“Mi Rhi Vwo Ẹguọnọ rẹ Iruo rẹ Aghwoghwo na Re!”

Ọ da vwẹ mamọ nẹ me vwọ hẹ omarẹ ẹgbukpe 13, oyerinkugbe mẹ vẹ Jihova de rhi dogho. Kọ ghwa họhọ nẹ emọ rẹ isikuru mẹ riavwerhen rẹ akpeyeren odedede, ke me rioma kpahen ayen. Ki mi no nẹ irhi rẹ ọsẹ vẹ oni mẹ kugbe iji ri Baibol na gan nọ, ẹga ri Jihova da rhe họhọ oghwa vwọ kẹ vwẹ. Me riẹnre nẹ Jihova herọ, ẹkẹvuọvo mi se sikẹrẹ-ẹ.

Dede nẹ me dobọ rẹ aghwoghwo ji riẹriẹriẹ-ẹ, ji mi se vwobọ vwọ kerẹ obo ri jovwo-o. Me da tobọ ra, mi muegbe tavwen me ke ra-a; kọ bẹn mi vwo nene ihwo ton otaẹtakuẹgbe phiyọ, ji ghwoghwo ota kẹ ayen. Ọtiọyena, mi rhe vwo orhivwinbrura kugbe ihwo me vwẹ Baibol yono-o, ofu rẹ iruo na de rhi dje vwe. Ke me nọ oma mẹ, ‘Mavọ yen ohwo se vwo vwobọ vwẹ iruo nana kudughwrẹn kudughwrẹn, kugbe kemeranvwe kemeranvwe?’

Mi vwo te ẹgbukpe 17, mi de rhi vwo ẹwẹn rẹ mẹvwẹ ọvo vwo sun oma mẹ. Ọtiọyena, mi de krun eghwa mẹ, mi de kpo Australia. Ọnana mi ruru na, da ọsẹ vẹ oni mẹ mamọ. Ayen ro ẹnwan kpahen ovwẹ mamọ, kidie ayen guọnọre nẹ mi vrẹn nẹ ukoko na-a.

Mi vwo te Australia, oyerinkugbe mẹ vẹ Jihova de rhi doghophiyọ. Ọke ro je vwe, kọyen mi vwo kpo uyono. Me da vwẹ ugbeyan vwo mu ighene re pha kerẹ omẹvwẹ; avwanre de kpo uyono vwẹ ason rẹ ẹdẹ ọvo, avwanre mi rhe kpo iklọbu re gbeha je da idi vwẹ ason rivẹ. Ọke yena, owọ mẹ ọvo hẹ ukoko na, ọ ro chekọ hẹ obẹ akpọ; me riẹn ẹbẹre me hepha-a.

Omarẹ ẹgbukpe ivẹ vwọ wan nu, me da rhe mrẹ oniọvo aye ọvo rọ nẹrhẹ mi roro kpahen oborẹ mi yeren akpọ wan, jẹ ọ riẹnre-e. Ọke yena, avwanre iniọvo eya iyorin re je rovwọ-ọn yen gba dia, avwanre de durhie oniruo okinriariẹ vẹ aye rọyen Tamara nẹ ayen rhi nene avwanre dia vwẹ udughwrẹn ọvo. Oniruo okinriariẹ na da vwẹrote ọdavwẹ rẹ ukoko na, aye rọyen Tamara mi rhi nene avwanre ghwọrọ ọke kugbe je hwẹ. Ọyena ro ruẹ na je vwe mamọ. Aye na ghini ohwo ra sa rua, rọ nabọ vwo ẹruo rẹ ohwo. O gbe vwe unu mamọ nẹ ohwo rọ muomaphiyọ ẹga ri Jihova ọtiọyen ji se nene ihwo efa ghwọrọ ọke kugbe.

Oniọvo Tamara vwo oruru rẹ iruo rẹ ẹga na mamọ. Ẹguọnọ ro vwo kpahen ukoko na kugbe iruo rẹ aghwoghwo na phoriẹ muẹ ihwo. Oma vwerhọn rọ vwọ davwẹngba rọyen eje vwẹ ẹga ri Jihova, jẹ mẹvwẹ ro ruẹ ọ rẹ takpe obọ mẹ herọ na muomaphiyọ. Uruemu rọyen kugbe uvi rẹ omavwerhovwẹn ro rhere na djobọte vwe mamọ. Udje rọyen nẹrhẹ ovwẹ karophiyọ uyota ọghanghanre nana: Jihova guọnọre nẹ avwanre eje vwẹ ẹga kẹ “vẹ evuavwerhe” kugbe “ine” ẹsuọ.—Une 100:2.

