A Kparẹ Ovwẹ nẹ Otọ Vwo Kpenu

Vwẹ August 1967, me vwọ hẹ ẹgbukpe ọvo gbubro, mi de vwo ọga rẹ odo ọgangan. Mi vwo vrẹn vwẹ urhiọke rọ vwọ kpahọn, me gbe sa ya-an. Mi vwo kpo omaẹfuẹrẹn vwẹ Freetown, Sierra Leone, ayen da vuẹ vwẹ nẹ mi vwo ọga ri polio, ọnana ọga ro pho rọ nẹrhẹ ohwo dia ukpono, marho vwọ kẹ emọ rehẹ ẹgbukpe iyorin kpotọ. Dede nẹ mi kpo omaeghworo, ọ dia ọyen o se vwo shephiyọ-ọ. Ememerha na, mi rhe se mudia yẹrẹ yan ọfa-a. Ọke buebun yen ọsẹ mẹ vwọ vuẹ vwẹ nẹ mẹvwẹ “ubro ohwo” fikirẹ ẹdia ukpono me hepha na. Kidie nẹ me sa ya-an ji nẹ oma mẹ kueku na, ki mi no nẹ ọ mẹ reri, mi ji fiemu-u.

Mẹvwẹ vẹ oni mẹ kugbe orua efa rẹ akpọ bẹn yen gba dia egodo ọvo kuẹgbe. Dede nẹ ihwo vwo ẹguọnọ mẹ, me guọnọre nẹ ọsẹ mẹ vwo ẹguọnọ mẹ, ẹkẹvuọvo, o ru ọtiọye-en. Ihwo evo vwo imuẹro nẹ ọnana dia ọga ghevweghe-e, ẹkẹvuọvo ẹruan. Efa da ra vuẹ oni mẹ nẹ o mu vwe kpo asan ra da vwẹrote ikpono. Ayen ta ọtiọyen vẹ ẹwẹn nẹ oghwa rẹ oni mẹ vwọ vwẹrote vwe che no oma. Oni mẹ sen iroroẹjẹ rayen na, ọ da wian gan rọ vwọ vwẹrote vwe.

Kidie nẹ mi rhe se muẹdia yẹrẹ ya-an, ke me shọrọ. Ẹkẹvuọvo, ọnana kọ so omaẹwan vwọ kẹ vwẹ. Me sa vwọ vrabọ rẹ omaẹwan, ki mi kuẹ iwun ri vwo ọkpan phiyọ, mi mi rhe kuẹ islipasi phiyọ abọ mẹ. Ọke vwọ yanran na, mi de rhi vwo irhe ri gunuru re nabọ sẹro abọ mẹ. Mi se vwo nẹ asan kpo asan, ki mi kuẹ irhe na phiyọ abọ, me me reyọ ayen vwo te otọ je kpare oma kpo obaro. Enenẹ kọyen mi ghwe ruo bẹsiẹ mi ki te asan me ra. Ọnana kọ nẹrhẹ igabọ vẹ abọ rhọ vwẹ mamọ. Kidie nẹ ona rẹ oyan nana guọnọ ẹgbaẹdavwọn mamọ, me ra fobọ vrẹn nẹ egodo na-a. Ọtiọyena, mi rhe se kpo isikuru yẹrẹ nene emọ efa heha-a. Ki mi roro kpahen oborẹ akpeyeren mẹ cha dia ọ da dianẹ oni mẹ ghwuru.

Me nẹrhovwo rhe Jihova, me vwọ vuẹ nẹ ọ cha vwẹ uko rere mi vwo jẹ emu ẹyarọ. Mi niro nẹ mi de sikẹrẹ je ga vwẹ idjerhe rọ guọnọre, ọ cha vwẹrote vwe. Ọtiọyena, vwẹ ẹdẹ ọvo vwẹ 1981, dede nẹ ọ lọhọ kẹ vwẹ-ẹ, mi de vrẹn nẹ egodo na kpo ishọshi ọvo rọhẹ urhuvwu rẹ avwanre dia. Oma kọ vo vwẹ fikirẹ oborẹ ihwo ni vwe wan. Ipastọ na rhiabọ dede uvwe-e, ọ da ghwọku oni mẹ kidie mi chidia agbara rẹ ihwo efa hwosa phiyọ. Mi de brorhiẹn nẹ mi rhe che kpo etiyin ọfa-a.

