Luk

17 Ọyena vwọ wan nu, ọ da ta kẹ idibo rọyen nẹ: “Obo re sua ekprowọ che jẹ cha-a. Ẹkẹvuọvo, okpetu rode vwọ kẹ ohwo rẹ ayen wan oma rọyen rhe! 2 O che yovwin kẹ mamọ, ọ da dianẹ a gba ukuta rode ra vwọ lọ erọnvwọn si ohọre rọyen re de do phiyọ abadi, vwọ vrẹ ọ rẹ ọ vwọ so ekprowọ kẹ ọvo vwẹ usun rẹ itete nana. 3 Ovwan ni oma rẹ ovwan so. Ọ da dianẹ oniọvo wẹn ru umwemwu, ghwọkuo, o de kurhẹriẹ, vwo ghovwo. 4 Ọ da tobọ dianẹ o ru umwemwu vwọso owẹ abọ ighwrẹn vwẹ ẹdọke ro de rhivwin bru we rhe abọ ighwrẹn na, rọ vwọ tanẹ, ‘Mi kurhẹriẹ,’ wo mi vwo ghovwo.”

5 Asaọkiephana iyinkọn na da ta kẹ Ọrovwori na nẹ: “Cha avwanre uko vwo ru esegbuyota rẹ avwanre ganphiyọ.” 6 Ọrovwori na da tanẹ: “Ovwan de vwo esegbuyota rọ pha kerẹ ubi rẹ imọstadi, ovwan cha ta kẹ urhe rẹ imọbẹri obiebi nana nẹ, ‘Ghwie nẹ etinẹ rere wo re mudia vwevunrẹ abadi na!’ ko che nyẹme rẹ ovwan.

7 “Ọvọ vwẹ usun rẹ ovwan na ro vwo odibo ro voro yẹrẹ ro suẹn ichuru, rọ cha ta kẹ ọke ro de nẹ udju rhe nẹ, ‘Yanrhe etinẹ jọphẹre, wọ rhe riemu vwẹ imẹjẹ na’? 8 Ukperẹ ọtiọyen, ọ dia ọ cha ta kẹ nẹ, ‘Muegbe rẹ orọnvwọn kẹ vwẹ me riemu rẹ ovwọnvwọn mẹ, ku eprọni phiyọ wo gbodibo kẹ vwẹ bẹsiẹ me vwọ re je da nu, ọke yena ku wọ sa ra re je da’? 9 Ọ cha kpẹvwẹ odibo na kidie nẹ o ru obo ra vwọ kẹ nẹ o ru-u, gbanẹ o che ru ọtiọyen? 10 Vwẹ idjerhe vuọvo na, ọke rẹ ovwan de ru erọnvwọn eje ra vwọ kẹ ovwan nẹ ovwan ru nu, ovwan gba tanẹ: ‘Avwanre idibo re che se vwo ru emuọvo-o. Oborẹ avwanre ruru na, ọyen obo ro fori nẹ avwanre ru.’”

11 Ọke ro vwo kpo Jerusalẹm, kọ wan uvwre ri Sameria kugbe Galili. 12 Rọ vwọ rua ọko ọvo, eshare ihwe re dia ehọnvwoti da vwa, ẹkẹvuọvo ayen mudia asan ro sherabọ kẹ. 13 Ayen da kpare urhuru rayen kpenu, ayen da tanẹ: “Jesu, Oyono, gbe arodọnvwẹ kẹ avwanre!” 14 Ọke rọ vwọ mrẹ ayen, ọ da ta kẹ ayen nẹ: “Ovwan yanran re dje oma rẹ ovwan kẹ irherẹn na.” Rẹ ayen vwọ yanran, oma rayen da fon. 15 Ọke rẹ ọvo vwẹ usun rayen vwọ mrẹ nẹ oma rọyen kpo re, o de kuomarhẹriẹ, kọ vwẹ urinrin kẹ Ọghẹnẹ vẹ urhuru ọgangan. 16 O de she bọvwọn opharo rhuotọ vwẹ asan awọ ri Jesu rọ vwọ kpẹvwẹ. Vwọba, ọyen ohwo ri Sameria. 17 Jesu da kpahen kẹ nẹ: “Ihwo ihwe yen e ru fon, ọ dia ọtiọyen? Kẹ irhirin ri chekọ na rhọ? 18 A rha mrẹ ohwo ọfa ro kuomarhẹriẹ rhe vwẹ urinrin kẹ Ọghẹnẹ jokparẹ ọshare nana rọ dia ohwo rẹ ẹkuotọ ọfa na?” 19 Ọ da ta kẹ nẹ: “Vrẹn wọ yanran; esegbuyota wẹn nẹrhẹ oma wẹn gan nure.”

