Ono Yen Job?

O vwo ọshare ọvo rọ dia otọ rẹ Uz, odibo rẹ Jihova ọyen o ruẹ. Odẹ rọyen Job. Ọdafe rode ro ji vwo orua rode. Ohwo ro ruẹse, rọ vwẹ ukẹcha kẹ ivwiogbere, eyauku, vẹ emọ ri vwo esẹ vẹ ini-i. Ẹkẹvuọvo, Job vwọ dia omamọ ohwo na, ko mudiaphiyọ nẹ o rhe vwo ebẹnbẹn vuọvo-o?

Job riẹnre nẹ Eshu tẹnrovio-o. Jihova da vuẹ Eshu: ‘Wọ mrẹ odibo mẹ Job? O vwo ohwo vuọvo rọ họherọ vwẹ akpọ na-a. Ọ kerhọ mẹ, o ji ruẹ obo ri yovwirin.’ Idẹbono da kpahen kẹ: ‘Me riẹnre nẹ Job kerhọ kẹ wẹ. Wọ gbogba riariẹ phiyọ, wo ji bruba kẹ. Wọ kẹrẹ etọ vẹ eranvwe buebun. Wọ da reyọ ayen eje mie, ọ rha cha ga wẹ-ẹ.’ Jihova da ta: ‘Wọ sa davwen Job ni. Ẹkẹvuọvo, wo hwe-e.’ Diesorọ Jihova vwọ vwẹ uphẹn kẹ Eshu nẹ ọ davwen Job ni? O vwo imuẹro nẹ Job cha yọnregan.

Eshu da vwẹ ebẹnbẹn sansan vwọ davwen Job ni. Ẹsosuọ, o ji ihwo rẹ Seba nẹ ayen re cho irhuẹn vẹ ekẹtẹkẹtẹ rẹ Job. Erhanre da rha torhẹ igegede rẹ Job ejobi. Ihwo rẹ Kaldia de rhe cho ikamẹl rọyen. Idibo rọyen re vwẹrote eranvwe yena eje ghwuru. Okpetu rọ ma gan kparobọ da rha phia. Emọ rẹ Job eje de ghwu ọke rẹ uwevwin rẹ ayen da riakpọ vwọ she teyen ayen. Ọnana nẹrhẹ Job muomaphiyọ mamọ, ẹkẹvuọvo ọ je yọnregan.

Eshu je guọnọ nẹ oja rẹ Job na gan vrẹ ọtiọyen dede, ọtiọyena ọ da nẹrhẹ era vọn oma rọyen eje. Ọnana so ọmiaovwẹ ọgangan vwọ kẹ. Job riẹn oboresorọ erọnvwọn nana eje vwọ phia kẹ-ẹ. Dedena, ọ je ga Jihova. Ọghẹnẹ mrẹ obo re phiare na eje, oma rẹ Job da nabọ vwerhọn.

Eshu de ji eshare erha ra davwen Job ni. Ayen da vuẹ: ‘Omuẹro nẹ wo ru umwemwu ọvo wo siẹnẹ. Ọghẹnẹ yen gboja kẹ wẹ na.’ Job da ta: ‘Mi ru umwemwu vuọvo-o.’ Ẹkẹvuọvo, ko roro nẹ Jihova yen sua ebẹnbẹn rọyen na, ọ da je tanẹ Ọghẹnẹ shenyẹ ọyen.

Eghene re se Elihu fotovwin ọke rẹ ayen vwọ ta ota. Ọ da rhe ta: ‘Eta rẹ ovwan eje na gbare-e. Jihova rho vrẹ oborẹ avwanre roro. O che se ru umwemwu vuọvo-o. Ọ mrẹ kemu kemu, ọ je vwẹ ukẹcha kẹ ihwo vwẹ ọke rẹ ebẹnbẹn.’

Jihova da kpahen kẹ Job. Ọ da ta: ‘Tivọ wọ hepha ọke me vwọ ma odjuvwu vẹ otọrakpọ na? Diesorọ wọ vwọ tanẹ mi shenyẹ wẹ? Wọ ta eta, dede nẹ wọ riẹn obo re nẹrhẹ erọnvwọn evo phia-a.’ Job da rhọnvwe oruchọ rọyen, ọ da ta: ‘Me ta chọ. Mi nyo kpahen owẹ re, jẹ enẹna, me rhe nabọ riẹn wẹ re. O vwo emu vuọvo rọ bẹn kẹ wẹ-ẹ. Wọ ghwọ nẹ me ta erharhe eta-a.’

Edavwini na vwọ wan nu, Jihova da vwẹ omakpokpọ rẹ Job vwọ rhoma kẹ, ọ da je vwẹ efe buebun vwọ kẹ vrẹ obo ro vwori jovwo. Job de yeren akpọ rẹ omavwerhovwẹn, ọ da dia ikpe buebun. Jihova ku ebruphiyọ ku Job kidie o nyupho rọyen tobọ vwẹ ọke rẹ ebẹnbẹn. Wọ cha ga Jihova kerẹ Job ọ da tobọ dianẹ wo hirharokuẹ edavwini?