Me guọnọ vwo oka rẹ aghọghọ ro rhe oniọvo Tamara na, jẹ ofori nẹ mi ru ewene evo tavwen. Dede nẹ ọ reyọ omarẹ ẹgbukpe erha, jẹ ukuotọ rọyen me da ton ewene na phiyọ. Ki mi muegbe tavwen mi ki kpo aghwoghwo; me je ga kerẹ ọkobaro ubrọke nọke ra ruọke. Ọnana chọn vwẹ uko vwo phi oshọ kparobọ ji fiudugberi. Kidie nẹ me vwẹ Baibol na vwo ruiruo kọke kọke, ke me riavwerhen rẹ iruo rẹ aghwoghwo na. O vwo te ọke ọvo, ke me ga kerẹ ọkobaro ubrọke kemeranvwe kemeranvwe.

Me da vwẹ ugbeyan vwo mu iniọvo rẹ edje sansan re nabọ yan obaro vwẹ ukoko na, je riavwerhen rẹ ẹga ri Jihova. Omamọ udje rayen chọn vwẹ uko vwo roro kpahen obo re ma ghanre vwẹ akpeyeren mẹ, ọ je nẹrhẹ me ton isese ri Baibol ri kẹdẹ kẹdẹ phiyọ. Omavwerhovwẹn re me mrẹ vwẹ iruo rẹ aghwoghwo na vwọ gan te asan ọvo re, me da rhe dia ọkobaro ọkieje. Vwẹ ikpe buebun rhire na, ọnana yen obọrẹsosuọ rẹ oma vwo fun vwe, rẹ oma rẹ ukoko re me da ga na je vwọ vwerhen ovwẹ.

Ẹgbukpe ọvo vwọ wan nu, me da mrẹ Alex rọ dia omamọ rẹ ohwo ro vwo ẹguọnọ ri Jihova kugbe iruo rẹ aghwoghwo na. Ọ ga kerẹ odibo rowian, o ji ruiruo rẹ ọkobaro na te ẹgbukpe esan re. Alex gare vwẹ asan ra da ma guọnọ ukẹcha vwẹ Malawi vwẹ emeranvwe ighwrẹn fiẹ ẹrenren. Etiyin yen ọ da mrẹ imishọnare re dia omamọ rẹ udje vwọ kẹ, ayen ji vwẹ uchebro vwọ kẹ nẹ o rhe phiẹ ẹga ri Jihova phiyọ ẹdia rẹsosuọ vwẹ akpeyeren rọyen.

Vwẹ 2003, mẹ vẹ Alex da rọvwọn, nẹ ọke yena rhe yen avwanre vwọ hẹ iruo rẹ ẹga rẹ ọkieje na re. Avwanre yono erọnvwọn buebun, Jihova ji bruba kẹ avwanre vwẹ idjerhe buebun.

Vwẹ 2009, e de durhiẹ avwanre kpo iruo rẹ imishọnare vwẹ Timor-Leste rọ dia orere ọtete vwẹ usun rẹ etọ rẹ ame riariẹ phiyọ rẹ ihwo rẹ Indonesia dia. O gbe avwanre unu, oma je vwerhen avwanre, dedena oshọ mu avwanre. Emeranvwe iyorin vwọ wan nu, avwanre de te Dili rọ dia otorere rẹ ẹkuotọ na.

Oyan nana guọnọ ewene sansan vwẹ akpeyeren avwanre. Avwanre che yono ẹkuruemu vẹ ephẹrẹ rẹ ihwo na, avwanre mi ji yono oma avwanre phiyọ obo ra riemu rayen vẹ oborẹ ayen yeren akpọ wan. Vwẹ iruo rẹ aghwoghwo na, ọkieje yen avwanre vwọ mrẹ igbere, ihwo re ghwa riẹn ẹbe-e, kugbe ihwo re she nyẹ. Avwanre je mrẹ ihwo buebun ri muomaphiyọ fikirẹ ofovwin kugbe ozighi.a

