Wo Vwo Iruo Ọghanghanre Vwevunrẹ Ukoko ri Jihova!

 1. Uphẹn vọ yen avwanre riavwerhen rọyen?

ỌYEN okpuphẹn ra vwọ dia evunrẹ ukoko ri Jihova! Avwanre riavwerhen rẹ ufuoma vẹ aghọghọ rode re vwo nene iniọvo rẹ ukoko na ga Jihova kuẹgbe. Iruo vọ yen wo ruẹ vwevunrẹ ukoko na?

 2. Udje vọ yen ọyinkọn Pọl vwo ruiruo vwẹ ileta buebun ro siri?

² Avwanre se yono emu buebun kpahen iruo rẹ avwanre vwori vwẹ ukoko na vwo nẹ udje rẹ ọyinkọn Pọl vwo ruiruo vwẹ ileta buebun ro siri. Vwẹ ọvuọvo rẹ ileta nana, Pọl vwẹ ukoko na vwo dje ugboma rẹ ohworakpọ. Ọ je vwẹ ohwo ọvuọvo vwevunrẹ ukoko na vwo dje ẹbẹre sansan rehẹ ugboma na.—Rom 12:4-8; 1 Kọr. 12:12-27; Ẹfe. 4:16.

 3. Iyono eghanghanre erha vọ yen avwanre che yono vwẹ uyono nana?

³ Vwẹ uyono nana, avwanre cha ta ota kpahen iyono eghanghanre erha rẹ avwanre se yono vwo nẹ udje rẹ Pọl vwo ruiruo. Ẹsosuọ, avwanre che yono nẹ ohwo ọvuọvo vwo iruo ọghanghanreb ro ruẹ vwevunrẹ ukoko ri Jihova. Ọrivẹ, avwanre che yono obo re se ru siẹrẹ avwanre de no nẹ avwanre fiemu vwevunrẹ ukoko na-a. Ọrerha, avwanre che yono oboresorọ o vwo fo nẹ avwanre muomaphiyọ iruo rẹ Jihova vwọ kẹ avwanre vwevunrẹ ukoko na.

 4. Die yen Rom 12:4, 5 yono avwanre?

⁴ Uyono rẹsosuọ rẹ avwanre se yono vwo nẹ udje rẹ Pọl vwo ruiruo yen avwanre ohwo ọvuọvo vwo iruo ọghanghanre vwẹ ukoko ri Jihova. Eta nana yen Pọl vwọ ton udje na phiyọ: “Kirobo rẹ avwanre hẹ ugboma ọvo na ro de vwo ekuakua buebu na, rẹ ekuakua na ejobi vwo oghẹre rẹ iruo ọvo-o na, ọtiọye na avwanre, dede nẹ avwanre epha buebu na, ugboma ọvo vwi Kristi, yẹ ohwo ọvuọvo ekuakua na ohwohwo vwọ so ohwohwo [“ohwohwo-o,” NW].” (Rom 12:4, 5) Die yen ẹkpo rẹ Pọl vwọ phia? Dede nẹ iruo rẹ avwanre ohwo ọvuọvo vwevunrẹ ukoko na fẹnẹre, jẹ avwanre ohwo ọvuọvo pha ghanghanre.

 5. Die yen Jihova vwo “ru ẹse” kẹ ukoko na?

⁵ Wo de roro kpahen ihwo ri vwo iruo eghanghanre vwevunrẹ ukoko na, ẹwẹn wẹn sa fobọ djẹ kpo ihwo re kobaro rẹ iruo rẹ ukoko na. (1 Tẹsa. 5:12; Hib. 13:17) Ghini uyota nẹ womarẹ Kristi, Jihova vwẹ eshare vwo “ru ẹse” kẹ ukoko rọyen. (Ẹfe. 4:8) Eshare nana re vwo “ru ẹse” na yen iniọvo rehẹ Ẹko Rọvwẹrote na, iniọvo re vwo mu re vwẹ ukẹcha kẹ Ẹko Rọvwẹrote na, iniọvo rehẹ Umẹ Rọvwẹrote Oghọn Ukoko, iniruo okinriariẹ, iyono rẹ isikuru rẹ ukoko na, ekpako ukoko, kugbe idibo rowian. Ẹwẹn ọfuanfon yen a vwọ reyọ iniọvo nana eje vwo mu nẹ e vwẹrote igodẹ rẹ Ọghẹnẹ re pha ghanghanre na je bọn ukoko na gan.—1 Pita 5:2, 3.

