UYONO 28
Dje Ọdavwaro Phia Vwọ kẹ Oborẹ Jihova vẹ Jesu Ru kẹ Wẹ
Mavọ yen oma che ru we ugbeyan wẹn da kẹ wẹ okẹ oyoyovwin ọvo? O muẹro nẹ oma cha vwerhen owẹ, wọ je cha guọnọ dje ọdavwaro phia fikirẹ okẹ na. Jihova vẹ Jesu kẹ avwanre okẹ rọ ma rho kparobọ ra sa vwọ kẹ avwanre. Ọyen die, kẹ mavọ yen e se vwo dje ọdavwaro phia kpahọn?
1. Ọrhọ yen idjerhe ọvo re se vwo dje ọdavwaro phia vwọ kẹ oborẹ Ọghẹnẹ vẹ Kristi ru kẹ avwanre?
Baibol na veri nẹ “ohwo kohwo ro sere [Jesu] gbuyota” cha dia bẹdẹ. (Jọn 3:16) Die yen o mudiaphiyọ e vwo vwo esegbuyota? Ọ vrẹ e di vwo vwo imuẹro kpahen Jesu. Ofori nẹ e dje esegbuyota phia womarẹ orhiẹn rẹ avwanre brẹ vẹ obo re ruẹ. (Jems 2:17) E de dje esegbuyota phia womarẹ obo ra ta vẹ obo re ruẹ, oyerinkugbe avwanre vẹ Jesu kugbe Ọsẹ rọyen, Jihova cha ganphiyọ.—Se Jọn 14:21.
2. Irueru rẹ oghẹresan vọ yen nẹrhẹ e se dje ọdavwaro phia vwọ kẹ oborẹ Jihova vẹ Jesu ru kẹ avwanre?
Vwẹ ovwọnvwọn rọ koba rọyen o ki rhi ghwu, Jesu vuẹ idibo rọyen kpahen idjerhe ọfa ayen se vwo dje ọdavwaro phia vwọ kẹ izobo rọyen. Ọ tuẹn irueru oghẹresan ọvo phiyọ rẹ Baibol na seri “Emu rẹ Ovwọnvwọn rẹ Ọrovwohwo,” ra je riẹn phiyọ Ẹkarophiyọ rẹ ughwu ri Jesu. (1 Kọrẹnt 11:20) Ọ tuẹn irueru nana phiyọ rere iyinkọn rọyen kugbe Inenikristi eje sa vwọ karophiyọ nẹ o ghwu vwọ kẹ avwanre. Vwọ kpahen irueru nana, Jesu da ta: “Ru ọnana vwọ karophiyọ ovwẹ.” (Luk 22:19, NW ) Wo de kpo Ẹkarophiyọ na, ọyena ghwa odjephia nẹ wo vwo ọdavwaro kpahen ẹguọnọ okokodo rẹ Jihova vẹ Jesu dje kẹ avwanre.
HIẸ KODO
Yono kpobarophiyọ kpahen idjerhe efa re se vwo dje ọdavwaro phia kpahen ẹguọnọ rẹ Jihova vẹ Jesu dje kẹ avwanre. Roro kpahen ọghanrovwẹ rẹ Ẹkarophiyọ rẹ ughwu ri Jesu.
3. Ọdavwaro mu avwanre vwo ruiruo
Vwẹro roro nẹ ohwo ọvo sivwin arhọ wẹn. Wọ cha de kpairoro vrẹ oborẹ ohwo na ru kẹ wẹ? Gbanẹ wọ cha guọnọ idjerhe wo se vwo djephia nẹ obo ro ruru na da wẹ aro?
Jihova yen vwẹ arhọ kẹ avwanre. Se 1 Jọn 4:8-10, ovwan ta ota kpahen enọ nana:
Diesorọ izobo rẹ ọtanhirhe ri Jesu na vwọ dia okẹ rẹ oghẹresan?
Mavọ yen oma ru we kpahen oborẹ Jihova vẹ Jesu ru kẹ avwanre?
