Luk

23 Ọtiọyena ihwo na eje re pha buebun na de vrẹn, ayen da reyọ bru Pailet ra. 2 Kẹ ayen guẹn nyẹ nẹ: “Avwanre mrẹ ọshare nana rọ bọvwọn ẹgborho rẹ avwanre rhuotọ, ọ tanẹ a hwosa uyovwin kẹ Siza-a, o ji se oma rọyen Kristi, ovie.” 3 Asaọkiephana Pailet da nọ nẹ: “Wẹwẹ yen Ovie rẹ ihwo ri Ju na?” Ọ da kpahen kẹ nẹ: “Wẹwẹ komobọ yen ta na.” 4 Pailet da ta kẹ irherẹn ride na kugbe otu na nẹ: “Me mrẹ asan vuọvo rẹ ọshare nana da churhi-i.” 5 Ẹkẹvuọvo ayen rhọnvwere-e, kẹ ayen tanẹ: “Ọ kpara ophu rẹ ihwo na, ro vwo yono vwẹ Judia ejobi, nẹ Galili rhi te etinẹ na dede.” 6 Ro vwo nyo ọyena, Pailet da nọ ayen sẹ ọshare na ohwo ri Galili. 7 Rọ vwọ mrẹvughe nẹ otọ rẹ usuon ri Hẹrọd yen ọ hepha, ọ da tanẹ a reyọ bru Hẹrọd ra, Hẹrọd jehẹ evunrẹ Jerusalẹm vwẹ ọke yena.

8 Ọke ri Hẹrọd vwọ mrẹ Jesu, ọ da ghọghọ gangan. O kriri mamọ re rọ vwọ guọnọ mrẹ Jesu, kidie o nyo erọnvwọn buebun kpahọn re, ọ je rhẹro rọyen nẹ ọyen cha mrẹ eka evo ro che ru. 9 Ọtiọyena ọ da ghwọrọ ọke vwọ nọ enọ, ẹkẹvuọvo ọ kpahen ota vuọvo-o. 10 Ẹkẹvuọvo, irherẹn ride na kugbe isiẹbe na ki dje evrevrẹn rẹ ayen vwo guẹn nyẹ vẹ ophu. 11 Hẹrọd vẹ isodje rọyen da jẹfia, ọ da je reyọ vwọ jehwẹ ro vwo ku ewun oyoyovwin phiyọ, ọ da tanẹ a reyọ rhivwin bru Pailet ra. 12 Hẹrọd vẹ Pailet da rhe dia igbeyan vwẹ ẹdẹ yena, kidie tavwen a ke rhe mrẹ ẹdẹ yena ayen ihwo ivẹ na ivwighrẹn.

13 Pailet de se irherẹn ride na, isun na kugbe ihwo na koko 14 ọ da ta kẹ ayen nẹ: “Ovwan mu ọshare nana rhe vwe kerẹ ohwo rọ nẹrhẹ ihwo na gbe vwọsua. Asaọkiephana nighere! me fuẹrerẹn vwẹ obaro rẹ ovwan, ẹkẹvuọvo me mrẹ ọvuọvo vwẹ usun rẹ erọnvwọn rẹ ovwan guẹn nyẹ ọshare nana vwẹ obọ rọye-en. 15 Vwọrẹ uyota, Hẹrọd dede je mrẹ ọvuọvo-o, kidie ọ tare nẹ a reyọ rhivwin bru avwanre rhe, nighere! o ru orọnvwọn vuọvo ro fo ughwu-u. 16 Ọtiọyena mi che gboja kẹ, rere mi siobọno.” 17 *⁠—— 18 Ẹkẹvuọvo otu na ejobi de kperi phia nẹ: “Hwe ọshare nana,* wo siobọnẹ Barabas kẹ avwanre!” 19 (E mu ọshare nana phiyọ uwodi fikirẹ ẹvwọsuọ rẹ usuon rọ phiare vwevunrẹ orere na kugbe fikirẹ ozighẹ-ẹdẹ.) 20 Pailet da rhoma kpare urhuru vwọ ta ota kẹ ayen, kidie ọ guọnọ siobọnu Jesu. 21 Kẹ ayen kperẹ nẹ: “Kanrọ mu urhe! Kanrọ mu urhe!”* 22 Ọ rẹ obọ rerha, ọ da ta kẹ ayen nẹ: “Diesorọ? Emu ọbrabra vọ yen ọshare nana ruru? Me mrẹ orọnvwọn vuọvo ro fo ughwu vwẹ oma rọye-en; ọtiọyena mi che gboja kẹ, rere mi siobọno.” 23 Ayen rhọnvwere-e, kẹ ayen kperẹ vẹ urhuru ọgangan nẹ e hwe,* urhuru rayen de phikparobọ. 24 Ọtiọyena Pailet de brorhiẹn nẹ e ru oborẹ ayen guọnọre na. 25 O de siobọnu ọshare rẹ ayen guọnọre na, ohwo re mu phiyọ uwodi fikirẹ usuon ro gbe vwọso kugbe ozighẹ-ẹdẹ, ẹkẹvuọvo ọ da vwẹ Jesu kpahotọ vwo nene ọhọre rayen.