 6. Vwo nene obo rehẹ 1 Tẹsalonaika 2:6-8, die yen iniọvo re vwo mu womarẹ ẹwẹn ọfuanfon na davwẹngba vwo ruẹ?

⁶ A vwẹ iniọvo eshare vwo mu womarẹ ẹwẹn ọfuanfon na rere ayen sa vwọ vwẹrote iruo sansan. Kirobo ẹbẹre sansan rehẹ ugboma na wian kuẹgbe vwọ kẹ erere rẹ oma na ejobi na, eriyin iniọvo eshare re vwo mu womarẹ ẹwẹn ọfuanfon na je wian gangan rere ukoko na ejobi sa vwọ mrẹ erere. Ọ dia ayen wian rere ihwo efa vwo jiri aye-en. Ukperẹ ọtiọyen, ayen wian gangan rere ayen sa vwọ bọn iniọvo na gan. (Se 1 Tẹsalonaika 2:6-8.) Avwanre kpẹvwẹ Jihova fikirẹ iniọvo eshare nana ri muwan na re vwẹ ọdavwẹ rẹ ihwo efa vwọ kobaro kẹ ọromobọ rayen!

 7. Ebruphiyọ vọ yen buebun rẹ iniọvo rehẹ ẹga rẹ ọkieje riavwerhen rọyen?

⁷ A sa vwẹ iniọvo evo vwevunrẹ ukoko na vwo mu nẹ ayen ga kerẹ imishọnare, ekobaro oghẹresan, yẹrẹ ekobaro ọkieje. Vwọrẹ uyota, iniọvo eshare vẹ eya sansan vwẹ akpọ na ejobi brorhiẹn rẹ ayen vwọ vwẹ iruo rẹ aghwoghwo vẹ odibo-egbe na vwo ru iruo rẹ ayen ruẹ ọkieje. Orhiẹn nana nẹrhẹ ayen sa vwẹ ukẹcha kẹ ihwo buebun vwọ dia idibo ri Kristi Jesu. Dede nẹ i ri me bun vwẹ usun rẹ iniọvo nana ghwe vwo ekuakua rẹ ugboma-a, jẹ Jihova bruphiyọ kẹ ayen gbidiki. (Mak 10:29, 30) Avwanre vwo ẹguọnọ rẹ iniọvo nana, oma je vwerhen avwanre nẹ ayen hẹ evunrẹ ukoko na!

 8. Diesorọ ihwo eje ri ghwoghwo iyẹnrẹn esiri na vwọ ghanre kẹ Jihova?

⁸ Iniọvo eshare re vwo mu kugbe iniọvo rehẹ ẹga rẹ ọkieje ọvo yen vwo iruo ọghanghanre vwevunrẹ ukoko na? Ẹjo! Ihwo eje ri ghwoghwo iyẹnrẹn esiri na ghanre kẹ Ọghẹnẹ vẹ ukoko na. (Rom 10:15; 1 Kọr. 3:6-9) Kidie ọvo usun rẹ ewian re ma ghanre vwẹ ukoko na yen e vwo gbe idibo rẹ Ọrovwavwanre Jesu Kristi. (Mat. 28:19, 20; 1 Tim. 2:4) Ighwoghwota eje rehẹ ukoko na, te i ri bromaphiyame re vẹ i ri ji bromaphiyame-e davwẹngba vwọ vwẹ iruo nana vwọ kobaro rẹ akpeyeren rayen.—Mat. 24:14.

