-
Die Yen Uvie rẹ Ọghẹnẹ?Vwo Omavwerhovwẹn Bẹdẹ!—Ọbe re Vwo Yono Baibol Na
-
-
7. Irhi rẹ Uvie rẹ Ọghẹnẹ yen me yovwin kparobọ
Usuon jurhi ro che fierere je sẹro rẹ ihwo rehẹ otọ rẹ usuon na. Uvie rẹ Ọghẹnẹ ji vwo irhi ro fori nẹ ihwo rehẹ otọ rẹ usuon rọyen je yan nene. Se 1 Kọrẹnt 6:9-11, ovwan ta ota kpahen enọ nana:
Mavọ yen wo rorori nẹ akpọ na cha dia ihwo ejobi da yan nene irhi rẹ Ọghẹnẹ?a
Ọhọ herọ rẹ Jihova vwo rhẹro rọyen nẹ ihwo rehẹ otọ rẹ usuon rọyen che muọghọ vwọ kẹ irhi rọyen? Kẹ, diesorọ?
Die yen djerephia nẹ ihwo re yọnrọn irhi rọye-en se wene?—Ni owọ 11.
Usuon jurhi ro che fierere je sẹro rẹ ihwo rehẹ otọ rẹ usuon rọyen. Uvie rẹ Ọghẹnẹ ji vwo irhi ri yovwirin ri che fierere je sẹro rẹ ihwo rehẹ otọ rẹ usuon rọyen
-
-
Die Yen Baibol na ta Kpahen Ehware?Vwo Omavwerhovwẹn Bẹdẹ!—Ọbe re Vwo Yono Baibol Na
-
-
UYONO 41
Die Yen Baibol na Ta Kpahen Ehware?
Ihwo buebun mrẹ bẹnbẹn ayen vwọ ta ota kpahen ehware. Jẹ, Baibol na ta ota kpahọn phephẹn vwẹ idjerhe ọghọ. Obo rọ tare se fierere kẹ avwanre. Ọyena shephiyọ kidie Baibol na tare nẹ Jihova yen Ọmemama na. Kọyen ọ riẹn obo ri me yovwin kẹ avwanre. Ọ vuẹ avwanre obo re se vwo ru obo ri je kugbe obo re sa nẹrhẹ e vwo omavwerhovwẹn bẹdẹ.
1. Ẹro vọ yen Jihova vwo ni ehware?
Ehware ọyen okẹ ro nẹ obọ rẹ Ọghẹnẹ rhe. Ọ guọnọre nẹ aye gbe ọshare re rọvwọnre riavwerhen rọyen. Okẹ nana nẹrhẹ aye gbe ọshare vwiẹ emọ, ọ je nẹrhẹ ayen se dje ẹguọnọ kẹ ohwohwo vwẹ idjerhe rọ cha ghwa omavwerhovwẹn rhe ayen. Ọnana yen sorọ Baibol na vwọ ta: “Ghọghọ vwẹ oma rẹ aye rẹ ọke emọ wẹn.” (Isẹ 5:18, 19) Jihova guọnọre nẹ Inenikristi re rọvwọnre fuevun kẹ ọrivẹ rẹ orọnvwe rayen rere ayen vwo je gbe igberadja.—Se Hibru 13:4.
2. Die yen ọfanrhiẹn?
Baibol na tare nẹ “ọvwọfanrhiẹ . . . sa reuku rẹ uvie rẹ Ọghẹnẹ na-a.” (1 Kọrẹnt 6:9, 10) Ihwo ri si Baibol na vwẹ ejajẹ ri Grik reyọ ubiota na por·neiʹa vwo dje ọfanrhiẹn. Ọyena churobọ si (1) ehwarea vwẹ uvwre rẹ ihwo re je rọvwọ-ọn, (2) ọshare vwo duẹ ọshare, kugbe (3) re vwo duẹ eranvwe. Avwanre ru ọhọre ri Jihova ji mrẹ erere siẹrẹ a da kẹnoma kẹ “igberadja.”—1 Tẹsalonaika 4:3.
HIẸ KODO
Yono kpahen obo wọ sa vwọ kẹnoma kẹ ọfanrhiẹn vẹ erere wọ cha mrẹ siẹrẹ iruemu wẹn da dia fuanfon.