26 Asaọkiephana rẹ ayen vwọ reyọ yanran, ayen de shabọ phiyọ Saimọn, ohwo ri Sairini, ro nẹ ọko ọvo cha, ayen de mu urhe rẹ oja* na kẹ nẹ o muo nene Jesu. 27 Ihwo buebun nene, ọtiọyen ji te eya re ghwiẹ oma rayen vwọrẹ uvweri, je viẹ gangan fiki rọyen. 28 Jesu de kuomarhẹriẹ ni eya na, ọ da tanẹ: “Emetẹ ri Jerusalẹm, ovwan rha viẹ fiki mẹ-ẹ, ukperẹ ọtiọyen, ovwan viẹ fikirẹ oma rẹ ovwan kugbe emọ rẹ ovwan; 29 kidie nighere! ọke cha rẹ ihwo cha vwọ tanẹ, ‘Omavwerhovwẹn dia vwọ kẹ eya re dia ẹgan, evun ri vwiẹ emọ-ọ kugbe ivie re vieri-i!’ 30 Ọke yena, kẹ ayen cha ta kẹ igbenu na nẹ, ‘She rhurhu avwanre!’ vwọ kẹ igbenu itete na nẹ, ‘Rhurhu avwanre muotọ!’ 31 Ayen de ru erọnvwọn nana ọke rẹ urhe na vwọ hẹ ọkpokpọ, kẹ die yen cha phia ọke ro de ghwu?”

32 A je reyọ eshare ivẹ efa re dia iji nene re hwe. 33 Ayen vwo te asan re se Ekpehruyovwin, ayen da kanrọ mu urhe vwẹ etiyin kẹrẹ iji na, ọvo hẹ obọrhen rọyen, ọ ro chekọ hẹ obohwẹre rọyen. 34 Ẹkẹvuọvo Jesu kọ tanẹ: “Ọsẹ, vwo ghovwo ayen kidie ayen riẹn oborẹ ayen ruẹ-ẹ.” Vwọba, ayen de duvwun itẹ vwọ ghare iwun rọyen. 35 Jẹ ihwo na mudia rẹ ayen vwo no. Ẹkẹvuọvo isun na ke reyọ vwọ jehwẹ, jẹ ayen tanẹ: “O sivwin ihwo efa; e jẹ o sivwin oma rọyen ọ da dianẹ ọyen Kristi rẹ Ọghẹnẹ na, Ọ ra Jẹreyọ na.” 36 Isodje na dede je reyọ vwọ jehwẹ, rẹ ayen vwọ rhe rhe vwẹ iwaini rọ fiunu vwọ kẹ 37 ayen da tanẹ: “Ọ da dianẹ wẹwẹ yen Ovie rẹ ihwo ri Ju na, gbe sivwin oma wẹn.” 38 E ji si eta nana phiyọ obenu rẹ uyovwin rọyen: “Ọnana yen Ovie rẹ ihwo ri Ju na.”