 9. Diesorọ iniọvo eya rehẹ ukoko na vwọ ghanre kẹ avwanre?

⁹ Jihova bru ọghọ phiyọ Inenikristi eya oma womarẹ iruo ọghanghanre rọ vwọ kẹ ayen vwevunrẹ ukoko na. O vwo ẹguọnọ rẹ iniọvo eya re herọ kpogono, eya re rọvwọnre, ini, kugbe eyauku re fuevun ga. Baibol na ta ota kpahen eya buebun ri ru obo re vwerhen Ọghẹnẹ oma. E jiri ayen fikirẹ omamọ rẹ udje rẹ aghwanre, esegbuyota, oruru, uduefiogbere, ẹse-eruo, kugbe iruo esiri rayen. (Luk 8:2, 3; Iruo 16:14, 15; Rom 16:3, 6; Fil. 4:3; Hib. 11:11, 31, 35) Avwanre kpẹvwẹ Jihova gangan fikirẹ iniọvo eya rehẹ ukoko na, ri ji dje omamọ rẹ iruemu tiọyena phia!

10. Diesorọ avwanre vwọ vwẹ ẹro ọghanghanre vwo nẹ iniọvo re kpakore?

¹⁰ Oma je vwerhen avwanre nẹ e vwo iniọvo re kpakore buebun vwevunrẹ ukoko na. Ikoko evo vwo iniọvo re kpakore re fuevun ga Jihova vwẹ akpeyeren rayen eje. Ọ sa dianẹ o ghwe kri rẹ iniọvo efa re kpakore mrẹ uyota na vughe-e. Obo rọ hepha eje, buebun rayen nene ega sansan muabọ fikirẹ ọghwo. Ebẹnbẹn tiọyena se siobọ rẹ oborẹ ayen se ru vwevunrẹ ukoko na kugbe iruo aghwoghwo na kpotọ. Dedena, iniọvo nana re kpakore na ji ruẹ oborẹ ẹgba rayen muru vwẹ iruo aghwoghwo na, ayen je davwẹngba rayen eje vwo phiuduphiyọ awọ ji yono iniọvo efa! Avwanre mrẹ erere vwo nẹ erianriẹn rayen. Ayen pha ghanghanre vwọ kẹ Jihova vẹ avwanre.—Isẹ 16:31.

11-12. Idjerhe vọ yen ighene rehẹ ukoko wẹn vwo phiuduphiyọ owẹ awọ re?

¹¹ Gbe rhe roro kpahen ighene avwanre. Ayen vwọ ghwanra na, ayen hirharokuẹ ebẹnbẹn sansan vwevunrẹ akpọ nana kidie Eshu yen suon, iroro echọchọ ro titẹ je vọn asan eje. (1 Jọn 5:19) Dedena, ighene na phiuduphiyọ avwanre awọ siẹrẹ avwanre da mrẹ ayen ọke rẹ ayen da kpahanphiyọ enọ vwẹ uyono, vwobọ vwẹ iruo aghwoghwo na, ji fiudugberẹ chochọn rẹ esegbuyota rayen. Ovwan ighene, ovwan vwo iruo ọghanghanre vwẹ ukoko ri Jihova!—Une 8:2.

¹² Ẹkẹvuọvo ọ pha bẹnbẹn kẹ iniọvo avwanre evo rẹ ayen vwo vwo imuẹro nẹ ayen vwo iruo ọghanghanre vwevunrẹ ukoko na. Die yen sa cha avwanre ohwo ọvuọvo uko vwo vwo imuẹro nẹ avwanre vwo iruo ọghanghanre vwevunrẹ ukoko na? Jẹ a guọnọ ẹkpahọnphiyọ rẹ onọ na.

13-14. Die yen sa nẹrhẹ ihwo evo roro nẹ ayen fiemu vuọvo vwevunrẹ ukoko na-a?

¹³ Vwo oniso rẹ uyono rivẹ rẹ avwanre se yono vwo nẹ udje ri Pọl vwo ruiruo. Ọ ta ota kpahen ebẹnbẹn ọvo rẹ ihwo buebun vwori nonẹna; ayen mrẹ bẹnbẹn rẹ ayen vwo vwo imuẹro nẹ ayen ghanre vwọ kẹ ukoko na. Pọl de si: “Ọ da dianẹ owọ tare nẹ, Fikiridie mẹ dia obọ-ọ na, me gbe dia ọ rẹ ugboma na-a, ọyena ko siro nẹ ugboma na”? (1 Kọr. 12:15) Die yen Pọl guọnọ yono avwanre?

¹⁴ Wọ da vwẹ oma wẹn vwọ vwanvwen ihwo efa vwevunrẹ ukoko na, ọ sa nẹrhẹ wo ni oma wẹn kueku. Ihwo evo vwevunrẹ ukoko na se vwo okẹ rẹ uyono, tẹn ona obo ra rhuẹrẹ erọnvwọn phiyọ, yẹrẹ tẹn ona obo re bru iniọvo uche ji phiuduphiyọ ayen awọ. Ọkiọvo wo roro nẹ wo vwo okẹ yẹrẹ wọ tẹn ona kerẹ ihwo yena-a. Ọnana odjephia nẹ wọ vwomakpotọ, wọ je riẹn asan rẹ ẹgba wẹn teri. (Fil. 2:3) Ẹkẹvuọvo, jomaotọ. Wọ da vwẹ oma wẹn vwọ vwanvwan ihwo ri vwo okẹ rẹ oghẹresan ọkieje, ọyena sa nẹrhẹ wo she ọkuọrọn. Kirobo rẹ Pọl djere, wọ sa tobọ roro nẹ wo fiemu vuọvo vwevunrẹ ukoko na-a. Die yen sa vwẹ ukẹcha kẹ wẹ vwo phi iroro tiọyena kparobọ?

15. Vwo nene obo rehẹ 1 Kọrẹnt 12:4-11, die yen ofori nẹ a mrẹvughe kpahen okẹ kokẹ re vwori?

¹⁵ Roro kpahen ọnana tavwen: Womarẹ ẹwẹn ọfuanfon na, Jihova da vwẹ okẹ rẹ igbevwunu vwọ kẹ Inenikristi evo vwẹ ẹgbukpe ujorin ẹsosuọ, ẹkẹvuọvo okẹ rọ vwọ kẹ ayen fẹnẹ ohwohwo. (Se 1 Kọrẹnt 12:4-11.) Dede nẹ okẹ vẹ ona rẹ Jihova vwọ kẹ ayen fẹnẹ ohwohwo, jẹ ayen ejobi pha ghanghanre. Nonẹna, Jihova womarẹ ẹwẹn ọfuanfon na kẹ avwanre okẹ vwẹ idjerhe rẹ igbevwunu-u. Ẹkẹvuọvo o vwo obo re se yono vwo nẹ obo re phiare vwẹ ẹgbukpe ujorin ẹsosuọ na. Okẹ yẹrẹ ona rẹ avwanre tẹnre sa fẹnẹ ohwohwo, ẹkẹvuọvo avwanre eje ghanre kẹ Jihova.

16. Uchebro rẹ ọyinkọn Pọl vọ yen ofori nẹ e vwo ruiruo?

¹⁶ Ukperẹ a vwọ vwẹ oma vwanvwe Inenikristi efa, ofori nẹ a reyọ uchebro nana rẹ ẹwẹn ọfuanfon mu ọyinkọn Pọl vwo si na vwo ruiruo, “E jẹn dohwo diruo rọye davwini, kọ mrẹ obo rọ vwọ yeyan kẹ omobọ rọye ọvo ọ gbe dia ọrivẹ rọye-e.”—Gal. 6:4.

