Vwẹrokere Jesu Rere Wo Vwo Ufuoma

1-2. Diesorọ Jesu vwọ ro ẹnwan?

JESU ro ẹnwan vwẹ ẹdẹ rọ koba tavwen o ki ghwu. Ọ riẹnrẹ nẹ ọyen che ghwu ughwu rẹ oja vwẹ abọ rẹ ihwo re riẹn Ọghẹnẹ-ẹ. Jẹ, ọ dia ughwu rọyen ro sikẹrire na yen nẹrhẹ ọ ro ẹnwa-an. O vwo ẹguọnọ rẹ Ọsẹ rọyen mamọ, ọtiọyena ọ guọnọ ru obo re cha nẹrhẹ oma vwerhọn. Jesu riẹnre nẹ ọyen che toroba ẹkparọ kpenu rẹ odẹ rẹ Ọsẹ rọyen siẹrẹ ọ da sa fuevun wanvrẹ ọdavwini ọgangan rọ hẹrhẹ vwẹ obaro na. Jesu vwo ẹguọnọ rẹ ihwo. Ọ riẹnre nẹ avwanre che vwo iphiẹrophiyọ rẹ arhọ rẹ bẹdẹ siẹrẹ ọyen da fuevun kẹ Jihova re duvwun oba.

² Dede nẹ Jesu ro ẹnwan ọgangan, o vwo ufuoma. Kọyensorọ ọ vwọ vuẹ idibo rọyen nẹ, “Ufuoma mẹ me vwọ kẹ ovwan.” (Jọn 14:27) O vwo “ufuoma rẹ Ọghẹnẹ” rọ dia ẹwẹn re dọe rẹ ohwo se vwo siẹrẹ o de vwo omamọ rẹ oyerinkugbe vẹ Jihova. Ufuoma yena yen nẹrhẹ ẹwẹn rọyen totọ.—Fil. 4:6, 7.

 3. Die yen a cha fuẹrẹn vwẹ uyono nana?

³ Idibo rẹ Jesu eje che rhiẹromrẹ edavwini, jẹ o vwo ohwo vuọvo vwẹ usun rẹ avwanre ro che rhiẹromrẹ oka rẹ oja rẹ Jesu chirakon rọye-en. (Mat. 16:24, 25; Jọn 15:20) Kerẹ Jesu, avwanre sa ro ẹnwan ọkiọvo. Mavọ yen a sa vwọ kẹnoma kẹ ẹnwan okamuka rọ sa nẹrhẹ aghọghọ va avwanre abọ? E gbe jẹ a fuẹrẹn erọnvwọn erha rẹ Jesu ruru vwẹ iruo rẹ aghwoghwo rọyen vwẹ otọrakpọ kugbe oborẹ avwanre sa vwọ vwẹrokere ọke re de hirharoku ebẹnbẹn.

 4. Vwo nene obo rehẹ 1 Tẹsalonaika 5:17, dje udje evo ri djerephia nẹ Jesu nẹrhovwo mamọ vwẹ ẹdẹ rọ koba rẹ akpeyeren rọyen vwẹ otọrakpọ?

⁴ Se 1 Tẹsalonaika 5:17. Jesu nẹrhovwo mamọ vwẹ ẹdẹ rọ koba rẹ akpeyeren rọyen vwẹ otọrakpọ na. Ọ nẹrhovwo phiyọ ikara vẹ udi rọ vwọ ton irueru rẹ ẹkarophiyọ rẹ ughwu rọyen phiyọ. (1 Kọr. 11:23-25) Jesu vẹ idibo rọyen nẹrhovwo tavwen ayen ki vrẹn nẹ asan rẹ ayen da re orẹ rẹ Ọwanvrẹ na. (Jọn 17:1-26) Ọ nẹrhovwo abọ buebun ọke rọ vẹ idibo na vwọ hẹ Ugbenu rẹ Oliv vwẹ ason yena. (Mat. 26:36-39, 42, 44) Ẹrhovwo yen ọ vwọ ta ota rọ tare kuko tavwen o ki ghwu. (Luk 23:46) Jesu nẹrhovwo rhe Jihova kpahen erọnvwọn eje re phiare vwẹ ẹdẹ rọ koba rẹ akpeyeren rọyen.

