Ọtonphiyọ

1, 2. Ẹro vọ yen oniruo okinriariẹ ọvo vwo ni ihwo rehẹ Baibol na, kẹ diesorọ ayen sa vwọ dia uvi rẹ igbeyan?

ONIỌVO aye ọvo vwọ kerhọ rẹ ota rẹ oniruo okinriariẹ ọvo rọ kpakore nu, ọ da ta: “Ọ ta ota kpahen ihwo rehẹ Baibol na kerẹ igbeyan rọyen ro vughe krire.” O ru ọtiọyen kidie ọ ghwọrọ ikpe buebun vwọ fuẹrẹn Ota rẹ Ọghẹnẹ je reyọ vwo yono ihwo te ẹdia rẹ ihwo ri vwo esegbuyota rehẹ Baibol na vwọ họhọ igbeyan ro vughe krire.

² Ihwo rehẹ Baibol na sa ghene dia uvi rẹ igbeyan. Ọtiọyen wo ji no? Roro kpahen oborẹ oma rhe ru we siẹrẹ wẹ vẹ ayen da yan usun je ta ota kugbe, yẹrẹ siẹrẹ wọ da ghwọrọ ọke vwọ riẹn ihwo kerẹ, Noa, Ebraham, Rutu, Ilaija, kugbe Ẹsta. Roro kpahen uvi rẹ uchebro kugbe uduephiophiyawọ rẹ ayen rha vwọ kẹ wẹ!—Se Isẹ 13:20.

 3. (a) Erere vọ yen a sa mrẹ siẹrẹ e de yono kpahen eya vẹ eshare ri vwo esegbuyota? (b) Enọ vọ yen a cha fuẹrẹn?

³ Vwọrẹ uyota, avwanre vẹ ihwo tiọyena cha dia uvi rẹ igbeyan vwẹ ọke rẹ “evrẹnushi . . . ihwo ọsoso.” (Iruo 24:15) Ẹkẹvuọvo, avwanre sa mrẹ erere enẹna siẹrẹ e de yono kpahen ayen. Vwẹ idjerhe vọ? Ọyinkọn Pọl vwẹ ẹkpahọnphiyọ nana phia: “Vwẹ ẹro keri otu re wan oma rẹ esegbuyota kugbe erhiori reuku rẹ ive na.” (Hib. 6:12) Avwanre che vwo yono kpahen eya vẹ eshare ri vwo esegbuyota na, a cha fuẹrẹn enọ nana rẹ eta ri Pọl sa nẹrhẹ a nọ: Die yen esegbuyota, kẹ diesorọ avwanre vwọ guọnọ? Mavọ yen a sa vwọ vwẹrokere ihwo ri fuevun vwẹ ọke awanre?

 4. Die yen ihwo evo roro kpahen esegbuyota, kẹ diesorọ ọyena vwọ dia ororochọ?

⁴ Esegbuyota ọyen uruemu oyoyovwin ọvo rọ pha ghanghanre kẹ eya vẹ eshare re che yono kpahen vwevunrẹ ọbe nana. Ihwo buebun vwẹ ẹro okueku vwo nẹ esegbuyota, ayen roro nẹ ọyen imuẹro ro vwo otọ-ọ. Ẹkẹvuọvo, ọyen ororochọ. Esegbuyota dia ughẹnghẹ-ẹn; ọ dia iroro yẹrẹ imuẹro ghevweghe-e. Ughẹnghẹn vọnre vẹ imuoshọ. Iroro ghevweghe sa kọn cha kọn kpo; e di vwo vwo imuẹro kpahen Ọghẹnẹ ọvo teri-i, kidie “Idẹbono ji segbuyota, o de gue oma.”—Jems 2:19.

5, 6. (a) Erhọ yen erọnvwọn ivẹ re jẹmrẹ rẹ esegbuyota rẹ avwanre tẹnroviẹ? (b) Mavọ yen ofori nẹ esegbuyota rẹ avwanre ghwotọ te? Djudje rọyen.

