Ọrẹsosuọ ri Jud

1 Jud, odibo ri Jesu Kristi, rọ je dia oniọvo ri Jems, vwo rhe ihwo re seri na, rẹ Ọghẹnẹ rọ dia Ọsẹ na vwo ẹguọnọ kpahen, rọ je sẹro rayen hẹrhẹ Jesu Kristi:

2 E jẹ arodọnvwẹ, ufuoma kugbe ẹguọnọ bunphiyọ kẹ ovwan.

3 Iniọvo eghanghanre, dede nẹ me davwẹngba mẹ eje mi vwo si rhe ovwan kpahen usivwin rẹ avwanre vwo kugbe, mi niro nẹ ofori mi vwo si rhe ovwan vwo jiro kẹ ovwan nẹ ovwan họnre gangan vwọ kẹ esegbuyota ra vwọ kẹ ihwo efuanfon na ẹsiẹvo goi na. 4 Kidie ihwo evo bẹbẹ ro ohri rẹ ovwan, Isiesi Ọfuanfon na tarọ phiyotọ rhabae nẹ ayen che rhiẹromrẹ ẹdjọeguo nana; ayen irumwemwu re rhẹriẹ ẹse rẹ Ọghẹnẹ rẹ avwanre re muwan rọye-en phiyọ uphẹn rẹ ayen vwo vwobọ vwẹ uruemu ra ghẹmrẹ,* ayen je sen Jesu Kristi rọ dia onini kugbe Ọrovwavwanre.

5 Dede nẹ ovwan nabọ riẹn enana eje, jẹ me guọnọ karophiyọ ovwan nẹ Jihova* vwo sivwin ihwo rọyen nẹ evunrẹ otọ rẹ Ijipt nu, ọ da ghwọrọ otu ri dje esegbuyota phia-a vwẹ ukuko na. 6 Vwọ kpahen emekashe re daji ẹdia raye-en re je yanjẹ asan ro fori nẹ ayen dia vwo, ọ vwẹ ejọnrọn ri bẹdẹ vwọ kanre ayen phiyọ ebri hwi bẹsiẹ ẹdẹ rode rẹ ẹdjọeguo na vwo te. 7 Idjerhe vuọvo na yen Sodọm vẹ Gomora kugbe irere re riariẹ ayen phiyọ ji vwo muomaphiyọ ọfanrhiẹn* rọ vrẹka kugbe urhurusivwe rẹ ugboma ra ghẹmrẹ; e phi ayen phiyọ obaro rẹ avwanre kerẹ udje rẹ orhọesio womarẹ ẹdjọeguo rẹ erhanre ri bẹdẹ rẹ ayen rioja rọyen.

8 Dedena ihwo nana je vwẹ ẹwẹn roro* obo re brare ọkieje, ayen gbe ugboma na ẹgua, muọghọ kẹ usuo-on, je ta eta ebrabra kpahen ihwo ri vwo urinrin. 9 Ẹkẹvuọvo, ọke ri Maikẹl, onotu rẹ emekashe na vẹ Idẹbono vwọ wẹnẹ eta je phraphro kpahen ugboma ri Mosis, o yivwin vwẹ eta rẹ ekan vwo bru hwe-e, ukperẹ ọtiọyen, ọ da tanẹ: “E jẹ Jihova* ghwọku we.” 10 Jẹ ihwo nana ta erharhe eta kpahen erọnvwọn eje rẹ ayen ghwe vwo ẹruọ rọye-en. Ayen gbe oma rayen ẹgua vwẹ erọnvwọn eje rẹ ayen vwẹ eroma rayen vwọ riẹn kerẹ eranvwe ri vwo ọhọ-ọ.

