UYONO 51
Mavọ Yen Wo se Vwo Jiri Jihova Womarẹ Obo Wọ Ta?
Jihova ma avwanre vẹ okẹ rẹ ọghanghanre ọvo, ọyen okẹ rẹ ota. Ọ davwerhọn rẹ oborẹ avwanre reyọ okẹ na vwo ruiruo wan? E, ọ davwerhọ! (Se Jems 1:26.) Ọtiọyena, mavọ yen a sa vwọ reyọ okẹ rẹ ota vwo ruiruo vwẹ idjerhe o de jiri Jihova?
1. Mavọ yen ofori nẹ a reyọ okẹ rẹ ota na vwo ruiruo wan?
Baibol na tare nẹ e, “bru ohwohwo uche rere ovwan kpọ ohwohwo vi.” (1 Tẹsalonika 5:11) Wọ sa vwẹro roro ihwo evo re guọnọ uchebro? Die yen wo se ru vwọ bọn ayen gan? Jẹ ayen riẹn nẹ wo vwo ọdavwẹ rayen. Ọkiọvo, wọ sa vuẹ ayen obo ri je we vwẹ oma rayen. Wọ sa vwẹ ẹwẹn roro ẹkpo ri Baibol rọ sa bọn ohwo ọvo gan? Ẹkpo ri Baibol buebun herọ wọ sa sane. Karophiyọ nẹ, ota wọ ta se phiuduphiyọ ihwo efa awọ. Ọtiọyena, gba ta ota rọ pha dẹndẹn vwiọrọ vwiọrọ ọkieje.—Isẹ 15:1.
2. Eka rẹ eta vọ yen ofori nẹ a kẹnoma kẹ?
Baibol da ta: “E jẹn ota umwemwu nẹ unu rẹ ovwan cha-a.” (Se Ẹfesọs 4:29.) Ọnana mudiaphiyọ nẹ avwanre cha reyọ eta ebrabra yẹrẹ eta re kparẹ ophu vwo ruiruo siẹrẹ a da ta eta kẹ ihwo-o. A je cha kẹnoma kẹ erharhe rẹ iguegun vẹ e vwo miovwo ohwo.—Se Isẹ 16:28.
3. Die yen sa chọn wẹ uko vwọ ta eta rẹ ọbọngan vwọ kẹ ihwo efa?
Oborẹ avwanre ta dje obo rehẹ ubiudu rẹ avwanre vẹ obo re roro kpahan phia. (Luk 6:45) Eriyina, ofori nẹ e yono oma rẹ avwanre rere a tẹnrovi emamọ rẹ erọnvwọn kerẹ uruemu ọsoso, obo ri yovwirin, ro vwo ẹguọnọ kugbe obo ro fo ejiro. (Filipae 4:8) A vwọ tẹnrovi erọnvwọn nana, ofori nẹ a vwẹ aghwanre sanẹ erọnvwọn ra vwọ diotọ. (Isẹ 13:20) Ọ je cha chọn avwanre uko vwọ nabọ roro tavwen a ke ta ota. Roro kpahen oborẹ oma che ru ihwo efa fikirẹ eta wẹn. Baibol na da ta: “Ohwo ọvo herọ rẹ eta rọye epha kpatakpata kerẹ adjara ro duvwẹ ohwo, ẹkẹvuọvo ẹrẹnvwe rẹ ọvwiroro sivwẹ ohwo.”—Isẹ 12:18.
HIẸ KODO
Yono kpahen obo wọ sa vwọ ta ota vwẹ idjerhe rọ cha vwerhen Jihova oma ji phiuduphiyọ ihwo efa awọ.
4. Sun eta wẹn
Ọke evo, avwanre ta eta ra da rhoma viẹ idiekpọvwẹ ukuko na. (Jems 3:2) Se Galesha 5:22, 23, ovwan ta ota kpahen enọ nana:
Ọrhọ vwẹ usun rẹ iruemu nana yen wọ sa nẹrhovwo kpahen rere wo se vwo sun eta wẹn? Mavọ yen iruemu nana sa vwọ chọn wẹn uko?
