Hu ṱoḓea zwo engedzeaho u fhira u sokou vhudza vhana vhaṋu zwithu zwo lugaho na zwi songo lugaho. Ni nga dovha na vha thusa uri vha humbule nga ha mbudziso dzi ngaho: ‘Ndi ngani Bivhili yo dzivhisa zwithu zwine zwa vhonala zwi tshi kunga? Ndi mini zwine zwa ita uri ndi vhe na vhungoho ha uri zwilinganyo zwa Bivhili zwi a mmbuyedza tshifhinga tshoṱhe?’ (Yes. 48:17, 18) Ṅwana ane a sumbedza u vha na dzangalelo ḽa u ṱoḓa u lovhedzwa, u fanela u thuswa uri a humbule nga ha nḓila ine a ḓipfa ngayo nga vhuḓifhinduleli vhune Mukriste a vha naho. Mbuyelo ndi dzifhio? Hu vha na thaidzo dzifhio? Ndi ngani mbuyelo dzi khulwane u fhira thaidzo? (Marko 10:29, 30) Zwenezwo ndi zwithu zwine muthu a nga sedzana nazwo musi o no lovhedzwa. Nga zwenezwo, ndi zwa ndeme u humbulisisa nga ha enea mafhungo ni sa athu u dzhia vhukando. Musi vhana vha tshi thuswa u ṱolisisa nga vhuronwane zwenezwo zwithu, zwi nga ita uri vha vhe na khwaṱhisedzo. Ndi khwaṱhisedzo ifhio? Ya uri u tevhela zwilinganyo zwa Bivhili ndi zwithu zwine zwa ḓo vha vhuyedza tshifhinga tshoṱhe. w17.12 21 ¶14-15

Vhunzhi ha vhoiwe, ni na mutakalo u si wavhuḓi. Vhaṅwe vhane miṅwaha yo no ḓi ya, vha khou ṱhogomela mashaka avho o no aluwaho. Vhaṅwe vha kundelwa u ṱunḓela miṱa yavho. Nahone ri a zwi ḓivha uri vhaṅwe vha khou sedzana na thaidzo nnzhi nga tshifhinga tshithihi! Arali Yehova e na dzangalelo kha zwithu zwi sa tshili zwe a zwi sika, edzani u humbula nḓila ine a ḓipfa ngayo nga ha inwi ane na mu shumela, hu si ngauri ni kombetshedzea u ita nga u ralo, fhedzi nga nṱhani ha uri ni a mu funa! (Ps. 19:1, 3, 14) Khotsi ashu wa ṱaḓulu u ni ḓivha a ni fhedza. U ḓivha na tshivhalo tsha “mavhudzi oṱhe a re ṱhohoni [yaṋu].” (Mat. 10:30) Nahone mupsalme u ri khwaṱhisedza uri: “Maḓuvha a vhavhuya a [ḓihwa] nga Yehova.” (Ps. 37:18) Vhukuma, u a ḓivha milingo ine na sedzana nayo nahone a nga ni thusa uri ni kone u konḓelela mulingo muṅwe na muṅwe. w18.01 7 ¶1; 8 ¶4

Musi Petro a tshi vusa Tabita zwo ita uri “vhanzhi vha [tende] Murena.” Vhenevho vhathu vho vha vha tshi nga kona u vhudza vhaṅwe mafhungo maḓifha nga ha Yesu na u vhudza vhathu vhoṱhe uri Yehova u na maanḓa a u vusa vho faho. (Mish. 9:36-42) Vhaṅwe vho tou zwi vhona nga maṱo musi hu tshi vha na iṅwe mvuwo. Ḽiṅwe ḓuvha muapostola Paulo o vha o kuvhangana na vhaṅwe ngei Tiroasi, hune zwino ha ḓivhiwa sa devhula-vhukovhela ha Turkey. Paulo o amba u swika vhukati ha vhusiku. Muṅwe muṱhannga we a vha a tshi pfi Oitixo o vha a tshi khou thetshelesa o dzula kha lumeme lwa fasiṱere. Fhedzi o mbo ḓi farwa nga khofhe nahone a wela fhasi a tshi bva kha nnḓu ya nṱha ya vhuraru. Khamusi Luka we a vha e dokotela ndi ene we a thoma u swika kha Oitixo nahone a mu ṱola: Oitixo o vha a songo huvhala nahone a songo dzidzivhala, fhedzi o vha o fa! Paulo o tsela fhasi, a swika a kuvhatedza tshitumbu tshawe nahone a ri: “U kha ḓi tshila.” Zwenezwo zwi nga vha zwo kwama vhukuma vhathu vhe vha zwi vhona! Vho “khuthadzwa zwihulu” nga u vhona hu tshi vuswa muṱhannga we a vha o lovha.​—Mish. 20:7-12. w17.12 5 ¶10-11