3. Kẹnoma kẹ ọfanrhiẹn
Ọshare ọvo rọ fuevun re se Josẹf sen aye ọvo rọ guọnọ nene vwerhẹn. Se Jẹnẹsis 39:1-12, ovwan ta ota kpahen enọ nana:
Diesorọ Josẹf vwọ djẹ?—Ni owọ 9.
Wo rorori nẹ Josẹf bru omamọ rẹ orhiẹn? Kẹ, diesorọ?
Mavọ yen ighene sa vwọ vwẹrokere Josẹf je kẹnoma kẹ ọfanrhiẹn nonẹna? Hworo IVIDIO na.
Jihova guọnọre nẹ a kẹnoma kẹ ọfanrhiẹn. Se 1 Kọrẹnt 6:18, ovwan ta ota kpahen enọ nana:
Ẹdia vọ yen sa nẹrhẹ ohwo gbe ọfanrhiẹn?
Mavọ yen wọ sa vwọ kẹnoma kẹ ọfanrhiẹn?
4. Wọ sa kẹnoma kẹ ọfanrhiẹn
Die yen sa nẹrhẹ ọ bẹn ra vwọ kẹnoma kẹ ọdavwini re vwo gbe ọfanrhiẹn? Hworo IVIDIO na, ovwan ta ota kpahen onọ ro nenire.
Ọke rẹ oniọvo rọhẹ ividio na vwo noso nẹ iroro vẹ iruemu rọyen sa nẹrhẹ o jẹ evun-ẹfuọn kẹ aye rọyen, die yen o ruru?
Ọke evo, Inenikristi ri fuevun dede ji nene iroro echọchọ muabọ. Mavọ yen a sa vwọ kẹnoma kẹ iroro rẹ ọfanrhiẹn? Se Filipae 4:8, ovwan ta ota kpahen enọ nana:
Erọnvwọn vọ yen ofori nẹ e roro kpahen?
Mavọ yen isese ri Baibol vẹ e vwo muomaphiyọ ẹga ri Jihova sa vwọ chọn avwanre uko vwọ sen ọdavwini re vwo ru umwemwu?
5. Iwan ri Jihova fierere kẹ avwanre
Jihova riẹn obo ri me yovwin kẹ avwanre. Ọ vuẹ avwanre kpahen obo ra sa vwọ dia fuanfon vẹ erere ro che norhe. Se Isẹ 7:7-27 yẹrẹ hworo IVIDIO na, ovwan ta ota kpahen enọ ri nenire.
Mavọ yen eghene ọshare na vwọ yan ro ọdavwini na?—Ni Isẹ 7:8, 9.
Vwo nene Isẹ 7:23, 26, ọfanrhiẹn sa so ebẹnbẹn rode. A da dia fuanfon, ebẹnbẹn vọ yen a sa kẹnoma kẹ?
Mavọ yen omamọ rẹ iruemu sa vwọ nẹrhẹ e vwo omavwerhovwẹn bẹdẹ?
Ihwo evo rorori nẹ oborẹ Baibol na ta kpahen uruemu rẹ ọshare vwo duẹ ọshare na dia odjephia rẹ ẹguọnọ-ọ. Ẹkẹvuọvo, Jihova rọ dia Ọghẹnẹ rẹ ẹguọnọ na guọnọre nẹ ihwo eje vwo omavwerhovwẹn bẹdẹ. E se vwo vwo, ofori nẹ e yerin mu iwan rọyen. Se 1 Kọrẹnt 6:9-11, ovwan ta ota kpahen onọ nana:
Vwẹ ẹro rẹ Ọghẹnẹ vwo ni emu, uruemu rẹ ọshare vwo duẹ ọshare na ọvo yen chọre?
E se vwo ru ọhọre rẹ Ọghẹnẹ, ofori nẹ ihwo eje ru ewene. Erere vọ yen che norhe? Se Une Rẹ Ejiro 19:8, 11, ovwan ta ota kpahen enọ nana:
Wo rorori nẹ iwan ri Jihova che fierere kẹ avwanre? Kẹ, diesorọ yẹrẹ diesorọ o vwo jẹ dia ọtiọyen?
