Matiu

25 “A sa vwẹ Uvie rẹ idjuvwu na vwo dje emetobẹ ihwe ri mu irhukpẹ rayen, ayen da yanran ra vwa ọshare ọpha na. 2 Iyorin vwẹ usun rayen vwo ọhọ-ọ, iyorin vwo aghwanre. 3 I ri jẹ ọhọ evwo na mu irhukpẹ rayen, jẹ ayen ghwa evwri nene oma-a, 4 ẹkẹvuọvo i ri vwo aghwanre na mu irhukpẹ rayen, ayen da je ghwa evwri nene oma vwẹ ukoko rayen. 5 Ọke rẹ ọshare ọpha na vwo hwọke, ayen ejobi ki go ovwerhẹn, ovwerhẹn de mu ayen yanran. 6 Vwẹ uherevie ason, e de kperi nẹ: ‘Ọshare ọpha na rhire! Ovwan yanran ra vwa.’ 7 Ọtiọyena emetobẹ na eje de vrẹn, ayen de muegbe rẹ irhukpẹ rayen. 8 I ri jẹ ọhọ evwo na da ta kẹ i ri vwo aghwanre na nẹ, ‘Ovwan kẹ avwanre emevwri nẹ e rẹ ovwan na, kidie irhukpẹ rẹ avwanre guọnọ fuẹn re.’ 9 I ri vwo aghwanre na da kpahen nẹ: ‘Ọkiọvo o che te kẹ avwanre vẹ ovwa-an. Ukperẹ ọtiọyen, ovwan bru ihwo re shẹ na ra, rere ovwan ra dẹ kẹ oma rẹ ovwan.’ 10 Ọke rẹ ayen vwọ yanran ra dẹ na, ọshare ọpha na da rhe, emetobẹ re choma na de nene ro uwevwin vwo kpo emuẹriọ rẹ orọnvwe na, a da kanre ẹchẹ na. 11 Ọke vwọ yan obaro, emetobẹ ri chekọ na da je rhe, kẹ ayen tanẹ, ‘Ọga, Ọga, rhie kẹ avwanre!’ 12 Ọ da kpahen nẹ, ‘Uyota me ta kẹ ovwan nẹ, me riẹn ovwa-an.’

13 “Ọtiọyena ovwan rha rhẹrẹ, kidie ovwan riẹn ẹdẹ na yẹrẹ unọke na-a.

14 “Kidie ọ pha kerẹ ọshare rọ guọnọ kpo isiorho, ro se idibo rọyen, o de phi obo ro vwori phiyọ ayen obọ. 15 Ọ vwẹ italẹnti* iyorin vwọ kẹ ọvo, ivẹ vwọ kẹ ọfa, ọ da rha vwẹ ọvo vwọ kẹ ọfa, ọ kẹ ayen ohwo ọvuọvo vwo nene oborẹ ẹgba rayen muru, o de kpo isiorho. 16 Ugege yena, ọ ra vwẹ italẹnti iyorin kẹ na da yanran ra vwẹ ayen chueki, ọ da mrẹ erere rẹ italẹnti iyorin efa. 17 Vwẹ idjerhe vuọvo na, ọ ra vwẹ ivẹ kẹ na je mrẹ erere rẹ ivẹ efa. 18 Ẹkẹvuọvo odibo ra vwẹ ọvo kẹ na da yanran ra tọn otọ, o de si igho* rẹ onini rọyen na nu.

19 “Ọke grongron vwọ wan nu, onini rẹ idibo na da rhe rhe fuẹrẹn oborẹ ayen vwẹ igho rọyen vwo ru. 20 Ọtiọyena ọ ra vwẹ italẹnti iyorin kẹ na da rhe, ọ da vwẹ italẹnti iyorin efa vwọba kpahotọ, ọ da tanẹ, ‘Onini, wọ kẹ vwẹ italẹnti iyorin; nighere, me mrẹ erere rẹ iyorin efa.’ 21 Onini rọyen da ta kẹ nẹ: ‘Wo ruru, odibo esiri rọ je fuevun! Wọ fuevun vwẹ enu rẹ erọnvwọn itete. Me cha vwẹ owẹ mu vwẹ enu rẹ erọnvwọn buebun. Ro aghọghọ rẹ onini wẹn.’ 22 Ọyena vwọ wan nu, ọ ra vwẹ italẹnti ivẹ kẹ na da rhe, ọ da tanẹ, ‘Onini, wọ kẹ vwẹ italẹnti ivẹ, nighere, me mrẹ erere rẹ ivẹ efa.’ 23 Onini rọyen da ta kẹ nẹ, Wo ruru, odibo esiri rọ je fuevun! Wọ fuevun vwẹ enu rẹ erọnvwọn itete. Me cha vwẹ owẹ mu vwẹ enu rẹ erọnvwọn buebun. Ro aghọghọ rẹ onini wẹn.’

24 “Ukuotọ rọyen, odibo ra vwẹ italẹnti ọvo kẹ na da rhe, ọ da tanẹ: ‘Onini, me riẹnre nẹ wẹwẹ ohwo re se ruẹ ọhọre rọye-en, wo vuẹn vwẹ asan ru wọ kọnphiyọ-ọ, wo koko ibi ekankọn ru wọ frẹre-e. 25 Ọtiọyena oshọ de mu vwe, me da yanran re si italẹnti wẹn nu vwẹ otọ. Nighere, italẹnti wẹn na.’ 26 Onini rọyen da kpahen kẹ nẹ: Odibo umwemwu rọ je vwiẹrẹ na, wọ riẹnre, ọ dia ọtiọyen, nẹ mi vuẹn vwẹ asan re me kọnphiyọ-ọ, nẹ mi koko ibi ekankọn re me frẹre-e? 27 Ọtiọyena, mane wo rhe phi igho* mẹ phiyọ ibanki, me vwọ rhe na ke me rha reyọ vẹ igho re vwo suon.

