Wo Se Yono Ihwo Vwọ Dia Idibo ri Jesu?

 1. Die yen Jihova ru kẹ wẹ?

MAVỌ wo ru dia Oseri ri Jihova? Ẹsosuọ, ọ sa dianẹ womarẹ ọsẹ vẹ oni wẹn, ohwo wẹ vẹ ọyen gbe ruiruo yẹrẹ kpo isikuru, yẹrẹ aghwoghwo ri nẹ uwevwin kpo uwevwin na yen wo vwo nyo “iyẹnrẹ esiri na.” (Mak 13:10) Vwo nẹ etiyin, ohwo ọvo da ghwọrọ ọke vẹ ẹgba rọyen vwo yono uwe Baibol na. Uyono yena da chọn wẹ uko vwọ riẹn nẹ Jihova vwo ẹguọnọ wẹ, ọnana da nẹrhẹ wo ji vwo ẹguọnọ rọyen. Jihova nẹrhẹ uyota na si we urhuru, enẹna wo vwo iphiẹrophiyọ wọ vwọ dia bẹdẹ kidie wẹwẹ odibo ri Jesu Kristi. (Jọn 6:44) O muẹro dẹn nẹ oma vwerhen owẹ nẹ Jihova reyọ ohwo ọvo vwo yono uwe uyota na, o ji rhiabọreyọ owẹ kerẹ odibo rọyen.

 2. Die yen a cha ta ota kpahen vwẹ uyono nana?

² Avwanre vwọ riẹn uyota na nure na, avwanre vwo uphẹn ra vwọ chọn ihwo efa uko vwọ vwomaba avwanre vwẹ idjerhe rẹ arhọ na. Dede nẹ ọ sa lọhọ kẹ avwanre re vwo vwobọ vwẹ aghwoghwo ri nuwevwin kpo uwevwin, jẹ ọ sa dia bẹnbẹn ra vwọ vuẹ ohwo ọfa kpahen ọrhuẹrẹphiyotọ rẹ uyono ri Baibol, ji nene yono. Ọyena phia kẹ wẹ jovwo re? Ọ da dia ọtiọyen, kọyen iroroẹjẹ ra cha vwọphia vwẹ uyono nana cha chọn wẹ uko. A cha ta ota kpahen obo ri muẹ avwanre vwo vwobọ vwẹ iruo rẹ odibo egbe na. A je cha ta ota kpahen obo re se vwo phi egbabọse sansan kparobọ, re sa nẹrhẹ e siomauko vwọ kẹ uyono ri Baibol re vwo muẹ kẹ ihwo. Ẹsosuọ, e jẹ a ta ota kpahen oboresorọ a vwọ guọnọ nẹ avwanre ghwoghwo iyẹnrẹn esiri na, ji yono ihwo.

 3. Diesorọ avwanre vwo ghwoghwo?

³ Ọke rẹ Jesu vwọ akpọ na, ọ vwẹ iji ọvo ro vwo ẹbẹre ivẹ vwọ kẹ idibo rọyen. Ẹsosuọ, ọ vuẹ ayen nẹ ayen ghwoghwo iyẹnrẹn esiri rẹ Uvie na, ọ je vuẹ ayen oborẹ ayen che ruo wan. (Mat. 10:7; Luk 8:1) Jesu vuẹ idibo rọyen oborẹ ayen che ru ọke rẹ ihwo da kerhọ, kugbe ọke rẹ ayen da sen ovuẹ rẹ Uvie na. (Luk 9:2-5) Ọ je ta phiyotọ nẹ ovuẹ na che te asan buebun, kidie ọ tare nẹ idibo rọyen che se “iseri kẹ ẹgborho na ejobi.” (Mat. 24:14; Iruo 1:8) O torori sẹ ihwo sen ovuẹ na yẹrẹ ayen rhiabọreyọ-ọ, idibo rọyen cha vuẹ ihwo kpahen Uvie rẹ Ọghẹnẹ kugbe obo ro che ru.