Jihova chọn ihwo buebun uko vwọ yanmu iwan rọyen re. Ọ je sa chọn wẹ uko
IHWO EVO TA: “Ehware chọre-e, siẹrẹ ihwo ivẹ na de vwo ẹguọnọ rẹ ohwohwo.”
Die yen wo cha ta?
ỌDJẸKOKO
Ehware ọyen okẹ rẹ Jihova vwọ kẹ ihwo re rọvwọnre rere ayen riavwerhen rọyen.
Ẹrhomafuẹrẹn
Die yen ọfanrhiẹn churobọ si?
Die yen cha chọn avwanre uko vwọ kẹnoma kẹ ọfanrhiẹn?
Erere vọ yen che norhe siẹrẹ e de nene iwan ri Jihova?
HIẸ GUỌNỌ
Mrẹ oboresorọ Ọghẹnẹ vwọ guọnọ nẹ ọshare vẹ aye re guọnọ dia kugbe rọvwọn.
“Die Yen Baibol Ta Kpahen ra Vwọ Dia Kuẹgbe Ababọ rẹ Orọnvwe?” (Uyovwinrota rọhẹ jw.org)
Yono oboresorọ Baibol na vwọ tanẹ dede nẹ uruemu rẹ ọshare vwo duẹ ọshare na chọre, ofori nẹ e vwo utuoma kpahen ihwo na-a.
Yono kpahen oborẹ irhi rẹ Ọghẹnẹ ri shekpahen koka koka rẹ ehware vwọ sẹro rẹ avwanre.
Vwẹ ikuegbe rẹ “Ayen Muọghọ kẹ Vwẹ,” mrẹ obo ri mu ohwo ọvo ro vwo uruemu rẹ ọshare vwo duẹ ọshare vwo wene akpeyeren rọyen rere o se vwo ru ọhọre rẹ Ọghẹnẹ.
a Erharhe rẹ iruemu nana churobọ si ehware rẹ unu yẹrẹ ọ rẹ unusọn, yẹrẹ ra vwọ vwẹ obọ ghwraghwra oma rẹ ohwo ọfa vwẹ idjerhe rẹ ọfanrhiẹn.
-
-
Ẹro vọ Yen Inenikristi Vwo Ni Udi Ọgangan?Vwo Omavwerhovwẹn Bẹdẹ!—Ọbe re Vwo Yono Baibol Na
-
-
UYONO 43
Ẹro vọ Yen Inenikristi Vwo Ni Udi Ọgangan?
Vwẹ akpọneje, ihwo vwo iroro sansan kpahen udi ọgangan. Ihwo evo da udi siẹrẹ ayen vẹ igbeyan rayen de kuomakugbe. Efa brorhiẹn nẹ ayen cha da udi kakaka-a. Jẹ, efa da te ẹdia rẹ udi na de mu ayen. Die yen Baibol na ta kpahen udi ọgangan?
1. Ọ chọre a vwọ da udi ọgangan?
Baibol na gha udi ọganga-an. Ukperẹ ọtiọyen, Baibol na vwo djunute okẹ buebun rẹ Ọghẹnẹ vwọ kẹ avwanre, ọ da ta: “Udi rọ vwẹ omavwerhe kẹ udu rẹ ohwo.” (Une Rẹ Ejiro 104:14, 15) Eshare vẹ eya evo ri fuevun ra niyẹnrẹn rọyen vwẹ Baibol na da udi ọgangan.—1 Timoti 5:23.
2. Uchebro vọ yen Baibol na vwọ kẹ ihwo re da udi ọgangan?
Jihova gha uruemu ra vwọ da udi obuebun kugbe udi ẹda vroma. (Galesha 5:21) Baibol na da ta: “Wọ dia ọvo vwẹ usun rẹ ọgba-idi na-a.” (Isẹ 23:20) Ọtiọyena, avwanre de brorhiẹn a vwọ da udi, tobọ vwẹ odjahọn, ofori nẹ a da te ẹdia rẹ iroro, eta vẹ iruemu avwanre rhe che fiotọ-ọ, yẹrẹ tobọ phi omakpokpọ avwanre phiyọ ẹdia imuoshọ. Avwanre rhe se sun uche udi ra da-a, a ghwa kẹnoma kẹ riẹriẹriẹ.