11 Ọ bra kẹ ayen mamọ, kidie ayen nene idjerhe ri Ken, ayen je họrhọ ro idjerhe ọchọchọ ri Balaam fikirẹ osaẹhwa, ayen da ghwọrọ kidie ayen ta eta rẹ ẹvwọsuọ kerẹ Kora! 12 Enana yen ikuta ri siomanu vwẹ obotọ rẹ ame vwẹ erẹ rẹ ẹguọnọ rẹ ovwan vwẹ ọke rẹ ayen vẹ ovwan vwọ ria orẹ, isuigodẹ re ghẹrẹ oma rayen ọvo jẹ oshọ mu aye-en; evwru ri vwo ame-e rẹ odju muẹcha muẹkpo; irhe ri jẹ ẹmọ vwẹ ọke ororo, ri ghwuru karekare* re ji ghwie re; 13 ọgbogho ọgangan rẹ abadi ro gbe iphughẹ rẹ omaẹvuọ rayen phia; isio ri beghe; ayen cha dia evunrẹ ebri hwi bẹdẹ.

14 E, Inọk rọ dia ohwo righwrẹn vwẹ uvwiẹ rẹ Adam, je mraro kpahen ayen ọke rọ vwọ tanẹ: “Nighere! Jihova* rhere vẹ ihwo efuanfon rọyen uri mane uri* 15 rọ vwọ reyọ ihwo ejobi vwo guẹdjọ, o mi ji bru hwe irumwemwu na eje fikirẹ orharhe rẹ uruemu rayen kugbe eta ebrabra rẹ irumwemwu na ta kpahọn.”

16 Ihwo nana guẹn hunhunhun, ayen brenu kpahan akpeyeren rayen, ayen nene ojevwe romobọ rayen, ayen je vwẹ unu rayen vwọ ta eta rẹ omaẹyan, jẹ ayen jiri* ihwo efa fikirẹ erere romobọ rayen.

17 Vwọ kẹ ovwan, iniọvo eghanghanre, ovwan karophiyọ oborẹ iyinkọn rẹ Ọrovwavwanre Jesu Kristi tare jovwo,* 18 rẹ ayen vwọ ta kẹ ovwan nẹ: “Vwẹ ọke rẹ oba na, ihwo re reyọ ihwo vwọ jehwẹ cha rhe, ri che nene urhurusivwe robọ rayen vwọ kẹ umwemwu eruo.” 19 Enana yen ihwo re sua ohẹriẹ, ri ruẹ kerẹ eranvwe,* ri vwo ẹwẹn rẹ Ọghẹnẹ-ẹ. 20 Ẹkẹvuọvo iniọvo eghanghanre, ovwan bọn oma rẹ ovwan gan vwevunrẹ esegbuyota rẹ ovwan rọ ma fon na, ovwan je nẹrhovwo womarẹ ukẹcha rẹ ẹwẹn ọfuanfon na, 21 rere ovwan sa vwọ sẹro rẹ oma rẹ ovwan vwevunrẹ ẹguọnọ rẹ Ọghẹnẹ, rẹ ovwan vwọ hẹrhẹ arodọnvwẹ rẹ Ọrovwavwanre Jesu Kristi ro suẹn kpo arhọ ri bẹdẹ. 22 Vwọba, ovwan rhe gbe arodọnvwẹ kẹ ihwo evo ri vwo ẹwẹn ivivẹ; 23 ovwan sivwin ayen womarẹ ovwan vwo frẹ ayen nẹ erhanre. Ẹkẹvuọvo we rhe gbe arodọnvwẹ kẹ ihwo efa, we ru ọnana vẹ oshọ, ovwan mi ji vwo utuoma kpahen ewun rẹ ugboma na gbe ku.

24 Asaọkiephana, vwọ kẹ ohwo rọ sa sẹro rẹ ovwan vwo nẹ ekprowọ, rọ je sa nẹrhẹ ovwan jẹ upe evwo vwẹ obaro rẹ urinrin rọyen vẹ aghọghọ rode, 25 vwọ kẹ Ọghẹnẹ ọvuọvo na, Osivwin rẹ avwanre womarẹ Jesu Kristi Ọrovwavwanre, e jẹ urinrin, ọrho, ẹgba kugbe ogangan eje dia erọyen vwo nẹ awanre rhe rhi duvwun ọke nana, rhirin bẹdi bẹdẹ. Isẹ.