Họnre Ọkieje Vwọ kẹ Ebruphiyọ rẹ Jihova

1, 2. Erọnvwọn sansan vọ yen idibo rẹ Jihova họnra vwọsua?

VWO nẹ ọke rẹ Ebẹl rhi te nonẹna yen idibo rẹ Ọghẹnẹ vwọ họnra. Ọyinkọn Pọl de si rhe Inenikristi rehẹ Hibru nẹ ayen “chirako rẹ ohọnre ọgangan vẹ oja,” ayen sa vwọ mrẹ ebruphiyọ rẹ Jihova. (Hib. 10:32-34) Pọl vwẹ ohọnre rẹ Inenikristi vwo dje ihwo re djonẹ yẹrẹ ihwo ri muabọ vwẹ orere rẹ Grik. (Hib. 12:1, 4) Avwanre jehẹ onẹ rẹ arhọ tiọyena nonẹna, e ji hirharokuẹ ivwighrẹn re guọnọ mu ẹwẹn avwanre reyọ, gere avwanre she, je reyọ aghọghọ vẹ iphiẹrophiyọ mie avwanre.

² Ẹsosuọ, avwanre nene Eshu vẹ akpọ ọbrabra rọyen na “họnra.” (Ẹfe. 6:12) Ofori nẹ a kẹnoma kẹ “ẹgba egangan” rẹ akpọ na. Enana churobọ si iyono rọyen, iroro rọyen, kugbe iruemu ebrabra kerẹ ọfanrhiẹn, itaba ese, ihunvwun egangan ẹreyọ vẹ udi ẹda vroma. O ji fo nẹ a họnre vwọso ovwiẹrẹ avwanre vẹ erọnvwọn re nẹrhẹ ẹwẹn avwanre kuọrọn.—2 Kọr. 10:3-6; Kọl. 3:5-9.

 3. Ukẹcha vọ yen Ọghẹnẹ vwọ kẹ avwanre a sa vwọ họnre vwọso ivwighrẹn avwanre?

³ E se ghini phi ivwighrẹn nana eje kparobọ? E, ẹkẹvuọvo, ọ guọnọ ohọnre. Pọl reyọ oma rọyen vwo dje ohwo ro muabọ ọke awanre nẹ, “Ọ dianẹ irharheghe mi muẹ teya-an.” (1 Kọr. 9:26) Kirobo ohwo nene ọvweghrẹn rọyen muabọ, ọtiọyen avwanre je họnra vwọsua ivwighrẹn avwanre. Jihova muegbe avwanre, ọ je chọn avwanre uko vwẹ ohọnre nana. Ọ kẹ avwanre odjekẹ vwẹ Baibol na; odjekẹ nana se sivwin arhọ rẹ ohwo. Ọ je vwẹ ukẹcha kẹ avwanre womarẹ ẹbe ukoko na, emẹvwa, isikoko vẹ eghwẹkoko. Wọ vwẹ erọnvwọn wo yono na vwo ruiruo? Wo rhe ruẹ ọtiọye-en, kọyen “irharheghe” wo muẹ teyan, ọ diẹ ọvweghrẹn wẹ-ẹn.

 4. Die yen e ru rere umwemwu vwo jẹ avwanre ephiokparobọ?

⁴ Ivwighrẹn nana sa ghwiẹ avwanre ọke ra rhẹro rọye-en, yẹrẹ ọke avwanre de shekpotọ mamọ, ọtiọyena ofori nẹ e nomaso ọkieje. Baibol na kẹ avwanre orhọ-esio nana: “Wo jẹ umwemwu phi we kparobọ-ọ, ẹkẹvuọvo vwẹ uyoyovwi phi umwemwu kparobọ.” (Rom 12:21) Ẹkpo rọ tare nẹ “wo jẹ umwemwu phi we kparobọ-ọ” na djerephia nẹ avwanre se phi umwemwu kparobọ. E se ru ọtiọyen siẹrẹ a da họnra vwọsuọ ọkieje. Ẹkẹvuọvo, Idẹbono, akpọ ọbrabra nana, vẹ jẹgba avwanre se phi avwanre kparobọ siẹrẹ e de phi abọ phiyotọ, je dobọ rẹ ohọnre na ji. Wo jẹ Eshu nẹrhẹ obọ rhọ wẹ-ẹ!—1 Pita 5:9.