3. Mavọ yen e se vwo muọghọ kẹ orhiẹn rẹ ihwo efa bru kpahen udi ọgangan?
Ohwo vuọvo yen che brorhiẹn sẹ ọ da udi ọgangan. Avwanre gun ihwo re da udi ọgangan vwọrẹ abavo ẹdjọ-ọ, avwanre je gba ohwo vwọ da udi ọganga-an. (Rom 14:10) Avwanre se brorhiẹn e vwo jẹ udi ẹda ọ da dianẹ ọ cha so ebẹnbẹn kẹ ihwo efa. (Se Rom 14:21.) Onenikristi “guọnọ erhuvwu rẹ oma rọye-e, ẹkẹvuọvo erhuvwu rẹ ọrivẹ rọye.”—Se 1 Kọrẹnt 10:23, 24.
HIẸ KODO
Roro kpahen odjekẹ ri Baibol re sa chọn wẹ uko vwo brorhiẹn sẹ wọ da udi ọgangan vẹ uche udi ro fori nẹ wọ da. Wọ je mrẹ obo wo ru ọ da dianẹ wo vwo ebẹnbẹn ro churobọ si udi ẹda.
4. Brorhiẹn sẹ wọ da
Ẹro vọ yen Jesu vwo ni udi ọgangan? Wọ vwọ mrẹ ẹkpahọnphiyọ na, roro kpahen igbevwunu rẹsosuọ rẹ Jesu ruru. Se Jọn 2:1-11, ovwan ta ota kpahen enọ nana:
Vwo nẹ igbevwunu yena, die yen wo yono kpahen ẹro rẹ Jesu vwo ni udi ọgangan vẹ ihwo re da?
Ọ vwọ dianẹ Jesu gha udi ọganga-an, ẹro vọ yen ofori nẹ Onenikristi vwo ni ohwo rọ da udi ọgangan?
Dede nẹ Onenikristi se brorhiẹn rọ vwọ da udi ọgangan, ọ dia ọyena mudiaphiyọ nẹ ọyen emu rẹ aghwanre rọ vwọ da udi ọkieje-e. Se Isẹ 22:3, ovwan roro kpahen erọnvwọn evo ri se djobọte orhiẹn ru wo bru kpahen udi ẹda:
Wọ guọnọ dje imotọ yẹrẹ ijini ride.
Wọ mrevun.
Idọktọ vuẹ wẹ nẹ wọ kẹnoma kẹ udi ọgangan.
Ọ bẹn wo vwo sun uche udi rẹ wọ cha da.
Urhi rẹ ẹkuotọ na rhọnvwere nẹ wọ da udi ọganga-an.
Wo chidia kẹrẹ ohwo ro brorhiẹn rọ vwọ kẹnoma kẹ udi kidie nẹ o vwo ebẹnbẹn ro vwo sun uche udi rọ da vwẹ ọke rọ wanre na.
Ofori nẹ wọ ghare udi ọgangan vwẹ irueru rẹ orọnvwe wẹn yẹrẹ vwẹ akpọẹriọ? Wọ vwọ mrẹ obo wo ru, hworo IVIDIO na.
Se Rom 13:13 kugbe 1 Kọrẹnt 10:31, 32. Wo de se ẹkpo ri Baibol na ọvuọvo nu, ovwan ta ota kpahen onọ nana:
Mavọ yen uchebro ri Baibol nana sa vwọ chọn wẹ uko vwo brorhiẹn rọ cha vwerhen Jihova oma?
Onenikristi ọvuọvo yen che brorhiẹn sẹ ọ cha da udi ọgangan yẹrẹ ọ cha da-a. Ọ da tobọ dianẹ ọ da udi ọgangan ọke evo, o se brorhiẹn ro vwo jẹ udi ẹda vwẹ ọke efa
5. Brorhiẹn rẹ uche udi rẹ wọ cha da
Wo de brorhiẹn wọ vwọ da udi ọgangan, karophiyọ: Dede nẹ Jihova gha udi ọganga-an, jẹ ọ tare nẹ a da udi vroma-a. Kẹ, diesorọ? Se Hosia 4:11, 18, ovwan ta ota kpahen onọ nana:
Die yen sa phia ohwo da da udi vroma?