 4. Vwo nene obo rehẹ Matiu 28:18-20, vwọ vrẹ aghwoghwo rẹ Uvie na, die ọfa yen e che ru?

⁴ Ọrhọ yen ẹbẹre rivẹ rẹ iji ri Jesu na? Ọ vuẹ idibo rọyen nẹ ayen yono ihwo vwọ riẹn imu ejobi ro ji iji rọyen kẹ ayen. Ẹkẹvuọvo, ihwo evo tare nẹ Inenikristi rẹ ẹgbukpe ujorin ẹsosuọ ọvo yen iji re vwo ghwoghwo ji yono na shekpahen. Ọtiọyen ọ ghini hepha? Ẹjo, Jesu tare nẹ e che ruiruo ọghanghanre yena, “rhiri rhi te oba rẹ akpọ na.” (Se Matiu 28:18-20.) Ọ sa dianẹ ọke rẹ Jesu vwọ vwomaphia kẹ idibo re vrẹ 500 yen o vwo ji iji yena. (1 Kọr. 15:6) Vwẹ ẹvwọphia rọ vwọ kẹ Jọn, Jesu djere phephẹn nẹ ọ guọnọre nẹ idibo rọyen eje yono ihwo efa kpahen Jihova.—Ẹvwọ. 22:17.

 5. Vwo nene obo rehẹ 1 Kọrẹnt 3:6-9, udje vọ yen Pọl vwo djisẹ rẹ oborẹ aghwoghwo vẹ eyono vwo churobọ si ohwohwo?

⁵ Ọyinkọn Pọl vwẹ iruo rẹ odibo egbe na vwo dje owian ra vwọ kọn ekankọn, o de djunute emu ọfa re ji che ru. Ọ vwẹ ẹkarophiyọ nana kẹ iniọvo rehẹ Kọrẹnt: “Me kọnre, Apolọs ku ame ku . . . ovwan hẹ udju rẹ Ọghẹnẹ.” (Se 1 Kọrẹnt 3:6-9.) Kerẹ ewiowian re wian vwẹ “udju rẹ Ọghẹnẹ,” avwanre kọn ibi, ku ame kuẹ, je vwo oniso rẹ oborẹ ekankọn na djẹ wan. (Jọn 4:35) Dedena, avwanre riẹnre nẹ Ọghẹnẹ yen nẹrhẹ ekankọn na djẹ.

 6. Die yen owian rẹ eyono rẹ avwanre na churobọ si?

⁶ Avwanre hiẹ guọnọ ihwo “re ve arhọ ri bẹdẹ na kẹ.” (Iruo 13:48) Ayen sa vwọ dia idibo ri Jesu, avwanre cha chọn ayen uko (1) vwo vwo ẹruọ, (2) vwo rhiabọreyọ, kugbe (3) vwọ vwẹ oborẹ ayen yonori vwẹ Baibol na vwo ruiruo. (Jọn 17:3; Kọl. 2:6, 7; 1 Tẹsa. 2:13) Avwanre eje sa chọn ihwo ra vwẹ Baibol yono uko siẹrẹ avwanre de dje ẹguọnọ kẹ ayen, ji dede ayen ọke rẹ ayen da rhe uyono. (Jọn 13:35) Ighwoghwota ri yono ayen sa ghwọrọ ọke je davwẹngba vwọ chọn ayen uko vwo ghwie ẹkuruemu vẹ esegbuyota “egangan” nẹ ubiudu rayen. (2 Kọr. 10:4, 5) Ọ sa reyọ emeranvwe buebun tavwen a ke sa chọn ohwo uko vwo ru ewene tiọna ji bromaphiyame. Ẹkẹvuọvo, erere buebun herọ.

