AGHỌGHỌ Ọyen Uruemu rẹ Avwanre Yono Mie Ọghẹnẹ

KOHWO kohwo guọnọ omavwerhovwẹn. Ẹkẹvuọvo, ihwo ejobi rioja rẹ ukpokpoma rẹ “ẹdẹ ebrabra” nana. (2 Tim. 3:1) Oma vwerhen ihwo evo-o, fikirẹ ọga, uvweri, oshenyẹ, jẹ iruo evwo, kugbe erọnvwọn ebrabra efa re sua ẹnwan vẹ omaemuophiyọ kẹ ihworakpọ. Ọnana je sa phia kẹ idibo rẹ Ọghẹnẹ. Mavọ yen wọ sa vwọ rhoma vwo aghọghọ wẹn rhivwin, siẹrẹ wọ da mrẹ oma wẹn vwẹ ẹdia tiọyena?

Tavwen a ke sa kpahenphiyọ onọ yena, ofori nẹ a riẹn oborẹ uvi rẹ aghọghọ mudiaphiyọ, kugbe oborẹ ihwo evo sa vwọ sẹro rẹ aghọghọ rayen dede nẹ ayen hirharoku ebẹnbẹn. Ukuotọ rọyen, ka cha fuẹrẹn oborẹ avwanre komobọ sa vwọ sẹro rẹ aghọghọ rẹ avwanre, ji ruo vọn.

Ofẹnẹ herọ vwẹ uvwre rẹ aghọghọ vẹ ehwẹ. Kerẹ udje: Ọgbaudi da da udi nu, ko muẹ hwẹ. Jẹ, ẹro rọyen de totọ re, ọ me rhoma muomaphiyọ fikirẹ ebẹnbẹn vẹ ofudjevwe rẹ akpeyeren. Kidie omavwerhovwẹn rẹ ọmọke krẹn rọyen na, dia uvi rẹ aghọghọ-ọ.​—Isẹ 14:13.

Vwọ fẹnẹ ọyena, ubiudu na yen uvi rẹ aghọghọ nẹ cha. A fanrọ phiyọ “omavwerhovwẹn ro rhe ohwo fikirẹ orọnvwọn oyoyovwin ro te re obọ, yẹrẹ rọ rhẹro rọyen.” Aghọghọ, ọyen omavwerhovwẹn rẹ ohwo se vwo, o torori sẹ erọnvwọn shephiyọ yẹrẹ i shephiyọ-ọ. (1 Tẹsa. 1:6) Vwọrẹ uyota, ohwo rẹ ophu tobọ muẹ fikirẹ ebẹnbẹn rọyen je sa aghọghọ. Kerẹ udje, o vwo ọke ọvo ra vwọ fa iyinkọn na kidie nẹ ayen vuẹ ihwo kpahen Jesu. Dedena, ayen “de vrẹn nẹ ẹguare na, re ghọghọ fiki robo re vwo kere ayen phihọ ihwo re reoja rẹ ophọphọvwe fiki rẹ Odẹ na.” (Iruo 5:41) O muẹro nẹ ọ dia ẹfa ra fa ayen na yen nẹrhẹ ayen ghọghọ-ọ. Ẹkẹvuọvo, ayen ghọghọre kidie nẹ ayen sẹro rẹ ọyọnregan rayen.

O vwo ohwo vuọvo re vwiẹre vẹ uruemu rẹ aghọghọ-ọ, ọ je dia obo re se vwo kpregede-e. Diesorọ? Kidie uvi rẹ aghọghọ, ọyen ẹbẹre ọvo rẹ omamọ rẹ ẹwẹn ọfuanfon rẹ Jihova. Ẹwẹn ọfuanfon na sa chọn avwanre uko vwo “ku ohwo ọkpokpọ na phihọ,” yẹrẹ vwo iruemu kpokpọ rẹ aghọghọ dia ọvo rayen. (Ẹfe. 4:24; Gal. 5:22) Aghọghọ sa chọn avwanre uko vwo yerin ghene ebẹnbẹn rẹ akpeyeren.