28 “Ọtiọyena, ovwan reyọ italẹnti na mie rere ovwan vwọ kẹ ọ ro vwo italẹnti ihwe na. 29 Kidie kohwo kohwo ro vwori, a cha vwẹ efa ba kẹ, ko che vwo buebun. Ẹkẹvuọvo ọ ro je vwo na, obo rọ tobọ vwo na, a cha reyọ mie. 30 Ovwan do odibo re che se vwo ru emuọvo-o na phiyọ otafe vwevunrẹ ebri. Etiyin kọyen ọ da cha rha viẹ je ria akon rọyen.’

31 “Ọke rẹ Ọmọ rẹ ohwo da rhe vwevunrẹ urinrin rọyen vẹ emekashe na eje, ko che chidia ekete rẹ urinrin rọyen. 32 Ẹgborho na eje ki che koko vwẹ obaro rọyen, kọ cha hẹriẹ ihwo, ọvo vwo nẹ ọfa, kirobo rẹ osuigodẹ hẹriẹ igegede vwo nẹ ẹvwe. 33 Ko che mu igodẹ na phiyọ obọrhen rọyen, o mi rhe mu ẹvwe na phiyọ obohwẹre rọyen.

34 “Ovie na kọ cha ta kẹ ihwo rehẹ obọrhen rọyen nẹ: ‘Ovwan yanrhe, ovwan rẹ Ọsẹ mẹ bruba kẹ na, ovwan riuku rẹ Uvie re muegbe rọyen kẹ ovwan nẹ ọtonphiyọ rẹ akpọ na rhe. 35 Kidie owẹnvwe hwe vwe, ovwan da kẹ vwẹ emu re; urhuru rẹ ame si vwe, ovwan da kẹ vwẹ ame da. Me dia ọrhorha, ovwan de rhiabọdede uvwe; 36 me banphiyọ, ovwan da kẹ vwẹ iwun. Me muọga, ovwan da vwẹrote vwe. Me hẹ uwodi, ovwan da rhe mrẹ vwẹ.’ 37 Evwata na ke cha vwẹ eta nana vwọ kpahen kẹ nẹ: ‘Ọrovwori, ọke vọ yen avwanre vwọ mrẹ wẹ rẹ owẹnvwe vwo hwe we, rẹ avwanre da kẹ wẹ emu re, yẹrẹ urhuru rẹ ame vwo si we, rẹ avwanre da kẹ wẹ ame da? 38 Ọke vọ yen avwanre vwọ mrẹ wẹ kerẹ ọrhorha rẹ avwanre de rhiabọdede uwe, yẹrẹ wọ vwọ banphiyọ rẹ avwanre da kẹ wẹ iwun? 39 Ọke vọ yen avwanre vwọ mrẹ wẹ nẹ wọ muọga yẹrẹ nẹ owẹ hẹ uwodi rẹ avwanre da rhe mrẹ wẹ?’ 40 Ovie na kọ cha kpahen kẹ ayen nẹ, ‘Uyota me ta kẹ ovwan nẹ, rọ vwọ dianẹ ovwan ruro kẹ ọvo vwẹ usun rẹ iniọvo mẹ nana re ma hanvwe na, ovwan ruro kẹ vwẹ.’

41 “Kọ cha ta kẹ ihwo rehẹ obohwẹre rọyen nẹ: ‘Ovwan vrẹn nẹ etinẹ, ovwan re duvwun iyorin kẹ, vwo kpo erhanre ri bẹdẹ re muegbe rọyen vwọ kẹ Idẹbono kugbe emekashe rọyen na. 42 Kidie owẹnvwe hwe vwe, ẹkẹvuọvo ovwan kẹ vwẹ emu re-e; urhuru rẹ ame si vwe, ẹkẹvuọvo ovwan kẹ vwẹ ame da-a. 43 Me dia ọrhorha, ẹkẹvuọvo ovwan rhiabọdede uvwe-e; me banphiyọ, ẹkẹvuọvo ovwan kẹ vwẹ iwu-un; me muọga je dia uwodi, ẹkẹvuọvo ovwan vwẹrote vwe-e.’ 44 Kẹ ayen je cha vwẹ eta nana vwọ kpahen kẹ nẹ: ‘Ọrovwori, ọke vọ yen avwanre vwọ mrẹ wẹ nẹ owẹnvwe hwe we yẹrẹ urhuru rẹ ame si we yẹrẹ nẹ wẹwẹ ọrhorha yẹrẹ wọ banphiyọ yẹrẹ wọ muọga yẹrẹ wọ hẹ uwodi, jẹ avwanre gbodibo kẹ wẹ-ẹ?’ 45 Kọ cha kpahen kẹ ayen nẹ: ‘Uyota me ta kẹ ovwan nẹ, rọ vwọ dianẹ ovwan ruro kẹ ọvo vwẹ usun rẹ enana re ma hanvwe na-a, ovwan ji ruo kẹ vwẹ-ẹ.’ 46 Enana che kpo oghwọrọ ri bẹdi bẹdẹ,* ẹkẹvuọvo evwata na che vwo arhọ ri bẹdẹ.”