UYONO 24

Amono Yen Emekashe na, Kẹ Die Yen Ayen Ruẹ?

Printed Edition

Jihova guọnọre nẹ avwanre riẹn kpahen orua rọyen rọhẹ odjuvwu. Orua nana churobọ si emekashe re seri “emọ rẹ Ọghẹnẹ.” (Job 38:7) Die yen Baibol na ta kpahen emekashe? Mavọ yen oborẹ ayen ruẹ vwo djobọte ihwo? Emekashe na eje yehẹ orua rẹ Ọghẹnẹ?

1. Amono yen emekashe na?

Jihova ma emekashe na tavwen ọ ke ma otọrakpọ na. Kerẹ Ọghẹnẹ, ayen ihwo ẹwẹn re dia obo odjuvwu. (Hibru 1:14) Emekashe iduduru buebun yen herọ, ayen ọvuọvo pha ghanghanre. (Ẹvwọphia 5:11) Ayen “ruẹ obo rẹ . . . [Jihova] tare, ri nyo urhuru rẹ ota rọye!” (Une Rẹ Ejiro 103:20) Vwẹ ọke awanre, ọke evo Jihova reyọ emekashe na vwọ vwẹ ovuẹ kẹ ihwo rọyen, biẹcha ayen, ji sivwin ayen. Nonẹna, emekashe na mu Inenikristi brẹ ihwo re guọnọ yono kpahen Ọghẹnẹ ra.

2. Ono yen Idẹbono kugbe emekashe rẹ Idẹbono?

Emekashe evo sẹro rẹ evun-ẹfuọn rayen kẹ Jihova-a. Amakashe rẹsosuọ rọ vwọso yen e “se Idẹbono kugbe Ukọn na, ọphiẹn rẹ akpọ na ejobi.” (Ẹvwọphia 12:9) Eshu guọnọ sun ihwo efa, ọtiọyena ọ da riẹriẹ ihworakpọ rẹsosuọ. Ọke vwọ yanran na, emekashe efa da vwomaba vwo gbevwọso Ọghẹnẹ. Emekashe nana re vwọso na yen e se emekashe rẹ Idẹbono. Jihova da djẹ ayen nẹ obo odjuvwu rhe otọrakpọ na. Chekemerha, ọ cha ghwọrọ ayen.—Se Ẹvwọphia 12:9, 12.

3. Mavọ yen Idẹbono vẹ emekashe rọyen vwọ guọnọ riẹriẹ avwanre?

Idẹbono vẹ emekashe rọyen riẹriẹ ihwo womarẹ uruemu rẹ orhan, rọ dia orharhe rẹ uruemu ra vwọ davwẹngba re vwo nene ihwo rẹ ẹwẹn ta ota. Kerẹ udje, ihwo evo bru ihwo ri ni isio, ebọepha, erienda, vẹ i ri ruẹ imajiki ra. Ihwo efa guọnọ omaesivwo ri churobọ si uruemu rẹ orhan. A je phiẹn ihwo vwo roro nẹ ayen sa ta ota kẹ ihwo ri ghwure. Ẹkẹvuọvo, Jihova de si avwanre orhọ: “We rhivwi bru otu rẹ ebọepha-a, eyẹ erieda-a.” (Livitikọs 19:31) Ọ kẹ avwanre orhọ-esio nana rere a sa vwọ sẹro rẹ oma avwanre nẹ abọ ri Idẹbono vẹ emekashe rọyen. Ayen ivwighrẹn ri Jihova, ayen je guọnọ wan avwanre oma.

HIẸ KODO

Yono kpahen erọnvwọn iyoyovwin rẹ emekashe ruẹ, imuoshọ rọhẹ uruemu rẹ orhan, kugbe obo ra sa vwọ sẹro rẹ oma avwanre vwo nẹ abọ rẹ Idẹbono vẹ emekashe rọyen.

Amakashe suẹn Iseri ri Jihova ivẹ rẹ ayen vwo ghwoghwota nuwevwin kpuwevwin.

4. Emekashe chọn ihwo uko vwo yono kpahen Jihova

Emekashe ri Jihova komobọ ghwoghwota kẹ ihwo-o. Ukperẹ ọtiọyen, ayen se sun ihwo rẹ Ọghẹnẹ bru ihwo re guọnọ yono kpahọn. Se Ẹvwọphia 14:6, 7, ovwan ta ota kpahen enọ nana:

Diesorọ a vwọ guọnọ ukẹcha rẹ emekashe na vwẹ iruo rẹ aghwoghwo na?
Oma vwerhen owẹ wọ vwọ riẹn nẹ emekashe na se sun we vwo bru ihwo re guọnọ yono Baibol na? Kẹ, diesorọ?

Ekuakua sansan ri churobọ si uruemu rẹ orhan kugbe ukoko rẹ odjahọn, ji te ophapha rẹ Ouija, ibọrọ rọ pha phephẹn, ẹbe ro shekpahen ivampaya, ikadi rẹ tarot, idọbebi rẹ egbẹnẹkẹ, ajija, orọnvwọn obọ, kugbe ẹbo.

5. Kẹnoma kẹ uruemu rẹ orhan

Idẹbono vẹ emekashe rọyen eyen ivwighrẹn ri Jihova. Ayen je ivwighrẹn rẹ avwanre. Se Luk 9:38-42, ovwan ta ota kpahen onọ nana:

Mavọ yen emekashe rẹ Idẹbono ru ihwo?

Avwanre durhie emekashe na rhe akpeyeren rẹ avwanre-e. Se Urhi Rivẹ 18:10-12, ovwan ta ota kpahen enọ nana:

Idjerhe vọ yen emekashe rẹ Idẹbono vwọ guọnọ riẹriẹ avwanre ji nene avwanre ta ota? Ẹkuruemu vọ yen me titi vwẹ ekogho wẹn?
Ọhọ herọ rẹ Jihova vwọ gha ẹkuruemu ri churobọ si uruemu rẹ orhan? Kẹ, diesorọ?

Hworo IVIDIO na, ovwan ta ota kpahen onọ ro nenire.

IVIDIO: Vwọso Idẹbono (5:02)

Wo rorori nẹ orọnvwọn rẹ Palesa kuphiyọ obọ rẹ ọmọ rọyen na vwo imuoshọ? Kẹ, diesorọ?
Die yen ofori nẹ Palesa ru ọ vwọ sẹro rẹ orua rọyen nẹ abọ rẹ emekashe rẹ Idẹbono?

Ọkieje yen Inenikristi rẹ uyota vwọ reyọ vwọso Idẹbono. Se Iruo Rẹ Iyinkọn Na 19:19 kugbe 1 Kọrẹnt 10:21, ovwan ta ota kpahen onọ nana:

Diesorọ ọ vwọ ghanre ra vwọ guọghọ korọnvwọn korọnvwọn ro churobọ si uruemu rẹ orhan?

Aye ọvo torhẹ erọnvwọn sansan ri churobọ si uruemu rẹ orhan.

6. Wo se phi Idẹbono vẹ emekashe rọyen kparobọ

Idẹbono yen suẹn emekashe rọyen. Ẹkẹvuọvo, Maekẹl rọ dia onotu rẹ emekashe na yen suẹn emekashe ri fuevun; odẹ ri Maekẹl ọfa yen Jesu. Mavọ yen Maekẹl vwo ẹgba te? Se Ẹvwọphia 12:7-9, ovwan ta ota kpahen enọ nana: