Ẹbẹre 2: Akpeyeren rẹ Onenikristi

Womarẹ uyono ri Baibol na, wo yono kpahen oborẹ Jihova guọnọ mie we vẹ obo wọ sa vwọ yọnrọn irhi rọyen. Fikirẹ oborẹ wo yonori na wo de wene iruemu wẹn kugbe ẹro wo vwo nẹ akpeyeren. Asaọkiephana wo vwo brorhiẹn wọ vwọ yan nene idjerhe ri Jihova re na, kọyen wo muegbe wọ vwọ ga Jihova kerẹ oghwoghwota rẹ Uvie na.

Ẹfuẹrẹn rẹ enọ rehẹ obotọ na cha chọn wẹ uko vwọ karophiyọ oborẹ Jihova guọnọ mie we vẹ erọnvwọn evo wo se ru rere o se vwo rhiabọreyọ owẹ. Ovuẹ nana cha nẹrhẹ wọ riẹn ọghanrovwẹ re vwo ru erọnvwọn eje vwọ kẹ urinrin ri Jihova vẹ ẹwẹn obrorhiẹn ro fiotọ.—2 Kọr. 1:12; 1 Tim. 1:19; 1 Pita 3:16, 21.

Wo vwo te ẹdia nana vwẹ uyono wẹn re na, aphro herọ-ọ wo muegbe wọ vwọ vwomakpotọ kẹ Jihova je dia ẹbẹre ọvo rẹ ukoko rọyen. Enọ vẹ ẹkpo ri Baibol rehẹ obotọ na cha chọn wẹ uko vwọ fuẹrẹn obo wọ riẹn kpahen omaevwokpotọ vwọ kẹ ọrhuẹrẹphiyotọ rẹ Ọghẹnẹ vwevunrẹ ukoko na vẹ orua, yẹrẹ vwọ kẹ usuon rẹ akpọ na. Aphro herọ-ọ, vwọ vrẹ obo ri jovwo, wọ cha vwẹ ẹro ọghanghanre vwo ni ọrhuẹrẹphiyotọ rẹ Jihova vwo yono ihwo rọyen, rọ je vwọ bọn esegbuyota rayen gan. Ọnana churobọ si uyono ẹra, wo mi ji vwobọ vwọ te asan rẹ ẹgba wẹn teri.

Vwọba, ẹbẹre nana che djekpahen ọghanrovwẹ re vwo vwobọ vwẹ iruo aghwoghwo na ọkieje je vwẹ ukẹcha kẹ ihwo efa vwọ riẹn Jihova vẹ obo ro ruẹ kẹ ihworakpọ. (Mat. 24:14; 28:19, 20) Ukuotọ rọyen, ọ cha nẹrhẹ wọ mrẹ ọghanrovwẹ rẹ omaẹvwọkpahotọ vẹ omaebrophiyame wẹn. Vwo imuẹro nẹ Jihova vwẹ ẹro ọghanghanre vwo nẹ kemu kemu wo ru vwọ kẹ fikirẹ ẹserọphẹ rọyen wo rhiẹromrẹ re.

1. Oka rẹ orọnvwe vọ yen Ọghẹnẹ rhọnvwephiyọ? Die yen orọnvwọn ọvuọvo rẹ Baibol na tare nẹ ọ sa nẹrhẹ orọnvwe fan?

• “Ọ da kpahe ọ da ta nẹ, Ovwan ji se nẹ ohwo rọ ma ayen notọrhe ọshare vẹ aye a ma aye-en? Ọ da ta nẹ, Fiki rẹ ọnana ọshare vwo jẹ ọsẹ vẹ oni rọye vwo ọ me ra gbanọ aye rọye, ayen ivẹ na ke cha dia oma ọvo. Fiki rẹ eriyin na ayen gbe hẹ ihwo ivẹ ọfa-a, ẹkẹvuọvo ayen kẹ oma ọvo Obo rẹ Ọghẹnẹ tan kugbe nu, e jẹn ohwo hẹriẹ-ẹ. . . . Kohwo kohwo ro siobọ nẹ aye rọye, jokpa nẹ ko gbe ọfanrhiẹ, rẹ ọ da reyọ ọfa, yo gbe igberadja: ọshare rọ reyọ aye re siobọ nu, yo gbe igberadja.”—Mat. 19:4-6, 9.

