Ọrẹsosuọ re si Rhe Ihwo ri Kọrẹnt

15 Asaọkiephana iniọvo, me karophiyọ ovwan vwọ kpahan iyẹnrẹn esiri ri mi ghwoghwo kẹ ovwan, rẹ ovwan rhiabọreyọ, rẹ ovwan je nabọ chochọn rọyen. 2 Ovwan da vwẹ ọkieje vwọ yọnrọn esegbuyota rẹ ovwan kpahen iyẹnrẹn esiri ri mi ghwoghwo kẹ ovwan na, jẹ ovwan vwo usivwin, ẹkẹvuọvo ovwan rhe ru ọtiọye-en, jẹ esegbuyota rẹ ovwan ofefe.

3 Kidie, obo re ma ghanre re yono uvwe yen mi yono ovwan, nẹ Kristi ghwuru fikirẹ imwemwu rẹ avwanre kirobo rẹ Isiesi Ọfuanfon na tare; 4 nẹ e shiro, e, nẹ a kparerọ vrẹn vwẹ ẹdẹ rerha kirobo rẹ Isiesi Ọfuanfon na tare; 5 nẹ ọ vwomaphia kẹ Sifas,* tavwen ọ ke vwomaphia kẹ Ihwivẹ na. 6 Ọyena vwọ wan nu ọ da vwomaphia kẹ iniọvo re vrẹ 500 ẹsiẹvo, buebun rayen vẹ avwanre je herọ, dede nẹ evo vwẹ usun rayen vwerhẹnre vwọrẹ ughwu re. 7 Ọyena vwọ wan nu ọ da vwomaphia kẹ Jems, ọ ke je vwomaphia kẹ iyinkọn na ejobi. 8 Ọ rọ koba, ọ da je vwomaphia kẹ vwẹ kerẹ ọmọ re vwiẹre jẹ emeranvwe* rọyen gbare-e.

9 Mẹvwẹ yen ma hanvwe vwẹ usun rẹ iyinkọn na, mi fo ohwo re se ọyinkọ-ọn, kidie mi mukpahen ukoko rẹ Ọghẹnẹ. 10 Ẹkẹvuọvo womarẹ ẹse rẹ Ọghẹnẹ re muwan rọye-en yen me vwọ hẹ obo re me hepha na. Ẹse re muwan rọye-en ro dje kẹ vwẹ na dia ofefe-e, kidie me wian vrẹ ayen ri chekọ na eje; jẹ ọ dia ẹgba mẹ-ẹ, ẹkẹvuọvo womarẹ ẹse re muwan rọye-en rẹ Ọghẹnẹ dje kẹ vwẹ. 11 Ọtiọyena, owenẹ ọ dia omẹvwẹ yẹrẹ ayen, enẹ yen avwanre ghwoghwo ovuẹ na, enẹ yen ovwan ji segbuyota.

12 Enẹna, ọ da dianẹ e ghwoghwo nẹ a kpare Kristi vrẹn nẹ ushi, kẹ diesorọ evo vwẹ usun rẹ ovwan na vwọ tanẹ evrẹnushi herọ-ọ? 13 Ọ da ghene dianẹ evrẹnushi herọ-ọ, kọyen a kpare Kristi nẹ ushi-i. 14 Jẹ ọ da dianẹ a kpare Kristi nẹ ushi-i, kọyen aghwoghwo rẹ avwanre ofefe, esegbuyota rẹ ovwan jẹ ofefe. 15 Vwọba, ọ da dianẹ a cha kpare ihwo ri ghwuru vrẹ-ẹn, kọyen avwanre ihwo ri soseri rẹ efian kpahen Ọghẹnẹ, kidie avwanre tanẹ ọ kpare Kristi vrẹn nẹ ushi, jẹ ọ kparerọ vrẹ-ẹn. 16 Ọ da dianẹ a cha kpare ihwo ri ghwuru vrẹ-ẹn, kọyen a je kpare Kristi vrẹ-ẹn. 17 Vwo kpobarophiyọ, ọ da dianẹ a kpare Kristi vrẹ-ẹn, kọyen esegbuyota rẹ ovwan ofefe; ovwan jehẹ imwemwu rẹ ovwan. 18 Vwọba, idibo ri Kristi re vwerhẹn vwọrẹ ughwu na ghwọrọ kufia. 19 Ọ da dianẹ evunrẹ akpọ nana ọvo yen avwanre de vwo iphiẹrophiyọ kpahen Kristi, avwanre kọyen e me vwerhe kẹ vwọ vrẹ kohwo kohwo.