Mavọ yen a sa vwọ kẹnoma kẹ ọdavrẹ? Ofori nẹ e vwo ẹro abavo, a me je riẹn asan rẹ ẹgba avwanre muru. Se Isẹ 11:2, ovwan ta ota kpahen onọ nana:
Diesorọ o vwo yovwin wọ vwọ riẹn uche udi ru wọ da?
6. Phi ọdavrẹ kparobọ
Mrẹ obo re chọn ọshare ọvo uko vwo phi udi ẹda vroma kparobọ. Hworo IVIDIO na, ovwan ta ota kpahen enọ ri nenire.
Vwevunrẹ ividio na, mavọ yen udi ọgangan vwo wene uruemu ri Dmitry?
Ọ sa dobọ rẹ ẹda rẹ udi ọgangan ji ugege na?
Mavọ yen ọ sa vwọ dobọ rẹ ẹda rẹ udi ọgangan ji ukuotọ rọyen?
Se 1 Kọrẹnt 6:10, 11, ovwan ta ota kpahen enọ nana:
Mavọ yen udi ẹda vroma bra te?
Die yen djerephia nẹ ohwo rọ da udi vroma se wene?
Se Matiu 5:30, ovwan ta ota kpahen onọ nana:
E vwo bru abọ nẹ ohwo oma ghwa udje rẹ izobo re ze e se vwo ru ọhọre rẹ Ọghẹnẹ. Die yen wo se ru ọ da dianẹ ọ bẹn wọ vwọ kẹnoma kẹ udi ẹda vroma?a
Se 1 Kọrẹnt 15:33, ovwan ta ota kpahen onọ nana:
Mavọ yen iruemu rẹ igbeyan wẹn se vwo wene uche udi wọ da?
OHWO SA NỌ: “Udi ẹda chọre?”
Die yen ẹkpahọnphiyọ wẹn?
ỌDJẸKOKO
Jihova kẹ avwanre udi ọgangan ra sa vwọ riakpọ, ẹkẹvuọvo ọ gha udi ẹda vroma kugbe uruemu ra vwọ da udi obuebun.
Ẹrhomafuẹrẹn
Die yen Baibol na ta kpahen udi ọgangan?
Imuoshọ vọ yen herọ siẹrẹ a da da udi gan nọ?
Mavọ yen e se vwo muọghọ kẹ orhiẹn rẹ ihwo efa bru kpahen udi ẹda?
HIẸ GUỌNỌ
Mavọ yen ighene se vwo bru omamọ rẹ orhiẹn kpahen udi ọgangan?
Mrẹ obo wo se ru wo phi ebẹnbẹn ro churobọ si udi ẹda vroma kparobọ.
“Phi Udi Phiyọ Ẹdia ro Foro” (Uwevwin Orhẹrẹ ri January 1, 2010)
Ofori nẹ Onenikristi vwobọ vwẹ uruemu ra vwọ vwẹ iganasi rẹ udi vwo dje ohwohwo?
“Enọ rẹ Ihwo ri Se Ẹbe Avwanre Nọre” (Uwevwin Orhẹrẹ ri February 15, 2007)
Vwẹ ikuegbe rẹ “Me da Udi Gangan,” mrẹ oborẹ ọshare ọvo vwọ dobọ rẹ udi ẹda vroma ji.
a Ihwo re dia ọviẹn kẹ udi ọgangan sa guọnọ ukẹcha rẹ idọktọ rere ayen sa vwọ vrabọ rọyen. Idọktọ buebun tare nẹ ihwo ri vwo ebẹnbẹn rẹ udi gha udi kare kare.
-
-
Wo de Rhe Ru Umwemwu Ọgangan Vwo?Vwo Omavwerhovwẹn Bẹdẹ!—Ọbe re Vwo Yono Baibol Na
-
-
Dede nẹ wo vwo ẹguọnọ ri Jihova mamọ wọ je davwẹngba vwọ kẹnoma kẹ obo ri miovwo ivun, jẹ wo se ru chọ ọke evo. Jẹ, imwemwu evo gan nẹ evo. (1 Kọrẹnt 6:9, 10) Wo de ru umwemwu ọgangan, karophiyọ nẹ Jihova ji sen wẹ kare kare-e; ọ je guọnọ vwo ghovwo uwe je chọn wẹ uko.