2. Diesorọ aye gbe ọshare re dia kuẹgbe vwọ rọvwọn? Ọ da dianẹ wọ rọvwọnre, o muwẹro nẹ wo ru orọnvwe wẹn nene urhi, usuon je mrẹ orọnvwe na vughe?

• “Karophihọ ihwo na nẹ ayen vwẹ oma kpotọ kẹ ayen otu ri suẹn ihwo, kugbe ihwo ride ri vwo ogangan.”—Tai. 3:1.

• “E jẹn emu ọghọ kẹ orọvwe vwẹ ohri rẹ ovwan ejobi, e jẹn e gbe ehwa rẹ orọvwe na ẹgua-a; kidie Ọghẹnẹ cha vwẹ ọvwọfanrhiẹ kugbe otu ri gbe igberadja guẹdjọ.”—Hib. 13:4.

3. Ẹdia vọ wọ kare vwevunrẹ orua wẹn?

• “Ọmọ mẹ, nyo uyono rẹ ọsẹ wẹn, wọ jẹ uyono rẹ oni wẹn kuẹfia-a.”—Isẹ 1:8.

• “Ọshare hẹ olori rẹ aye kirobo ri Kristi hẹ olori rẹ [“ukoko na” NW] . . . Eshare na, wa guọnọ eya rẹ ovwan, kirobo ri Kristi guọnọ [“ukoko na” NW].”—Ẹfe. 5:23, 25.

• “Esẹ na, wa kpare emọ rẹ ovwan ophu-u, ẹkẹvuọvo wa ghẹrẹ ayen vwẹ ẹghwọ kuo kugbe uyono rẹ Ọrovwohwo.”—Ẹfe. 6:4.

• “Ovwan emọ, we mu ọghọ kẹ esẹ vẹ ini rẹ ovwan, fikiridie ọtiọna ri je Ọrovwohwo.”—Kọl. 3:20.

• “Ovwan eya ri kpo orọvwe, wa vwẹ oma kpotọ kẹ eshare rẹ ovwan.”—1 Pita 3:1.

4. Diesorọ o vwo fo nẹ e ni arhọ ghanghanre?

• “[Ọghẹnẹ] kẹ ihwo ejobi arhọ kugbe ẹnwẹn kugbe kemu kemu. . . . Evun rọye avwanre epha etiyin avwanre da yan etiyin arhọ rẹ avwanre epha.”—Iruo 17:25, 28.

5. Diesorọ e vwo jẹ ohwo ehwe tobọ ọmọ rọhẹ evun rẹ oni?

• “Ihwo da họnra, ayen da wan aye vẹ evun oma . . . emu rọ brare da ruọ, ọke yena a me vwẹ arhọ hwa osa rẹ arhọ.”—Eyan. 21:22, 23.

• “Ẹro wẹn mrẹ asan ra je ma-a vwẹ oma mẹ; vwẹ evun rẹ ọbe wẹn e si ayen phihọ ọvuọvo, ẹdẹ ra mare vwọ kẹ vwẹ, yẹ ọke yena a je ma ọvuọvo rẹ aye-en.”—Une 139:16.

• “Emu . . . ri tuẹ Ọrovwohwo na oma, . . . abọ ri sun ọbara ekueku.”—Isẹ 6:16, 17.

6. Die yen Ọghẹne ta kpahen ọbara?

• “Ovwan gha . . . ọbara kugbe obo ro churu ghwu kugbe ọfanrhiẹ.”—Iruo 15:29.

7. Diesorọ o vwo fo nẹ e vwo ẹguọnọ rẹ iniọvo avwanre?

• “Urhi ọkpokpọ mi ji kẹ ovwan nẹ, ovwan guọnọ ohwohwo; kirobo re me guọnọ ovwan na rere ovwan je guọnọ ohwohwo rhe. Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.”—Jọn 13:34, 35.