Urhiọke ọvo vwẹ 1984, ọke me vwọ hẹ ẹgbukpe 18, mi de kpo enu rẹ egenege re chidia kerẹ ovakpo, rọ dia asan ri mi chidia phiyọ kẹdẹ kẹdẹ. Etiyin kọyen mi de nẹ obo re phia vwẹ otafe. Mi de brorhiẹn mi vwo wontọ kpo otafe rẹ egodo na, rọ dia asan rẹ ihwo fobọ dia-a. Mi vwo te etiyin, me da mrẹ eshare ivẹ ri ghwoghwota nuwevwin kpuwevwin. Ayen da vuẹ vwẹ kpahen akpọ oyoyovwin rọ cha vwẹ obarọ na, rẹ ẹdia mẹ na de che wene. Ayen se Aizaya 33:24 kugbe Ẹvwọphia 21:​3, 4 kẹ vwẹ. Ayen da je kẹ vwẹ ibroshọ rẹ Enjoy Life on Earth Forever! rọ pha yoyovwin, ji ve kẹ vwẹ nẹ ayen che rhivwin rhe ri yono uvwe kpobarophiyọ.

Ọke rẹ ayen vwọ rhoma rhivwin rhe abọ rivẹ, ayen da vuẹ vwẹ nẹ ayen vẹ imishọnare kpokpọ ọvo re se Pauline cha rhe, rere mẹ vẹ ọyen vwo yono kpobaro. Ayen ru oborẹ ayen tare na, oyerinkugbe mẹ vẹ ọ rẹ Pauline da rhe họhọ ọ rẹ oni vẹ ọmọtẹ rọyen. Oni ro vwiẹ vwẹ de jiro kẹ vwẹ nẹ mẹ vẹ Pauline se ru uyono ri Baibol kugbe ọkieje, Pauline ọyen ohwo vẹ edirin kugbe aroesiri, ro vwo ọdavwẹ rẹ ihwo ji dje ẹguọnọ rẹ omaevwoze vwọphia, ọkieje yen ọ vwọ nokpẹn mẹ. O yono uvwe obo re se ọbe. Ọ reyọ ọbe na My Book of Bible Stories, vwo dje Ọsẹ rẹ ẹguọnọ, re me guọnọ na vwọ kẹ vwẹ.

Oborẹ mi yono vwo nẹ Baibol na rhe kẹ vwẹ aghọghọ. Vwẹ ẹdẹ ọvo, me da nọ Pauline sẹ mi se kpo omẹvwa rẹ Iseri ri Jihova ra riẹn phiyọ Uyono rẹ Ubruwevwin,a re ruẹ vwẹ uwevwin Oseri ri Jihova ọvo, ro ghwe sheri kẹ vwẹ-ẹ. Pauline da tanẹ e. Tuesday rọ vwọ kpahọn, ọ da rhe jẹ hẹrhẹ ovwẹ, nẹ me họ ji ku iwun mẹ phiyọ rere avwanre se vwo kpo omẹvwa na kugbe. Ohwo ọvo da vuẹ vwẹ nẹ me vuẹ Pauline nẹ o phi vwe phiyọ imoto, ẹkẹvuọvo, me da kpahen kẹ nẹ, “Me cha vwẹ irhe mẹ na vwọ yan te etiyin.”

O vwo te ọke me cha vwọ yanran re, oni mẹ kugbe ihwo rẹ egodo mẹ ki ni vwe je ro ẹnwan kpahen ovwẹ. Me vwọ hẹ idjerhe yanran, evo usun rẹ ihwo rehẹ egodo na da van kuẹ Pauline, “Wọ gba yanran na!”

Pauline da nọ vwẹ: “Jay, wọ guọnọ yanran?” Ọnana yen ọke ro fori nẹ mi vwo djephia nẹ me vwẹroso Jihova. (Isẹ 3:​5, 6) Me da kpahen: “E, ọnana yen orhiẹnbro mẹ.” Ihwo rẹ egodo mẹ da fọ rẹ ayen vwo nẹ uvwe ughe, uruemu rayen de rhi wene mi vwo siẹkẹrẹ igeti na. Ugege mi vwo vrẹn nu egodo na, ayen da ghọghọ.