1. Die yen ofori nẹ wo ru wọ sa vwọ mrẹ evwoghovwo ri Jihova?
Ihwo ri vwo ẹguọnọ ri Jihova muomaphiyọ gangan ayen da mrẹvughe nẹ ayen ru umwemwu ọgangan. Ẹkẹvuọvo, ayen mrẹ uchebro vwo nẹ ive ri Jihova nana: “Ọ da dianẹ imwemwu wẹn họhọ isene, e cha họhọ ẹton rẹ ogegede.” (Aizaya 1:18) E de kurhẹriẹ nẹ otọ ubiudu rhe, Jihova che vwo ghovwo avwanre. Mavọ yen e kuẹrhẹriẹ wan? Avwanre viẹ idiekpọvwẹ kpahen oborẹ avwanre ruru, dobọ rọyen jẹ, je yare evwoghovwo ri Jihova. Ọtiọyena, kẹ avwanre davwẹngba vwo wene iroro vẹ iruemu echọchọ ri sun avwanre kpo umwemwu na ji yeren akpọ nene iwan ri Jihova.—Se Aizaya 55:6, 7.
2. Mavọ yen Jihova vwọ reyọ ekpako na vwọ chọn avwanre uko ọke re de ru umwemwu?
E de ru umwemwu ọgangan, Jihova tare nẹ e “se ekpako rẹ [ukoko na].” (Se Jems 5:14, 15.) Eshare nana vwo ẹguọnọ ri Jihova vẹ igodẹ na. Ayen muwan rẹ ayen vwọ chọn avwanre uko vwọ rhuẹrẹ oyerinkugbe avwanre vẹ Jihova phiyọ.—Galesha 6:1.
Mavọ yen ekpako na vwọ chọn avwanre uko ọke re de ru umwemwu? Ekpako ivẹ yẹrẹ erha cha vwẹ Baibol na vwọ kpọ avwanre vi. Ayen je cha vwẹ iroroẹjẹ vẹ uchebro re sa chọn avwanre uko vwọ kẹnoma kẹ umwemwu yena obọfa. Ayen sa dobọ rẹ erọnvwọn evo avwanre ruẹ vwẹ ukoko na ji re te ọke rẹ oyerinkugbe avwanre vẹ Jihova vwọ rhoma gan. A sa vwọ sẹro rẹ ukoko na vwo nẹ imuoshọ, ekpako na djẹ ihwo ri ru umwemwu ọgangan re rhọnvwe kurhẹriẹ-ẹ nẹ ukoko na.
HIẸ KODO
Vwo ọdavwaro, wo ji yono kokodo kpahen ukẹcha rẹ Jihova vwọ kẹ avwanre ọke re de ru umwemwu ọgangan.
3. A da fan imwemwu ka sa rhoma sikẹrẹ Ọghẹnẹ
Koka koka rẹ umwemwu rẹ avwanre ruru da Jihova, ọtiọyena ofori nẹ a fan imwemwu na vwọ kẹ. Se Une Rẹ Ejiro 32:1-5, ovwan ta ota kpahen onọ nana:
Diesorọ o vwo fo nẹ a ta umwemwu avwanre kẹ Jihova ukperẹ a vwọ djahọn?
Vwọ vrẹ a vwọ fan umwemwu rẹ avwanre kẹ Jihova, a cha mrẹ urovwoma siẹrẹ a da guọnọ ukẹcha rẹ ekpako na. Hworo IVIDIO na, ovwan ta ota kpahen onọ ro nenire.
Vwevunrẹ ividio na, mavọ yen ekpako na vwọ chọn Canon uko vwo rhivwin bru Jihova rhe?
Ofori nẹ e rhievun ta uyota na eje kẹ ekpako na; ayen sa chọn avwanre uko. Se Jems 5:16, ovwan ta ota kpahen onọ nana:
Diesorọ ọ cha vwọ lọhọ ekpako na vwọ chọn avwanre uko siẹrẹ a da ta uyota kẹ ayen?
