Matiu

24 Asaọkiephana ri Jesu vwo vrẹn nẹ uwevwin rẹ ẹga na, idibo rọyen de bro rhe rhi dje uwevwin rẹ ẹga na eje kẹ. 2 Ọ da kpahen kẹ ayen nẹ: “Ovwan mrẹ erọnvwọn nana eje na? Uyota me ta kẹ ovwan nẹ, o vwo ọke vuọvo ra cha vwọ yanjẹ ukuta ọvo vwo vwẹ enu rẹ ọfa vwẹ etinẹ na re de jẹ ayen ekporon she-e.”

3 Ọke ro vwo chidia enu rẹ Ugbenu rẹ Oliv, idibo na de bro rhe vwẹ odjahọn, ayen da tanẹ: “Vuẹ avwanre, ọke vọ yen erọnvwọn nana cha vwọ phia, die yen cha dia oka rẹ ọrhire* wẹn kugbe ọ rẹ okuphiyọ rẹ eyeren* na?

4 Jesu da kpahen kẹ ayen nẹ: “Ovwan nomaso rere ohwo vuọvo vwo jẹ ovwan esuon ghwrẹ, 5 kidie ihwo buebun cha rhe vwẹ odẹ mẹ, kẹ ayen cha tanẹ, ‘Mẹvwẹ yen Kristi na,’ kẹ ayen che sun ihwo buebun ghwru. 6 Ovwan che nyo kpahen ifovwin kugbe iyẹnrẹn rẹ ifovwin, ovwan jẹ oshọ muẹ ovwa-an, kidie erọnvwọn nana cha phia, jẹ oba na ji rhi te-e.

7 “Kidie ẹkuotọ cha vwọso ẹkuotọ, uvie cha vwọso uvie, emu cha kanre, etọ che kpogho nẹ asan ọvo vwo kpo ọfa. 8 Enana ejobi eyen ọtonphiyọ rẹ ikpetu egangan.*

9 “Ihwo che mukpahen ovwan,* ayen che hwe ovwan, ẹgborho na eje che vwo utuoma kpahen ovwan fikirẹ odẹ mẹ. 10 Vwọba, ihwo buebun cha kprowọ, ayen cha shẹ ohwohwo, ayen ji che vwo utuoma kpahen ohwohwo. 11 Emraro rẹ efian buebun cha vwomaphia, kẹ ayen che sun ihwo buebun ghwru; 12 Fikirẹ jurhi ẹyọnrọn ro buẹnphiyọ, ẹguọnọ rẹ ihwo buebun ko che djiro. 13 Ẹkẹvuọvo ohwo ro chirakon toba yen che vwo usivwin. 14 E che ghwoghwo iyẹnrẹn esiri rẹ Uvie na vwẹ akpọ na ejobi, rọ vwọ dia oseri vwọ kẹ ẹgborho na eje, ọke yena oba na kọ cha rhe.

15 “Ọtiọyena, ọke rẹ ovwan da mrẹ emu rẹ ẹgua rọ sua oghwọrọ ro mudia asan ọfuanfon kirobo rẹ ọmraro Daniẹl tarọ, (e jẹ ohwo ro se na vwo oniso), 16 ọtiọyena e gbe jẹ ihwo rehẹ Judia ton onẹdjẹ phiyọ kpo enu rẹ igbenu na. 17 E jẹ ohwo rọhẹ enu rẹ uwevwin na wontọ cha rere ọ rhe reyọ ekuakua nẹ uwevwin rọye-en, 18 e jẹ ohwo rọhẹ evunrẹ udju rhivwin cha rhe reyọ ewun rẹ obotafe rọye-en. 19 Okpetu rode vwọ kẹ eya re mrevun kugbe e re vwẹ evie kẹ emọ vwẹ ọke yena! 20 Ovwan rha nẹrhovwo rere ọke rẹ ovwan cha vwọ djẹ na vwo jẹ ọke ekpahen yẹrẹ Ẹdẹ Urovwoma eshephiyọ; 21 kidie vwẹ ọke yena ukpokpogho rode cha dia, ra je rhe mrẹ oka rọyen rhanvwẹ ọke rẹ akpọ na vwọ tonphiyọ rhi te ọke nana-a, ẹjo, ọ je cha phia ọfa-a. 22 Vwọrẹ uyota, jokpanẹ ke bru ẹdẹ yena krẹ, o vwo ohwo* vuọvo ro che sivwin rhọ-ọ; ẹkẹvuọvo fikirẹ ihwo ra jẹreyọ na ke che bru ẹdẹ na krẹ.

23 “Ọke yena ohwo da ta kẹ ovwan nẹ, ‘Nighere! Kristi na hẹ etinẹ,’ yẹrẹ ‘Ọ hẹ oboyin!’ ovwan se gbuyota-a. 24 Kidie Kristi rẹ efian kugbe emraro rẹ efian cha vwomaphia, ayen che ru eka ride kugbe emu rẹ igbevwunu rere ayen se vwo sun ihwo ra jẹreyọ na ghwru, ọ da dia oborẹ ayen se ru. 25 Nighere! mi si ovwan orhọ phiyotọ. 26 Ọtiọyena ihwo da ta kẹ ovwan nẹ, ‘Nighere! Ọ hẹ evunrẹ aton na,’ ovwan yanra-an; ‘Nighere! Ọ hẹ evunrẹ ivun rehẹ obevun na,’ ovwan se gbuyota-a. 27 Kidie kirobo rẹ enu nyavwaro vwẹ ẹbẹre ọnre va nẹcha, o mi lo re te ẹbẹre ọnre shera na, ọtiọyen ọrhire* rẹ Ọmọ rẹ ohwo na cha dia. 28 Kasan kasan rẹ irivwin hepha, etiyin igo de koko.