Jihova guọnọ mrẹ erhuvwu vwẹ akpọ na, ukperẹ umiovwo rẹ avwanre rhiẹromrẹ nonẹna. Dedena, orukuruku rẹ ihwo ruẹ vwẹ akpọ na che se mie Jihova aghọghọ rọye-en. Vwọ kpahen Ọghẹnẹ, Baibol na da ta: “Ẹgba vẹ aghọghọ e hẹ asan rọye.” (1 Ikun 16:27) Vwọba, ẹgbaẹdavwọn rẹ avwanre nẹrhẹ “udu [rẹ Jihova] ghọghọ.”​—Isẹ 27:11.

Avwanre sa vwẹrokere Jihova siẹrẹ a da kẹnoma kẹ ẹnwan okamuka kpahen obo re rhẹro rọyen rọ je phia-a. Ukperẹ avwanre vwọ kpare aghọghọ rẹ avwanre kufia, ofori nẹ a tẹnrovi erọnvwọn iyoyovwin rẹ avwanre vwori asaọkiephana, rere e chirakon hẹrhẹ erhuvwu rọ cha obaro.a

Baibol na vọnre vẹ ikuegbe rẹ ihwo buebun re sẹro rẹ aghọghọ rayen ọke rẹ ayen vwo hirharoku ebẹnbẹn. Ebraham rhiẹromrẹ ukpokpoma vwo nẹ obọ rẹ ihwo sansan, o ji vwo ọke evo rọ vwọ mrẹ oma rọyen vwẹ ẹdia rẹ imuoshọ. (Jẹn. 12:10-20; 14:8-16; 16:4, 5; 20:1-18; 21:8, 9) Ẹkẹvuọvo, ọ nabọ sẹro rẹ aghọghọ rọyen vwẹ ẹdia nana eje. Die yen chọn rọ uko? O mu ẹwẹn rọyen eje kpahen iphiẹrophiyọ na nẹ ọ cha dia otọ rẹ usuon rẹ Mesaya na vwẹ akpọ kpokpọ rọ cha na. (Jẹn. 22:15-18; Hib. 11:10) Jesu da ta: “Ọsẹ rẹ ovwan Ebraham ghọghọre nẹ ọye mrẹ ẹdẹ mẹ; ọ mrẹrẹ ọ da ghọghọ.” (Jọn 8:56) Avwanre sa vwẹrokere Ebraham siẹrẹ avwanre de mu ẹwẹn kpahen aghọghọ rọ cha obaro na.​—Rom 8:21.

Kerẹ Ebraham, ọyinkọn Pọl kugbe ọrivẹ rọyen Sailas mu ẹwẹn rayen kpahen ive rẹ Ọghẹnẹ. Esegbuyota rayen pha kokoroko, ayen je sẹro rẹ aghọghọ rayen dede nẹ e mu kpahen ayen. Kerẹ udje, ọke re vwo hwe ayen gangan ji mu ayen phiyọ uwodi nu, “vwẹ oma rẹ uherevie ason Pọl kugbe Sailas [ke] nẹ ẹrhovwo” je sua une vwo jiri Ọghẹnẹ. (Iruo 16:23-25) Vwọba iphiẹrophiyọ rayen, Pọl vẹ Sailas ghọghọre kidie ayen rioja fikirẹ odẹ rẹ Kristi. Avwanre sa vwẹrokere ayen siẹrẹ avwanre da tẹnrovi ebruphiyọ rọhẹ evunrẹ ẹga rẹ Jihova.​—Fil. 1:12-14.