 5. (a) Die yen sa chọn avwanre uko vwọ họnre kẹ ebruphiyọ rẹ Ọghẹnẹ ọkieje? (b) Ihwo vọ yen avwanre che yono kpahen?

⁵ E ki se phikparobọ, ofori nẹ a tẹnrovi oboresorọ avwanre vwọ họnra na. A sa vwọ mrẹ ebruphiyọ rẹ Ọghẹnẹ, ofori nẹ avwanre tẹnrovi imuẹro rọhẹ Hibru 11:6: “Ohwo kohwo rọ tanẹ ọye si kẹre Ọghẹnẹ mi segbuyota nẹ ọ herọ nẹ ọye re hwa osa kẹ ayen otu re guọnerọ.” Ubiota rẹ Grik ra fan kpo “guọnerọ” na mudiaphiyọ ẹgbaẹdavwọn ọgangan. (Iruo 15:17) Baibol na vuẹ avwanre kpahen ihwo re davwẹngba rayen eje vwọ guọnọ ebruphiyọ rẹ Jihova. Jekọp, Rachel, Josẹf, vẹ Pọl rhiẹromrẹ ẹdia sansan re nẹrhẹ ẹwẹn rayen shekpotọ, oma da je ghwọrọ ayen, ẹkẹvuọvo ayen djerephia nẹ erhiorin hwarhiẹ ebruphiyọ gbidiki cha. Mavọ avwanre sa vwọ vwẹrokere ihwo nana?

 6. Die yen chọn Jekọp uko vwo vwo erhiorin, kẹ erere vọ yen ọ mrẹre? (Ni uhoho rẹsosuọ na.)

⁶ Jekọp họnre o ji chirakon kidie o vwo ẹguọnọ rẹ Jihova, o vwo ọdavwaro kpahen erọnvwọn rẹ ẹwẹn, o ji vwo obọdẹn rẹ esegbuyota kpahen ive rẹ Jihova ro che vwo ku ebruphiyọ ku uvwiẹ rọyen. (Jẹn. 28:3, 4) Ọnana yen sorọ, ọke rẹ Jekọp vwọ joma te ẹgbukpe 100 re, ọ da davwẹngba rọyen eje o vwo vwo ebruba rẹ Ọghẹnẹ; ọ tobọ nene amakashe muabọ. (Se Jẹnẹsis 32:24-28.) Jekọp komobọ vwo ẹgba vẹ erhiorin ro vwo nene amakashe muabọ? Ẹjo, kakaka! Ẹkẹvuọvo, ọyen ohwo ro muegbe rọ vwọ họnre, o de ji djephia nẹ o che se chukoku ohọnre na-a! Ọ da ghene mrẹ ebruba fikirẹ akoechiro rọyen. E mu odẹ ro ghwe fo vwọ kẹ, rọ dia Izrẹl (ro mudiaphiyọ “Ọ ro Nene Ọghẹnẹ Họnre [vẹ Erhiorin]” yẹrẹ “O Nene Ọghẹnẹ Muabọ”). Jekọp mrẹ erere rẹ avwanre je guọnọ nonẹna, rọ dia ebruba rẹ Jihova.

 7. (a) Obẹnbẹn vọ yen Rachel hirharoku? (b) Idjerhe vọ yen o vwo nene ẹdia na muabọ ọkieje, je mrẹ ebruba?