Me riavwerhen rẹ omẹvwa na mamọ! O te vwe ẹwẹn! Ihwo ejobi rhiabọ dede uvwe. Ohwo vuọvo vwẹ ẹro okueku vwo nẹ uvwe-e. Oma nama vo ovwẹ-ẹ. Ọtiọyena, ke me ra ọkieje. O kriri-i, me da nọ sẹ mi se kpo emẹvwa re ruẹ vwẹ Oguan Ruvie rẹ Iseri ri Jihova. Mẹvwẹ ogbere, iwun ivẹ yen ghwe rhe vwe me sa sane kuphiyọ kugbe islipasi ọvo. Dedena, udu mẹ je gan nẹ ihwo rẹ Ọghẹnẹ cha sen vwẹ-ẹ. Ọtiọyen kọyen ọ ghene dia.

Mi se vwo te Ọguan Ruvie, me cha “yan” te oba rẹ urhuvwu na, me me ro imoto ro che mu vwe kpo obotọ rẹ ugbenu na, rọ dia asan rẹ Ọguan Ruvie na hepha. Iniọvo eshare na me rha vwẹ abọ mu vwe ro Ọguan Ruvie na.

Kidie nẹ me mrẹ ẹguọnọ ri Jihova vughe vwẹ akpeyeren mẹ, me da guọnọ nẹ ọ dia asan rẹ adjarhọ mẹ. Mi de brorhiẹn mi vwo kpo emẹvwa ọkieje. (Une rẹ Ejiro 34:8) Vwẹ ọke osio, oma na eje kpọrọ te otọ, ibehre je tan mu vwe oma, ọyena me nẹrhẹ mi wene emwa mẹ ọke mi de te Ọguan Ruvie; ẹkẹvuọvo, mi nẹ eyena eje fiemu-u!

Ikuegbe rẹ akpeyeren mẹ hẹ evunrẹ 1985 Yearbook of Jehovah’s Witnesses. Ọke rẹ Josette rọ dia Oseri ri Jihova vwẹ Switzerland vwo se ikuegbe mẹ, o de muo vwọ dẹ agbara rẹ ukpono ra vwẹ obọ gua, rọ pha yoyovwin vwo rhe vwe, ro ji vwo obo re sẹro rẹ ohwo vwo nẹ ibehre. Ọnana de brọghọ phiyọ ovwẹ oma, je nẹrhẹ oyan mẹ phẹrẹ. Agbara rẹ ukpono mẹ na je imitete mamọ, kẹ ayen vuẹ vwẹ obo ro je ayen te ọke me da gua. Me gbe shọrọ vwẹ otọ-ọ, ke me rhe dia kerẹ ohwo rode, re muọghọ kẹ, ọ dia ohwo re ni kuẹrofia-a.

Kidie nẹ mẹvwẹ ohwo ro vwo omamọ uruemu jovwo, ro ji yeren akpọ ri kekpe, me rha mrẹ bẹnbẹn mi vwo sikẹrẹ Jihova-a. Agbara rẹ ukpono mẹ na nẹrhẹ mi se vwobọ vwẹ iruo rẹ aghwoghwo na, ọtiọyena, ki mi rhi bromaphiyame vwẹ August 9, 1986. Omaebrophiyame na nẹrhẹ akpeyeren mẹ yovwin vrẹ oborẹ mi rhẹro rọyen. Mi rhi vwo omavwerhovwẹn vẹ evunvọnvwẹ, mi rhe nẹ oma mẹ kueku-u, ki mi rhi fiudugberi kidie mi rhi vwo Ọsẹ ro vwo ẹguọnọ mẹ, vẹ ihwo ri ghini vwo ọdavwẹ mẹ, re riariẹ ovwẹ phiyọ.

Me vwọ guọnọ idjerhe me sa vwọ kpẹvwẹ Jihova, ki mi roro vwọ kaphen iruo rẹ ọkobaro ọkieje, ẹkẹvuọvo, oshọ mu vwe sẹ mi se ruo. (Une rẹ Ejiro 116:12) Me da nẹrhovwo kpahọn ji brorhiẹn me vwọ davwọn ni. Vwẹ January 1, 1988, me da ton iruo rẹ ọkobaro phiyọ ri mi ji ruẹ ri te ọke nana. Ọnana ebruphiyọ rode kẹ vwẹ! Mi vwo omamọ iniọvo re cha vwẹ uko vwọ yanmu ẹkẹn ri mi bru kẹ oma kemeranvwe kemeranvwe. Me je mrẹ ukẹcha rẹ ẹwẹn ọfuanfon ri Jihova vwẹ akpeyeren mẹ.​—Une rẹ Ejiro 89:21.