 5. Diesorọ iyinkọn na rhe se fiudugberi-i?

⁵ Ẹrhovwo vẹ ẹroẹvwọsuọ rẹ Jesu vwo kpahen Jihova yen nẹrhẹ o se chirakon rẹ edavwini ro hirharoku. Vwọ fẹnẹ Jesu, iyinkọn na se muomaphiyọ ẹrhovwo ẹnẹ vwẹ ason yena-a. Ọtiọyena, ayen rhe se fiudugberi ọke rẹ ọdavwini vwọ rhe-e. (Mat. 26:40, 41, 43, 45, 56) Avwanre sa fuevun chirakon rẹ edavwini siẹrẹ a da vwẹrokere Jesu vwọ “rẹ” yẹrẹ nẹrhovwo ọkeneje. Die yen avwanre sa nẹrhovwo kpahen?

 6. Mavọ yen esegbuyota sa vwọ chọn avwanre uko vwo vwo ufuoma?

⁶ Avwanre sa nẹrhovwo rhe Jihova nẹ o “ru esegbuyota rẹ avwanre bu.” (Luk 17:5; Jọn 14:1) Avwanre guọnọ esegbuyota, kidie kohwo kohwo ro nene Jesu che rhiẹromrẹ ọdavwini vwo nẹ obọ rẹ Eshu rhe. (Luk 22:31) Mavọ yen esegbuyota sa vwọ chọn avwanre uko vwo vwo ufuoma, ọ da tobọ dianẹ avwanre hirharoku edavwini sansan? Avwanre de ru oborẹ avwanre se ru eje nu, esegbuyota che mu avwanre vwo phi ebẹnbẹn na phiyọ obọ rẹ Jihova. Ọtiọyena, ẹwẹn rẹ avwanre ko se totọ, kidie avwanre riẹnre nẹ ọyen ọvo yen sa rhuẹrẹ ebẹnbẹn avwanre phiyọ vwẹ idjerhe rẹ oma de se fun avwanre.—1 Pita 5:6, 7.

 7. Die yen wo yono vwo nẹ udje rẹ Robert rhe?

⁷ O toro edavwini rẹ avwanre hirharoku-u, ẹrhovwo cha nẹrhẹ ẹwẹn rẹ avwanre totọ. Roro kpahen udje rẹ ọkpako ọvo re se Robert rọ vrẹ ẹgbukpe 80 re. Ọ da ta: “Uchebro rọhẹ Filipae 4:6, 7 chọn vwẹ uko vwo yerin ghene ebẹnbẹn sansan vwẹ akpeyeren. Uweren gan kẹ vwẹ, uphẹn rẹ ẹga je va vwẹ abọ vwẹ uvwre ọke ọvo.” Die yen nẹrhẹ Robert se vwo ẹwẹn rẹ dọe ọke yena? Ọ da ta: “Ẹnwan da ghwa cha, ke me nẹrhovwo. Mi niroso nẹ ọke mi de muomaphiyọ ẹrhovwo ẹnẹ, ẹwẹn mẹ ko totọ.”

 8. Kirobo rẹ Jọn 8:29 tare, die yen orọnvwọn ọfa rọ nẹrhẹ ẹwẹn rẹ Jesu dia dọe?

⁸ Se Jọn 8:29. Jesu vwo ẹwẹn re dọe ọke re vwo mukpahọn, kidie ọ riẹnre nẹ ọhọre rẹ Ọsẹ rọyen yen o ruẹ. Ọ fuevun vwẹ ọke rọ vwọ bẹn kẹ. Ọ vwẹ ẹga rẹ Jihova vwọ kobaro, kidie o vwo ẹguọnọ rẹ Ọsẹ rọyen. Jesu nene Ọghẹnẹ wian kugbe kerẹ “onotu rẹ ọwena” tavwen ọ ke rhe akpọ na. (Isẹ 8:30) O de ji ghwoghwo kpahen Ọsẹ rọyen vẹ oruru ọke rọ vwọ hẹ otọrakpọ na. (Mat. 6:9; Jọn 5:17) Iruo yena ghene kẹ Jesu aghọghọ rode.—Jọn 4:34-36.

