Қандай қилиб васвасага берилмаслигим мумкин?

Ҳаворий Павлус шундай деб ёзган: «Тўғри бўлган нарсани қилмоқчи бўлсам, ёнимда ёмонлик туради». (Римликларга 7:21) Сизда ҳам бундай бўлганми? Агар шундай бўлса, ушбу мақола сизга нотўғри йўл тутиш васвасасига берилмаслигингизга кўмаклашади.

• Нимани билишингиз керак?

• Нима қила оласиз?

• Тенгдошларингизнинг фикри

Одатда бошқаларнинг босими остида нотўғри йўл тутиш васвасаси пайдо бўлади. Муқаддас Китобда шундай дейилган: «Ёмон одамлар билан мулоқот қилиш яхши хулқни бузади». (1 Коринфликларга 15:33) Биз мулоқот қилаётган кишилар, томоша қилаётган, тинглаётган ва ўқиётган нарсаларимиз бизни шакллантиради. Буларнинг бари қалбимизда ёмон истаклар пайдо бўлишига ва нотўғри йўл тутишимизга етаклаши мумкин. Натижада «кўпчиликка эргашиб, ёмон ишга» қўл уриб қўйишингиз ҳеч гап эмас. (Чиқиш 23:2)

Ўйлаб кўринг: нега бошқаларнинг фикри борасида ҳаддан ташқари ташвишланадиган киши васвасага қарши туриши қийинроқ кечади? (Ҳикматлар 29:25)

«Бошқаларга ёқаман деб, улар каби йўл тутиш босимига берилиб кетишингиз мумкин». (Жереми)

Хулоса. Тенгдошларингизнинг босими ахлоқий меъёрлардан воз кечишингизга сабаб бўлишига йўл қўйманг.

Ишонадиган нарсаларингизда иккиланманг. Эътиқодингизда иккилансангиз, бошқаларнинг қўлида қўғирчоққа айланиб қоласиз. Ундан кўра, Муқаддас Китобдаги: «Ҳар нарсани текшириб кўриб, яхшисига ёпишиб олинглар»,— деган маслаҳатга амал қилиш доноликдир. (1 Салоникаликларга 5:21) Эътиқодингизга қанча кўп амин бўлсангиз, қатъий бўлишингиз ҳамда васвасага берилмаслигингиз шунча осонроқ кечади.

Ўйлаб кўринг: нега Худонинг ахлоқий меъёрлари менга фойда келтиришига ишонаман?

«Шуни сездимки, эътиқодимдан қайтмай, васвасага қарши тура олганимда, бошқаларнинг менга нисбатан ҳурмати ошади». (Кимберли)

Муқаддас Китобдаги мисол. Дониёр. У Худонинг қонунларига бўйсунишни «қалбида қарор қилганда» ҳали ўсмир бўлгандир. (Дониёр 1:8)

Камчиликларингизни билинг. Муқаддас Китобда «ёшлик эҳтирослари», яъни айниқса ёшликда жунбишга келадиган хоҳиш-истаклар ҳақида ёзилган. (2 Тимўтийга 2:22) Бу ерда нафақат жинсий мойиллик, балки бошқалар томонидан танилиш ва тайёр бўлмай туриб ота-онадан мустақил равишда яшаш ҳамда қарор чиқариш хоҳиши ҳақида ҳам гап кетяпти.

Ўйлаб кўринг: Муқаддас Китобда: «Ҳар ким ўз эҳтиросига берилиб, алданиб синовга дучор бўлади»,— дейилган. (Ёқуб 1:14) Хўш, қандай хоҳиш сиз учун васваса бўлиши мумкин?

«Айнан қайси васвасага қарши туриш сиз учун қийин эканини холисона тан олинг. Аниқлагач эса, улар борасида изланиш олиб боринг ва қўлламоқчи бўлган маслаҳатларни ёзиб қўйинг. Шунда, яна ўша васвасага дуч келганингизда, унга қай йўсин қарши тура олишингизни биласиз». (Сильвия)

Муқаддас Китобдаги мисол. Довуд. Гоҳида у бошқаларнинг босими остида ўз хоҳишларига берилган. Лекин хатоларидан тўғри хулоса чиқариб, иккинчи ундай қилмасликка ҳаракат қилган. Довуд Яҳовага: «Эй Худо, ичимда пок юрак ярат, менга янги ва барқарор руҳ ато эт»,— деб ёлворган. (Забур 51:10)

Вазиятни назорат қилинг. Худонинг Каломида: «Ёмонликка мағлуб бўлманг»,— дейилган. (Римликларга 12:21) Бошқача қилиб айтганда, васваса қурбонига айланманг. Тўғри йўл тутиш сизнинг ихтиёрингизда.

Ўйлаб кўринг: нотўғри йўл тутиш васвасасига дуч келганингизда, вазиятни назорат қилиб, қай йўсин тўғри йўл тута оласиз?

«Агар васвасага берилсам, оқибатда нима бўлиши ҳақида фикр юритаман. Ўзимни яхшироқ ҳис қиламанми? Балким. Лекин бу вақтинча, холос. Вақт ўтса-чи, нима бўлади? Ўзимни ёмон ҳис қиламан. Бу арзигуликми? Асло!» (София)

Муқаддас Китобдаги мисол. Павлус. Гарчи нотўғри истаклар пайдо бўлган бўлса-да, Павлус уларни назорат қилган. У: «Танамни савалаб, уни қулдай назорат қиляпман»,— деб айтган. (1 Коринфликларга 9:27)

Хулоса. Ҳаёт бамисоли йўлдир. Сиз ҳайдовчисиз, холос. Васвасаларни айланиб ўтиш-ўтмасликни ўзингиз ҳал қиласиз.

Унутмангки, васвасалар ўткинчидир. 20 ёшли Мелисса қуйидагича бўлишди: «Мен учун юқори синфларда васваса туғдирган кўп нарсалар ҳозирги пайтда умуман аҳамиятсиз. Ҳозир дуч келаётган васвасаларим ҳам ортда қолади. Аминманки, уларга қарши турсам, ортга назар солиб ҳеч нарсадан афсусланмайман».