3 Mavọ Yen A Nẹrhovwo Wan?

A DA ta ota kpahen ẹrhovwo, ẹga buebun vwo ẹkuruemu rẹ ayen vwo tẹnroviẹ obo re rhiẹromrẹ vwẹ ẹrhovwo na kerẹ, obo re ruẹ oma wan, eta kugbe irueru sansan. Ẹkẹvuọvo, Baibol na chọn avwanre uko vwọ kẹnoma kẹ ẹkuruemu tiọyena, rere a tẹnrovi obo re ma ghanre vwẹ onọ nana, “Mavọ yen a nẹrhovwo wan?”

Baibol na vuẹ avwanre kpahen idibo rẹ Ọghẹnẹ re nẹrhovwo vwẹ ẹdia sansan kugbe oborẹ ayen ruẹ oma wan ọke rẹ ayen vwọ nẹrhovwo. Ayen nẹrhovwo phia yẹrẹ phiyọ evun kerẹ oborẹ ẹdia na hepha. Ayen kpare opharo kpenu yẹrẹ gbe uyovwin phiyotọ ọke rẹ ayen vwọ nẹrhovwo. Ukperẹ ayen vwọ reyọ ema, evwarha yẹrẹ ẹbe rẹ ẹrhovwo vwọ nẹrhovwo, ayen ghwa nẹrhovwo nẹ ubiudu rayen cha vẹ eta romobọ rayen. Die yen nẹrhẹ Ọghẹnẹ nyo ẹrhovwo rayen?

Kirobo rẹ a fuẹrẹn vwẹ uyovwinrota rọ wanre na, ayen nẹrhovwo rhe Ọghẹnẹ vuọvo rọ dia Jihova. Ẹkpo ọghanghanre ọfa je herọ. 1 Jọn 5:14 da ta: “Ọnana kọye ẹroẹvwọsuọ rẹ avwanre vwori vwẹ evun rọye, nẹ avwanre da nọ ekpẹn rẹ emu ro shephihọ ọhọre rọye ko nyo kẹ avwanre.” Ofori nẹ ẹrhovwo rẹ avwanre shephiyọ vẹ ọhọre rẹ Ọghẹnẹ. Die yen ọnana mudiaphiyọ?

A vwọ nẹrhovwo ro shephiyọ ọhọre rẹ Ọghẹnẹ, ofori a vwọ riẹn ọhọre rọyen tavwen. Eyono ri Baibol na ọyen emu ọghanghanre ọvo ro se toroba ẹrhovwo rẹ avwanre. Kẹ, ọnana mudiaphiyọ nẹ e rhe yono Baibol na kodo-o, Ọghẹnẹ rhe che nyo ẹrhovwo rẹ avwanre-e? Ẹjo, ẹkẹvuọvo Ọghẹnẹ rhẹro rọyen nẹ a riẹn ọhọre rọyen, vwo ẹruọ ọhọre rọyen ji ru nene. (Matiu 7:21-23) Ofori a vwọ nẹrhovwo nene obo re yono vwo nẹ Baibol na rhe.

E vwo yono kpahen Jihova vẹ ọhọre rọyen ye, jẹ esegbuyota rẹ avwanre ganphiyọ, rọ dia emu ọfa rọ ghanre vwọ kẹ ẹrhovwo. Jesu da ta: “Kemu kemu ejobi rẹ ovwan nọre vwẹ esebuyota, ovwan ke mrẹ ayen.” (Matiu 21:22) Ọ dia esegbuyota mudiaphiyọ nẹ kemu kemu ra vuẹ ohwo yen a rhọnvwa phiyọ-ọ. Ukperẹ ọtiọyen, o mudiaphiyọ e vwo vwo imuẹro kpahen orọnvwọn dede nẹ a mrẹ-ẹ, e muro kpahen obo re ghwotọ kokoroko. (Hibru 11:1) Baibol na vọnre vẹ imuẹro ri djerephia nẹ Jihova, rọ dia ohwo ra sa mrẹ-ẹ na, herọ yerẹn, a sa vwẹrosuọ, o ji vwo owenvwe rọ vwọ kpahenphiyọ ẹrhovwo rẹ ihwo ri vwo esegbuyota kpahọn. Kpobarophiyọ, a je sa rẹ nẹ ọ kẹ avwanre esegbuyota, Jihova vwo owenvwe rọ vwọ kẹ avwanre oborẹ a guọnọre.—Luk 17:5; Jems 1:17.

Ẹkpo ọghanghanre ọfa ro shekpahen ẹrhovwo kẹ ọna. Jesu da ta: “Ohwo ọvuọvo se bru Ọsẹ na rhe-e, ẹkẹvuọvo yẹ oma mẹ.” (Jọn 14:6) Eriyina, womarẹ Jesu yen avwanre vwọ nẹrhovwo rhe Ọsẹ na, Jihova. Ọnana yensorọ rẹ Jesu vwọ vuẹ idibo rọyen nẹ ayen nẹrhovwo vwẹ odẹ rọyen. (Jọn 14:13; 15:16) Ọ dia ọnana mudiaphiyọ nẹ a nẹrhovwo rhe Jesu-u. Ukperẹ ọtiọyen, avwanre nẹrhovwo vwẹ odẹ ri Jesu, kidie womarẹ Jesu yen avwanre sa vwọ nẹrhovwo rhe Ọsẹ avwanre rọ pha fuanfon rọ je pha gbagba na.

Idibo ri Jesu re ma kẹrẹ vuẹrẹ nẹ, “Ọrovwohwo yono avwanre obo ra nẹ ẹrhovwo.” (Luk 11:1) Vwọrẹ uyota, ọ dia oborẹ a nẹrhovwo wan ra fuẹrẹn cha na yen ayen nokpẹn rọyen mie-e. Ayen ghene guọnọ riẹn kpahen ẹrhovwo kpobarophiyọ, kọyen ayen nọ nẹ, ‘Die yen avwanre nẹrhovwo kpahen?’