Iruo rẹ aghwoghwo na vwerhenre san! Kerẹ udje, o vwo ọke ọvo me vwọ mrẹ ọmọtẹ ọvo rọhẹ ẹgbukpe 13 re se Maria ro muomaphiyọ.b Oni rọyen ghwuru ikpe evo re wanre, jẹ ọ je fobọ mrẹ ọsẹ rọye-en. Kerẹ emọ efa rẹ edje rọyen, Maria riẹn obo rọ guọnọre vwẹ akpeyere-en. Me karophiyọ ọke ọvo rọ vwọ ta ọdavwẹ rọyen kẹ vwẹ, jẹ ọ viẹ. Ẹkẹvuọvo, mi vwo ẹruọ rẹ obo rọ ta-a, kidie me sa jẹ ephẹrẹ rayen fiotọ-ọ. Me da nẹrhovwo rhe Jihova nẹ ọ chọn vwẹ uko me sa vwọ vwẹ uchebro kẹ. Ọtiọyena, mi de se ẹkpo ri Baibol sansan kẹ, re sa bọn gan. Vwẹ uvwre rẹ ikpe evo, me da mrẹ oborẹ uyota na wene akpeyeren ri Maria. O de bromaphiyame, enẹna kọ vwẹ Baibol vwo yono ihwo. Asaọkiephana, Maria rhi vwo orua rẹ idibo ri Jihova ri vwo ẹguọnọ rọyen.

Jihova kuẹ ebruphiyọ ku iruo rẹ aghwoghwo na vwẹ Timor-Leste. Dede nẹ buebun rẹ ighwoghwota na je rhe vrẹ ẹgbukpe ihwe vwẹ ukoko na-a, jẹ buebun rayen ga kerẹ ekobaro, idibo rowian, kugbe ekpako ukoko. Efa wian vwẹ ọfisi ra da fan ẹbe rẹ avwanre kpo ephẹrẹ sansan. Oma vwerhen ovwẹ siẹrẹ me da mrẹ ẹyan-obaro rayen vẹ omavwerhovwẹn ro rhe ayen ọke rẹ ayen da suine vwẹ emẹvwa.

Akpeyeren rẹ avwanre vwẹ Timor-Leste fẹnẹ ọ rẹ Australia, ẹkẹvuọvo, ọ vọnre vẹ omavwerhovwẹn. Ọke evo, avwanre keke oma phiyọ imoto otete rọ vọnre vẹ ihwo ri nẹ eki kpo, vẹ iyerin eyaya kugbe ifọ rẹ ayen dẹ nene oma. Vwẹ ẹdẹ evo, avwanre ru uyono ri Baibol vwẹ uwevwin rọ tuabọ rọ je pha gbegbe, jẹ ehọ djẹ nene asan eje. Dede nẹ avwanre hirharoku egbabọse nana eje, jẹ mi ji no nẹ ‘a mrẹ vwo dje uphẹn nana-a!’

Oma vwerhen ovwẹ nẹ ọsẹ vẹ oni mẹ davwẹngba vwo yono uvwe ji bicha vwẹ ọke rẹ oyerinkugbe mẹ vẹ Jihova vwo dogho. Isẹ 22:6 rugba vwẹ oma mẹ. Oma vwerhen ọsẹ vẹ oni mẹ nẹ mẹ vẹ Alex ga Jihova. Rhanvwe 2016 yen ọshare mẹ vwọ ga kerẹ oniruo okinriariẹ vwẹ ibrotọ rẹ oghọn ukoko rẹ Australasia vwẹrote.

O gbe vwe unu mamọ nẹ, vwẹ ọke ri jovwo me riavwerhen rẹ iruo rẹ aghwoghwo na-a. Jẹ enẹna, mi rhi vwo ẹguọnọ rẹ iruo aghwoghwo na re! Me rhe mrẹvughe re nẹ, o toro obo re phiare vwẹ akpeyere-en, avwanre cha mrẹ uvi rẹ aghogho siẹrẹ a da vwẹ ẹwẹn rẹ avwanre eje vwọ ga Jihova. Vwọrẹ uyota, ẹgukpe 18 re mẹ vẹ Alex vwọ ga Jihova cha rhe na yen ma kẹ vwẹ omavwerhovwẹn. Me rhe mrẹ uyota rẹ eta nana rẹ obuine Devid ta kẹ Jihova: “Ihwo ri si oma nu vwẹ owẹ ghọghọ, jẹn ayen so ine rẹ aghọghọ. . . . Ihwo re guọnọ odẹ wẹn mrasan vwo omavwerhe vwẹ oma wen.”—Une 5:11.