⁷ Aye rẹ Jekọp re se Rachel, ji vwo oruru ọgangan rọ vwọ mrẹ orugba rẹ oborẹ Jihova ve kẹ ọshare rọyen. Ẹkẹvuọvo, o vwo egbabọse ọvo. Rachel vwo ọmọ-ọ. Vwẹ ọke yena, aye ro vwiẹre-e rhiẹromrẹ oja mamọ. O vwo oborẹ Rachel che se ru kpahen ẹdia rọyen na-a, kẹ mavọ yen Rachel sa vwọ mrẹ ẹgba ro vwo nene ẹdia na muabọ? O vwo iphiẹrophiyọ ọgangan. Ọ họnre ọkieje womarẹ ẹrhovwo ẹnẹ ọgangan. Jihova nyo oyare rẹ Rachel na, ọ da kẹ emọ. Kọyensorọ, o vwo ọke ọvo Rachel vwo kperi phia vwọrẹ ophikparobọ: “Ogangan me . . . vwo muabọ me da marọ!”—Jẹn. 30:8, 20-24.

 8. Ojaẹriọ ọgangan vọ yen Josẹf rhiẹromrẹ vwẹ ọke grongron, kẹ mavọ yen obo ro ru kpahen ẹdia na vwọ dia omamọ udje kẹ avwanre?

⁸ Aphro herọ-ọ, ọyọnregan rẹ Jekọp vẹ Rachel nabọ djobọte ọmọ rayen Josẹf, ọ chọn rọ uko vwẹ ọke rẹ edavwini. Josẹf vwọ hẹ ẹgbukpe 17, akpeyeren rọyen de rhi wene kare kare. Fikirẹ omaẹriọ, iniọvo rọyen da shẹ kpo eviẹn. Vwẹ Ijipt, e de rhe muo phiyọ uwodi ekueku vwẹ ikpe buebun. (Jẹn. 37:23-28; 39:7-9, 20-21) Josẹf vwẹ uphẹn kẹ ẹdia rẹ ọkuọrọn nẹ o muo rọ-ọ; o ji muophu ọgangan te ẹdia rẹ ọ da guọnọ ru orukeri-i. Ukperẹ ọtiọyen, o mu ẹwẹn rọyen kpahen oyerinkugbe rọyen vẹ Jihova. (Liv. 19:18; Rom 12:17-21) E jẹ udje rẹ Josẹf chọn avwanre uko. Ọ da tobọ dianẹ avwanre rioja vwẹ ọkiemọ yẹrẹ ẹdia avwanre hepha enẹna ghwe yovwi-in, e jẹ avwanre họnre ọkieje vẹ erhiorin. E de ru ọtiọyen, imuẹro herọ nẹ Jihova che bruba kẹ avwanre.—Se Jẹnẹsis 39:21-23.

 9. Kerẹ Jekọp, Rachel, vẹ Josẹf, die yen e ru a sa vwọ mrẹ ebruphiyọ rẹ Jihova?

⁹ Roro kpahen egbabọse ọvo wo hirharokuẹ asaọkiephana yẹrẹ ẹdia rọ sa dia ọdavwini kẹ wẹ. Ọ sa dia oshenyẹ, utuoma, yẹrẹ ehwẹjẹ. Ọ sa je dianẹ ohwo gun efian nyẹ wẹ fikirẹ omaẹriọ. Ukperẹ wo vwo phi obọ phiyotọ, karophiyọ obo re vwẹ ukẹcha kẹ Jekọp, Rachel, vẹ Josẹf vwọ ga Jihova ọkieje vẹ aghọghọ. Ọghẹnẹ kẹ ayen ẹgba vẹ ebruphiyọ kidie ayen dje idavwaro phia vwọ kẹ erọnvwọn rẹ ẹwẹn ọkeneje. Ayen họnre je wian kpahen ẹrhovwo rayen. Oba rẹ eyeren na yen avwanre hepha na, ọtiọyena ofori nẹ a nabọ yọnrọn iphiẹrophiyọ avwanre na kokoroko! Wo muegbe wọ vwọ họnre vwọ kẹ ebruphiyọ rẹ Jihova?

10, 11. (a) Idjerhe vọ a sa vwọ họnre vwọ kẹ ebruphiyọ rẹ Ọghẹnẹ? (b) Die yen cha chọn avwanre uko vwo brorhiẹn aghwanre ji phikparobọ vwẹ ohọnre avwanre nana?