⁵ Uvi rẹ esegbuyota vrẹ eyena ejobi. Wọ karophiyọ oborẹ Baibol na djisẹ rẹ esegbuyota? (Se Hibru 11:1.) Pọl tare nẹ esegbuyota tẹnroviẹ erọnvwọn ivẹ re che se rhiẹromrẹ-ẹ. Ọrẹsosuọ, ọ tẹnroviẹ erọnvwọn re herọ “re jẹmrẹ.” Avwanre che se rhiẹromrẹ obo re phia vwẹ obo odjuvwu-u; a cha sa mrẹ Jihova, Ọmọ rọyen, yẹrẹ Uvie na ro suẹn vwẹ obo odjuvwu-u. Ọrivẹ, esegbuyota tẹnroviẹ “iphiẹrohọ rẹ obo ri mu ohwo ẹro” re je phia-a. Avwanre cha sa mrẹ akpọ kpokpọ rẹ Uvie rẹ Ọghẹnẹ cha ghwa rhe kẹrẹkpẹ-ẹ. A sa tanẹ esegbuyota re vwo kpahen erọnvwọn re rhẹro rọyen na vwo otọ-ọ?

⁶ Ẹjo, kakaka! Pọl djere nẹ uvi esegbuyota vwo uchivwo rọ pha kokoroko. Rọ vwọ tanẹ esegbuyota ọyen “iphiẹrohọ,” ọ tarọ vwẹ idjerhe rọ vwọ họhọ nẹ esegbuyota ọyen “ọbe uwevwin.” Vwẹ ẹwẹn roro nẹ ohwo ọvo vwẹ uwevwin vwo ruẹse kẹ wẹ. Ọkiọvo ọ vwẹ ọbe na kẹ wẹ, ọ da ta: “Ọnana uwevwin kpokpọ wẹn.” Ọ dia ọ guọnọ tanẹ ọbe ghevweghe na yen wọ cha dia-a; ẹkẹvuọvo, ọbe na kẹ wẹ uturhi wọ sa vwọ vwẹ obọ saudu nẹ uwevwin na ọwẹn, kerẹ asan rọ da dianẹ ọbe na yen uwevwin na. Vwẹ idjerhe vuọvo na, iphiẹrophiyọ avwanre ganre yẹrẹ o muẹro te asan ra da sa tanẹ ọyen tobọ esegbuyota rẹ avwanre.

 7. Die yen uvi rẹ esegbuyota churobọ si?

⁷ Ọtiọyena, uvi rẹ esegbuyota churobọ si uduefiogbere vẹ imuẹro rọ pha kokoroko rọ nabọ tẹnrovi Jihova. Esegbuyota nẹrhẹ avwanre mrẹ Jihova kerẹ Ọsẹ rẹ avwanre ro vwo ẹguọnọ, je vwẹroso ive rọyen eje nẹ i che rugba. Ẹkẹvuọvo, uvi rẹ esegbuyota vrẹ ọtiọyen. Kerẹ orọnvwọn ro vwo arhọ, esegbuyota ro ruiruo-o, che ghwu.—Jems 2:26.

 8. Diesorọ esegbuyota vwọ dia obo re ghanre?

⁸ Diesorọ esegbuyota vwọ dia obo re ghanre? Pọl kpahenphiyọ onọ yena gbagba. (Se Hibru 11:6.) Ababọ rẹ esegbuyota, e che se sikẹrẹ Jihova yẹrẹ ru obo rọ guọnọre-e. Ọtiọyena, esegbuyota pha ghanghanre mamọ siẹrẹ a da guọnọ ru oboresorọ a vwọ ma avwanre, rọ dia, re vwo sikẹrẹ Jihova rọ dia Ọsẹ rẹ avwanre rọhẹ obo odjuvwu, je vwẹ urinrin kẹ.