8. A sa vwọ kẹnoma kẹ ega ri pho, re je sa so ughwu kẹ ihwo efa: (a) Diesorọ ohwo rọ muọga tiọyena vwo jẹ ihwo ẹgbanọ yẹrẹ o vwo jẹ unu rayen ẹfiọnfiọn? (b) Diesorọ ophu vwo je emuo siẹrẹ ihwo rhe durhie kpo uwevwin raye-en? (c) Diesorọ ohwo rọ muọga tiọyena vwọ yanran ra davwen ọbara rọyen tavwen ọ ke ton oyan rẹ orọnvwe phiyọ? (d) Diesorọ o vwo fo nẹ ohwo rọ muọga ro pho vwọ vuẹ ọrọvwẹrote iruo rẹ ekpako na tavwen o ki bromaphiyame?

• “Wọ ria osa rẹ ohwo ọvuọvo-o, jokpa nẹ osa rẹ ẹguọnọ wa re ohwohwo. . . . Wọ me guọnọ ọrivẹ wẹn kirobo ru wọ guọnọ oma wẹn. Ẹguọnọ ruẹ ọchọ kẹ ọrivẹ rọye-e.”—Rom 13:8-10.

• “E jẹn ohwo guọnọ erhuvwu rẹ oma rọye ọvo-o, ẹkẹvuọvo ovwan je guọnọ erhuvwu rẹ ihwo efa.”—Fil. 2:4.

9. Diesorọ Jihova vwọ guọnọ nẹ avwanre vwo ghovwo ihwo efa?

• “Ohwohwo chirako kẹ ohwohwo, fobọ si ophu nẹ evun rere ohwohwo vwo ghovwo ohwohwo nẹ otọ rẹ evun rhe: kirobo rẹ Ọrovwohwo vwo ghovwo na, eriyin we ji vwo ghovwo rhe.”—Kọl. 3:13.

10. Die yen ofori nẹ wo ru siẹrẹ oniọvo de miovwo odẹ wẹn yẹrẹ ọ da ghwa wẹ re?

• “Omoni wẹn de gbe we ku, vwẹ obo ro ruru vwọ nẹ; o de nyo we ye wọ rease rọye. Ẹkẹvuọvo o gbi nyo-o, reyọ ihwo ivẹ ọfa boma, kidie iseri rẹ amwarha re ma sẹ. Ọ gbe je davwerhọ-ọn, gba ra ta kẹ [“ukoko na,” NW]; o gbi ji nyo ota rẹ [“ukoko na-a,” NW], gbe jọ dia ọvweghrẹ wẹn bẹdẹ.”—Mat. 18:15-17.

11. Ẹro vọ yen Jihova vwo ni imwemwu nana?

▪ Ọfanrhiẹn

▪ Ra vwọ vwẹ ema vwọ ga ẹga

▪ Eshare ri duẹ eshare yẹrẹ eya ri duẹ eya

▪ Ujiecho

▪ Re vwo phi idjogba

▪ Udiẹda vroma

• “Wo jẹ a phiẹn wẹ-ẹn; ọvwọfanrhiẹ, eyẹ ọgọẹdjọ, eyẹ o gbe igberadja, eyẹ ọshare ro duẹ ọshare, eyẹ iji, eyẹ ọvwurhuru, eyẹ ọgbaidi, eyẹ ọharhekan, eyẹ ogborhugborho sa reuku rẹ uvie rẹ Ọghẹnẹ na-a.”—1 Kọr. 6:9, 10.

12. Die yen orhiẹnbro wẹn kpahen ọfanrhiẹn, ro ji churobọ si koka koka rẹ ehware re bruru vwẹ otafe rẹ orọnvwe?

• “Si oma nẹ ọfanrhiẹ.”—1 Kọr. 6:18.

13. Diesorọ o vwo fo nẹ a kẹnoma kẹ ihunvwun egangan yẹrẹ erọnvwọn re yanghan iroro rẹ ohwo?

• “Imoni mẹ, me rẹ ovwan, rere vwẹ arodọvwẹ rẹ Ọghẹnẹ, ovwan sa vwẹ oma rẹ ovwan ze izobo ọkpokpọ, rọ fọnro ro fo ẹreyọ kẹ Ọghẹnẹ, kọye hẹ ẹga [“ọfuanfon,” NW] rẹ ovwan ga. We hirhe oma phihọ ohwo rẹ akpọ nana ọvo-o ẹkẹvuọvo gbe wene iroro rẹ udu rẹ ovwan phihọ ọkpokpọ, re we se vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.”—Rom 12:1, 2.