¹⁰ Ẹdia vọ yen sa nẹrhẹ avwanre họnre vwọ kẹ ebruphiyọ rẹ Ọghẹnẹ? Ọvo yen e vwo nene ovwiẹrẹ romobọ họnra kirobo rẹ ihwo buebun ji hirharokuẹ. Ihwo efa davwẹngba ayen sa vwọ sẹro rẹ ẹro abavo rẹ ayen vwo ni iruo aghwoghwo na. Yẹrẹ ọ sa dianẹ wo chirakon rẹ ọga yẹrẹ ẹdia rẹ ọruvwohwo. Ihwo evo je davwẹngba rayen eje ayen se vwo ghovwo ohwo ro gbe ayen ku, ofori nẹ e ji ni ọnana so. Otoro ikpe ra ga Jihova re-e, avwanre họnre vwọso kemu kemu ro se gbowọphiyọ ẹga avwanre kẹ Ọghẹnẹ, ohwo rọ hwosa kẹ otu re fuevun.

¹¹ Vwọrẹ uyota, ọ sa bẹn re vwo brorhiẹn aghwanre, e ji vwo vwo iruemu rẹ Onenikristi. Ma rho, udu avwanre rọ vọnre vẹ ophiẹnvwe na da vuẹ avwanre nẹ e ru obo re chọre. (Jer. 17:9) Wo de noso nẹ wo shekpotọ vwẹ ẹdia evo, yare ukẹcha rẹ ẹwẹn ọfuanfon na. Ẹrhovwo vẹ ẹwẹn ọfuanfon na sa kẹ wẹ ẹgba vwo nene idjerhe ro shephiyọ je mrẹ ebruba rẹ Jihova. Wian kpahen ẹrhovwo wẹn. Davwẹngba wo se ẹkpo rẹ Baibol kẹdẹ kẹdẹ, rhuẹrẹ ọke vwọ kẹ uyono romobọ wẹn kugbe Ẹga Orua.—Se Une Rẹ Ejiro 119:32.

12, 13. Ukẹcha vọ yen Inenikristi ivẹ mrẹre kpahen urhurusivwe ọchọchọ ro rhe ayen?

¹² Udje buebun djerephia nẹ Ota rẹ Ọghẹnẹ, ẹwẹn ọfuanfon rọyen vẹ ẹbe ukoko na chọn Inenikristi sansan uko vwo phi erharhe urhurusivwe kparobọ. Eghene ọvo vwo se uyovwinrota re se “How Can You Resist Wrong Desires?” rọhẹ Awake! rẹ December 8, 2003, ọ da tanẹ, “Me họnra vwọsua urhurusivwe ọchọchọ. Uyovwinrota na djerephia nẹ ‘vwọ kẹ ihwo buebun, ohọnre re vwo phi urhurusivwe ọchọchọ kparobọ ganre mamọ,’ ọ da nẹrhẹ me mrẹvughe nẹ mi vwo iniọvo vwẹ akpọneje. Ọ diẹ omẹvwẹ ọvo yehẹ ẹdia na-a.” Eghene nana je mrẹ erere vwo nẹ uyovwinrota na, “Alternative Life-Styles—Does God Approve?” rọhẹ Awake! rẹ October 8, 2003. O niroso nẹ vwọ kẹ ihwo evo, ohọnre nana pha kerẹ “unwe” ro duvwu ayen. (2 Kọr. 12:7) Dede nẹ ayen jehẹ ohọnre na nonẹna, iphiẹrophiyọ herọ. Ọ da je tanẹ, “Fikirẹ ọnana, mi no nẹ me sa yọnregan kẹdẹ kẹdẹ. Me kpẹvwẹ Jihova rọ vwọ reyọ ukoko rọyen vwọ chọn avwanre uko kẹdẹ kẹdẹ vwẹ eyeren ọbrabra nana.”

