Mrẹ Erere Gbidiki Vwo nẹ Ọrhuẹrẹphiyotọ rẹ Emu rẹ Ẹwẹn rẹ Jihova

1, 2. (a) Ẹro vọ yen Iseri rẹ Jihova vwo nẹ Baibol na? (b) Ẹkpo rẹ Baibol vọ yen ma vwerhen owẹ?

ISERI RẸ JIHOVA vwo ẹguọnọ rẹ Baibol na. Ọ kẹ avwanre odjekẹ, uchebro vẹ iphiẹrophiyọ. (Rom 15:4) Avwanre nẹ Baibol na kerẹ ọbe rẹ ihworakpọ-ọ, ẹkẹvuọvo, “kirobo rọ epha dẹn, ota rẹ Ọghẹnẹ.”—1 Tẹsa. 2:13.

² Aphro herọ-ọ, avwanre eje vwo ẹkpo rẹ Baibol rọ ma vwerhen avwanre. Ihwo evo vwo omavwerhovwẹn kpahen Ẹbe rẹ ikuegbe rẹ Jesu, ro djisẹ rẹ iruemu iyoyovwin rẹ Jihova rẹ Jesu djephia. (Jọn 14:9) Efa ke rha hẹ ẹbẹre re ta ota kpahen aroẹmrẹ kerẹ Ẹvwọphia, ro djekpahen “obo re cha phia” kẹrẹkpẹ. (Ẹvwọ. 1:1) Kẹ ono yen sa tanẹ ọyen mrẹ uchebro vwo nẹ ọbe rẹ Une Rẹ Ejiro-o, yẹrẹ aghwanre vwo nẹ ọbe rẹ Isẹ-ẹ? Baibol na ghene ọbe ro fori nẹ kohwo kohwo vwo.

3, 4. (a) Ẹro vọ yen avwanre vwo ni ẹbe rẹ ukoko na? (b) Ẹbe vọ yen a rhuẹrẹ kẹ ẹko rẹ ihwo evo?

³ Avwanre ji vwo ẹguọnọ rẹ ẹbe rẹ ukoko na, kidie avwanre vwo ẹguọnọ rẹ Baibol na. Kerẹ udje, avwanre vwo ọdavwaro kpahen emu rẹ ẹwẹn rehẹ ẹbe, ibroshọ, imagazini, vẹ erọnvwọn efa. A riẹnre nẹ ọrhuẹrẹphiyotọ rẹ Jihova nana eje cha chọn avwanre uko vwọ dia ihwo re rhẹrẹ vwọrẹ ẹwẹn, ihwo rẹ evun vọnre vwọrẹ ẹwẹn, ihwo rẹ “esegbuyota rayen” je gan.—Taitọs 2:2.

⁴ Vwọba ẹbe rẹ ukoko na rẹ kohwo kohwo se, a je mrẹ ẹbe vẹ erọnvwọn ra rhuẹrẹ vwọ kẹ ẹko rẹ ihwo sansan. Evo vwọ kẹ ighene, efa vwọ kẹ emiọvwọn. Buebun rẹ ẹbe ra teyan vẹ erọnvwọn re ruẹ phiyọ wẹbsaiti rẹ avwanre, e ru ayen fikirẹ ihwo re dia Iseri rẹ Jihova-a. Emu rẹ ẹwẹn gbidiki tiọyena karophiyọ avwanre nẹ Jihova ghini ruẹ uve rọyen gba, rọ vwọ tanẹ, ọyen cha “vwẹ emu kẹ ihwo na ejobi re emu rẹ ivwri.”—Aiz. 25:6.

 5. Die yen e vwo imuẹro nẹ ọ kẹ Jihova omavwerhovwẹn?

⁵ Ọ sa dianẹ, avwanre tobọ mrẹ ọke vwo se Baibol na vẹ ẹbe nana eje-e. Ẹkẹvuọvo, jẹ e vwo imuẹro nẹ oma vwerhen Jihova siẹrẹ e de se Baibol na ọkieje, ji ru uyono romobọ ro djephia nẹ e “kuẹ ọke [rẹ avwanre] fia-a.” (Ẹfe. 5:15, 16) Vwọrẹ uyota, ọ diẹ ọkieje yen a sa vwọ ria emu rẹ ẹwẹn na eje-e. Jẹ ofori nẹ a jomaotọ kpahen imuoshọ ọvo. Ọyen die?