Iniọvo buebun herọ nonẹna, re nabọ sẹro rẹ aghọghọ rayen vwẹ ọke rẹ ebẹnbẹn. Kerẹ udje, vwẹ November 2013, ogiribo rode re se Super Typhoon Haiyan da guọghọ asan evo vwẹ ẹkuotọ rẹ Philippines. Uwevwin rẹ erua rẹ Iseri rẹ Jihova ri te omarẹ 1,000 yen guọghọre. George, rẹ ogiribo na guọghọ uwevwin rọyen totọ vwẹ orere rẹ Tacloban da ta: “Dede nẹ okpetu rode nana te avwanre oma, iniọvo na muomaphiyọ-ọ. A mrẹ vwo dje aghọghọ ro rhe avwanre-e.” Avwanre da vwẹ ọkieje vwo roro kpahen oborẹ Jihova ruẹ kẹ avwanre, ka sa sẹro rẹ aghọghọ rẹ avwanre, o toro obo re rhieromrẹ-ẹ. Die ọfa yen Jihova vwọ kẹ avwanre rọ nẹrhẹ avwanre ghọghọ?

Oyerinkugbe rẹ avwanre vẹ Jihova yen obo re ma kẹ avwanre aghọghọ. Di roro: Avwanre riẹnre nẹ Jihova rọ dia Ọsẹ, Ọghẹnẹ, kugbe Ugbeyan rẹ avwanre, yen me kpenu vwẹ akpọ vẹ odjuvwu!​—Une 71:17, 18.

Oma je vwerhen avwanre nẹ Jihova kẹ avwanre arhọ kugbe ogangan ra sa vwọ riavwerhen rẹ akpeyeren. (Aghwo. 3:12, 13) Jihova si avwanre te oma, ọ vuẹ avwanre ọhọre rọyen vwọ kẹ ihworakpọ. (Kọl. 1:9, 10) Enana nẹrhẹ avwanre se yeren uvi rẹ akpeyeren. Vwọ fẹnẹ avwanre, ihwo buebun nonẹna yeren akpọ rayen odedede, kidie ayen riẹn ọhọre rẹ Ọghẹnẹ-ẹ. Vwọ kpahen ofẹnẹ nana, Pọl de si: “Obo rẹ ẹro je mrẹ dẹvo-o, eyẹ erhọn ji nyo-o, eyẹ udu rẹ ohwo rẹ akpọ ji roro phia-a, obo rẹ Ọghẹnẹ rhuẹrẹ phihọ otọ kẹ ayen otu re guọnerọ, Ọghẹnẹ vwe rọ phia kẹ avwanre vwẹ oma rẹ [“ẹwẹn ọfuanfon rọyen,” NW ] na.” (1 Kọr. 2:9, 10) Vwọrẹ uyota, oma vwerhen avwanre nẹ avwanre nabọ riẹn ọhọre rẹ Ọghẹnẹ.

Roro kpahen orọnvwọn ọfa rẹ Jihova ru kẹ ihwo rọyen. Oma vwerhen avwanre nẹ Jihova choma rọ vwọ reyọ vwo ghovwo imwemwu rẹ avwanre. (1 Jọn 2:12) Fikirẹ arodọnvwẹ rẹ Jihova, avwanre vwo imuẹro kpahen akpọ kpokpọ rọ cha kẹrẹkpẹ. (Rom 12:12) Avwanre vwo igbeyan buebun vwevunrẹ ukoko nana ri nene avwanre ga Jihova. (Une 133:1) Baibol na je kẹ avwanre imuẹro nẹ Jihova sẹro rẹ ihwo rọyen vwo nẹ abọ rẹ Eshu vẹ emekashe ebrabra rọyen. (Une 91:11) Avwanre de roro kpahen ebruphiyọ nana eje rẹ Jihova vwọ kẹ avwanre, o che torobo uvi rẹ aghọghọ ro rhe avwanre.​—Fil. 4:4.

