Luk

12 Vwẹ uvwre ọke yena, ọke rẹ otu rẹ ihwo uriorin buebun vwo siomakoko te ẹdia rẹ ayen vwo chiyin ohwohwo, ọ da ton ota ẹta phiyọ rọ ka vwọ ta kẹ idibo rọyen nẹ: “Ovwan nomaso kpahen iphuephu rẹ ihwo ri Farisi na, rọ dia omeru. 2 Ẹkẹvuọvo o vwo orọnvwọn vuọvo ra nabọ sinu re che je djephia-a, o ji vwo orọnvwọn vuọvo rọ djahenre re che jẹriẹ-ẹn. 3 Ọtiọyena kemu kemu rẹ ovwan tare vwevunrẹ ebri, e che nyo vwẹ aruphẹn, oborẹ ovwan dje phiyọ ohwo orhọ vwẹ ivun rẹ ovwan, e che ghwoghwo vwo nẹ enu rẹ iwevwin na rhe. 4 Vwọba, me ta kẹ ovwan igbeyan mẹ nẹ, ovwan djoshọ rẹ ihwo ri hwe ugboma na, ẹkẹvuọvo ayen rhe che se ru orọnvwọn ọfa ọke rẹ ayen de ru ọtiọyen nu-u. 5 Ẹkẹvuọvo mi che dje ohwo rẹ ovwan djoshọ rọyen kẹ ovwan: Ovwan djoshọ rẹ Ohwo ro vwo ogangan ro vwo do phiyọ Gehina* ọke ro de hwe nu. E, me ta kẹ ovwan nẹ, ovwan djoshọ rẹ Ohwo nana. 6 Igho itete ivẹ* ri te emuọvo-o yen a shẹ igue iyorin, gbanẹ ọ dia ọtiọyen? Dedena o vwo ọvuọvo vwẹ usun rayen rọ chọrọ Ọghẹnẹ ẹro-o.* 7 Ẹkẹvuọvo ẹton rẹ uyovwin rẹ ovwan dede, e kere ayen ejobi. Ovwan djoshọ-ọ; ovwan ghanre vrẹ igue buebun.

8 “Me ta kẹ ovwan nẹ, kohwo kohwo rọ rhọnvwere nẹ ọyen vughe uvwe vwẹ obaro rẹ ihworakpọ, Ọmọ rẹ ohwo je cha rhọnvwe vwẹ obaro rẹ emekashe rẹ Ọghẹnẹ nẹ ọyen vughire. 9 Ẹkẹvuọvo kohwo kohwo rọ sen vwẹ vwẹ obaro rẹ ihworakpọ, a je cha siọn vwẹ obaro rẹ emekashe rẹ Ọghẹnẹ. 10 Kohwo kohwo rọ ta ota vwọso Ọmọ rẹ ohwo, e che vwo ghovwo, ẹkẹvuọvo kohwo kohwo rọ ta ota rẹ ẹgua vwọso ẹwẹn ọfuanfon na, e che vwo ghovwo-o. 11 Ọke ra da reyọ ovwan kpo obaro rẹ ọghwẹgbe,* obaro rẹ ihwo re wian vwọ kẹ usuon, kugbe obaro rẹ ogangan rẹ usuon, ovwan rua ẹnwan kpahen oborẹ ovwan cha chochọn rẹ oma rẹ ovwan wan yẹrẹ oborẹ ovwan cha ta-a, 12 kidie vwẹ unọke yena, ẹwẹn ọfuanfon na che yono ovwan obo ro fori nẹ ovwan ta.”

