Matiu

23 Ọyena vwọ wan nu, Jesu da ta ota kẹ otu na vẹ idibo rọyen, ọ da tanẹ: 2 “Isiẹbe na vẹ ihwo ri Farisi na vwẹ oma rayen vwo chidia agbara ri Mosis. 3 Ọtiọyena erọnvwọn eje rẹ ayen vuẹ ovwan, ovwan ru ayen, ovwan je yọnrọn ayen, ẹkẹvuọvo ovwan vwẹrokere iruemu raye-en, kidie ayen ta ẹkẹvuọvo ayen ruẹ oborẹ ayen ta-a. 4 Ayen krun eghwa ehọhọhọ muẹ phiyọ igabọ rẹ ihwo, ẹkẹvuọvo ayen komobọ vwo owenvwe rẹ ayen vwọ vwẹ urhiobọ te aye-en. 5 Iruo eje rẹ ayen ruẹ, ayen ruẹ ayen rere ihwo vwọ mrẹ ayen, kidie ayen ruẹ ekpeti rẹ isiesi ọfuanfon rẹ ayen kuẹphiyọ kerẹ ochọnvwe na hẹhẹre, ayen ji ruẹ ejọjọ rẹ iwun rayen grongron. 6 Ayen guọnọ asan ro me titi vwẹ emuẹriọ rẹ ovwọnvwọn kugbe egbara rehẹ obaro* vwẹ sinagọg 7 kugbe uyeren vwẹ afieki, ayen je guọnọ nẹ ihwo se ayen Rabbi.* 8 Ẹkẹvuọvo vwọ kẹ ovwan, we jẹ ihwo se ovwan Rabbi-i, kidie Oyono ọvuọvo yen ovwan vwori, ovwan eje iniọvo. 9 Vwọba, ovwan se ohwo vuọvo ọsẹ rẹ ovwan vwẹ akpọ na-a, kidie Ọsẹ ọvuọvo yen ovwan vwori, Ọ rọhẹ obodjuvwu na. 10 Yẹrẹ e se ovwan isu-un, kidie Osun ọvuọvo yen ovwan vwori, Kristi na. 11 Ẹkẹvuọvo ọ rọ ma rho vwẹ usun rẹ ovwan me dia odibo rẹ ovwan. 12 Kohwo kohwo rọ kpare oma rọyen kpenu, e che vwo kpotọ, kohwo kohwo rọ vwẹ oma rọyen kpotọ, a cha kparọ kpenu.

13 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan kanre ẹchẹ rẹ Uvie rẹ idjuvwu gbe ihwo; ovwan komobọ ruọ-ọ, ovwan je vwẹ uphẹn kẹ ihwo re guọnerọ ro nẹ ayen ruọ-ọ. 14 *——

15 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan wan abadi vẹ otọ ọyaya vrẹ re ku ohwo ọvo rhẹriẹ rhe ẹga rẹ ihwo ri Ju, o de kurhẹriẹ nu, ovwan me nẹrhẹ ọ dia ohwo ro fo vwọ kẹ Gehina* ọhwọhwọ ivẹ vwọ vrẹ ovwan komobọ.

16 “Okpetu rode kẹ ovwan, isun ri rhuẹro, re tanẹ, ‘Ohwo da vwẹ uwevwin rẹ ẹga na vwo duvwun iyorin, ọyena fiemu vuọvo-o; ẹkẹvuọvo siẹrẹ ohwo da vwẹ oro rẹ uwevwin rẹ ẹga na vwo duvwun iyorin, jẹ o vwo oghwa.’ 17 Ovwan ri jẹ ọhọ evwo kugbe irhuẹro na! Ọvọ yen ghene ma rho, oro na gbanẹ uwevwin rẹ ẹga na ro ru oro na fon? 18 Vwọba, ‘Ohwo da vwẹ agbada na vwo duvwun iyorin, ọyena fiemu vuọvo-o, ẹkẹvuọvo siẹrẹ ohwo da vwẹ okẹ rọhẹ enu rọyen vwo duvwun iyorin, jẹ o vwo oghwa.’ 19 Irhuẹro na! Ọvọ yen ghene ma rho, okẹ na gbanẹ agbada na ro ru okẹ na fon? 20 Ọtiọyena, kohwo kohwo rọ vwẹ agbada na vwo duvwun iyorin, jẹ ọ vwẹ agbada na vẹ erọnvwọn eje rehẹ enu rọyen vwo duvwun iyorin; 21 kohwo kohwo rọ vwẹ uwevwin rẹ ẹga na vwo duvwun iyorin, jẹ ọ vwẹ uwevwin rẹ ẹga na vẹ Ohwo rọ dia evun rọyen vwo duvwun iyorin; 22 kohwo kohwo rọ vwẹ odjuvwu vwo duvwun iyorin, jẹ ọ vwẹ ekete rẹ Ọghẹnẹ kugbe Ohwo ro chidia enu rọyen vwo duvwun iyorin.