 6. Die yen sa nẹrhẹ emu rẹ ẹwẹn evo va avwanre abọ?

⁶ Imuoshọ herọ nẹ emu rẹ ẹwẹn evo sa va avwanre abọ kidie e niro nẹ i djobọte avwanre-e. Kerẹ udje, ọ da dianẹ ẹkpo rẹ Baibol ọvo ghwe shekpahen ẹdia rẹ avwanre hepha-a vwo? Yẹrẹ e si ọbe ọvo kpahen ẹko rẹ ihwo evo vwo? Avwanre di djuẹro no, gbanẹ a ghwa kpairoro vrẹ? Ọ da dia ọtiọyen, kọyen a cha sa mrẹ erere rẹ ovuẹ yena-a. Mavọ a sa vwọ kẹnoma kẹ imuoshọ yena? Obo re ma rho rọ sa chọn avwanre uko yen a vwọ riẹn nẹ Ọghẹnẹ yen Esiri rẹ emu rẹ ẹwẹn na. Womarẹ ọmraro Aizaya, Jihova da ta: “Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere.” (Aiz. 48:17) O che yovwin siẹrẹ a da fuẹrẹn iroroẹjẹ erha re sa chọn avwanre uko vwọ mrẹ erere nẹ ẹkpo rẹ Baibol vẹ emu rẹ ẹwẹn sansan ra vwọ kẹ avwanre.

 7. Diesorọ o vwo fo nẹ e se Baibol na vẹ ẹwẹn ophephẹn?

⁷ Se vẹ ẹwẹn ophephẹn. Baibol na tare nẹ “Ọbe ọfuanfon na ejobi rẹ Ọghẹnẹ mu ihwo vwo si na, vọnre vẹ erere.” (2 Tim. 3:16, NW) Vwọrẹ uyota, ọke re vwo si Baibol na, ọ sa dianẹ e si ẹkpo evo vwọ kẹ ohwo ọvo yẹrẹ ẹko rẹ ihwo evo. Kọyensorọ o vwo fo nẹ e se Baibol na vẹ ẹwẹn ophephẹn. Oniọvo ọshare ọvo da ta: “Mi de se Baibol na, me karophiyọ nẹ e se yono erọnvwọn buebun vwo nẹ ẹkpo rẹ Baibol vuọvo rhe. Ẹwẹn nana mu vwe vwọ nabọ fuẹrẹn.” Bẹsiẹ e ki se Baibol na, ofori nẹ a nẹrhovwo vwọ kẹ ẹwẹn ophephẹn vẹ aghwanre re vwo vwo ẹruọ rẹ oborẹ Jihova guọnọre nẹ e yono norhe.—Ẹzra 7:10; se Jems 1:5.

8, 9. (a) E de se Baibol na, enọ vọ yen a nọ oma avwanre? (b) Die yen iwan ra guọnọ mie ekpako na yono avwanre kpahen Jihova?

⁸ Nọ enọ. Wo de se Baibol na, davwẹngba wọ nọ oma wẹn enọ kerẹ: ‘Die ọnana yono uvwe kpahen Jihova? Mavọ me sa vwọ reyọ ovuẹ nana vwo ruiruo vwẹ akpeyeren mẹ? Mavọ me sa vwọ reyọ vwọ chọn ihwo efa uko?’ E de roro kpahen enọ yena, ka cha mrẹ erere vwo nẹ isese rẹ Baibol rhe. Kerẹ udje, roro kpahen iwan rẹ Baibol na, ra guọnọ mie ọshare a ke sa reyọ mu ọkpako. (Se 1 Timoti 3:2-7.) Rọ vwọ dianẹ buebun rẹ avwanre diẹ ekpako na-a, ke se roro nẹ ẹkpo rẹ Baibol nana ghwe djobọte avwanre-e. Ẹkẹvuọvo, e de roro kpahen ẹkpahọnphiyọ rẹ enọ nana, a cha mrẹ nẹ iwan nana sa je kẹ avwanre erere vwẹ idjerhe sansan.