14. Erhọ yen iruemu rẹ orhan evo rẹ Ọghẹnẹ gha?

• “We ja mrẹ ohwo ọvo vwẹ uherevie rẹ ovwan . . . rọ mraro, eyẹ ọbuepha eyẹ ohwo rọ mrorẹ eyẹ ọbo rọ ghwa ihwo ria, eyẹ ohwo ro ruẹ inehweri, eyẹ ohwo ro nene irivwi ta ota eyẹ ọrieda, eyẹ ohwo ro hrẹn.”—Urhi 18:10, 11.

15. Ohwo de ru umwemwu ọgangan, ọ da guọnọ rhoma vwo aroesiri ri Jihova, die yen ofori nẹ o brokpakpa ru?

• “Me rhọvwẹ imwemwu mẹ kẹ wẹ, mi si orukuruku mẹ nu kẹ wẹ-ẹ, Me tare nẹ, me fan ogbeku mẹ kẹ Ọrovwohwo.”—Une 32:5.

• “Ono rẹ họnvwan vwẹ uherevie rẹ ovwan? E jo se ekpako rẹ [“ukoko na,” NW]; rere ayen nẹ ẹrhovwo kẹ, rere ayen vwẹ evwri ghworo vwẹ odẹ rẹ Ọrovwohwo. Omamọ rẹ ẹrhovwo rẹ esegbuyota ko sivwi ohwo rọ họnvwan na, Ọrovwohwo kọ kparọ vrẹn; ọ da dianẹ o ru imwemwu jovwo, ke vwo ghovwo.”—Jems 5:14, 15.

16. Wọ da riẹn nẹ oniọvo ọvo ru umwemwu ọgangan, die yen ofori nẹ wo ru?

• “Ọ da dianẹ ohwo ọvo ru umwemwu, ohwo re seri rhe asan otu rere o rhi se iseri kpahe uyota re emu rọ mrẹre eyẹ ọ ro nyori, ọ rha rhọvwe ta-a, kẹ ọye ọvo re ghwa orukuruku rọye.”—Liv. 5:1.

17. E de ghwoghwo nẹ ohwo ọvo rha dia Oseri ri Jihova-a, mavọ yen a vẹ ọyen che yerin wan?

• “We kuoma gbe ohwo ọvuọvo rọ re odẹ rẹ oniọvo kakaka-a rọ da reabe rẹ ọfanrhiẹ egbe eyẹ ọvwurhuru, eyẹ rọ dia ọgọedjọ, ọharhekan, ọgbaidi, eyẹ oji—wọ vẹ ohwo ọtiọye ria emu kuẹgbe-e.”—1 Kọr. 5:11.

• “Ọ da dianẹ ohwo ọvo bru uwe rhe rọ ghwa uyono nana rhe-e, wọ reyọ phihọ uwevwi-i eyẹ wo yere-e.”—2 Jọn 10.

18. Diesorọ o vwo fo nẹ igbeyan wẹn dia ihwo ri vwo ẹguọnọ ri Jihova?

• “Ohwo rọ yan nene evwaghwanre ko vwo aghwanre, ẹkẹvuọvo ugbeyan rẹ ẹkpa kọ re oja.”—Isẹ 13:20.

• “Wo jẹ a phiẹn wẹ-ẹn: otu umwemwu gbe uruemu esiri kuẹ.”—1 Kọr. 15:33.

19. Diesorọ Iseri ri Jihova vwobọ vwẹ usuon rẹ akpọ nana-a?

• “Ayen dia e rẹ akpọ na-a.”—Jọn 17:16.

20. Diesorọ o vwo fo nẹ wo muọghọ kẹ ihwo ri suẹn?

• “E jẹn kohwo kohwo vwẹ oma kpotọ kẹ otu ra vwẹ ogangan rẹ isuesun kẹ. Kidie ogangan ọfa herọ-ọ jokpa rẹ ọ ro nẹ obọ rẹ Ọghẹnẹ rhe, ayen otu ri suẹn na Ọghẹnẹ re vwẹ ayen mu.”—Rom 13:1.

21. Urhi rẹ ihworakpọ da vwọso ọ rẹ Ọghẹnẹ, die yen ofori nẹ wo ru?

• “Avwanre se mu ọghọ kẹ Ọghẹnẹ nọ ihwo rẹ akpọ.”—Iruo 5:29.

