Ọrẹsosuọ ri Jọn

5 Kohwo kohwo ro vwo esegbuyota nẹ Jesu yen Kristi na, jẹ ohwo yena ọmọ rẹ Ọghẹnẹ, kohwo kohwo ro vwo ẹguọnọ rẹ ohwo rọ nẹrhẹ e vwo arhọ na, ko ji vwo ẹguọnọ rẹ emọ Rọyen. 2 Womarẹ ọnana ọyen avwanre vwọ riẹn nẹ avwanre vwo ẹguọnọ rẹ emọ rẹ Ọghẹnẹ siẹrẹ avwanre de vwo ẹguọnọ rẹ Ọghẹnẹ je yọnrọn irhi rọyen. 3 Kidie ọnana yen oborẹ ẹguọnọ rẹ Ọghẹnẹ mudiaphiyọ, nẹ avwanre yọnrọn irhi rọyen, jẹ irhi rọyen na dia oghwa ọhọhọhọ-ọ, 4 kidie kohwo kohwo rọ dia ọmọ rẹ Ọghẹnẹ,* jẹ o phi akpọ na kparobọ. Ọnana yen obo re nẹrhẹ avwanre se phi akpọ na kparobọ, esegbuyota rẹ avwanre.

5 Ono yen se phi akpọ na kparobọ? Ọ dia ohwo ro vwo esegbuyota nẹ Jesu yen Ọmọ rẹ Ọghẹnẹ? 6 Ọnana yen ohwo rọ rhere womarẹ ame vẹ ọbara, Jesu Kristi, ọ dia ame ọvo-o ẹkẹvuọvo, womarẹ ame vẹ ọbara. Ẹwẹn na rhe soseri, kidie ẹwẹn na yen uyota na. 7 Kidie iseri erha yen herọ: 8 ẹwẹn na, ame na, kugbe ọbara na; erha na rhọnvwe kugbe.

9 Ọ da dianẹ avwanre rhiabọreyọ oseri rẹ ihworakpọ, oseri rẹ Ọghẹnẹ kọyen ma rho. Kidie oseri rẹ Ọghẹnẹ seri kẹ ọna, oseri ro se kpahen Ọmọ rọyen. 10 Ohwo ro vwo esegbuyota kpahen Ọmọ rẹ Ọghẹnẹ, jẹ o vwo oseri na vwẹ oma rọyen. Ohwo ro se Ọghẹnẹ gbuyota-a, jẹ o ruro phiyọ ọvwọrofian, kidie o vwo esegbuyota kpahen oseri rẹ Ọghẹnẹ se kpahen Ọmọ rọye-en. 11 Ọnana yen oseri na, nẹ Ọghẹnẹ kẹ avwanre arhọ ri bẹdẹ, arhọ nana hẹ evunrẹ Ọmọ rọyen. 12 Ohwo ro rhiabọreyọ Ọmọ na vwo arhọ nana; ohwo ro rhiabọreyọ Ọmọ rẹ Ọghẹnẹ-ẹ vwo arhọ nana-a.

13 Mi si erọnvwọn nana rhe ovwan rere ovwan vwọ riẹn nẹ ovwan vwo arhọ ri bẹdẹ, ovwan ri vwo esegbuyota kpahen odẹ rẹ Ọmọ rẹ Ọghẹnẹ na. 14 Ọnana yen imuẹro rẹ avwanre vwo kpahọn, nẹ kemu kemu rẹ avwanre nọre vwo nene ọhọre rọyen, o nyo avwanre. 15 Avwanre da riẹn nẹ kemu kemu rẹ avwanre nọ mie o nyo avwanre, kọyen avwanre riẹnre nẹ oborẹ avwanre nọ mie na che te avwanre obọ, kidie avwanre nokpẹn rayen mie.

16 Ohwo da mrẹ oniọvo rọyen ro ruẹ umwemwu rọ sua ughwu-u, kọ nẹrhovwo, Ọghẹnẹ me vwẹ arhọ kẹ. Ọnana shekpahen otu ri ruẹ umwemwu rọ sua ughwu-u. Ẹkẹvuọvo, o vwo umwemwu ọvo rọ sua ughwu. Ọ dia umwemwu yena yen me tanẹ ọ nẹrhovwo kpahen na-a. 17 Jẹ ọsoso enene eje umwemwu, jẹ umwemwu ọvo herọ rọ sua ughwu-u.

18 Avwanre riẹnre nẹ kohwo kohwo rọ dia ọmọ rẹ Ọghẹnẹ muomaphiyọ umwemwu eruo-o, ẹkẹvuọvo ọmọ rẹ Ọghẹnẹ* na sẹro rọyen, ọtiọyena ohwo umwemwu na cha mrẹ asan wan yọnrọ-ọn.* 19 Avwanre riẹnre nẹ obọ rẹ Ọghẹnẹ yen avwanre nurhe, ẹkẹvuọvo akpọ na eje hẹ obọ rẹ ohwo umwemwu na. 20 Avwanre riẹnre nẹ Ọmọ rẹ Ọghẹnẹ na rhire, ọ je kẹ avwanre ọmrẹvughe* rere avwanre se vwo vwo erianriẹn rẹ ohwo rẹ uyota na. Avwanre vẹ ohwo rẹ uyota na vwo oyerinkugbe womarẹ Ọmọ rọyen Jesu Kristi. Ọnana yen Ọghẹnẹ rẹ uyota na kugbe arhọ ri bẹdẹ. 21 Imitete, ovwan kẹnoma kẹ edjọ.