13 Ohwo ọvo vwevunrẹ otu na da ta kẹ nẹ: “Oyono, vuẹ oniọvo mẹ nẹ ọ ghare uku na vwẹ uvwre rẹ avwanre ihwo ivẹ.” 14 Ọ da ta kẹ nẹ: “Ọshare, ono yen vwẹ ovwẹ vwo mu oguẹdjọ yẹrẹ ọgharuku vwẹ uvwre rẹ ovwan ihwo ivẹ na?” 15 Ọ da ta kẹ ayen nẹ: “Ovwan rhie ẹro rẹ ovwan phiyọ, rere ovwan sẹro rẹ oma rẹ ovwan vwo nẹ koka koka rẹ urhuru evwo, kidie ohwo da tobọ vwo ekuakua buebun dede, arhọ rọyen che se nẹ evunrẹ erọnvwọn ro vwori na rhe-e.” 16 Ọtiọyena o de ru udje ọvo kẹ ayen rọ vwọ tanẹ: “Otọ rẹ ọshare ọvo rọ dia ọdafe mọ emamọ buebun. 17 Ọtiọyena ko roro vwevunrẹ ẹwẹn rọyen nẹ, ‘Die yen mi che ru asaọkiephana rọ vwọ dianẹ mi vwo asan vuọvo ri mi che koko ekankọn mẹ phiyọ-ọ na?’ 18 Ọ da tanẹ, ‘Ọnana yen oborẹ mi che ru: Me cha guọghọ iwevwin re me da sẹro rẹ erọnvwọn na, rere me bọn e re rhoro, etiyin kọyen mi che koko eka mẹ kugbe erọnvwọn mẹ ejobi phiyọ, 19 ke me cha ta kẹ oma mẹ* nẹ: “Wo* vwo erọnvwọn iyoyovwin buebun ru wọ sẹro rọyen vwọ kẹ ikpe buebun; gbe rovwoma, wọ re, wọ da, wọ riakpọ kuoma.”’ 20 Ẹkẹvuọvo Ọghẹnẹ da ta kẹ nẹ, ‘Wẹ ro jẹ iroro evwo na, vwẹ ason nana, a cha nokpẹn rẹ arhọ* wẹn mie we. Kẹ ono yen che vwo erọnvwọn ru wo kokori na?’ 21 Ọtiọyen ọ cha dia kẹ ohwo ro koko efe kẹ oma rọyen, jẹ o feri vwẹ ẹro rẹ Ọghẹnẹ-ẹ.”

22 Ọtiọyena ọ da ta kẹ idibo rọyen nẹ: “Ọnana yen sorọ me vwọ ta kẹ ovwan nẹ, ovwan rha rua ẹnwan kpahan arhọ* rẹ ovwan, vwọ kpahan oborẹ ovwan cha re yẹrẹ kpahan ugboma rẹ ovwan, vwọ kpahan oborẹ ovwan che kuphiyọ-ọ. 23 Kidie arhọ* ghanre vrẹ emu, ugboma na ghanre vrẹ iwun. 24 Ovwan roro kpahen ikpemu na: Ayen kọn ibi yẹrẹ vuẹ-ẹn; ayen vwo uwevwin ra da sẹro rẹ emu-u; dedena Ọghẹnẹ ghẹrẹ ayen. Ovwan rha ghanre vrẹ emephran shesheri? 25 Ono vwẹ usun rẹ ovwan na yen sa womarẹ ẹnwan rọ rua vwọ vwẹ kubit* ọvo vwọ ba arhọ rọyen? 26 Ọtiọyena ọ da dianẹ ovwan che se ru orọnvwọn otete tiọyena-a, kẹ diesorọ ovwan vwọ rua ẹnwan kpahan erọnvwọn ri chekọ na? 27 Ovwan roro kpahen oborẹ idodo rẹ aghwa na rhua wan: Ayen wian yẹrẹ ko iwu-un; ẹkẹvuọvo me ta kẹ ovwan nẹ Solomọn dede vwevunrẹ urinrin rọyen na eje, sẹn te ọvo vwẹ usun rẹ enana-a. 28 Asaọkiephana ọ da dianẹ ọtiọna yen Ọghẹnẹ rhuon odi rẹ aghwa na re herọ nonẹna odẹ rọ cha na e mi do ayen phiyọ erhanre na, o rhe se rhuon ovwan vrẹ ọtiọye-en, ovwan ri vwo esegbuyota tutuno na! 29 Ọtiọyena ovwan rha rua ẹnwan kpahan oborẹ ovwan cha re kugbe oborẹ ovwan cha da-a, ovwan rha rua ẹnwan gan nọ-ọ; 30 kidie enana eje yen erọnvwọn rẹ ẹgborho rẹ akpọ na vwọtua vẹ owenvwe ọgangan, ẹkẹvuọvo Ọsẹ rẹ ovwan riẹnre nẹ ovwan guọnọ erọnvwọn nana. 31 Ukperẹ ọtiọyen, ovwan rha guọnọ Uvie rọyen, ka vwẹ erọnvwọn nana vwọ ba kẹ ovwan.