20 Ọke rẹ ihwo ri Farisi na vwọ nọ kpahen ọke rẹ Uvie rẹ Ọghẹnẹ na cha vwọ rhe, ọ da kpahen kẹ ayen nẹ: “Uvie rẹ Ọghẹnẹ na cha rhe vwẹ idjerhe rẹ ihwo ejobi de noso-o; 21 yẹrẹ kẹ ihwo cha tanẹ, ‘No, ọ hẹ etinẹ! yẹrẹ ‘Oboyi-in!’ Kidie nighere! Uvie rẹ Ọghẹnẹ na hẹ ohri rẹ ovwan.”

22 Ọyena vwọ wan nu, ọ da ta kẹ idibo rọyen nẹ: “Ọke cha rẹ ovwan che vwo vwo urhurusivwe rẹ ovwan vwọ mrẹ ọvo vwẹ usun rẹ ẹdẹ rẹ Ọmọ rẹ ohwo na, ẹkẹvuọvo ovwan cha mrẹ-ẹ. 23 Ihwo cha ta kẹ ovwan nẹ, ‘Nighere ọ hẹ oboyin!’ yẹrẹ ‘Nighere ọ hẹ obonẹ!’ Ovwan rua otafe yẹrẹ djẹ nene aye-en. 24 Kidie kirobo rẹ enu nyavwaro vwo nẹ ẹbẹre ọvo rẹ odjuvwu na kpo ẹbẹre ọfa rẹ odjuvwu na, ọtiọyen Ọmọ rẹ ohwo na cha dia vwẹ ẹdẹ rọyen. 25 Ẹkẹvuọvo, ẹsosuọ, ọ cha rioja rẹ erọnvwọn buebun, uvwiẹ nana me je siọn. 26 Vwọba, kirobo rọ phiare vwẹ ọke ri Noa, ọtiọyen ọ je cha dia vwẹ ẹdẹ rẹ Ọmọ rẹ ohwo na: 27 ayen ria, ayen da, eshare rọvwọn, a je vwẹ eya kpo orọnvwe, bẹsiẹ rẹ ẹdẹ yena vwo te, ri Noa vwọ ro okọ na, oghwe na da rhe, ọ da ghwọrọ ayen ejobi. 28 Vwẹ idjerhe vuọvo na, kirobo rọ phiare vwẹ ọke ri Lọt: ayen ria, ayen da, ayen dẹ, ayen shẹ, ayen kọn, ayen bọn. 29 Ẹkẹvuọvo vwẹ ẹdẹ ri Lọt vrẹ nẹ Sodọm, osio rẹ erhanre kugbe ọ rẹ isọfọ* da rhọ nẹ odjuvwu rhe, ọ da ghwọrọ ayen ejobi. 30 Ọtiọyen ọ je cha dia vwẹ ẹdẹ yena re che vwo dje Ọmọ rẹ ohwo na phia.

31 Vwẹ ẹdẹ yena, e jẹ ohwo rọhẹ enu rẹ uwevwin, jẹ ekuakua rọyen hẹ evunrẹ uwevwin na, wontọ cha rere ọ rhe reyọ aye-en, vwẹ idjerhe vuọvo na, e jẹ ohwo rọhẹ evunrẹ udju rhivwin brẹ erọnvwọn rehẹ obuko-o. 32 Karophiyọ aye ri Lọt. 33 Kohwo kohwo rọ guọnọ sẹro rẹ arhọ* rọyen che kuo kufia, ẹkẹvuọvo kohwo kohwo ro kuro kufia cha sẹro rọyen. 34 Me ta kẹ ovwan nẹ, vwẹ ason yena, ihwo ivẹ cha dia evunrẹ ehwa ọvo; a cha reyọ ọvo, ẹkẹvuọvo a cha yanjẹ ọ ro chekọ vwo. 35 Eya ivẹ cha rha vwẹ ukuta vwọ lọ erọnvwọn vwẹ asan vuọvo; a cha reyọ ọvo, ẹkẹvuọvo a cha yanjẹ ọ ro chekọ vwo.” 36 *—— 37 Ọtiọyena ayen da kpahen kẹ nẹ: “Vwẹ tivọ, Ọrovwori?” Ọ da ta kẹ ayen nẹ: “Asan rẹ orivwin na hepha, etiyin igo de ji che koko.”