 9. Mavọ yen Jihova vwo djephia nẹ ọ riẹn oborẹ esegbuyota ghanre kẹ avwanre te?

⁹ Jihova riẹn oborẹ esegbuyota ghanre kẹ avwanre te, kọyensorọ ọ vwọ kẹ avwanre udje sansan re sa chọn avwanre uko vwo vwo esegbuyota ji djephia. Ukoko na vọnre vẹ eshare ri fuevun re kobaro kẹ avwanre. Baibol na da ta: “Vwẹ ẹro kere esegbuyota rayen.” (Hib. 13:7) Vwọba, ọ je kẹ avwanre orọnvwọn ọfa. Pọl si kpahen “iseri buebu,” te eya te eshare ri fuevun vwẹ ọke awanre, ra sa vwẹrokere esegbuyota rayen. (Hib. 12:1) Jẹ, o vwo ihwo efa buebun ri fuevun rẹ Pọl djunute vwẹ uyovwin 11 rẹ ọbe rẹ Hibru na-a. Baibol na vọnre vẹ ikuegbe rẹ eya vẹ eshare, te emare te ighene ri nẹ asan sansan rhe, ri dje esegbuyota phia, rẹ avwanre ji se yono mie vwẹ ọke nana rẹ ihwo buebun vwo jẹ esegbuyota evwo na.

10. Mavọ yen uyono romobọ sa vwọ chọn avwanre uko vwọ vwẹrokere eya vẹ eshare ri fuevun vwẹ Baibol na?

¹⁰ Wo che sikẹrẹ ohwo tavwen wọ ke sa vwẹrokere. Wo vwo se ọbe nana, wọ cha mrẹ nẹ e ru ehiahiẹ buebun re sa chọn wẹ uko vwọ vwẹrokere eya vẹ eshare ri fuevun. Vwọba, wo ji se ru ehiahiẹ romobọ wẹn. Vwẹ ekuakua re vwo ruẹ ehiahiẹ vwọ fuẹrẹn Baibol na kodo ọke wo de ruẹ uyono romobọ wẹn. Ọke wo de roro kpahen oborẹ wo yonori, vwẹ ẹwẹn roro asan rẹ oborẹ wo se kpahen na da phia, kugbe oborẹ ekuakua hepha vwẹ ọke yena. Mrẹ oborẹ ihwo na mrẹ, nyo edo rẹ ayen nyo, wo mi ji nyọ ọnrhe rẹ ayen nyo, kirobo re se dje. Ọ rọ ma kenu, davwen vwo vwo oniso rẹ ọdavwẹ rẹ ihwo na. Wo de phi oma wẹn phiyọ ẹdia rẹ ihwo na, kọ cha họhọ nẹ wọ mrẹ ayen, evo rayen sa tobọ rhe họhọ uvi rẹ igbeyan ru wo vughe krire.

11, 12. (a) Mavọ yen wo se vwo sikẹrẹ Ebram vẹ Sarai phiyọ? (b) Mavọ yen wọ sa vwọ mrẹ erere vwo nẹ udje ri Hanah, Ilaija, yẹrẹ Samuẹl?

¹¹ Wọ da nabọ vughe ayen, ku wo che vwo ẹwẹn wọ vwọ vwẹrokere ayen. Kerẹ udje, reyọ phiyọ nẹ ukoko ri Jihova durhie uwe nẹ wọ hẹre iruo rẹ aghwoghwo wẹn phiyọ vwẹ idjerhe evo. Ọ sa dianẹ e ji we kpo ẹkuotọ ra da ma guọnọ ighwoghwota, yẹrẹ e durhie uwe nẹ wo vwobọ vwẹ ona rẹ aghwoghwo ọvo rọ dia emu ọrhorha yẹrẹ rọ pha bẹnbẹn kẹ wẹ. Wọ vwọ nẹrhovwo ji roro kpahen iruo na, ọkiọvo udje rẹ Ebram sa chọn wẹ uko. Ebram vẹ Sarai vrẹn nẹ orere ri Ur ro fun ayen oma, Jihova de bruba kẹ ayen vọnvọn. Wo de nene udje rayen, ku wo se vwo imuẹro nẹ wo vughe ayen vrẹ obo ri jovwo re.