32 “Ovwan djoshọ-ọ, ẹmẹko rẹ igodẹ, kidie Ọsẹ rẹ ovwan rhọnvwe nure nẹ ọyen cha vwẹ Uvie na kẹ ovwan. 33 Shẹ oborẹ wo vwori, wọ kẹ okẹ rẹ arodọnvwẹ.* Ru ekpu rẹ igho re guọghọ-ọ, efe ro re-e vwẹ obodjuvwu, asan rẹ oji vuọvo che se sikẹre-e, rẹ eghwọghwọ vuọvo cha sa ghwọrọ-ọ. 34 Kidie asan rẹ efe rẹ ovwan hepha, etiyin ubiudu rẹ ovwan je cha dia.

35 “Ovwan ku ewun phiyọ ji muegbe, urhukpẹ rẹ ovwan me rha la, 36 ovwan me je dia kerẹ ihwo re hẹrhẹ onini rayen ro che rhivwin nẹ irueru rẹ orọnvwe rhe, rere ọke rọ da rhe ji hworo ẹchẹ, ayen se vwo rhie kẹ ugege yena. 37 Omavwerhovwẹn dia vwọ kẹ idibo yena rẹ onini na mrẹre nẹ e rhẹrẹ ọke rọ vwọ rhe! Uyota me ta kẹ ovwan nẹ, o che ku ewun rẹ iruo phiyọ,* ọ me vuẹ ayen nẹ ayen chidia imẹjẹ, ọ me rhe rhi gbodibo kẹ ayen. 38 Ọ da dianẹ ọ rhere vwẹ orhẹrẹ rivẹ* yẹrẹ tobọ ọrerha na,* ọ da mrẹ ayen nẹ ayen choma, omavwerhovwẹn dia kẹ ayen! 39 Ẹkẹvuọvo ovwan riẹn ọnana nẹ, mane kẹ ọrovwuwevwin na riẹn unọke rẹ oji na cha vwọ rhe, ọ rha rhọnvwe nẹ ọ ro uwevwin rọye-en. 40 Ovwan ji muegbe ọkieje, kidie vwẹ unọke rẹ ovwan vwẹ ẹwẹn roro-o yen Ọmọ rẹ ohwo cha vwọ rhe.”