20 Jẹ asaọkiephana, a kpare Kristi nẹ ushi re, kerẹ omamọ rẹsosuọ rẹ otu re vwerhẹn vwọrẹ ughwu. 21 Kirobo rẹ ughwu womarẹ ohwo ọvo rhe na, ọtiọyen evrẹnushi rẹ ihwo ri ghwuru je womarẹ ohwo ọvo rhe. 22 Kirobo rẹ ihwo ejobi ghwẹ fikirẹ Adam na, ọtiọyen ihwo ejobi ji che vwo arhọ fikirẹ Kristi. 23 Vwo nene ọrhuẹrẹphiyotọ na, Kristi omamọ rẹsosuọ, kẹsiẹye o ki te ihwo re vẹ Kristi gba herọ vwẹ ọke rẹ ọrhire* rọyen. 24 Ọyena da wan nu, kẹ oba na, rọ cha vwọ vwẹ Uvie na kẹ Ọghẹnẹ kugbe Ọsẹ rọyen, ọke rọ da vwẹ usuon kugbe ogangan kugbe ẹgba ejobi vwo toba nu. 25 Kidie o che sun kerẹ ovie bẹsiẹ Ọghẹnẹ vwo phi ivwighrẹn rọyen ejobi phiyọ obotọ awọ rọyen. 26 Ughwu rọ dia ọvweghrẹn rọ koba na, ke che sio no. 27 Kidie Ọghẹnẹ phi erọnvwọn eje phiyọ obotọ awọ rọyen. Ẹkẹvuọvo ọke rọ vwọ tanẹ ‘e phi emu eje phiyọ obotọ rọyen,’ o muẹro dẹn nẹ Ohwo ro phi erọnvwọn eje phiyọ obotọ rọyen na hẹ usun rẹ erọnvwọn re phi phiyọ obotọ rọyen na-a. 28 Ọke re de phi erọnvwọn eje phiyọ obotọ rọyen nu, Ọmọ na komobọ ko ji che phi oma rọyen phiyọ obotọ rẹ Ohwo ro phi erọnvwọn eje phiyọ obotọ rọyen na, rere Ọghẹnẹ sa vwọ dia erọnvwọn eje vwọ kẹ ihwo ejobi.

29 Ọ rha dia ọtiọye-en, erere vọ yen herọ vwọ kẹ ihwo re bruphiyame vẹ ẹwẹn nẹ ayen che ghwu? Ọ da dianẹ a cha rhọvwọn ihwo ri ghwuru nẹ ushi kakaka-a, kẹ diesorọ e vwo bru ayen phiyame vẹ ẹwẹn yena? 30 Diesorọ avwanre je vwọ hẹ ẹdia rẹ imuoshọ kọke kọke? 31 Mi hirharokuẹ ughwu kẹdi kẹdẹ. Iniọvo, ọnana muẹro kirobo rẹ aghọghọ ri mi vwori fikirẹ ovwan vwevunrẹ Kristi Jesu Ọrovwavwanre je hepha. 32 Ọ da dianẹ mi nene eranvwe re djoma họnre vwẹ Ẹfesọs kerẹ ihwo efa,* erere vọ yen che te vwe obọ? Ọ da dianẹ a cha kpare ihwo ri ghwuru nẹ ushi-i, “e gbe jẹ avwanre re, rere a da, kidie odẹ rọ cha na ke che ghwu.” 33 Wo jẹ a phiẹn wẹ-ẹn. Erharhe igbeyan* miovwo omamọ rẹ uruemu.* 34 Ovwan vwẹ iroro rẹ ovwan vwo ruiruo vwẹ idjerhe rẹ ọsoso, ovwan ruẹ umwemwu-u, kidie ihwo evo vwo erianriẹn rẹ Ọghẹnẹ-ẹ. Me ta ọnana rere oma vwọ vo ovwan.

35 Dedena, ohwo ọvo cha ta: “Mavọ yen a cha kpare ihwo ri ghwuru nẹ ushi wan? Oka rẹ ugboma vọ yen ayen che vwo vrẹn?” 36 Wẹwẹ ro vwo ọhọ na-a! Oborẹ wọ kọnre cha sa djẹ-ẹ, jokpanẹ kẹ o ghwuru tavwen. 37 Ẹkẹvuọvo, wọ kọn orọnvwọn rọ djẹ nure-e, ukperẹ ọtiọyen ubi yen wọ kọn, owenẹ ọ dia iwiti yẹrẹ oka rẹ ubi ọfa; 38 ẹkẹvuọvo, Ọghẹnẹ ruo rere ọ djẹ kirobo rọ guọnọre, ọ je vwẹ oka rẹ oma sansan vwọ kẹ ubi ọvuọvo. 39 Ugboma na eje dia oka ọvo-o, kidie ugboma rẹ ihworakpọ herọ, ugboma rẹ erhuẹn herọ, ugboma rẹ ephran herọ, ugboma rẹ erin je herọ. 40 Oma rẹ obodjuvwu herọ, oma rẹ akpọ na je herọ; ẹkẹvuọvo urinrin rẹ oma rẹ obodjuvwu na oka ọvo, urinrin rẹ oma rẹ akpọ na ke rha oka ọfa. 41 Urinrin rẹ ọnre na oka ọvo, urinrin rẹ emeranvwe na oka ọfa, urinrin rẹ isio na je oka ọfa, vwọrẹ uyota, urinrin rẹ isio na ọvuọvo fẹnẹ ohwohwo.