¹² Kẹ, ọ da rha dianẹ ofu dje we kidie nẹ ohwo ọvo rọ kẹrẹ owẹ vwọso owẹ, wo de ji vwo ẹwẹn wọ vwọ dobọ rẹ uyono ẹra ji vwo? Wo de roro kpahen udje ri Hanah vẹ obo ro vwo chirakon rẹ ẹvwọsuọ ri Peninah, ku wo se bru omamọ orhiẹn, Hanah me je dia kerẹ uvi rẹ ugbeyan kẹ wẹ. Ofu de dje we kidie wo nẹ oma wẹn kueku, udje rẹ Ilaija che je we siẹrẹ wo de se ikuegbe rẹ obo re phia kẹ kugbe oborẹ Jihova bọn rọ gan wan. Ikuegbe ri Samuẹl che je ighene rẹ emọ rẹ isikuru rayen guọnọ riẹriẹ vwo gbe ọfanrhiẹn. Ayen de yono kpahen oborẹ Samuẹl ruru ọke rẹ emọ rẹ Eli vwo ruẹ ogbiru vwẹ uwevwin rẹ ẹga na.

13. A sa tanẹ esegbuyota wẹn rhe fiemu-u siẹrẹ wọ da vwẹrokere esegbuyota rẹ ohwo ọvo rọhẹ Baibol na? Djekpahọn.

¹³ A sa tanẹ esegbuyota wẹn rhe fiemu-u siẹrẹ wọ da vwẹrokere esegbuyota rẹ ihwo tiọyena rehẹ Baibol na? Ẹjo, kakaka! Karophiyọ nẹ Ota rẹ Ọghẹnẹ bru avwanre uche nẹ a vwẹrokere udje rẹ ihwo ri vwo esegbuyota. (1 Kọr. 4:16; 11:1; 2 Tẹsa. 3:7, 9) Ihwo evo re che yono kpahen vwevunrẹ ọbe nana je vwẹrokere ihwo efa ri fuevun re karo kẹ ayen. Kerẹ udje, vwẹ Uyovwinrota 17 rẹ ọbe nana, avwanre cha mrẹ nẹ Meri vwanriẹn eta ri Hanah, ọyena odjephia nẹ ọ davwẹngba vwo nene udje rọyen. Kẹ, a sa vwẹ fikirẹ ọyena vwọ tanẹ esegbuyota ri Meri rhe fiemu-u? Ẹjo! Ukperẹ ọtiọyen, udje ri Hanah chọn Meri uko vwo ru esegbuyota rọyen ganphiyọ rere o se vwo vwo omamọ odẹ vwẹ obaro ri Jihova.

14, 15. Erhọ yen erọnvwọn evo re ru phiyọ ọbe nana, kẹ mavọ yen a sa vwọ nabọ reyọ ayen vwo ruiruo?

¹⁴ E ru ọbe nana vwẹ idjerhe rọ sa vwọ chọn wẹ uko vwo ru esegbuyota wẹn ganphiyọ. A reyọ iyovwinreta re vwọ kpahen ọnana vwo nẹ uyovwinrọta na, “Imitate Their Faith” rọ vwomaphia okpokpahọn vwẹ Uwevwin Orhẹrẹ na, vwo nẹ 2008 fiẹ 2013. Ẹkẹvuọvo, a vwẹ erọnvwọn kpokpọ evo ba. Uyovwinrota vuọvo vwo enọ ra cha vwọ fuẹrẹn obo re yonori. Vwọba, e ru ihoho kpokpọ ri vwo ikọlọ iyoyovwin phiyọ ọbe na, e de rhe ru ihoho ri jovwo na rho, ji yovwinphiyọ. E ji phi erọnvwọn kerẹ urhiẹ rẹ ọke vẹ imapu phiyọ ọbe na. E ru ọbe nana re se Vwẹrokere Esegbuyota Rayen na rere a sa vwọ reyọ vwo ru uyono romobọ, ẹga orua, kugbe uyono ri Baibol rukoko. Erua buebun ji se kuomakugbe vwo se ikuegbe na phia gori gori je riavwerhen rọyen.

¹⁵ E jẹ ọbe nana chọn wẹ uko vwọ vwẹrokere esegbuyota rẹ idibo ri Jihova rẹ ọke awanre ri fuevun. Vwọba, e jẹ ọ chọn wẹ uko vwo ru esegbuyota wẹn ganphiyọ ru wo vwo siẹkẹrẹ Jihova rọ dia Ọsẹ wẹn rọhẹ obo odjuvwu na!