41 Pita da tanẹ: “Ọrovwori, avwanre ọvo yen wo ru udje nana kẹ gbanẹ wo ji ruo kẹ ihwo eje?” 42 Ọrovwori na da tanẹ: “Ono yen ghene hẹ ọrọvwẹrote rọ fuevun na, ọ rọ je ghwanre na, rẹ onini rọyen che vwo mu nẹ ọ vwẹrote ẹko rẹ idibo rọyen,* nẹ ọ rha kẹ ayen ẹkẹn rẹ emu rayen vwẹ ọke ro fori? 43 Omavwerhovwẹn dia vwọ kẹ odibo yena, ọ da dianẹ ọke rẹ onini rọyen vwọ rhe, ọ mrẹrẹ ro ruẹ ọtiọyen! 44 Me vuẹ ovwan vwọrẹ uyota nẹ, ọ cha reyọ vwo mu vwẹ enu rẹ ekuakua rọyen eje. 45 Ẹkẹvuọvo ọ da dianẹ odibo yena ta vwevunrẹ ubiudu rọyen nẹ, ‘Onini mẹ hwọke, ko hwe idibo eshare vẹ e rẹ eya, jẹ ọ ria je da, ọ da da udi vroma, 46 onini rẹ odibo yena cha rhe vwẹ ẹdẹ rọ rhẹro rọye-en, kugbe unọke rọ riẹnre-e, ko che gboja kẹ gangan je reyọ vwọ ba ihwo re fuevu-un. 47 Ọke yena odibo yena ro vwo ẹruọ rẹ ọhọre rẹ onini rọyen, ẹkẹvuọvo ro muegbe yẹrẹ ru obo rọ vuẹrẹ nẹ o ru-u na,* ka cha fa abọ buebun. 48 Ẹkẹvuọvo ọ ro vwo ẹruọ-ọ, dedena jẹ o ru erọnvwọn ri fo ẹfa, a cha fa emerha. Vwọrẹ uyota, kohwo kohwo ra vwẹ buebun kẹ, a cha nokpẹn rẹ buebun mie, ohwo re vwo mu nẹ ọ vwẹrote erọnvwọn buebun, a cha nokpẹn rẹ obo ri bun vrẹ obo ra nokpẹn rọyen jovwo mie.

49 “Me rhere rhi koko erhanre phiyọ akpọ na, kẹ die ọfa yen me rhoma guọnọ ọ da dianẹ a vwẹ erhanre na vwo mu nure? 50 Vwọrẹ uyota, mi vwo omaebrophiyame re che bru vwe phiyọ, ọ cha yanghan ẹwẹn mẹ bẹsiẹ ro vwo re! 51 Ovwan roro nẹ me rhere rhi phi ufuoma phiyọ akpọ na? Ẹjo, me ta kẹ ovwan nẹ, ọ dia ufuoma-a, ẹkẹvuọvo ohẹriẹ. 52 Kidie vwo nẹ ọke nana yanran, ihwo iyorin rehẹ uwevwin ọvo cha ghare, erha cha vwọso ivẹ, ivẹ cha vwọso erha. 53 Ayen cha ghare, ọsẹ vwọso ọmọ, ọmọ vwọso ọsẹ, oni vwọso ọmọtẹ, ọmọtẹ vwọso oni, oni orọnvwe vwọso aye rẹ ọmọ, aye rẹ ọmọ vwọso oni orọnvwe.”

54 Ọyena vwọ wan nu, ọ da je ta kẹ otu na nẹ: “Ọke rẹ ovwan da mrẹ enu ro bi phiyọ vwẹ ẹbẹre ọnre shera, kẹ ovwan ghwa tanẹ, ‘Ogiribo cha,’ ọ me phia. 55 Ọke rẹ ovwan da mrẹ nẹ odju djuẹ nẹ obọrhen ọnre na cha, kẹ ovwan tanẹ, ‘Oheri cha dia,’ ọ me phia. 56 Ihwo rẹ omeru na, ovwan riẹn obo ra fuẹrẹn oborẹ akpọ na vẹ enu na hepha, kẹ diesorọ ovwan rha riẹn obo ra fuẹrẹn ọke nana-a? 57 Diesorọ ovwan komobọ rhe ji brorhiẹn rẹ obo re dia ọsoso-o? 58 Kerẹ udje, ọke wẹ vẹ ohwo ro mu we kpo aguare de brẹ osun ọvo ra, rẹ ovwan vwọ hẹ idjerhe yanran na, jowọ rẹ owẹ vẹ ọyen vwọ rhuẹrẹkugbe rere o vwo ju we emuo kpo obaro rẹ oguẹdjọ na, rẹ oguẹdjọ na da reyọ owẹ vwọ kẹ ohwo ro ruiruo vwevunrẹ aguare, rẹ ohwo ro ruiruo vwevunrẹ aguare na de do we phiyọ uwodi. 59 Me ta kẹ wẹ nẹ, wo che nẹ etiyin rhe-e, bẹsiẹ wọ vwọ hwa imigho otutuno rọ koba* ru wọ riosa rọyen re.”