⁹ Die ọnana yono uvwe kpahen Jihova? Iwan nana djerephia nẹ Jihova rhẹro rẹ erọnvwọn evo vwo mie ihwo re vwo mu. Ọ guọnọre nẹ ayen dia omamọ rẹ udje kẹ ukoko na, ọ je cha nọ ayen orhiẹn kpahen oborẹ ayen ghẹrẹ ukoko na wan, “rọ vwẹ ọbara [“rẹ Ọmọ,” NW] rọye dẹ.” (Iruo Rẹ Iyinkọn Na 20:28) Jihova guọnọre nẹ ekpako na nabọ vwẹrote avwanre. (Aiz. 32:1, 2) Vwo nene ọhọ yena, iwan ra guọnọ mie ekpako na nẹrhẹ avwanre riẹn nẹ Jihova ghini vwo ọdavwẹ rẹ avwanre.

10, 11. (a) E de se iwan ra guọnọ mie eshare, mavọ yen a sa reyọ ovuẹ na vwo ruiruo vwẹ akpeyeren rẹ avwanre? (b) Mavọ a sa reyọ vwọ chọn ihwo efa uko?

¹⁰ Mavọ me sa vwọ reyọ ovuẹ nana vwo ruiruo vwẹ akpeyeren mẹ? Nẹ ọke fiẹ ọke, ofori nẹ ọkpako vwẹ iwan nana fuẹrẹn oma rọyen, ọ sa vwọ mrẹ ẹdia ro de se ru yovwinphiyọ. Ofori nẹ oniọvo rọ “pharhere nẹ ọye dia Osun” yẹrẹ ọkpako nabọ fuẹrẹn iwan nana, rere ọ davwẹngba rọyen eje vwọ yan mu ayen. (1 Tim. 3:1) Inenikristi eje se yono nẹ iwan nana rhe kidie Jihova je guọnọ buebun rẹ iwan nana vwo mie Inenikristi ejobi. Kerẹ udje, ofori nẹ avwanre eje dia fuefun, ji vwo iroro. (Fil. 4:5; 1 Pita 4:7) Ekpako vwọ dia “oniru” vwọ kẹ uchuru na, e jẹ e yono mie ayen je “vwẹ ẹro kere esegbuyota rayen.”—1 Pita 5:3; Hib. 13:7.

¹¹ Mavọ me sa vwọ reyọ ovuẹ nana vwọ chọn ihwo efa uko? A sa reyọ iwan rẹ ekpako na vwo dje kẹ ihwo rẹ avwanre yono, idjerhe sansan rẹ ekpako rẹ ukoko na vwọ fẹnẹ ilori ẹga rẹ efian. Vwọba, iwan nana je sa karophiyọ avwanre oborẹ ekpako na davwan te vwevunrẹ ukoko na. E de roro kpahen ẹgbaẹdavwọn rayen, ọnana cha nẹrhẹ a nabọ “mu ọghọ kẹ ihwo re wian owian” ọgangan tiọyena. (1 Tẹsa. 5:12) Uvi rẹ ọghọ re muẹ kẹ ekpako nana che toroba aghọghọ rayen.—Hib. 13:17.

12, 13. (a) Oka rẹ ehiahiẹ vọ yen a sa reyọ ẹbe vẹ erọnvwọn efa vwo ru? (b) Djudje rẹ oborẹ ehiahiẹ okokodo sa vwọ nẹrhẹ a mrẹ iyono ra vwẹ ẹro roro-o.

¹² Ru ehiahiẹ. Reyọ ẹbe vẹ erọnvwọn efa vwọ hiẹ guọnọ erọnvwọn nana:

• Ono yen si ẹkpo nana?

• Tivọ vẹ ọke vọ yen e vwo sio?

• Emu oghẹresan vọ yen phiare ọke re vwo si ọbe nana?

Ehiahiẹ okokodo tiọyena sa nẹrhẹ a mrẹ iyono efa norhe.

