Ḽavhuṋa, 28 March
U ḓo vhuyelela buseni.—Gen. 3:19.
Zwi tou vha khagala uri a ri ṱoḓi u ita vhukhakhi ho itwaho nga Adamu na Eva. Ri nga vhu iledza nga u dzula ri tshi guda nga ha Yehova, nga u dzhiela nṱha zwine a vha zwone na nga u lingedza u pfesesa nḓila ine a humbula ngayo. Zwenezwo zwi ḓo ri thusa uri ri fune Yehova nga ho engedzeaho. Ṱhogomelani tsumbo ya Abrahamu. O vha a tshi funa Yehova nga maanḓa. Abrahamu o dzula a tshi thetshelesa Yehova na musi a sa pfesesi phetho dza Yehova. Zwe a zwi ita ndi u ḓivha Yehova khwine. Sa tsumbo, musi a tshi pfa nga ha phetho ya Yehova ya u fhelisa muḓi wa Sodoma na Gomora, mathomoni Abrahamu o humbula uri “Muhaṱuli wa ḽifhasi ḽoṱhe” u ḓo fhelisa vhavhuya na vhavhi. Fhedzi Abrahamu o vha a sa zwi pfesesi, nga zwenezwo, o ḓiṱukufhadza a vhudzisa Yehova mbudziso nnzhi. Yehova ho ngo mu fhelela mbilu, o mu fhindula. Mafheleloni, Abrahamu o kona u zwi ṱhogomela uri Yehova u ṱolisisa mbilu ya muthu muṅwe na muṅwe na uri a nga si fhelise vhavhuya.—Gen. 18:20-32. w22.08 28 ¶9-10
Ḽavhuṱanu, 29 March
Ane a fhulufhedzea u vhulunga tshiphiri.—Mir. 11:13.
Nga 455 B.C.E., musi Muvhusi Nehemia o no fhaṱulula mbondo dza Yerusalema, o ṱoḓa vhanna vhane a nga vha fhulufhela uri vha ṱhogomele wonoyo muḓi. Muṅwe wa vhathu vhe Nehemia a vha nanga ndi Henania we a vha e murangaphanḓa wa Dzhavhelo. Bivhili i amba uri Henania o vha e “munna a fhulufhedzeaho na a ofhaho Mudzimu wa ngoho u fhira vhaṅwe vhoṱhe.” (Neh. 7:2) Henania o shuma nga maanḓa kha mishumo ye a i ṋewa ngauri o vha a tshi funa Yehova nahone a sa ṱoḓi u ita zwithu zwe zwa vha zwi tshi nga ita uri a sa mu takalele. Ra edzisa tsumbo ya Henania zwi ḓo ri thusa uri ri vhe vhathu vhane Mudzimu a vha fhulufhela kha mishumo ine a ri ṋea yone. Ṱhogomelani tsumbo ya Tixiko, we a vha a tshi fhulufhelwa nga khonani yawe muapostola Paulo. Paulo o ḓitika nga Tixiko a amba uri Tixiko u muthu ane a “shumela Murena nga u fhulufhedzea.” (Vhaef. 6:21, 22) Paulo o fhulufhela uri Tixiko u ḓo isela Vhaefesa na Vhakolosa marifhi e a vha ṅwalela na uri u ḓo vha ṱuṱuwedza na u vha khuthadza. Tixiko u ri humbudza nga vhahashu vha tshinnani vhane vha fhulufhedzea na vhane ra nga vha fhulufhela, vhane vha ri thusa uri ri dzule ri na vhushaka ho khwaṱhaho na Yehova.—Vhakol. 4:7-9. w22.09 9-10 ¶5-6
Mugivhela, 30 March
Lufuno lu fukedza zwivhi zwinzhi.—1 Pet. 4:8.
Yosefa o sedzana na thaidzo lwa miṅwaha i ṱoḓaho u vha 13. Yosefa o vha a tshi nga dzula a ḓivhudzisa arali Yehova a tshi mu funa zwa vhukuma. Kana a ḓivhudzisa arali Yehova o mu laṱa nga tshifhinga tshine a khou ṱoḓesa thuso ngatsho. Fhedzi Yosefa ho ngo sinyuwa. Nṱhani hazwo o bvela phanḓa o dzivhuluwa na u dzika. Naho o ḓiwana e kha vhuimo he a vha a tshi nga kona u ḓilifhedzela, ho ngo ita nga u ralo, nṱhani hazwo o sumbedza uri u funa vhakomana vhawe nahone a vha hangwela. (Gen. 45:4, 5) Zwo thusaho Yosefa uri a kone u ita zwenezwo, ndi uri o vha a tshi humbula nga nḓila yo teaho. Nṱhani ha u livhisa ṱhogomelo kha thaidzo dzawe, o humbulesa nga ha uri ndi mini zwine zwa ḓo takadza Yehova. (Gen. 50:19-21) Ri guda mini? Arali na fariwa nga nḓila i si yavhuḓi, ni songo sinyutshela Yehova kana na pfa u nga o ni laṱa. Nṱhani hazwo, ni humbule nga ha nḓila ine a khou ni thusa ngayo uri ni konḓelele. Nahone musi vhaṅwe vha tshi ni fara nga nḓila i si yavhuḓi, tendelani lufuno lu tshi ni thusa uri ni si livhise ṱhogomelo kha vhushayanungo havho. w22.11 21 ¶4