22. Ẹkpo ri Baibol vọ yen sa chọn wẹ uko vwọ kẹnoma kẹ akpọ na ọke wọ da guọnọ iruo?

• “Ẹgborho gbe kpare ọlọkọ vwọ so ẹgborho-o, ayen gbi che nyo umri rẹ ofovwi ọfa-a.”—Maika 4:3.

• “Vrẹn no [Babilọn rode] rhe, ihwo mẹ, wo de rhe vwo obọ vwẹ imwemwu rọye, wọ da rha ghare vwẹ ọtiekọ rọye.”—Ẹvwọ. 18:4.

23. Erọnvwọn ra vwọ diotọ vọ vẹ eha vọ yen wo che vwobọ vwọ, kẹ evo yen wọ cha sen?

• “Oma tuẹ erhi [rẹ Ọrovwohwo] kpahe ohwo ro gbe ozighi.”—Une 11:5.

• “Jẹn umwemwu tu ovwan oma, churu obọ mu obo ri yoma.”—Rom 12:9.

• “Emu ejobi rọ dia uyota, emu ejobi ro vwo ọghọ, emu ejobi rọ dia ọsoso, emu ro yovwiri, emu ejobi ro vwo ẹguọnọ, emu ejobi ro vwo erhuvwu, ọ da dianẹ o vwo uyoyovwi, ọ da dianẹ o vwo obo ro fo ejiro, gbe roro imu nana.”—Fil. 4:8.

24. Diesorọ Iseri ri Jihova vwomaba ẹga efa vwọ ga ẹga-a?

• “Wọ sa re vwẹ imẹjẹ rẹ Ọrovwohwo kugbe imẹjẹ rẹ Idẹbono-o.”—1 Kọr. 10:21.

• “Gba hẹriẹ oma nẹ ayen, eriyin Ọrovwohwo tare, Wọ vwẹ obọ te emu ogbegbe-e; ki mi dede ovwan reyọ.”—2 Kọr. 6:17.

25. Odjekẹ ri Baibol vọ yen cha chọn wẹ uko wo brorhiẹn sẹ wo che vwobọ vwẹ orẹ ọvo?

• “Ayen de kuoma kugbe ẹgborho na ayen de ru kirobo rẹ ayen ruru. Ayen da ga ema rayen, re rhoma hirhe phihọ ufi kẹ ayen.”—Une 106:35, 36.

• “Ihwo ri ghwuru riẹn emu ọvuọvo-o.”—Aghwo. 9:5.

• “Ayen dia e rẹ akpọ na-a.”—Jọn 17:16.

• “Gbe jẹn ọke rọ wanre na te kẹ eruo rẹ obo ri Keferi guọnọ ruẹ, ri ruẹ fanrhiẹ fanrhiẹ, urhuru sivwe, idi-ẹda, re mrẹ ọre ghọghọ, idi emuo, ẹdjọ ro gbegọ.”—1 Pita 4:3.

26. Mavọ yen idje rehẹ Baibol na chọn wẹ uko vwo brorhiẹn sẹ wo che vwobọ vwẹ ẹkarophiyọ rẹ ẹdẹ re vwiẹ ohwo?

• “Vwẹ ẹdẹ rẹ erha, rọ dia eduvwiẹ ri Fero, o de chere emu kẹ idibo rọye ejobi, ọ da kpare uyovwi rẹ onotu rẹ omuidi na kpenu kugbe uyovwi rẹ onotu rọ kakemu na kpenu vwẹ usun rẹ idibo rọye na. Ọ da rhoma reyọ onotu rẹ omuidi na phihọ ako rẹ iruo rọye . . . ; ẹkẹvuọvo o de churu onotu rọ kakemu na si.”—Jẹn. 40:20-22.

• “Ọke rẹ ẹdevwiẹ ri Hẹrọd vwo te, ọmọtẹ ri Hẹrọdias de rhi gbe eha, eha na da vwerhe Hẹrọd gangan. Etiyin o de ve, o de ji duvwu iyori nẹ, kemu kemu wọ nọre ejobi me vwọ kẹ wẹ. Rẹ oni rọye vwo nyo, ọ de yono, ọ da rhe nẹ, kẹ vwẹ uyovwi ri Jọn ri Baptist vwẹ ọsete. O de ji ikọn kpo obo uwodi re bru ohọre ri Jọn ri Baptist.”—Mat. 14:6-8, 10.