42 Ọtiọyen evrẹnushi rẹ ihwo ri ghwuru na je hepha. A kọnrọ vwẹ obo ri gbon; a da kparọ vrẹn vwẹ obo ri jegbon. 43 A kọnrọ vwẹ jẹ ọghọ evwo; a da kparọ vrẹn vwẹ urinrin. A kọnrọ vwẹ ovwiẹrẹ; a da kparọ vrẹn vwẹ ogangan. 44 A kọnrọ vwẹ ugboma re rhiẹromrẹ; a da kparọ vrẹn vwẹ ugboma rẹ ẹwẹn. Ugboma re rhiẹromrẹ da herọ, kọyen ugboma rẹ ẹwẹn je herọ. 45 Kọyensorọ e vwo sio phiyotọ: “Ọshare rẹsosuọ Adam da rhe dia ohwo* ro yerẹn.” Adam rọ koba da rhe dia ohwo rẹ ẹwẹn rọ vwẹ arhọ kẹ ihwo. 46 Ẹkẹvuọvo, ọ dia ọ rẹ ẹwẹn na yen ọrẹsosuọ-ọ. Ọ re rhiẹromrẹ na yen ọrẹsosuọ, tavwen a ke rhe mrẹ ọ rẹ ẹwẹn na. 47 Akpọ na yen ọshare rẹsosuọ na nurhe, ekpẹn yen a vwọ ma; ọshare rivẹ na, obodjuvwu yen o nurhe. 48 Kirobo rẹ ọ ra vwẹ ekpẹn ma na hepha na, ọtiọyen otu ra vwẹ ekpẹn ma je hepha; kirobo rẹ ọ ro nẹ obodjuvwu rhe na hepha na, ọtiọyen otu rehẹ obodjuvwu je hepha. 49 Kirobo rẹ avwanre dia uhoho rẹ ohwo ra vwẹ ekpẹn ma na, ọtiọyen avwanre je cha dia uhoho rẹ ọ ro nẹ obodjuvwu rhe na.

50 Ẹkẹvuọvo mi jẹ ovwan riẹn ọnana iniọvo, nẹ uvwo vẹ ọbara cha sa riuku rẹ Uvie rẹ Ọghẹnẹ-ẹ, yẹrẹ obo ri gbon cha sa riuku ri jegbo-on. 51 Nighere! Me vuẹ ovwan odjahọn ọfuanfon ọvo: Ọ dia avwanre eje yen cha vwerhẹn vwọrẹ ughwu-u, ẹkẹvuọvo avwanre eje che wene, 52 siẹvuọvo vwẹ aroẹbrẹ ọvo na, vwẹ ọke re de hworo owanre rọ koba na. Kidie e che hworo owanre na, irivwin na ki che vrẹn vwo kpo jegbon, avwanre ki che wene. 53 Kidie ofori nẹ oma nana ro gbon na ku jegbon phiyọ, oma nana ro ghwẹ na mi rhe ku jeghwo phiyọ. 54 Ẹkẹvuọvo, ọke rẹ ọnana ro gbon na de ku jegbon phiyọ, rẹ ọnana ro ghwẹ na de ku jeghwo phiyọ re, obo re si phiyotọ na ko che rugba: “E mu ughwu rọ bẹdẹ.” 55 “Ughwu, ophikparobọ wẹn rhọ? Ughwu, obi wẹn rhọ?” 56 Umwemwu yen obi rọ sua ughwu, Urhi na yen ẹgba rẹ umwemwu. 57 Ẹkẹvuọvo, akpẹvwẹ kẹ Ọghẹnẹ, kidie ọ kẹ avwanre ophikparobọ womarẹ Ọrovwavwanre Jesu Kristi!

58 Ọtiọyena, iniọvo mẹ eghanghanre, ovwan mudia gan, ovwan yeghe-e, ovwan vwo iruo buebun rẹ ovwan che rhe ruẹ vwevunrẹ Ọrovwori na, rẹ ovwan vwọ riẹn nẹ owian rẹ ovwan wian kẹ Ọrovwori na ghwruru-u.