 9. Mavọ yen iruo rẹ aghwoghwo re muomaphiyọ sa vwọ chọn avwanre uko vwo vwo ẹwẹn re dọe?

⁹ Avwanre sa vwẹrokere Jesu siẹrẹ e de nyupho rẹ Jihova, ji “dje ebuo-ebuo phihọ vwẹ iruo rẹ Ọrovwohwo” na. (1 Kọr. 15:58) Avwanre sa vwẹ ẹro abavo vwo ni ebẹnben rẹ avwanre siẹrẹ e de “gboma phihọ” iruo rẹ aghwoghwo na. (Iruo 18:5) Kerẹ udje, ihwo buebun rẹ avwanre ghwoghwo ota kẹ na hirharoku ebẹnbẹn re gan vrẹ e rẹ avwanre shesheri. Jẹ, ayen de rhi vwo ẹguọnọ rẹ Jihova ji yeren akpọ nene odjekẹ rọyen, akpeyeren rayen mi rhi yovwinphiyọ, oma kọ je vwerhen ayen. Emu tiọyena da phia, ọ kẹ avwanre imuẹro nẹ Jihova cha vwẹrote ọdavwẹ rẹ avwanre. Imuẹro yena nẹrhẹ ẹwẹn rẹ avwanre dia dọe. Oniọvo aye ọvo rọ rioja rẹ ofudjevwe, ro ji ni oma rọyen kueku mrẹ ẹkpo nana vughe. Ọ da ta: “Mi de muomaphiyọ iruo rẹ aghwoghwo na, ẹwẹn mẹ ko totọ, oma kọ je vwerhen ovwẹ. Kidie ọke me dahẹ iruo rẹ aghwoghwo na yen mẹ vẹ Jihova ma vwọ kẹrẹ ohwohwo.”

10. Die yen wo yono vwo nẹ udje rẹ Brenda rhe?

¹⁰ Ji roro kpahen udje rẹ oniọvo aye ọvo re se Brenda. Ọ vẹ ọmọtẹ rọyen rioja rẹ ọga ọbrabra ọvo re se multiple sclerosis. Brenda sa ya-an, agbara yen evwo ghorie. Ọ davwẹngba vwo vwobọ vwẹ aghwoghwo rẹ nuwevwin kpuwevwin siẹrẹ oma na da kẹ uphẹn, jẹ ọke buebun na, ẹbe yen o siẹ vwo ghwoghwo ota kẹ ihwo. Ọ da ta: “Me ghwa vwọ riẹn nẹ e che se sivwin ọga mẹ vwẹ eyeren nana-a, mi de muomaphiyọ iruo rẹ aghwoghwo na. Me karophiyọ ebẹnbẹn mẹ ọke me dahẹ iruo rẹ aghwoghwo na-a. Ukperẹ ọtiọyen, ke me tẹnrovi oborẹ me sa vwọ vwẹ ukẹcha kẹ ihwo rehẹ ekogho rẹ avwanre de ghwoghwo na. Ọ je nẹrhẹ me karophiyọ iphiẹrophiyọ mi vwo kpahen obaro na.”

11-13. (a) Idjerhe vọ yen iyinkọn na vẹ ihwo efa vwo djephia nẹ ayen uvi rẹ igbeyan kẹ Jesu? (b) Mavọ yen uruemu rẹ igbeyan rẹ Jesu djobọte wan?