27. Diesorọ o vwo fo nẹ wo nene odjekẹ rẹ ekpako na?

• “Mu ọghọ kẹ isun rẹ ovwan vwẹ oma kpotọ kẹ ayen; kidie ayen re sẹro rẹ ẹnwẹn rẹ ovwan, ayen je hẹ ihwo re cha nẹ iyẹnrẹ kpahe ovwan. We jẹn ayen ru ọna vẹ omavwerhe, ọ dia ọ rẹ opharo emuohọ-ọ, kidie ọyena fi erere kẹ wẹ-ẹ.”—Hib. 13:17.

28. Diesorọ ọ vwọ ghanre wẹ vẹ orua wẹn vwọ rhuẹrẹ ọke phiyotọ vwo se ji yono Baibol na kọke kọke?

• “O vwo aghọghọ vwẹ evun rẹ urhi rẹ Ọrovwohwo urhi rọye na kọye o roro te ason te uvo. Kọ dia kerẹ urhe ra kọnre kẹrẹ asan ame, rọ mọ emamọ rọye vwẹ ọke ororo rọye, ẹbe rọye se vwioro-o. Kemu kemu ro ruru ejobi, ko yovwi kẹ.”—Une 1:2, 3.

29. Diesorọ wo vwo vwo ẹguọnọ rẹ uyono ẹra kugbe e vwo vwobọ vwẹ ayen?

• “Mi se odẹ wẹn kẹ imoni mẹ vwẹ uherevie rẹ ukoko rode mi de jiri uwe.”—Une 22:22.

• “E gbe jẹ avwanre roro obo re jeje ohwohwo oma vwẹ ẹguọnọ kugbe iruo esiri, e jẹn avwanre ghwẹ oma koko, a rha hẹriẹ oma kirobo rẹ otu evo ruẹ-ẹ, ẹkẹvuọvo e bru ohwohwo uche, marho kẹ ọke nana rẹ ovwan vwọ mrẹ nẹ Ẹdẹ na si kẹre re.”—Hib. 10:24, 25.

30. Ọrhọ yen owian rọ ma ghanre kparobọ rẹ Jesu vwọ kẹ avwanre?

• “Ovwan gba yanran re we re yono ihwo rẹ akpọ na ejobi, . . . we yono ayen vwọ riẹn otọ rẹ imu na ejobi rẹ mi ji iji kẹ ovwan na.”—Mat. 28:19, 20.

31. Ọke re de ru itetoro yẹrẹ a da vwẹ ukẹcha kẹ iniọvo avwanre, uruemu vọ yen vwerhen Jihova oma?

• “Vwẹ emu wo vwori ejobi bru ọghọ phihọ Ọrovwohwo oma.”—Isẹ 3:9.

• “Ohwo ọvuọvo mi ru kirobo rẹ udu rọye dje kẹ, ọ dia ọ rẹ iguegu-u eyẹ ẹgbahọ-ọ, kidie Ọghẹnẹ guọnọ okẹ rẹ ivun avwerhe.”—2 Kọr. 9:7.

32. Ebẹnbẹn vọ yen Inenikristi se rhẹro rọyen?

• “Ebruba kẹ ihwo re muru ekueku fiki rẹ ọvwata: kidie uvie rẹ odjuvwu kọ dia ọrayen. Ebruba kẹ ovwan, vwẹ ọke rẹ ihwo da ghwọ ku ovwan, rẹ ayen de mu ovwan, rẹ ayen da ta ota ọbrabra kpahe ovwan fiki mẹ. Ghọghọ re oma vwerhe ovwan, kidie osa rẹ ovwan vwa rhuarho vwẹ obo odjuvwu: kidie ọtiọye e ke kpokpo otu rẹ emraro re karo kẹ ovwan.”—Mat. 5:10-12.

33. Diesorọ ọ vwọ dia uphẹn oghẹresan re vwo bromaphiyame kerẹ Oseri ri Jihova?

• “Eta wẹn da dia aghọghọ kẹ vwẹ kugbe omavwerhovwẹ kẹ ubiudu mẹ; kidie a vwẹ odẹ wẹn se vwe nure, E Ọrovwohwo, Ọghẹnẹ.”—Jer. 15:16.