Kerẹ ọkobaro, me sa nabọ vwobọ vwẹ iruo rẹ aghwoghwo na, ọnana kọ vwẹ ukẹcha kẹ awọ mẹ, dede nẹ ọ gan re-e. Ọke evo vwọ wan nu, mi de kpo họspito ọvo re rhieri obọ vwọ kẹ omaeghworo vẹ ọrhuẹrẹphiyotọ rẹ omaẹsasọ. Ẹkẹvuọvo, inọsu ọvo rọhẹ etiyin da vuẹ vwẹ nẹ mi kpokpo oma mẹ-ẹ kidie mi che ghwu kẹrẹkpẹ. Ọke rẹ inọsu ọfa je vwọ vuẹ vwẹ ota vuọvo na, mi de she ọkuọrọn. Me da rhe uwevwin je nẹrhovwo rhe Jihova nẹ ọ nẹrhẹ ẹwẹn mẹ te otọ, je mrẹ omaesivwon ro shephiyọ.

Iruo rẹ aghwoghwo na rhe dia omaesivwon ro me yovwin kẹ vwẹ, rọ nẹrhẹ me nabọ sasa oma mẹ. Ikpe evo vwọ wan nu, ọvo usun rẹ inọsu re vuẹ nẹ mi che ghwu kẹrẹkpẹ na, da mrẹ vwẹ ọke rọ vwọ wanvrẹ Ọguan Ruvie na. O de gbe unu nẹ me jehẹ akpọ!

Dede nẹ oma mẹ shephiyọ-ọ, me je davwẹngba vwọ sẹro oruru mẹ vwẹ ẹga ri Jihova. Iniọvo na jiri uvwe fikirẹ oruru mẹ kugbe me vwọ fobọ cha uyono. Me fobọ kpo uyono kidie ọ nẹrhẹ me mrẹ ọke vwo yeren iniọvo mẹ ji dje ẹguọnọ kẹ ayen.

Me mrẹ ẹguọnọ vẹ ebruphiyọ ri Jihova buebun vwẹ akpeyeren mẹ. Oma vwerhen ovwẹ me vwọ vwẹ ukẹcha kẹ ihwo erha vwo yerin te ẹdia rẹ omaebrophiyame. Amelia rọ dia ọvo usun rayen kpo iklasi 137 rẹ Isikuru ri Giliẹd. Mẹvwẹ komobọ kpo Isikuru rẹ Ekobaro vrẹ abọ ọvo re! Jihova nẹrhẹ oma vwerhen ovwẹ phiyọ, mi rhe nẹ oma mẹ kueku-u, mi de ji rhi fiudugberi. Enẹna ihwo muọghọ kẹ vwẹ. Oma rha vo ovwẹ-ẹ. Mi vwo omamọ igbeyan vwẹ akpọneje ri vwo ẹguọnọ ri Jihova, o dia Freetown vẹ ẹkuotọ mẹ ọvo-o.

Ọ joma te ẹgbukpe 40 re, mi vwo yono kpahen ive rẹ Ọghẹnẹ vwọ kpahen akpọ kpokpọ rẹ ega kanre. Ive yena phiuduphiyọ ovwẹ awọ, mi ji nẹ kiọkiọkiọ hẹrhẹ orugba rọyen. Me cha hẹrhẹ kidie me riẹnre nẹ Ọghẹnẹ mẹ, Jihova che gbeghẹrẹ-ẹ. (Maika 7:7) Mi mre ebruphiyọ buebun kidie me vwẹ erhiorin hẹrhẹ. Jihova cha vwẹ uko vwo chirakon rẹ ebẹnbẹn vẹ egbabọse sansan ri mi hirharoku. Ọkieje yen ọ vwọ cha vwẹ uko vwẹ ọke ro fori. Mi vwo uvi rẹ omavwerhovwẹn kidie a kparo ovwẹ nẹ otọ vwẹ idjerhe ri mi rhẹro rọye-en vwo kpenu.