 7. Die yen muẹ avwanre vwo vwobọ vwẹ aghwoghwo vẹ iruo rẹ odibo egbe na?

⁷ Diesorọ avwanre vwo vwobọ vwẹ aghwoghwo vẹ iruo rẹ odibo egbe na? Ẹsosuọ, kidie avwanre vwo ẹguọnọ ri Jihova. Wo se djephia nẹ wo vwo ẹguọnọ ri Jihova siẹrẹ wọ da davwẹngba wẹn eje vwo nene iji re vwo ghwoghwo ji yono. (1 Jọn 5:3) Roro kpahen ọnana: Ẹguọnọ wo vwori kpahen Jihova yen mu we vwo ghwoghwo ota nuwevwin kpo uwevwin. Ọ lọhọre wo vwo nene iji yena? Ẹjo. O muẹro nẹ oshọ mu we ẹdẹ rẹsosuọ wo tu kpo aghwoghwo. Ẹkẹvuọvo, wọ riẹnre nẹ Jesu guọnọre nẹ wo ruiruo nana, wo de nene iji rọyen. Ọkiọvo ọke wọ yanran na, iruo rẹ aghwoghwo na me rhe riẹnriẹn owẹ oma. Kẹ, uyono ri Baibol re vwo muẹ kẹ ihwo vwo? Oshọ rẹ ọyena ji mu we? Ọkiọvo. Ẹkẹvuọvo, wọ da nẹrhovwo rhe Jihova nẹ ọ chọn wẹ uko vwo phi oshọ yena kparobọ, ji fiudugberi vuẹ ihwo kpahen ọrhuẹrẹphiyotọ rẹ uyono ri Baibol, Jihova se phi oruru rẹ iruo rẹ odibo egbe na phiyọ owẹ.

 8. Vwo nene obo rehẹ Mak 6:34, die ọfa yen se mu avwanre vwo yono ihwo efa?

⁸ Ọrivẹ, ẹguọnọ rẹ irivẹ rẹ avwanre muẹ avwanre vwo yono ayen uyota na. O vwo ẹdẹ ọvo rẹ oma vwọ ghwọrọ Jesu vẹ idibo rọyen rẹ ayen vwo ghwoghwo ota kẹ ihwo buebun nu. Ọke rẹ ayen vwọ guọnọ asan rẹ ayen de rovwoma, otu buebun da mrẹ ayen. Fikirẹ arodọnvwẹ, Jesu de yono ihwo na “emu buebu.” (Se Mak 6:34.) Diesorọ Jesu vwo ru ọnana vwẹ ọke yena rẹ oma vwọ ghwọrọ? Kidie o phi oma rọyen phiyọ ẹdia rẹ otu buebun na. Ọ guọnọ chọn ayen uko, kidie ayen rioja mamọ; ayen vwo iphiẹrophiyọ-ọ. Ihwo buebun jehẹ ẹdia tiọyen nonẹna, dede nẹ ọ sa họhọ nẹ oma vwerhen ayen. Ayen họhọ igegede ri ghwruru kidie ayen vwo osu-un. Ọyinkọn Pọl djere nẹ ihwo tioyena riẹn Ọgẹnẹ-ẹ, ayen ji vwo iphiẹrophiyọ-ọ. (Ẹfe. 2:12) Ayen hẹ “idjerhe rẹ ughwru” yẹrẹ oghwọrọ! (Mat. 7:13) Avwanre de roro kpahen obo rọ ghanre te, rẹ ihwo rehẹ ekogho rẹ avwanre de ghwoghwo vwọ riẹn Ọghẹnẹ, ẹguọnọ vẹ arodọnvwẹ ko che mu avwanre vwọ chọn ayen uko. Idjerhe ro me yovwin ra sa vwọ chọn ayen uko, ọyen e vwo yono ayen Baibol na.