Se 1 Kọrẹnt 15:33, ovwan ta ota kpahen onọ nana:
Mavọ yen ojẹ rẹ igbeyan vẹ erọnvwọn ra vwọ diotọ se vwo wene obo wọ ta ota wan?
Die yen sa nẹrhẹ obo wọ ta ota wan wen?
Se Aghwoghwo 3:1, 7, ovwan ta ota kpahen onọ nana:
Ọke vọ yen o vwo fo nẹ e fotovwin yẹrẹ hẹrhẹ ọke ro shephiyọ a ke ta ota?
5. Ta omamọ rẹ eta kpahen ihwo efa
Mavọ yen a sa vwọ kẹnoma kẹ a vwọ ta erharhe eta kpahen ihwo efa? Hworo IVIDIO na, ovwan ta ota kpahen onọ ro nenire.
Vwevunrẹ ividio na, diesorọ oniọvo rẹ ọshare na vwọ guọnọ wene eta rọ ta kpahen ihwo efa?
Die yen o ruru wo wene?
Se Aghwoghwo 7:16, ovwan ta ota kpahen onọ nana:
Die yen ofori nẹ a karophiyọ siẹrẹ a da guọnọ ta erharhe eta kpahen ohwo?
Se Aghwoghwo 7:21, 22, ovwan ta ota kpahen onọ nana:
Mavọ yen ẹkpo ri Baibol yena sa vwọ chọn wẹ uko ọke rẹ ohwo ọvo da ta orharhe rẹ ota kpahen owẹ?
6. Ta ota kẹ ihwo rẹ orua wẹn vwẹ idjerhe rẹ ọghọ
ihova guọnọre nẹ wọ ta ota kẹ ihwo rẹ orua wẹn vwẹ idjerhe rẹ ẹguọnọ vẹ ọghọ. Hworo IVIDIO na, ovwan ta ota kpahen onọ ro nenire.
Die yen cha nẹrhẹ wọ sa ta ota kẹ ihwo rẹ orua wẹn vwẹ idjerhe rẹ ọghọ?
Se Ẹfesọs 4:31, 32, ovwan ta ota kpahen onọ nana:
Mavọ yen wọ sa vwọ ta ota kẹ ihwo rẹ orua wẹn vwẹ idjerhe rẹ oma da vwerhen ayen?
Jihova dje oborẹ oma ruro kpahen Ọmọ rọyen, Jesu. Se Matiu 17:5, ovwan ta ota kpahen onọ nana:
Mavọ yen wọ sa vwọ vwẹrokere Jihova womarẹ obo wọ ta ota kẹ ihwo rẹ orua wẹn?
Guọnọ uphẹn wo se vwo jiri ihwo efa
IHWO EVO TA: “Me ta ẹwẹn mẹ, tẹ o je ihwo efa yẹrẹ o je aye-en.”
Wọ rhọnvwephiyọ? Kẹ, diesorọ yẹrẹ diesorọ o vwo jẹ dia ọtiọyen?
ỌDJẸKOKO
Eta vwo ẹgba. Ofori nẹ a nabọ roro kpahen obo ra ta, ọke a vwọ ta vẹ obo ra ta wan.
Ẹrhomafuẹrẹn
Erhọ yen idjerhe evo wọ sa vwọ reyọ eta wẹn vwọ chọn ihwo efa uko?
Oka rẹ eta vọ yen ofori nẹ wọ kẹnoma kẹ?
Die yen sa chọn avwanre uko wọ ta eta re cha bọn ihwo efa gan ọkieje?
HIẸ GUỌNỌ
Die yen sa chọn avwanre uko vwọ ta eta re cha bọn ihwo efa gan?
Yono kpahen obo re sa chọn wẹ uko vwọ kẹnoma kẹ erharhe rẹ eta.
Mrẹ obo wọ sa vwọ kẹnoma kẹ uruemu ra vwọ ta erharhe rẹ eta kpahen ihwo efa.
Mrẹ oborẹ Jihova vwọ chọn ọshare ọvo uko vwọ dobọ rẹ uruemu rọ vwọ ta erharhe eta ji.
“Me Rhoma Roro Kpahen Oka rẹ Akpọ Mi Yerẹn” (Uwevwin Orhẹrẹ rẹ August 1, 2013)