1 Gioani

4 Me cari, no sté creder in qualche roba che i dise che la vien de Dio. Ma, sforseve par saver se questa roba la vien de Dio o nò, parché ghen’è tanti falsi profeti nel mondo. 2 L’è de questa maniera che valtri podé saver se quel che i altri i ve dise vien de Dio: tuto quel che valtri gavé scoltà vien de Dio se l’è de acordo che Gesù l’è vegnesto nela carne. 3 Ma se quel che i dise no l’è de acordo che Gesù l’è vegnesto nela carne, questo no’l vien de Dio. Anca, questo l’è quel che el anticristo el dise. Valtri gavé scoltà che el nadaria vegner e adesso l’è belche qua nel mondo. 5 Lori i ze vegnesti del mondo e l’è par quela che i parla robe del mondo e el mondo li scolta. 6 Noantri semo vegnesti de Dio. Quei che i cognosse a Dio i ne scolta, ma quei che no i vien de Dio no i ne scolta. L’è cossì che se vede la difarensa intrà quel che vien pròpio de Dio e quel che no vien mia de Dio. 7 Amadi, seitemo a amar un al altro, parché el amor el vien de Dio, e tuti quei che i ama i ze vegnesti de Dio e i cognosse a Dio. 8 Quel che no’l ama no’l cognosse a Dio, parché Dio l’è amor. 9 Podemo veder pròpio ben el amor de Dio par noantri, parché Dio el ga mandà el so ùnico Fiol al mondo, e cossita podemo guadagnar la vita par meso de lu. 10 El amor el vol dir che no semo noantri che ghemo amà a Dio, ma l’è stà lu che el ne ga amà e che el ga mandà so Fiol come sacrifìssio par i nostri pecati, un sacrifìssio par far pace con lu. 11 Cari, se Dio el ne ga amà cossita, anca noantri ghemo la obrigassion de gaver amor un par el altro. 18 No ghen’è paura nel amor, ma el amor perfeto el para via la paura, parché la paura la ne frena. In verità, quel che el ga paura no l’è stato fato perfeto nel amor. 19 Noantri amemo parché Dio el ne ga amà vanti. 20 Se qualchedun el dise: “Mi amo a Dio”, e se ancora cossita el òdia el so fradel, l’è busier. Parché, quel che no ama el so fradel, che el ga visto, no’l pol mia amar a Dio, che no lo ga mia visto. 21 E ghemo ricevesto de lu questo comandamento: quei che i ama a Dio i ga de amar anca el so fradel.