 9. Vwo nene obo rehẹ Filipae 2:13, ukẹcha vọ yen Jihova sa vwọ kẹ wẹ?

⁹ Ọ sa dianẹ oshọ mu we wọ vwọ vwẹ uyono ri Baibol mu kẹ ohwo, kidie wọ riẹnre nẹ wọ cha ghwọrọ ọke vwo muegbe ji yono ohwo na. Ta ọdavwẹ wẹn kẹ Jihova, ọ da dia oshọ rẹ ọke na yen mu we. Vuẹ nẹ ọ chọn wẹ uko wo vwo owenvwe wọ vwọ vwẹ Baibol vwo yono ohwo. (Se Filipae 2:13, NW.) Ọyinkọn Jọn kẹ avwanre imuẹro nẹ Ọghẹnẹ cha kpahenphiyọ ẹrhovwo ri shephiyọ ọhọre Rọyen. (1 Jọn 5:14, 15) Ọtiọyena, jẹ o muwẹro nẹ Jihova cha nẹrhẹ wo vwo owenvwe vwo vwo vwobọ vwẹ iruo rẹ odibo egbe na.

10-11. Die yen sa nẹrhẹ oshọ ra vwọ vwẹ uyono ri Baibol mu kẹ ohwo mu avwanre?

¹⁰ Avwanre nẹ iruo rẹ eyono na ghanghanre, dede nẹ e se hirharoku egbabọse re sa nẹrhẹ ọ bẹn re vwo ru te asan ra guọnọre vwẹ iruo rẹ odibo egbe na. E jẹ a ta ota kpahen egbabọse evo, kugbe obo re se vwo phi ayen kparobọ.

¹¹ Ẹdia rẹ avwanre hepha se si obo re se ru kpotọ. Kerẹ udje, ighwoghwota evo kpakore, efa vwo omakpokpọ-ọ. Ẹdia tiọyen wọ hepha? Ọ da dia ọtiọyen, roro kpahen emu ọvo rẹ emiavwe re se COVID-19 rọ ro akpọeje yono avwanre. Avwanre niroso nẹ a sa vwẹ Baibol vwọ nabọ yono ihwo womarẹ intanẹti! Wọ sa vwẹ uyono ri Baibol mu kẹ ohwo wọ vwọ hẹ uwevwin wẹn na! Erere ọfa je herọ. Ihwo evo guọnọ yono Baibol na, jẹ ayen dia uwevwin ọke rẹ iniọvo rẹ avwanre vwo kpo ota eghwoghwo-o. Ẹkẹvuọvo, ayen sa dia uwevwin vwẹ edegburhiọke yẹrẹ vwẹ ovwọvwọn. Wo se nene ayen yono vwẹ ọke tiọyena? Jesu yono Nikodimọs vwẹ ason, kidie ọyen ọke ro me je Nikodimọs.—Jọn 3:1, 2. 

12. Die yen sa nẹrhẹ avwanre vwo imuẹro nẹ a sa die uvi rẹ iyono?

¹² Avwanre se roro nẹ avwanre che se yono ohwo na-a. Ọkiọvo avwanre niro nẹ e che vwo erianriẹn kpobarophiyọ yẹrẹ nabọ tẹn ona rẹ uyono, tavwen e ki se yono ohwo ọfa. Ẹwẹn tiọna de rhe we, gbe vwo oniso rẹ erọnvwọn erha ri se toroba uduefiogbere wẹn. Ẹsosuọ, Jihova niro nẹ wo muwan wo vwo yono ihwo efa. (2 Kọr. 3:5) Ọrivẹ, Jesu ra vwẹ “ogangan ejobi re hẹ odjuvwu vẹ akpọ” na kẹ, yen vwẹ iji kẹ wẹ nẹ wo re yono ihwo efa. (Mat. 28:18) Ọrerha, wọ sa nokpẹn rẹ ukẹcha mie ihwo efa. Jesu vwẹ oborẹ Jihova yoniro vwo yono ihwo efa; wo ji se ru ọtiọyen. (Jọn 8:28; 12:49) Vwọba, wọ sa vuẹ oniruo rọ vwẹrote ẹko rẹ iruo aghwoghwo rẹ wọ hepha, ọkobaro, yẹrẹ oghwoghwota rọ tẹn ona nẹ o yono uwe oborẹ wọ sa vwọ vwẹ uyono ri Baibol mu kẹ ohwo, ji yono ohwo na. Idjerhe ọvo wo se vwo vwo uduefiogbere ọyen wo vwo nene iniọvo tiọyena kpo asan rẹ ohwo rẹ ayen yono.

