UYONO 55

Bicha Ukoko Wẹn

Printed Edition

Vwẹ akpọneje, oma vwerhen ihwo buebun rẹ ayen vwọ ga Jihova vwẹ ikoko re vrẹ uriorin buebun. Ayen vwo ọdavwaro kpahen odjekẹ vẹ ọkpọvi ra vwọ kẹ ayen, ayen ji vwo owenvwe rẹ ayen vwo biẹcha ukoko na vwẹ idjerhe sansan. Ọtiọyen oma ji ru we kpahen ukoko wẹn?

1. Erhọ yen idjerhe evo wọ sa vwọ vwẹ ọke vẹ ẹgba wẹn vwo bicha ukoko na?

Avwanre eje sa vwẹ ukẹcha phia vwẹ ukoko na. Kerẹ udje, emare vẹ ihwo rẹ oma rayen gan te-e hẹ ukoko wẹn? Wo se mu ayen kpo uyono? Wọ sa vwẹ ukẹcha efa vwọ kẹ ayen, kerẹ a vwọ yan uwevwin kẹ ayen yẹrẹ ruẹ uwevwin rayen fuan? (Se Jems 1:27.) A sa je vwomakpahotọ vwo ruiruo rẹ orufon yẹrẹ ẹrhuẹrẹ vwẹ Ọguan Ruvie. A gba ohwo vwo ruẹ aye-en. Ẹguọnọ ri Jihova vẹ ọ rẹ iniọvo na yen mu avwanre vwo “siobọ nẹ oma rẹ [avwanre] ọphọphẹ.”—Une Rẹ Ejiro 110:3.

Ihwo ri bromaphiyame re se bicha ukoko na vwẹ idjerhe efa. Iniọvo eshare ri muwan sa ga kerẹ idibo rowian, ọke vwọ yanran na, ayen sa rhe dia ekpako. Iniọvo eshare vẹ eya se bicha iruo rẹ aghwoghwo na siẹrẹ ayen da ga kerẹ ekobaro. Iniọvo evo sa vwẹ ukẹcha phia vwọ bọn asan ra da ga ẹga yẹrẹ kua kpo asan rẹ ukoko na da guọnọ ukẹcha vwẹ idjerhe efa.

2. Mavọ yen a sa vwọ vwẹ ekuakua rẹ avwanre vwori vwo bicha ukoko na?

Wọ sa “vwẹ emu wo vwori ejobi bru ọghọ phihọ Ọrovwohwo oma.” (Isẹ 3:9) Ọyen okpọghọ rẹ avwanre vwo toro igho vẹ ekuakua efa vwo bicha iruo rẹ ukoko na kugbe iruo rẹ aghwoghwo re ruẹ vwẹ akpọneje. (Se 2 Kọrẹnt 9:7.) A je vwẹ itetoro rẹ avwanre vwo biẹcha ihwo re rhiẹromrẹ oghwọrọ ri kpregede. Ihwo buebun brorhiẹn rẹ ayen vwo “phiẹ ememu vwọ hẹ akakọ” ọkieje vwo ru itetoro. (Se 1 Kọrẹnt 16:2.) A sa vwẹ ekpeti rẹ utoro rọhẹ uyono vwo ruiruo yẹrẹ ruo vwẹ intanẹti vwẹ donate.jw.org. Jihova kẹ avwanre uphẹn re vwo dje ẹguọnọ kẹ womarẹ obo ra reyọ ekuakua ugboma re vwori vwo ruiruo.

HIẸ KODO

Roro kpahen idjerhe evo wo se vwo bicha ukoko na.

3. A sa reyọ ekuakua rẹ ugboma rẹ avwanre vwo ruo

Jihova vwo ẹguọnọ rẹ ihwo ri kokẹ ghwologhwolo. Ẹwẹn vuọvo na yen rhe Jesu. Kerẹ udje, Jesu vwo oniso rẹ ayeuku ọvo kugbe ẹgbaẹdavwọn ro vwo ru itetoro. Se Luk 21:1-4, ovwan ta ota kpahen enọ nana:

Ofori nẹ e ru itetoro buebun e ki se ru ọhọre ri Jihova?
Mavọ oma ru Jihova vẹ Jesu kpahen itetoro ri ghwologhwolo avwanre?

Wọ vwọ riẹn obo ra vwẹ itetoro rẹ avwanre vwo ruẹ, hworo IVIDIO na. Ovwan ta ota kpahen onọ ro nenire.

IVIDIO: ‘Okẹ Ra Vwọ kẹ Jihova’ (4:47)

Mavọ yen itetoro rẹ avwanre vwo fierere kẹ ikoko rehẹ akpọneje?

Oniọvo aye ọvo rọ kpakore phi igho phiyọ ekpeti re vwo ruẹ itetoro.

4. A sa vwomakpahotọ

Vwẹ ọke awanre, idibo ri Jihova vwẹ oruru vwọ wian gangan vwọ sẹro rẹ uwevwin ẹga na. Ẹkẹvuọvo, ọ dia igho ọvo yen ayen torori-i. Se 2 Ikun Rivie 34:9-11, ovwan ta ota kpahen onọ nana:

Ukẹcha vọ yen ihwo rẹ Izrẹl eje vwọ phia vwẹ ẹroevwote rẹ uwevwin ri Jihova yẹrẹ asan ra da ga ẹga?

A vwọ mrẹ oborẹ Iseri ri Jihova vwọ yan nene udje rẹ ọke awanre yena, hworo IVIDIO na. Ovwan ta ota kpahen enọ ri nenire.

IVIDIO: Ẹroevwote rẹ Iwevwin Avwanre da Ga Ọghẹnẹ (3:31)

Ẹbẹre evo rẹ ividio rẹ ‘Ẹroevwote rẹ Iwevwin Avwanre da Ga Ọghẹnẹ.’ Eshare, eya, vẹ emọ ruẹ orufon rẹ obevun rẹ Ọguan Ruvie.

Diesorọ o vwo fo nẹ e ru Ọguan Ruvie rẹ avwanre fon, je nabọ rhuẹrẹ?
Erhọ yen idjerhe evo wọ sa vwọ vwẹ ukẹcha phia?

Iniọvo evo vwomakpahotọ vwo ru ebabọn rẹ Ọguan Ruvie.

5. Iniọvo eshare se muwan vwọ kẹ ewian vwẹ ukoko na

Baibol na vwẹ uchebro kẹ iniọvo eshare nẹ ayen pharhe rere ayen se vwo bicha ukoko na. Wọ vwọ mrẹ udje ọvo, hworo IVIDIO na. Ovwan ta ota kpahen onọ ro nenire.

IVIDIO: Eshare—Ovwan Muwan Vwọkẹ Iruo Esiri (5:19)

Vwevunrẹ ividio na, mavọ yen Ryan sa vwọ pharhe vwo bicha ukoko na vọnvọn?

Baibol na dje oborẹ iniọvo eshare cha yanmu tavwen ayen ki muwan kerẹ idibo rowian kugbe ekpako. Se 1 Timoti 3:1-13, ovwan ta ota kpahen enọ nana:

Die yen a guọnọ mie iniọvo eshare re guọnọ yerin te ẹdia rẹ odibo rowian yẹrẹ ọkpako?
Die yen a guọnọ mie erua rayen?—Ni awọ 4 vẹ 11.
Mavọ yen ukoko na sa vwọ mrẹ erere siẹrẹ iniọvo eshare da davwẹngba vwọ yanmu iwan nana?