17. Erere vọ yen a cha mrẹ siẹrẹ e de nene uchebro ri Pọl?

¹⁷ E de ru nene uchebro rẹ ẹwẹn ọfuanfon na mu ọyinkọn Pọl vwo si, je reyọ vwọ fuẹrẹn oma rẹ avwanre, avwanre sa rhe mrẹvughe nẹ a tẹn ona yẹrẹ e vwo okẹ rẹ oghẹresan rẹ ihwo efa vwori-i. Kerẹ udje, ọ sa dianẹ ọkpako ọvo ghwa tẹn ona rẹ uyono vwẹ enu rẹ umukpe-e, ẹkẹvuọvo, ọ nabọ tẹn ona rẹ iruo rẹ odibo-egbe na. Yẹrẹ ọ sa dianẹ ọ ghwa tẹn ona rẹ obo ra rhuẹrẹ erọnvwọn phiyọ kerẹ ekpako efa vwevunrẹ ukoko na-a, ẹkẹvuọvo, ọ sa dianẹ a riẹnrẹ phiyọ ohwo ro vwo ẹguọnọ vẹ uruemu esiri rẹ ighwoghwota se brẹ ra vwọ kẹ uvi rẹ uchebro ro nẹ Baibol na rhe. Yẹrẹ a riẹnrẹ phiyọ ohwo rọ nabọ dede erhorha. (Hib. 13:2, 16) Siẹrẹ a da mrẹ ona yẹrẹ okẹ re vwori vughe re, ọ cha cha avwanre uko vwọ riẹn nẹ e vwo iruo re se ru vwevunrẹ ukoko na. Ọke yena, ọ cha bẹn ra vwọ rioma kpahen iniọvo ri vwo okẹ re fẹnẹ e rẹ avwanre.

18. Mavọ yen avwanre se vwo ru yovwinphiyọ?

¹⁸ Otoro iruo rẹ avwanre ruẹ vwevunrẹ ukoko na-a, e jẹ avwanre davwẹngba vwo ru yovwinphiyọ. Jihova yono avwanre womarẹ ukoko rọyen rere e se vwo ru yovwinphiyọ. Kerẹ udje, vwẹ uyono rẹ uvwre rẹ udughwrẹn na, e yono avwanre obo re se vwo ruiruo aghwoghwo na vwẹ idjerhe rọ ghwotọ. Wọ reyọ obo wo yono vwẹ uyono nana vwo ruiruo vọnvọn?

19. Mavọ wọ sa vwọ yanmu iwan ra guọnọre e ki se kpo Isikuru rẹ Ihwo ri Ghwoghwo Uvie Na?

¹⁹ Ọrhuẹrẹphiyotọ rẹ uyono ọfa yen Isikuru rẹ Ihwo ri Ghwoghwo Uvie Na. Iniọvo rehẹ ẹga ọkieje rehẹ uvwre rẹ ẹgbukpe 23 fiẹ 65 yen se kpo isikuru nana. Wo se roro nẹ wo che se muwan wo vwo kpo isikuru nana bẹdẹ-ẹ. Ukperẹ wọ vwọ tẹnrovi obo re cha djẹ wẹ isikuru na ẹra, tẹnrovi oboresorọ wọ vwọ guọnọ kpo isikuru na. Gbe ru ọrhuẹrẹphiyotọ rọ cha cha wẹ uko vwọ yanmu iwan ra guọnọre e ki se kpo isikuru na. Womarẹ ukẹcha ri Jihova kugbe ẹgbaẹdavwọn wẹn, wo se ru obo wo rorori nẹ wo che se ru jovwo na-a.

20. Die yen avwanre se yono vwo nẹ Rom 12:6-8?

²⁰ A mrẹ uyono rerha rẹ avwanre se yono vwo nẹ udje ri Pọl vwo ruiruo na vwẹ Rom 12:6-8. (Se.) Vwẹ ẹkpo ri Baibol nana, Pọl rhoma djephia nẹ ihwo rehẹ ukoko na vwo okẹ re fẹnẹre. Ẹkẹvuọvo, ọ kanrunumuo nẹ a vwẹ okẹ sansan nana vwọ bọn ukoko na gan.