13. Diesorọ o vwo fo nẹ avwanre ru ewene?

¹³ Ọ sa dia bẹnbẹn ra vwọ vwẹ ona vẹ ekuakua kpokpọ efa vwo ruiruo. Ona rẹ avwanre vwo ruẹ uyono ri Baibol wene re. Ọbe re se Vwo Omavwerhovwẹn Bẹdẹ! yen avwanre vwo yono ihwo. Ona re vwo muegbe, vẹ ọ re vwo ruẹ uyono rha dia kerẹ obo ri jovwo-o. Avwanre se ẹkoreta buebu-un. Ukperẹ ọtiọyen, avwanre nabọ nene ohwo re yono na ta ota kuẹgbe. A vwẹ ividio vẹ ekuakua buebun rehẹ aplikeshoni kerẹ JW Library^® vwo ruẹ uyono na. Ọ da bẹn kẹ wẹ wọ vwọ reyọ ekuakua tiọna vwo ruiruo, wọ me nokpẹn rẹ ukẹcha mie ohwo rọ sa chọn wẹ uko. Ọ bẹn mamọ ohworakpọ se vwo siobọnu orọnvwọn ro ru riẹnrioma nure. Ọtiọyen, ọ lọhọre e vwo rhiabọreyọ ona kpokpọ-ọ. Ẹkẹvuọvo, womarẹ ukẹcha ri Jihova kugbe ihwo efa, ọ cha lọhọ kẹ wẹ wo vwo ru ewene, wọ me je riavwerhen rẹ uphẹn wo vwo yono ihwo efa. Ọkobaro ọvo tare nẹ ona kpokpọ vwẹ ọbọngan vwọ kẹ “oghwoghwota vẹ ohwo ro yono.”

14. Die yen ofori nẹ a karophiyọ ọke re de ghwoghwo vwẹ ekogho rẹ ihwo buebun da sen ovuẹ na, kẹ mavọ yen 1 Kọrẹnt 3:6, 7 vwọ bọn avwanre gan?

¹⁴ Ọ sa dia bẹnbẹn ra vwọ tọn uyono ri Baibol phiyọ vẹ ihwo vwẹ ekogho rẹ avwanre dia. Ihwo sa sen ovuẹ rẹ avwanre yẹrẹ tobọ vwọsuọ. Die yen sa nẹrhẹ e vwo imuẹro nẹ ihwo tiọyena se rhiabọreyọ ovuẹ na vwẹ ọke ọfa? Karophiyọ nẹ ẹdia rẹ ihwo se wene siẹvuọvo vwẹ akpọ rẹ Eshu nana, ihwo re rhọnvwa kerhọ-ọ, sa rhoma rhi vwo omavwerhovwẹn kpahen ovuẹ na. (Mat. 5:3) Ihwo evo ri sen ẹbẹ rẹ avwanre mamọ dẹvure, rhiabọreyọ uyono ri Baibol enẹna. Avwanre je riẹn nẹ Jihova yen onini rẹ orhọ na. (Mat. 9:38) Ọ guọnọre nẹ avwanre rha kọ ji ku ame kuẹ, ẹkẹvuọvo ọyen cha nẹrhẹ ekankọn na djẹ. (1 Kọr. 3:6, 7 ) Oma vwerhen avwanre nẹ ẹgbaẹdavwọn rẹ avwanre yen Jihova nẹ vwo ku ebruphiyọ kuẹ avwanre, ọ dia uche ihwo re se yono-o!b