29 “Ugege rẹ ukpokpogho rẹ ọke yena da phia nu, ọnre na ko che muebri, emeranvwe na rha cha vwẹ elo rọyen phia-a, isio na che she nẹ obodjuvwu rhe, ẹgba rẹ idjuvwu na ki che kpogho. 30 Ọke yena, oka rẹ Ọmọ rẹ ohwo cha vwomaphia vwẹ odjuvwu, uvwiẹ rẹ akpọ na eje cha ghwiẹ oma rayen vwọrẹ uvweri, kẹ ayen cha mrẹ Ọmọ rẹ ohwo rọ cha vwevunrẹ evwru rẹ odjuvwu na, vẹ ogangan kugbe urinrin rode. 31 Ọ cha vwẹ edo rẹ owanre* rode vwo ji emekashe rọyen yanran, kẹ ayen che koko ihwo rọ jẹreyọ vwo nẹ odju ẹne na rhe, vwo nẹ oba ọvo rẹ idjuvwu na re te oba ro chekọ.

32 “Asaọkiephana, ovwan yono udje nana vwo nẹ urhe rẹ ifigi na: Ugege rẹ oghọn boba rọyen da djẹ phia, rọ da je ghwẹbe phiyọ nu, kẹ ovwan riẹn nẹ ọke uvo sikẹre re. 33 Vwẹ idjerhe vuọvo na, ọke rẹ ovwan da mrẹ erọnvwọn nana eje, ovwan gba riẹn nẹ o sikẹre ẹchẹ na re. 34 Uyota me ta kẹ ovwan nẹ, o vwo ọke vuọvo rẹ uvwiẹ nana cha vwọ wanvrẹ bẹsiẹ rẹ erọnvwọn nana eje vwọ phia-a. 35 Odjuvwu vẹ akpọ cha wanvrẹ, ẹkẹvuọvo o vwo ọke vuọvo rẹ eta mẹ cha vwọ wanvrẹ-ẹ.

36 “Vwọ kpahen ẹdẹ vẹ unọke yena, ohwo vuọvo riẹnrẹ-ẹ, emekashe rẹ idjuvwu na riẹnrẹ-ẹ, Ọmọ na je riẹ-ẹn, jokparẹ Ọsẹ na ọvo. 37 Kidie kirobo rọ hepha vwẹ ọke ri Noa ọtiọyen ọrhire* rẹ Ọmọ rẹ ohwo na je cha dia. 38 Kirobo rọ hepha vwẹ ọke yena tavwen oghwe na ki ku, rẹ ayen vwọ ria je da, rẹ eshare vwọ rọvwọn ra je vwọ vwẹ eya kpo orọnvwe, bẹsiẹ rẹ ẹdẹ ri Noa vwọ ro okọ na vwo te, 39 ayen rha riẹn obo re phia-a, bẹsiẹ rẹ oghwe na vwọ rhe, o de hwerhe ayen ejobi yanran, ọtiọyen ọrhire* rẹ Ọmọ rẹ ohwo na je cha dia. 40 Ọke yena eshare ivẹ cha dia evunrẹ udju; a cha reyọ ọvo, a me yanjẹ ọ ro chekọ vwo. 41 Eya ivẹ cha rha lọ erọnvwọn vwẹ asan ra da vwẹ ukuta rẹ obọ vwọ lọ erọnvwọn; a cha reyọ ọvo a me yanjẹ ọ ro chekọ vwo. 42 Ọtiọyena ovwan rha rhẹrẹ, kidie ovwan riẹn ẹdẹ rẹ Ọrovwori rẹ ovwan cha vwọ rhe-e.

43 “Ẹkẹvuọvo ovwan riẹn ọnana nẹ: Mane kẹ ọrovwuwevwin na riẹn unọke rẹ oji na cha vwọ rhe vwẹ ason, ọ rha rhẹrẹ, ọ rha rhọnvwe nẹ ọ ro uwevwin rọye-en. 44 Fikirẹ ọnana, ovwan gbe ji djephia nẹ ovwan muegbe, kidie Ọmọ rẹ ohwo cha rhe vwẹ unọke rẹ ovwan vwẹ ẹro roro-o.

45 “Ono yen ghene hẹ odibo rọ fuevun rọ je ghwanre na rẹ onini rọyen vwo mu nẹ ọ vwẹrote idibo rẹ evwruwevwin rọyen, rere ọ vwẹ emu rayen vwọ kẹ ayen vwẹ ọke ro fori? 46 Omavwerhovwẹn dia vwọ kẹ odibo yena, ọ da dianẹ ọke rẹ onini rọyen vwọ rhe, ọ mrẹrẹ ro ruẹ ọtiọyen! 47 Uyota me ta kẹ ovwan nẹ, ọ cha reyọ vwo mu vwẹ enu rẹ ekuakua rọyen eje.

48 “Ẹkẹvuọvo ọ da dianẹ odibo umwemwu yena ta vwevunrẹ ubiudu rọyen nẹ, ‘Onini mẹ hwọke,’ 49 ko hwe ihwo efa re vẹ ọyen gba dia idibo, jẹ ọ ria je da vẹ ihwo ra riẹn phiyọ egbaudi, 50 onini rẹ odibo yena cha rhe vwẹ ẹdẹ rọ rhẹro rọye-en kugbe unọke rọ riẹnre-e, 51 ko che gboja kẹ gangan ji do phiyọ asan rẹ ihwo rẹ omeru na hepha. Etiyin kọyen ọ da cha rha viẹ je ria akon rọyen.