọnvwọn rẹ Ọghẹnẹ vwọ kẹ Ọghẹnẹ.” 22 Ayen vwo nyo ọyena, o de gbe ayen unu, ayen da yan jovwo, ayen da yanran.

23 Vwẹ ẹdẹ yena, ihwo ri Sadiusi na re tanẹ evrẹnushi herọ-ọ, da rhe rhe nọ nẹ: 24 “Oyono, Mosis tare nẹ: “Ọ da dianẹ ọshare ghwuru jẹ o vwiẹ emọ-ọ, oniọvo rọyen kọ rọvwọn aye rọyen rere o se vwo vwiẹ emọ kẹ oniọvo rọyen na.’ 25 Asaọkiephana o vwo iniọvo ighwrẹn re vẹ avwanre gba herọ jovwo. Ọrẹsosuọ na rọvwọnre o de ghwu, jẹ o vwiẹ ọmọ vuọvo-o, ọ da yanjẹ aye rọyen vwo kẹ oniọvo rọyen. 26 Orọnvwọn vuọvo yena yen je phia kẹ ọrivẹ vẹ ọrerha, re te ọrighwrẹn na. 27 Ukuotọ rọyen eje, aye na de ghwu. 28 Ọtiọyena vwevunrẹ evrẹnushi na, aye rẹ ono yen ọ cha dia vwẹ usun rẹ ighwrẹn na? Kidie ayen eje vwiro ru aye.”

29 Jesu da kpahen kẹ ayen nẹ: “Ovwan roriro chọ, kidie ovwan riẹn Isiesi Ọfuanfon na yẹrẹ ẹgba rẹ Ọghẹnẹ-ẹ; 30 kidie vwevunrẹ evrẹnushi na, eshare rọvwọ-ọn, a je vwẹ eya kpo orọnvwe-e, ẹkẹvuọvo ayen pha kerẹ emekashe rehẹ obodjuvwu. 31 Vwọ kpahen evrẹnushi rẹ ihwo ri ghwuru na, ovwan ji rhi se oborẹ Ọghẹnẹ ta kẹ ovwan, ohwo rọ tare nẹ: 32 ‘Mẹvwẹ Ọghẹnẹ rẹ Ebraham, Ọghẹnẹ rẹ Aizik kugbe Ọghẹnẹ ri Jekọp’? Ọyen Ọghẹnẹ, ọ dia ọ rẹ ihwo ri ghwuru-u, ẹkẹvuọvo ọ rẹ ihwo ri yerẹn.” 33 Otu na vwo nyo ọyena, uyono rọyen de gbe ayen unu.

34 Ọke rẹ ihwo ri Farisi na vwo nyo nẹ ọ nọ ihwo ri Sadiusi na she, ayen de siomakoko kerẹ ẹko ọvo. 35 Ọvo vwẹ usun rayen rọ nabọ riẹn Urhi na, da davwọn ni rọ vwọ nọ nẹ: 36 “Oyono, iji vọ yen ma rho kparobọ vwevunrẹ Urhi na?” 37 Ọ da ta kẹ nẹ: “Vwo ẹguọnọ ri Jihova* Ọghẹnẹ wẹn vẹ ubiudu wẹn eje kugbe erhi* wẹn eje kugbe iroro wẹn eje.’ 38 Ọnana yen iji rẹsosuọ na rọ je ma rho kparobọ. 39 Ọrivẹ rọ je họhọ kẹ ọna: ‘Vwo ẹguọnọ rẹ ọrivẹ wẹn kirobo wo vwo ẹguọnọ rẹ oma wẹn.’ 40 Iji ivẹ nana yen a vwẹ Urhi na eje kugbe Emraro na vwọ ya.”

41 Asaọkiephana rẹ ihwo ri Farisi na vwo siomakoko, Jesu da nọ ayen nẹ: 42 “Die yen ovwan rorori kpahen Kristi na? Ọmọ rẹ ono yen o ruẹ? Ayen da ta kẹ nẹ: “Ọmọ ri Devid.” 43 Ọ da nọ ayen nẹ: “Kẹ diesorọ ẹwẹn ọfuanfon na vwo mu Devid vwo se Ọrovwori, rọ vwọ tanẹ, 44 Jihova* ta kẹ Ọrovwovwe nẹ: “Chidia obọrhen mẹ bẹsiẹ mi vwo phi ivwighrẹn wẹn phiyọ obotọ awọ wẹn”’? 45 Ọ da dianẹ Devid sere Ọrovwori, kẹ mavọ yen ọ vwọ dia ọmọ rọyen?” 46 O vwo ohwo vuọvo rọ mrẹ ota kpahen kẹ-ẹ, nẹ ẹdẹ yena yanran, ohwo vuọvo rhe yivwin nọ onọ ọfa-a.