Fan imwemwu wẹn, ta uyota kẹ ekpako na, wo ji rhiabọreyọ ukẹcha ri Jihova
4. Ukẹcha rẹ ọrhuẹrẹphiyotọ ra vwọ djẹ ohwo nẹ ukoko vwọ phia
Ohwo ro ru umwemwu ọgangan ra rhọnvwe nene iwan ri Jihova-a, ọ rha cha sa dia evunrẹ ukoko na-a. A cha djẹ ohwo na. Ọtiọyena, avwanre rhe kuomakugbe ohwo na yẹrẹ nene ta ota-a. Se 1 Kọrẹnt 5:6, 11 kugbe 2 Jọn 9-11, ovwan ta ota kpahen onọ nana:
Kirobo rẹ iphuephu nẹrhẹ ibrẹdi phuẹ, mavọ yen e vwo kuomakugbe ihwo re rhọnvwe kurhẹriẹ-ẹ se vwo miovwo ukoko na?
ede nẹ ọghwọku na miavwẹ oma, ihwo buebun ra djẹre rhoma rhivwin rhe ukoko na re kidie ọghwọku na nẹrhẹ ayen mrẹ oruchọ rayen vughe. (Une Rẹ Ejiro 141:5) Hworo IVIDIO na, ovwan ta ota kpahen onọ ro nenire.
Vwevunrẹ ividio na, mavọ yen ọrhuẹrẹphiyotọ ra vwọ djẹ ohwo nẹ ukoko vwọ chọn Sonja uko?
Mavọ yen ọrhuẹrẹphiyotọ ra vwọ djẹ ohwo nẹ ukoko . . .
vwo muọghọ kẹ odẹ ri Jihova?
vwo djephia nẹ Jihova vwo aghwanre vẹ ẹguọnọ?
5. Jihova vwo ghovwo avwanre e de kurhẹriẹ
Jesu vwẹ udje ọvo vwọ chọn avwanre uko vwọ riẹn oborẹ oma ru Jihova ọke rẹ ohwo ọvo de kurhẹriẹ. Se Luk 15:1-7, ovwan ta ota kpahen onọ nana:
Die yen ọnana yono uwe kpahen Jihova?
Se Izikiẹl 33:11, ovwan ta ota kpahen onọ nana:
Die yen e che ru vwo djephia nẹ e kurhẹriẹ re?
Kerẹ osuigodẹ, Jihova nabọ vwẹrote igodẹ rọyen
IHWO EVO TA: “Oshọ mu vwe nẹ me da vuẹ ekpako na kpahen umwemwu mẹ, a cha djẹ vwẹ.”
Die yen wọ cha vuẹ ohwo ro vwo oka rẹ ẹwẹn tiọyen?
ỌDJẸKOKO
E de ru umwemwu ọgangan, viẹ idiekpọvwẹ kpahọn ji brorhiẹn a vwọ kẹnoma kẹ obo re chọre, Jihova che vwo ghovwo avwanre.
Ẹrhomafuẹrẹn
Diesorọ ọ vwọ ghanre a vwọ fan imwemwu avwanre vwọ kẹ Jihova?
Die yen ofori nẹ e ru a sa vwọ mrẹ evwoghovwo?
E de ru umwemwu ọgangan, diesorọ a vwọ guọnọ ukẹcha rẹ ekpako na?
HIẸ GUỌNỌ
Mrẹ oborẹ ọshare ọvo vwọ mrẹ arodọnvwẹ ri Jihova re djisẹ rọyen vwẹ Aizaya 1:18.
Mavọ yen ọrhuẹrẹphiyotọ ra vwọ djẹ ohwo nẹ ukoko vwo fierere kẹ ihwo eje ro shekpahen?
Mrẹ obo wo se vwo djekpahen ọrhuẹrẹphiyotọ ra vwọ djẹ ohwo nẹ ukoko vwọ kẹ ohwo rọ dia Oseri-i.
“Ovwan Kẹnoma kẹ Ihwo Ri ke Kpẹ Ẹga Rovwan Jovwo?” (Uyovwinrota rọhẹ jw.org)
Vwẹ ikuegbe rẹ “Ofori nẹ Mi Rhivwin Bru Jihova Rhe,” mrẹ oborẹ ọshare ọvo ro bo nẹ ukoko na vwọ mrẹ nẹ Jihova yen si ọyen rhivwin rhe.
-