¹¹ Iyinkọn rẹ Jesu djerephia nẹ ayen uvi rẹ igbeyan kẹ, vwẹ uvwre rẹ ọke ro vwo ruiruo rẹ aghwoghwo rọyen rọ vọnre vẹ egbabọse. Ayen uvi rẹ udje rẹ isẹ rọ tare nẹ, “Ugbeyan ọvo herọ re kẹrẹ ohwo nọ oniọvo.” (Isẹ 18:24) Igbeyan tiọyena pha ghanghanre kẹ Jesu. Ọke ro vwo ghwoghwo ota vwẹ akpọ na, iniọvo evun rọyen vwo esegbuyota kpahọ-ọn. (Jọn 7:3-5) Ọ tobọ vwo ọke ọvo rẹ ayen vwo roro nẹ ọ họnvwa orhuẹ. (Mak 3:21) Vwọ fẹnẹ ayen, Jesu ta eta nana kpahen iyinkọn rọyen vwẹ ason rọ koba tavwen o ki ghwu: “Ovwan hẹ otu re vẹ ovwẹ gba herọ vwẹ evun rẹ odavwini mẹ.”—Luk 22:28.

¹² Iyinkọn na ru obo re nẹrhẹ ivun miovwo Jesu vwẹ ọke sansan, ẹkẹvuọvo Jesu tẹnrovi oruchọ raye-en, kidie ọ riẹnre nẹ ayen vwo esegbuyota kpahọn. (Mat. 26:40; Mak 10:13, 14; Jọn 6:66-69) Vwẹ ason rọ koba tavwen Jesu ki ghwu, o da ta eta nana kẹ eshare nana ri fuevun kẹ na: “Mi se ovwan igbeyan, kidie obo ri mi nyo mie Ọsẹ mẹ ejobi me vwẹ ayen phia kẹ ovwan.” (Jọn 15:15) Aphro herọ-ọ, iyinkọn na ghini esiri rẹ uduephiophiyawọ kẹ Jesu. Ukẹcha rẹ ayen vwọ kẹ vwẹ iruo aghwoghwo na, nẹrhẹ oma vwerhọn mamọ.—Luk 10:17, 21.

¹³ Vwọ vrẹ iyinkọn na, Jesu ji vwo igbeyan efa re chọn rọ uko vwẹ iruo rẹ aghwoghwo na kugbe idjerhe efa. Evo sere kpo uwevwin rayen vwọ kẹ emuọre. (Luk 10:38-42; Jọn 12:1, 2) Efa nenire yan, ayen ji nene ghare oborẹ ayen vwori. (Luk 8:3) Jesu vwo uvi rẹ igbeyan kidie ọyen komobọ jẹ uvi rẹ ugbeyan. O ruẹse kẹ igbeyan rọyen. O rhẹro rẹ obo re vrẹ ayen oma-a. Dede nẹ Jesu ohwo ọgbagba, o rhiabọreyọ ukẹcha mie igbeyan rọyen ri jẹgba. O muẹro nẹ ayen chọn rọ uko vwo vwo ẹwẹn re dọe.

14-15. Mavọ yen avwanre se vwo vwo uvi rẹ igbeyan, kẹ idjerhe vọ yen ayen sa vwọ chọn avwanre uko?

¹⁴ Uvi rẹ igbeyan cha chọn avwanre uko vwọ fuevun kẹ Jihova. Idjerhe ro me yovwin re se vwo vwo uvi rẹ igbeyan ọyen ọ rẹ avwanre komobọ je vwọ dia uvi rẹ igbeyan. (Mat. 7:12) Kerẹ udje, Baibol na vwẹ uchebro kẹ avwanre nẹ a vwẹ ukẹcha kẹ ihwo efa, ma rho kẹ “otu rẹ akpọ bẹn.” (Ẹfe. 4:28) Wo se roro kpahen ohwo ọvo ru wọ sa vwẹ ukẹcha kẹ vwẹ ukoko wẹn? Wọ sa yan uwevwin kẹ oniọvo rẹ ọga yẹrẹ ọghwo mu gbere otọ? Wo se chere emu kẹ orua ọvo rẹ uweren gan kẹ? Wọ da riẹn obo ra vwẹ wẹbsaiti rẹ jw.org^® yẹrẹ aplikeshọni rẹ JW Library^® vwo ruiruo, wo se yono ihwo efa kpahọn? Oma cha vwerhen avwanre mamọ siẹrẹ e de vwo uruemu ra vwọ vwẹ ukẹcha kẹ ihwo efa.—Iruo 20:35.