¹³ Roro kpahen udje rẹ oniọvo aye ọvo vwẹ United States ro siri nẹ, “Me kpẹvwẹ ovwan vwọ kẹ emu rẹ ẹwẹn rẹ avwanre ghwa guọnọ vwẹ ọke ro fori. Ọkieje mi vwo no nẹ e ghwe si eta na vwọ kẹ vwẹ. Ikpe buebun rhire na yen mi vwo nene urhurusivwe rẹ orọnvwọn rẹ Jihova vwo utuoma kpahen muabọ. Ọkiọvo, me guọnọ phi obọ phiyotọ, me vwọ dobọ rẹ ohọnre na ji. Me riẹnre nẹ Jihova gbe arodọnvwẹ o ji vwo ghovwo, ẹkẹvuọvo kidie nẹ mi vwo urhurusivwe ọchọchọ nana, mi ji vwo utuoma kpahọn vwẹ ubiudu mẹ na-a, ki mi no nẹ mi muwan rẹ ukẹcha rọye-en. Ohọnre nana djobọte akpeyeren mẹ eje. . . . Mi vwo se uyovwinrota na, ‘Do You Have “a Heart to Know” Jehovah?’ rọhẹ Watchtower rẹ March 15, 2013 nu, me da rhe mrẹvughe nẹ Jihova ghene guọnọ chọn vwẹ uko.”

14. (a) Imuẹro vọ yen Pọl vwo kpahen ovwiẹrẹ rọyen? (b) Idjerhe vọ yen e se vwo phi ovwiẹrẹ avwanre kparobọ?

¹⁴ Se Rom 7:21-25. Pọl nabọ riẹn obo rọ gan te re vwo nene ovwiẹrẹ vẹ urhurusivwe ọchọchọ muabọ fikirẹ jẹgba, kidie o rhiẹromrẹ re. Ẹkẹvuọvo, o vwo imuẹro kokoroko nẹ o se phikparobọ womarẹ ẹrhovwo, ọ da vwẹroso Jihova ji vwo esegbuyota kpahen izobo ọtanhirhe rẹ Jesu. Kẹ avwanre vwo? E ji se phi ovwiẹrẹ romobọ kparobọ. Idjerhe vọ? Ra vwọ vwẹrokere Pọl, ra vwọ vwẹroso Jihova kare kare ọ dia ẹgba romobọ avwanre-e, e mi ji vwo esegbuyota kpahen ọtanhirhe na.

15. Diesorọ ẹrhovwo sa vwọ chọn avwanre uko vwọ yọnre gan ji chirakon rẹ edavwini?

¹⁵ O vwo ọke evo Ọghẹnẹ vwọ guọnọ nẹ avwanre dje oborẹ ẹdia avwanre hepha na da avwanre te. Kerẹ udje, die yen e che ru ọ da dianẹ avwanre (yẹrẹ ohwo rẹ orua avwanre) muọga ọgangan ọvo yẹrẹ rhiẹromrẹ oshenyẹ? E che djephia nẹ a vwẹroso Jihova kare kare womarẹ ẹrhovwo ọgangan rọ vwọ kẹ avwanre ẹgba ra sa vwọ yọnre gan je sẹro rẹ aghọghọ vẹ ẹdia rẹ ẹwẹn avwanre. (Fil. 4:13) Oborẹ ihwo buebun rhiẹromrẹ vwẹ ọke rẹ Pọl vẹ ọke avwanre nana, djerephia nẹ ẹrhovwo sa bọn avwanre gan je kẹ avwanre uduefiogbere e se vwo chirakon.

16, 17. Die yen orhiẹn-ebro wẹn?

¹⁶ Idẹbono guọnọre nẹ oma rhọ wẹ vwẹ ohọnre nana rere wo phi abọ phiyotọ. Ẹkẹvuọvo, brorhiẹn wo vwo “churu obọ mu obo ri yovwiri.” (1 Tẹsa. 5:21) Jẹ o muwẹro nẹ wo se phi Eshu, akpọ ọbrabra nana, kugbe jẹgba kparobọ. Wo se phikparobọ siẹrẹ wọ da vwẹroso ẹgba rẹ Ọghẹnẹ kare kare.—2 Kọr. 4:7-9; Gal. 6:9.

¹⁷ Ọtiọyena, họnre ọkieje. Muabọ ọkieje. Chirakon ọkieje. Vwo imuẹro nẹ Jihova che “ku oburhubu rẹ ebruphihọ” rọyen ku we.—Mal. 3:10.