¹³ Kerẹ udje, roro kpahen oborẹ Izikiẹl 14:13, 14, tare: “Ọke rẹ otọ de ru umwemwu kpahe ovwẹ vwẹ ijesegbuyota rayen, re me da riẹn obọ mẹ kpahọ, ri mi de vwirhi ọkpọ rẹ ikara rọye re me da vwẹ owẹvwe rhe otọ na, ri mi de bru ohwo vẹ eranvwe kufia no, ọ da tobọ dianẹ ihwo nana erha na herọ, Noa, Daniẹl, kugbe Job, oma rayen ọvo ayen se sivwi fiki rẹ ọvwata rayen, eriyin Ọrovwohwo Ọghẹnẹ tare.” Ehiahiẹ yen sa nẹrhẹ a riẹn nẹ e si ẹkpo rẹ Izikiẹl nana vwẹ omarẹ ukpe rẹ 612 B.C.E. Ọke nana, Noa vẹ Job ghwu krire, jẹ Ọghẹnẹ je karophiyọ esegbuyota rayen. Ẹkẹvuọvo, Daniẹl jehẹ akpọ. Ọ sa tobọ dianẹ ọke rọ vwọ joma te ẹgbukpe 20 yẹrẹ ọ ghwa vwọ vrẹ, ọyen Jihova vwo se nẹ ọvwata kerẹ Noa vẹ Job. Die yen e yono norhe? Jihova vwo oniso kpahen ọyọnregan rẹ idibo rọyen eje tobọ te ighene.—Une 148:12-14.

14. Idjerhe vọ yen ẹbe re ru kẹ ighene vwọ chọn ayen uko, kẹ mavọ yen ihwo efa sa vwọ mrẹ erere norhe? (Ni uhoho rẹsosuọ na.)

¹⁴ Kirobo rẹ avwanre mrẹ erere vwo nẹ ẹkpo rẹ Baibol ejobi na, ọtiọyen a je sa mrẹ erere vwo nẹ emu rẹ ẹwẹn eje rhe. Roro kpahen udje evo. Ẹbe vẹ erọnvwọn re ru kẹ ighene. Ikpe evo rhire na, a teyen buebun rẹ ẹbe rẹ avwanre vwọ kẹ ighene.^[1] A rhuẹrẹ evo rere ayen sa vwọ mrẹ ukẹcha vwo yerin ghene ọnyẹ rẹ otu vwẹ isikuru yẹrẹ egbabọse efa rẹ ayen rhiẹromrẹ. Idjerhe vọ yen avwanre eje sa vwọ mrẹ erere vwo nẹ isese rẹ ẹbe tiọyena rhe? Ọnana nẹrhẹ avwanre vwo ọmrẹvughe rẹ oborẹ ighene rẹ avwanre hirharokuẹ. Kọ je sa nẹrhẹ a riẹn ukẹcha ra sa vwọ kẹ ayen.

15. Diesorọ Inenikristi re dia imiragua vwọ vwẹ ẹro ọghanghanre vwo ni ovuẹ re si rhe ighene?

¹⁵ Ọ diẹ ighene ọvo yen hirharokuẹ ebẹnbẹn re djunute vwẹ evun raye-en. Ofori nẹ avwanre eje chochọ rẹ esegbuyota avwanre, sun iroro rẹ avwanre, sen ọnyẹ rẹ otu, kẹnoma kẹ erharhe rẹ igbeyan kugbe erọnvwọn ra vwọ diotọ ri fori-i. Odjekẹ ro shekpahen eta nana vẹ efa herọ vwẹ ẹbe vẹ erọnvwọn ra rhuẹrẹ kẹ ighene. Ofori nẹ Inenikristi re dia imiragua vwẹ ẹro ri phovwin vwo ni ẹbe re si kẹ ighene? Ẹjo, kakaka! Dede nẹ e siro vwọ kẹ ighene, e mu ovuẹ rọhẹ evun rọyen kpahen iyono rẹ Baibol ri kpo awanre-e, avwanre ejobi sa mrẹ erere nẹ ayen rhe.