Mavọ yen aghọghọ rẹ Onenikristi se vwo bunphiyọ? Jesu da ta: “Imu nana me ta kẹ ovwan, rere aghọghọ mẹ vwọ sa dia evun rẹ ovwan, rere aghọghọ rẹ ovwan yena vwọ vọn.” (Jọn 15:11) Ọnana ghwa odjephia nẹ e se ru aghọghọ rẹ avwanre rere o bunphiyọ. A sa vwẹ ẹgbaẹdavwọn tiọyena vwo dje erhanre re kokori. Wọ da guọnọ nẹ erhanre na nabọ la, ku wo che phi irhe phiyọ. Ọtiọyen ọ je hepha, wọ da guọnọ nẹ aghọghọ wẹn bunphiyọ, ku wọ vwẹ Ota rẹ Ọghẹnẹ vwọ ghẹrẹ oma wẹn. Karophiyọ: Ẹwẹn ọfuanfon rẹ Ọghẹnẹ yen sa nẹrhẹ e vwo aghọghọ. Ọtiọyena, aghọghọ wẹn che bunphiyọ siẹrẹ wọ da vwẹ ọkieje vwọ yare ukẹcha rẹ ẹwẹn ọfuanfon na, ji se Ota rẹ Ọghẹnẹ rẹ ẹwẹn rọyen mu ihwo vwo si.​—Une 1:1, 2; Luk 11:13.

Aghọghọ wẹn ji se bunphiyọ siẹrẹ wọ da nabọ muomaphiyọ iruo re kẹ Jihova omavwerhovwẹn. (Une 35:27; 112:1) Diesorọ? Kidie a ma avwanre ra vwọ “djẹ oshọ rẹ Ọghẹnẹ, rere [a] yọnrọn irhi rọye; kidie ọnana ọye iruo ro te ohwo.” (Aghwo. 12:13) Otọ rọyen, a ma avwanre vẹ ẹgba re se vwo ru ọhọre rẹ Ọghẹnẹ. Ọtiọyena, siẹrẹ a da ga Jihova ọ kẹ ohwo omavwerhovwẹn.b

Aghọghọ rẹ avwanre vwo buẹnphiyọ na, jẹ avwanre riavwerhen rẹ ebruphiyọ buebun. Kerẹ udje, kidie nẹ avwanre ga Jihova vwẹ kẹdia kẹdia rẹ avwanre hepha, ẹguọnọ rẹ Jihova vwo kpahen avwanre cha ganphiyọ. (Urhi 16:15; 1 Tẹsa. 5:16-18) Vwọba, uvi rẹ aghọghọ rẹ avwanre vwori cha nẹrhẹ a sa kẹnoma kẹ ẹvwọtua rẹ efe, o ji che mu avwanre vwọ vwẹ ekuakua vwo ze fikirẹ Uvie na. (Mat. 13:44) Erere ro che norhe na che toroba aghọghọ rẹ avwanre, ọ cha kẹ avwanre evunvọnvwẹ, o ji che toroba omavwerhovwẹn rẹ ihwo efa.​—Iruo 20:35; Fil. 1:3-5.

Ọshare ọvo rọ tẹn ona rẹ ehiahiẹ vwẹ University rẹ Nebraska rọhẹ United States tare nẹ, “Wo de yeren akpọ rẹ omavwerhovwẹn vẹ otekẹvwẹ asaọkiephana, wo che vwo omakpokpọ vwẹ ọke rọ cha obaro na.” Ota rọyen na ghwe shephiyọ vẹ ota rẹ Baibol nana: “Udu sasasa yẹ omamọ rẹ uhuvwu.” (Isẹ 17:22) O muẹro dẹn nẹ, aghọghọ che toroba omakpokpọ wẹn.

O toro oborẹ eyeren na gan te-e, ẹwẹn ọfuanfon na sa nẹrhẹ e vwo uvi rẹ aghọghọ. E se vwo ẹwẹn ọfuanfon na siẹrẹ e de muomaphiyọ ẹrhovwo ẹnẹ, uyono rẹ Baibol, kugbe eroro kpahọn rẹ obo re seri. Aghọghọ rẹ avwanre che bunphiyọ siẹrẹ e de roro kpahen ebruphiyọ rẹ avwanre riavwerhen rọyen asaọkiephana, vwẹrokere esegbuyota rẹ ihwo efa, ji ru ọhọre rẹ Ọghẹnẹ. Vwẹ idjerhe nana eje, avwanre mrẹ uyota rẹ Une Rẹ Ejiro 64:10, rọ tarẹ nẹ, “Jẹn ọvwata ghọghọ vwẹ evun rọ Ọrovwohwo na, rere o si oma nu vwẹ evun rọye.”