¹⁵ Igbeyan rẹ avwanre sa vwẹ ukẹcha kẹ avwanre vwẹ ọke rẹ edavwini, rere ẹwẹn rẹ avwanre vwo totọ. Kirobo rẹ Elihu kerhọ rẹ Job ọke rọ vwọ ta ota kpahen ebẹnbẹn rọyen, eriyin igbeyan rẹ avwanre ji che ru ọke rẹ avwanre da ta ọdavwẹ rẹ avwanre. (Job 32:4) E jẹ avwanre noso nẹ igbeyan rẹ avwanre che se brorhiẹn kẹ avwanre-e, ẹkẹvuọvo ọyen emu rẹ aghwanre ra vwọ kerhọ rẹ uchebro rẹ Baibol rẹ ayen vwọ kẹ avwanre. (Isẹ 15:22) E jẹ avwanre vwomakpotọ rhiabọreyọ ukẹcha rayen vwẹ ọke rẹ ebẹnbẹn, kirobo rẹ Ovie Devid ruru ọke rẹ igbeyan rọyen vwọ vwẹ ukẹcha kẹ. (2 Sam. 17:27-29) Igbeyan tiọyena ghini okẹ ro nẹ obọ rẹ Jihova rhe.—Jems 1:17.

16. Kirobo rẹ Filipae 4:6, 7 tare, womarẹ ono ọvo yen avwanre se vwo vwo ufuoma? Djekpahọn.

¹⁶ Se Filipae 4:6, 7. Diesorọ Jihova vwọ vuẹ avwanre nẹ womarẹ “Kristi Jesu” yen e se vwo vwo ufuoma rọyen? Kidie ẹwẹn rẹ avwanre se totọ siẹrẹ e de vwo ẹruọ ji vwo esegbuyota kpahen ẹdia rẹ Jesu kare vwẹ ọrhuẹrẹphiyotọ rẹ Ọghẹnẹ. Kerẹ udje, womarẹ izobo rẹ ọtanhirhe rẹ Jesu yen a sa vwọ mrẹ evwoghovwo rẹ imwemwu rẹ avwanre. (1 Jọn 2:12) Iroro yena sa ghene nẹrhẹ ẹwẹn rẹ ohwo totọ! Kerẹ Ovie rẹ Uvie rẹ Ọghẹnẹ, Jesu cha rhuẹrẹ ebẹnbẹn na eje rẹ Eshu vẹ eyeren rọyen na so kẹ avwanre. (Aiz. 65:17; 1 Jọn 3:8; Ẹvwọ. 21:3, 4) Iphiẹrophiyọ yena vwerhoma dẹn! Jesu rọ kẹ avwanre iruo rọ vọnre vẹ egbabọse na je biẹcha avwanre, ọ vẹ avwanre herọ vwẹ ẹdẹ re koba ra hepha na. (Mat. 28:19, 20) Ọyena nẹrhẹ udu rẹ avwanre gan. Omafuvwe, iphiẹrophiyọ, kugbe uduefiogbere yen iruemu evo re sa nẹrhẹ ẹwẹn rẹ ohwo totọ.

17. (a) Mavọ yen Onenikristi sa vwọ sẹro rẹ ufuoma rọyen? (b) Vwo nene ive rọhẹ Jọn 16:33, die yen avwanre se ru?

¹⁷ Mavọ yen wọ sa vwọ sẹro rẹ ufuoma wẹn siẹrẹ wo de hirharoku ebẹnbẹn egangan? Wo se ru ọtiọyen siẹrẹ wọ da vwẹrokere Jesu. Ẹsosuọ, muomaphiyọ ẹrhovwo ẹnẹ. Ọrivẹ, nyupho rẹ Jihova, wo ji ghwoghwo vẹ oruru tobọ vwẹ ọke rọ vwọ bẹn kẹ wẹ. Ọrerha, rhiabọreyọ ukẹcha rẹ igbeyan wẹn vwẹ ọke rẹ ebẹnbẹn. Ọke yena, ufuoma rẹ Ọghẹnẹ ko sun iroro vẹ ubiudu wẹn. Ku wo se phi edavwini kparobọ kirobo rẹ Jesu ruru.—Se Jọn 16:33.