39 Ọvo vwẹ usun rẹ iji ra kanre mu irhe vwẹ etiyin kọ hanrhọ rọ vwọ tanẹ: “Wẹwẹ yen Kristi na, ọ dia ọtiọyen? Gbe sivwin oma wẹn, wo ji sivwin avwanre!” 40 Ọ ro chekọ na da ghwọkuo rọ vwọ tanẹ: “Wọ djoshọ rẹ Ọghẹnẹ kakaka-a, enẹna rọ vwọ dianẹ orhiẹn vuọvo yen e bru hwe we vẹ ọyen na? 41 Orhiẹn re bru hwe avwanre na gbare, kidie obo ri fo kẹ avwanre fikirẹ erọnvwọn rẹ avwanre ruru yen avwanre reyọ osa rọyen na; ẹkẹvuọvo ọshare nana ru orọnvwọn vuọvo rọ chọre-e.” 42 Ọ da tanẹ: “Jesu, karophiyọ ovwẹ ọke wọ da ro Uvie wẹn.” 43 Ọ da ta kẹ nẹ: “Uyota me ta kẹ wẹ nonẹna, mẹ vẹ owẹ cha dia vwẹ Iparadaisi.”

44 Asaọkiephana ọke hẹ omarẹ unọke resan,* dedena okuku de she rhurhu otọ na eje re te unọke rirhirin,* 45 kidie ọnre na vwẹ elo phia-a; ikọtini rẹ asan ọfuanfon na da bẹre totọ vwẹ uherevie. 46 Jesu de kperi phia vẹ urhuru ọgangan, ọ da tanẹ: “Ọsẹ, obọ wẹn yen mi phi ẹwẹn mẹ phiyọ.” Rọ vwọ ta ọnana nu, o de ghwu.* 47 Kidie nẹ ọ mrẹ obo re phiare na, onotu rẹ isodje na kọ vwẹ urinrin kẹ Ọghẹnẹ, rọ vwọ tanẹ: “Vwọrẹ uyota, ọshare nana ọvwata.” 48 Ọke rẹ otu na eje ri kokori vwẹ etiyin vwọ kẹ ughe nana vwọ mrẹ erọnvwọn re phiare na, ayen de rhivwin kpo uwevwin rayen, jẹ ayen teyan udu rayen. 49 Jẹ ihwo eje ri vughire mudia ugboko. Vwọba, eya ri nenire nẹ Galili rhe hẹ etiyin, ayen mrẹ erọnvwọn nana.

50 Nighere! o vwo ọshare ọvo re se Josẹf, ọvo vwẹ usun rẹ Ediaguare* na, ọyen ohwo esiri kugbe ọvwata. 51 (Ọshare nana vwobọ vwẹ ero rayen kugbe oborẹ ayen ruru na-a.) Ọyen ohwo rẹ Arimatia, orere rẹ ihwo ri Judia, ọ hẹrhẹ Uvie rẹ Ọghẹnẹ na. 52 Ọshare nana bru Pailet ra, ọ da ra nokpẹn rẹ ugboma ri Jesu. 53 O de muo wontọ, ọ da vwẹ amwa oyoyovwin vwọ pharọ, o de muo phiyọ ushi* ọvo ra kare phiyọ evunrẹ oragha, asan re ji mu* ohwo phiyọ dẹvo-o. 54 Asaọkiephana ọyen ẹdẹ rẹ Egbemuo, Ẹdẹ Urovwoma na guọnọ tuanphiyọ re. 55 Ẹkẹvuọvo eya re vẹ ọyen gbe nẹ Galili rhe de nene, ayen de ni ushi* na, ayen da mrẹ obo ra hwa ugboma rọyen phiyọ wan, 56 ayen de rhivwin re muegbe rẹ erọnvwọn ri gbon phanphanphan* kugbe iri ri gbon phanphanphan. Ẹkẹvuọvo vwọrẹ uyota, ayen rovwoma vwẹ Ẹdẹ Urovwoma na kirobo rẹ iji na hepha.