Jihova de no sẹ ọyen che vwo ghwovwo ohwo, ọ fuẹrẹn sẹ orumwemwu na riẹnre nẹ obo ro ruru na chọre. Jesu dje ọnana fiotọ vwẹ Luk 12:​47, 48. Ohwo rọ vwẹ arogba vwo ruẹ obo re brare, rọ riẹnre nẹ obo rẹ ọyen ruẹ na tuẹ Jihova oma, o ru umwemwu ọgangan. Jihova se brorhiẹn nẹ ọyen che vwo ghovwo ohwo tiọyena-a. (Mk 3:29; Jọ 9:41) Vwẹ ẹdia ọtiọyena, e ji se rhẹro rẹ evwoghovwo rẹ Ọghẹnẹ? E! Kidie emu ọfa je herọ rẹ Jihova fuẹrẹn tavwen o ki vwo ghovwo sẹ orumwemwu na ghini kurhẹriẹ nẹ otọ ẹwẹn rhe. E vwo kurhẹriẹ mudiaphiyọ nẹ ohwo na che “wene iroro, uruemu, yẹrẹ ọhọre rọyen.” O churobọ si ra vwọ viẹ idiekpọvwẹ ji muomaphiyọ gangan kpahen obo re brare re ruru, yẹrẹ kpahen obo ri yovwirin re rhe ru jovwo. Ohwo tiọyena muomaphiyọ, ọ dia fikirẹ obo ro ruchọ na ọvo-o, ẹkẹvuọvo fikirẹ oyerinkugbe rọyen vẹ Jihova ro doghori rọ nẹrhẹ o ru umwemwu na. w22.06 5-6 ¶15-17

Ivwighrẹn rẹ avwanre womarẹ ekuakua re ghwa iyẹnrẹn vẹ sosha nẹtwọk vwọ hrahra efian kpahen iniọvo re vwẹrote ukoko ri Jihova. (Un 31:13) Fikirẹ ọnana, e mu iniọvo evo phiyọ uwodi je tanẹ ayen churhi. Inenikristi ẹgbukpe ujorin rẹsosuọ ji hirharoku oka rẹ ẹdia nana ọke re vwo gun efian nyẹ Pọl ji muo phiyọ uwodi. Ihwo evo da dobọ rẹ ukẹcha rẹ ayen vwọ kẹ ọyinkọn Pọl ji ọke re vwo muo phiyọ uwodi vwẹ Rom. (2Ti 1:​8, 15; 2:​8, 9) Di vwẹ ẹro roro oborẹ oma che ru Pọl ọke yena. Ọ rioja abọ buebun ji phi arhọ rọyen phiyọ ẹdia rẹ imuoshọ fikirẹ ayen. (Iru 20:​18-21; 2Kọ 1:8) E ja dia kerẹ ihwo ri gbobọnyẹ Pọ-ọl! Ọtiọyena, wo jẹ o gbewunu-u nẹ ihwo ri tedje vwẹ ukoko na yen Idẹbono ma vwọ sua. Obo rọ guọnọre yen, ọ vwọ djẹ uguegue mu ayen rere ayen vwo jẹ evun-ẹfuọn kẹ Jihova. (1Pi 5:8) Vwe ọkieje vwo bicha iniọvo na, wo ji tinkamu ayen.​—2Ti 1:​16-18. w22.11 16-17 ¶8-11

Ọhọhọre nẹ oji ro kurhẹriẹ re kanre phiyọ urhe kẹre Jesu na ohwo ri Ju. Ọghẹnẹ yen ihwo ri Ju na ga, ẹkẹvuọvo ihwo rẹ ẹgborho na ga eghẹnẹ buebun. (Ey 20:​2, 3; 1Kọ 8:​5, 6) Mane kẹ oji na ihwo rẹ ẹgborho ọfa jovwo, ọkiọvo onọ rẹ isese ni nonẹna rha dia, “Wọ djoshọ rẹ eghẹnẹ na?” Vwọba, e ji Jesu bru “igegede rẹ uwevwi rẹ Izrẹl ri ghwruru,” ọ dia ihwo rẹ ẹgborho na yen e jiro brura-a. (Mt 15:24) Ọghẹnẹ vuẹ ihwo rẹ Izrẹl nẹ, ọyen cha rhọvwọn ihwo ri ghwuru nushi. Ọ sa dianẹ oji ro kurhẹriẹ na riẹn ọnana, kidie eta rọ tare na djerephia nẹ, ọhọhọre nẹ ọ riẹnre nẹ Jihova cha rhọvwọn Jesu o vwo sun vwẹ Uvie rẹ Ọghẹnẹ. Ọ sa dianẹ ọshare na ji vwo iphiẹrophiyọ nẹ Ọghẹnẹ cha rhọvwọn ọyen nushi. Ọ vwọ dianẹ oji ro kurhẹriẹ na ohwo ri Ju na, ọhọhọre nẹ ọ riẹn kpahen Adam vẹ Ivi kugbe Iparadaisi rẹ Jihova phi ayen phiyọ na. Ọtiọyena, ọ sa dianẹ oji na vwo imuẹro nẹ Iparadaisi rẹ Jesu ta ota kpahan na ọyen ogba oyoyovwin vwẹ otọrakpọ na.​—Jẹ 2:15. w22.12 8-9 ¶2-3