21-22. Die yen e se yono mie Robert vẹ Felice?

²¹ Roro kpahen udje rẹ oniọvo ọvo re che se Robert. Ọ vwọ ga vwẹ ẹkuotọ ọrhorha ọvo nu, a da vuẹ nẹ ọ ra ga vwẹ Bẹtẹl rọhẹ ẹkuotọ rọyen. Dede nẹ iniọvo na kẹrẹ imuẹro nẹ ọ dia obo ro ruru yen nẹrhẹ e wene iruo rọye-en, jẹ ọ tare nẹ, “Mi muomaphiyọ vwẹ emeranvwe buebun kidie mi niro nẹ mi se ruiruo ra vwọ kẹ vwẹ na-a. O vwo ọkievo re me vwọ guọnọ dobọ rẹ ẹga ri Bẹtẹl ji.” Mavọ yen ọ sa vwọ rhoma vwo aghọghọ? Ọkpako ọvo da cha uko vwọ karophiyọ nẹ Jihova womarẹ owian kowian rọ vwọ kẹ avwanre jovwo re, vwo yono avwanre, rere e se vwo ruiruo ra vwọ kẹ avwanre enẹna fiotọ. Robert da rhe mrẹvughe nẹ ofori ọ vwọ kpairoro vrẹ obo re wanre rere ọ tẹnrovi obo ro se ru enẹna.

²² Oniọvo Felice Episcopo ji hirharoku oka rẹ egbabọse tiọyena. Ọ vẹ aye rọyen wontọ nẹ isikuru ri Gilead vwẹ ukpe ri 1956, ọ da je ga kerẹ oniruo okinriariẹ vwẹ Bolivia. Vwẹ ukpe ri 1964, ayen de rhi vwiẹ ọmọ ọvo. Felice da ta: “Avwanre mrẹrẹ bẹnbẹn ra vwọ yanjẹ owian rẹ avwanre vwo ẹguọnọ rọyen mamọ na vwo. Vwọrẹ uyota, ẹwẹn mẹ kuọrọnre ọsoso ẹgbukpe ọvo. Ẹkẹvuọvo, womarẹ ukẹcha ri Jihova, mi de rhi wene iroro mẹ je tẹnrovi oghwa ro te vwe kerẹ ọmiọvwọn.” Ẹdia wẹn họhọ ọ rẹ Robert yẹrẹ Felice? Ẹwẹn wẹn kuọrọnre kidie nẹ wo rhe vwo uphẹn rẹ ẹga rẹ wo vwori jovwo-o? Ọ da dia ọtiọyen, oma cha vwerhen owẹ wo de wene obo wọ tẹnrovi ji muomaphiyọ oborẹ wo se ru enẹna vwọ ga Jihova vẹ iniọvo wẹn. Muomaphiyọ iruo wẹn, rere wọ reyọ okẹ vẹ ona wẹn vwọ cha ihwo efa uko, kẹ wo che vwo aghọghọ rẹ wọ vwọ bọn ukoko na gan.

23. Die yen a cha ghwọrọ ọke vwo ru, kẹ die yen a cha fuẹrẹn vwẹ uyono rọ cha na?

²³ Avwanre ohwo ọvuọvo pha ghanghanre kẹ Jihova. Ọ guọnọre nẹ avwanre dia ẹbẹre ọvo rẹ orua rọyen. A da ghwọrọ ọke vwo roro kpahen obo re se ru vwọ bọn iniọvo rẹ avwanre gan je davwẹngba vwo ruo, kẹ a cha rhe mrẹ nẹ avwanre eje vwo owian ọghanghanre vwevunrẹ ukoko na. Kẹ ẹro re vwo nẹ ihwo efa vwevunrẹ ukoko na vwo? Mavọ yen e se vwo djephia nẹ e muọghọ kẹ ayen? A cha fuẹrẹn enọ nana vwẹ uyono rọ cha na.