15. Mavọ yen oma ruẹ Jihova siẹrẹ ohwo ọvo de rhiabọreyọ uyono ri Baibol ji ru nene obo ro yonori?

¹⁵ Oma vwerhen Jihova siẹrẹ ohwo ọvo de rhiabọreyọ uyono ri Baibol, je vuẹ ihwo efa kpahen obo ro yonori. (Isẹ 23:15, 16) O muẹro dẹn nẹ oma vwerhen Jihova mamọ rọ vwọ mrẹ ihwo rọyen ri ghwoghwo ota ji yono ihwo vẹ oruru nonẹna! Kerẹ udje, vwẹ ukpe rẹ ẹga ri 2020, dede nẹ ọga ro akpọeje, ihwo ra vwẹ Baibol yono te 7,705,765, ọyena nẹrhẹ a sa vwẹ ukẹcha kẹ ihwo 241,994 vwọ vwomakpahotọ kẹ Jihova ji bromaphiyame. Ihwo kpokpọ nana je cha vwẹ Baibol na vwo yono ihwo efa, je chọn ayen uko vwọ dia idibo ri Jesu. (Luk 6:40) Aphro herọ-ọ, oma nabọ vwerhen Jihova ọke rẹ avwanre de vwobọ vwẹ iruo rẹ odibo egbe na.

16. Omamọ orọnvwọn vọ yen sa dia oborẹ avwanre vwọtua?

¹⁶ Iruo rẹ odibo egbe na ghwa lọhọ-ọ, ẹkẹvuọvo womarẹ ukẹcha ri Jihova, a sa chọn ihwo kpokpọ uko vwo vwo ẹguọnọ rẹ Ọsẹ rẹ avwanre rọhẹ obo odjuvwu. Obo re se vwo vwo ohwo ọvo ra cha vwẹ Baibol yono sa dia oborẹ avwanre vwọtua? Obo re cha phia se gbe avwanre unu siẹrẹ avwanre da reyọ kuphẹnkuphẹn ro rhiephiyọ vwọ vuẹ ihwo nẹ ayen nene avwanre yono Baibol na. O muẹro dẹn nẹ Jihova che ku ebruphiyọ ku ẹgbaẹdavwọn rẹ avwanre.

17. Mavọ yen oma che ru avwanre siẹrẹ a da sa vwẹ Biabol yono ohwo ọvo?

¹⁷ Avwanare vwo okpuphẹn re vwo ghwoghwo ota ji yono ihwo efa uyota na! Ihwo na kẹ avwanre uvi rẹ omavwerhovwẹn. Ọyinkọn Pọl rọ chọn buebun rẹ ihwo ri Tẹsalonaika uko vwọ dia idibo ri Jesu, dje oborẹ oma nabọ vwerhọn te, rọ vwọ ta: “Kidie hẹ iphiẹrohọ rẹ avwanre, eyẹ aghọghọ rẹ avwanre eyẹ erhu rẹ uvie rẹ avwanre vwọ yan eyan vwẹ obara rẹ Ọrovwavwanre Jesu vwẹ ẹcha rọye? Ọ rha dia ovwan na-a? Kidie ovwan na hẹ eyan rẹ avwanre vẹ aghọghọ rẹ avwanre.” (1 Tẹsa. 2:19, 20; Iruo 17:1-4) Nonẹna, ihwo buebun ji vwo ẹwẹn ọtiọyen. Oniọvo aye ọvo re se Stéphanie, rọ vẹ ọshare rọyen yono ihwo buebun bromaphiyame re, tare nẹ, “A mrẹ vwo dje aghọghọ rọ herọ siẹrẹ a da chọn ihwo uko vwọ vwomakpahotọ kẹ Jihova-a.”