16. Erere efa vọ yen ighene mrẹ nẹ ẹbe rẹ ukoko na cha?

¹⁶ Ẹbe rẹ ukoko na chọn ighene uko vwo phi ebẹnbẹn rayen kparobọ, yerẹn tedje vwọrẹ ẹwẹn, ji si ayen kẹrẹ Jihova. (Se Aghwoghwo 12:1, 13.) Inenikristi re dia imiragua sa je mrẹ erere norhe. Kerẹ udje, Awake! rẹ April 2009 vwo uyovwinrota na, “Young People Ask . . . How Can I Make Bible Reading Enjoyable?” Uyovwinrota nana vwo iroroẹjẹ re se vwo ruiruo kugbe ekpeti re se bru no fikirẹ ọke ọfa. Imiragua je mrẹ erere vwo nẹ uyovwinrota nana rhire? Aye ọvo rọ je dia oni, de si: “Mi ghwe vwo omavwerhovwẹn kpahen isese rẹ Baibol na-a, mi rhiabọreyọ iroroẹjẹ na mi de ji bru ẹbẹre re se bru reyọ na kẹ omobọ mẹ. Asaọkiephana, me rhẹro rẹ isese rẹ Baibol na. Me nabọ mrẹ oborẹ ẹbe sansan rẹ Baibol na churobọ si ohwohwo wan kerẹ amwa ra vwẹ oruru sansan vwo ko. Oma rẹ isese rẹ Baibol na nabọ vwerhen ovwẹ asaọkiephana.”

17, 18. Erere vọ yen a mrẹ siẹrẹ e de se ẹbe vẹ erọnvwọn re ru kẹ kohwo kohwo? Djudje rọyen.

¹⁷ Ẹbe vẹ erọnvwọn re ru kẹ kohwo kohwo. Vwo nẹ ukpe rẹ 2008 rhire, avwanre riavwerhen rẹ ọbe Uwevwin Orhẹrẹ re ru kẹ Iseri rẹ Jihova ọvo rẹ ayen vwo ru uyono. Kẹ e re phiẹ phiyọ ada vwo? A sa je mrẹ erere norhe? Roro kpahen udje nana. Vwẹ ẹro roro nẹ ẹdẹ ọvo wo vwo kpo uyono, tavwen ota rotu na ke tonphiyọ, wọ da mrẹ ohwo ọvo wo durhieri, vwẹ Ọguan Ruvie na. Oma vwerhen owẹ dẹn. Ọtota na vwọ ta ota yanran na, jẹ wo roro kpahen ohwo na vẹ oborẹ ovuẹ na che djobọte wan. Ọnana cha nẹrhẹ wọ nabọ vwo ẹruọ rẹ ota na.

¹⁸ Ọnana sa je phia kẹ avwanre siẹrẹ e de se ẹbe ra teyen vwọ kẹ kohwo kohwo. Ọke rẹ Uwevwin Orhẹrẹ re phiẹ phiyọ ada na de djekpahen iyovwinreta evo, ọ reyọ eta evo vwo ruiruo rere ihwo re dia Iseri rẹ Jihova-a se vwo vwo ẹruọ rọyen. Ọtiọyen ji te erọnvwọn re ruẹ phiyọ jw.org, kerẹ ẹkpo re se “Enọ Redje Ẹnẹnọ.” E de se evuẹ nana, ọ cha nẹrhẹ ọdavwaro rẹ avwanre kpahen uyota na rhoma kodophiyọ. O ji yono avwanre idjerhe re se vwo dje oborẹ avwanre yono fiotọ vwẹ iruo aghwoghwo na. Ọtiọyen yen Awake! na je bọn imuẹro rẹ avwanre kpahen Ọghẹnẹ gan ọkieje, ọ je chọn avwanre uko vwọ chochọ rẹ esegbuyota rẹ avwanre.—Se 1 Pita 3:15.

19. Idjerhe vọ yen e se vwo dje idavwaro vwọ kẹ ọrhuẹrẹphiyotọ rẹ Jihova?

¹⁹ Aphro herọ-ọ, Jihova kẹ avwanre emu rẹ ẹwẹn buebun ro se si avwanre nẹ ẹdia rẹ “igbere” rẹ ẹwẹn. (Mat. 5:3) E jẹ avwanre reyọ ọrhuẹrẹphiyotọ na ejobi vwo ruiruo kọke kọke. Ọke yena, ke se djephia nẹ avwanre vwo ọdavwaro kpahen Ohwo ro yono avwanre vwọ mrẹ erere na.—Aiz. 48:17.