Diesorọ Avwanre Vwọ Sẹn Omamọ Osẹnvwe Kpẹ Uyono?

Wo se noso vwẹ ibroshọ nana nẹ Iseri ri Jihova sẹn omamọ osẹnvwe kpẹ uyono? Diesorọ avwanre vwọ sẹn omamọ osẹnvwe?

Avwanre muọghọ kẹ Ọghẹnẹ. Ọ diẹ ugboma avwanre ọvo yen Ọghẹnẹ nẹ-ẹ. (1 Samuẹl 16:7) Ẹkẹvuọvo, ọdavwẹ avwanre ọyen e vwo muọghọ kẹ Ọghẹnẹ vẹ iniọvo avwanre siẹrẹ avwanre de kpẹ uyono. Ọ da dianẹ avwanre guọnọ kpẹ aguare re mudia obaro oguẹdjọ, avwanre cha nabọ sẹn osẹnvwe ro shephiyọ. Ọtiọyen ọ je hepha, siẹrẹ avwanre de kpẹ uyono, avwanre je nabọ sẹn osẹnvwe vwo brọghọ phiyọ asan rẹ avwanre da vwoma, kugbe Jihova Ọghẹnẹ, rọ dia “Obrorhiẹn rẹ akpọ na.”​—Jẹnẹsis 18:25.

Ọ nẹrhẹ a riẹn odjekẹ rẹ avwanre nene. Baibol na jiriro kẹ Inene-ri-Kristi nẹ ayen sẹn osẹnvwe rẹ “omaevwokpotọ [‘abavo,’ NW ] vẹ iroro.” (1 Timoti 2:9, 10) Ravwọ sẹn osẹnvwe rẹ “omaevwokpotọ” yẹrẹ ọrẹ abavo, mudiaphiyọ ravwọ kẹnoma kẹ osẹnvwe ri dje oma ohwo phia, yẹrẹ re tamuẹ oma. Vwọba, “iroro” ro fiotọ chọn avwanre uko vwọ kẹnoma kẹ iwun re rho gan nọ yẹrẹ re hanvwe gan nọ. Odjekẹ nana je kẹ avwanre uphẹn ravwọ sen osẹnvwe ro je avwanre. Avwanre rha tobọ tota-a, omamọ osẹnvwe se “mu ọghọ kẹ uyono rẹ Ọghẹnẹ, Osivwi rẹ avwanre,” ọ je sa “vwẹ ejiro kẹ Ọghẹnẹ.” (Taitọs 2:10; 1 Pita 2:12) Avwanre da sẹn omamọ osẹnvwe kpẹ uyono, ọ nẹrhẹ ihwo vwẹ ẹro ọghanghanre vwo nẹ ẹga rẹ avwanre vwọ kẹ Jihova.

Wo jẹ iwun djẹ wẹ Ọguan Ruvie avwanre ẹ cha-a. E rha tobọ ghanre dede-e, e jẹ ayen dia fuanfon, yoyovwin, i mi ji faro.

• Mavọ yen osẹnvwe avwanre ghanre te vwẹ ẹga rẹ avwanre?

• Odjekẹ vọ yen avwanre nene a da tota kpahen osẹnvwe?