23 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan hwa ẹkẹn ọvo rẹ ẹkẹn ihwe ri mint, dil, kugbe kumin,* ẹkẹvuọvo ovwan kpairoro vrẹ erọnvwọn ri vwo ọkpan vwevunrẹ Urhi na, kọyen orhiẹn-ebro abavo kugbe arodọnvwẹ kugbe evun-ẹfuọn. Enana erọnvwọn ri fori nẹ e ru, jẹ ọ dia ọyen a vwọ jẹ erọnvwọn ri chekọ na fia-a. 24 Isun ri rhuẹro, re rhẹ iwen* kuẹfia, jẹ ayen muẹ ikamẹl rọ!

25 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan ruẹ obuko rẹ uko kugbe ọ rẹ omoze fuan, ẹkẹvuọvo vwẹ obevun, ayen vọnre vẹ urhuru* kugbe ojevwe romobọ. 26 Ihwo ri Farisi ri rhuẹro na, ovwan ke ru obevun rẹ uko na kugbe ọ rẹ omoze na fon, rere obotafe na je vwọ dia fuanfon.

27 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan họhọ ishi ra vwẹ ọda ọfuanfon gbe, rọ pha yoyovwin vwẹ obotafe, ẹkẹvuọvo obevun rọyen vọnre vẹ ibeku rẹ ihwo ri ghwuru kugbe koka koka ri jẹfuọn. 28 Vwẹ idjerhe vuọvo na, ovwan họhọ evwata vwọ kẹ ihwo vwẹ obotafe, ẹkẹvuọvo ovwan vọnre vẹ omeru kugbe jurhi ẹyọnrọn vwẹ obevun.

29 “Okpetu rode kẹ ovwan, isiẹbe kugbe ihwo ri Farisi, ihwo rẹ omeru na! kidie ovwan bọn ishi rẹ emraro na je rhuẹrẹ ishi* rẹ evwata na fia, 30 ovwan tanẹ, ‘Ọ da dianẹ avwanre herọ vwẹ ọke rẹ esẹ rẹ avwanre ride, avwanre rhe nene ayen vwobọ vwẹ ọbara rẹ emraro na re ku kuotọ-ọ.’ 31 Ọtiọyena ovwan soseri hwe oma rẹ ovwan nẹ ovwan emọ rẹ ihwo ri hwe emraro na. 32 Ọtiọyena ovwan gbe ru ovwanvwọ rẹ esẹ rẹ ovwan ride na vọn.

33 “Eredekọ, emọ rẹ eredekọ, mavọ yen ovwan sa vwọ djẹ vwọ kẹ ẹdjọeguo ri Gehina?* 34 Fikirẹ ọnana, mi ji emraro kugbe evwaghwanre kugbe iyono rẹ azagba brẹ ovwan cha. Ovwan che hwe evo je vwẹ ayen ya irhe, ovwan me rha fa evo vwẹ sinagọg rẹ ovwan ji mukpahen ayen nẹ orere kpo orere, 35 rere ọbara rẹ evwata na eje re ku kuotọ vwẹ akpọ na sa vwọ dia enu rẹ ovwan, vwo nẹ ọbara rẹ Ebẹl rọ dia ọvwata na, re te ọbara ri Zekaraya ọmọ ri Barakaya, ohwo rẹ ovwan hweri vwẹ uvwre rẹ asan ọfuanfon na kugbe agbada na. 36 Uyota me ta kẹ ovwan nẹ, erọnvwọn nana eje cha phia kẹ uvwiẹ nana.

37 “Jerusalẹm, Jerusalẹm, ọ ro hwe emraro na, ro ji phi ihwo re ji bro rhe—brabọ yen me davwẹngba vwo koko emọ wẹn kugbe kirobo rẹ ọhọ koko emọ rọyen vwẹ otọ rẹ ibekpe rọyen! Ẹkẹvuọvo ovwan guọnọre-e. 38 Nighere! A yanjẹ uwevwin rẹ ovwan vwo kẹ ovwan re.* 39 Kidie me ta kẹ ovwan nẹ, ovwan rha cha mrẹ vwẹ ọfa-a, rhi te ọke rẹ ovwan vwọ tanẹ, ‘Ebruba kẹ ohwo rọ cha vwẹ odẹ ri Jihova!’”*