Mavọ yen wo se vwo dje ọdavwaro phia kpahen oborẹ Jihova vẹ Jesu ru kẹ avwanre? Se 2 Kọrẹnt 5:15 kugbe 1 Jọn 4:11; 5:3. Wo de se ẹkpo ri Baibol ọvuọvo na nu, ovwan ta ota kpahen onọ nana:
Vwo nene oborẹ ẹkpo ri Baibol na tare, die yen e se ru vwo dje ọdavwaro phia?
4. Vwẹrokere Jesu
Idjerhe ọfa re se vwo dje ọdavwaro phia ọyen ra vwọ vwẹrokere Jesu. Se 1 Pita 2:21, ovwan ta ota kpahen onọ nana:
Idjerhe vọ yen wo se vwo djephia nẹ wọ nabọ vwẹrokere Jesu?
Jesu vwo ẹguọnọ rẹ Ota rẹ Ọghẹnẹ, o ghwoghwo iyẹnrẹn esiri na, je chọn ihwo efa uko
5. Kpo Ẹkarophiyọ rẹ ughwu ri Jesu
Wọ vwọ mrẹ obo re phiare vwẹ irueru rẹ Emu rẹ Ovwọnvwọn rẹ Ọrovwohwo rẹsosuọ, se Luk 22:14, 19, 20. Ovwan ta ota kpahen enọ nana:
Die yen phiare vwẹ irueru rẹ Emu rẹ Ovwọnvwọn rẹ Ọrovwohwo na?
Die yen ibrẹdi vẹ udi na mudiaphiyọ?—Ni awọreta 19 vẹ 20.
Jesu guọnọre nẹ idibo rọyen ru Ẹkarophiyọ na obọvo vwẹ ẹgbukpe vwẹ ason ro shephiyọ ẹdẹ ro vwo ghwu na. Ọtiọyena, Iseri ri Jihova kuomakugbe obọvo ẹgbukpe vwo ru ẹkarophiyọ rẹ ughwu ri Jesu vwo nene obo rọ tare. Wọ vwọ riẹn kpahen irueru ọghanghanre nana, Hworo IVIDIO na. Ovwan ta ota kpahen onọ ro nenire.
Mavọ yen e ruẹ Ẹkarophiyọ na wan?
JIbrẹdi vẹ udi na yen e vwo ruẹ ẹkarophiyọ na. Ibrẹdi na mudiaphiyọ arhọ ọgbagba ri Jesu ro vwo ze kẹ avwanre. Udi na de rhe mudiaphiyọ ọbara rọyen
IHWO EVO TA: “Obo ro fori nẹ wo ru ọyen wo vwo vwo imuero nẹ Jesu herọ.”
Mavọ yen wọ sa vwọ reyọ Jọn 3:16 vẹ Jems 2:17 vwo djephia nẹ imuẹro ọvo teri-i?
ỌDJẸKOKO
E se dje ọdavwaro phia kpahen oborẹ Jesu ru kẹ avwanre siẹrẹ e de vwo esegbuyota kpahọn ji kpo Ẹkarophiyọ rẹ ughwu rọyen.
Ẹrhomafuẹrẹn
Die yen o mudiaphiyọ e vwo vwo esegbuyota kpahen Jesu?
Mavọ yen wọ guọnọ vwo dje ọdavwaro wẹn phia kpahen oborẹ Jihova vẹ Jesu ru kẹ wẹ?
Diesorọ ọ vwọ ghanre re vwo kpo Ẹkarophiyọ rẹ ughwu ri Jesu?
HIẸ GUỌNỌ
Die yen ughwu ri Jesu mu avwanre vwo ruẹ?
Yono kpobarophiyọ kpahen esegbuyota vẹ obo re se vwo djephia.
“Vwo Esegbuyota Kpahen Ive ri Jihova” (Uwevwin Orhẹrẹ rẹ October 2016)
Vwẹ ikuegbe rẹ “Mi Rhi Vwo Omakpokpọ, Dia Fuanfon ji Vwo Uvi rẹ Akpeyeren Re,” mrẹ oborẹ akpeyeren rẹ aye ọvo vwo wene ọke ro vwo yono kpahen izobo rẹ ọtanhirhe ri Jesu.
Mrẹ oboresorọ imihwo ọvo vwọ ria ibrẹdi na je da udi na vwẹ Ẹkarophiyọ na.