La léngua del gato

I gati i ghe piase de netarse. I guasta fin 24% del tempo che i ze desmissiadi drio far cossita. E i ze boni de netarse pròprio ben, parché la so léngua la ze de maraveiarse.

Pensaghe sora: La léngua del gato la ze querta con 290 pìcoli spini butadi par drio che i ze quasi tanto duri fà una óngia. Cada un de questi spini el ga un spasso soto la ponta che ciapa e tien la saliva quando el gato mete la léngua rento la boca. Quando el gato el se leca, i spini i va fundo rento i pei e i mola la saliva sora la pele.

La léngua del gato la pol molar sora la pele e sora el pel intorno de 48 ml de saliva par giorno. La saliva del gato la ga enzime che le spaca le sporchìssie. Anca quando la saliva la svaporisse, la dà 25% dela sfredada che el corpo del gato el ga de bisogno, e questo l’è tanto importante parché i gati i ga poche giàndole par sudar.

Se un dei spini el ciapa un gropo, el se smìssia par ndar pi fondo rento el pel, e cossita el ga la forsa par disfar el gropo. Questi spini anca i fà ben par la pele del gato quando lu el se leca. Studiosi i ga doperà quel che i ga imparà dela léngua del gato par far una scoa de cavei. Con questa scoa, se pol petenar i cavei con manco forsa, e la ze anca pi fàcile de netar che una scoa normal. Anca la disfà i gropi che ghen’è in meso i cavei. Studiosi i crede che la léngua del gato la pol giutarli a catar fora maniere pi fàcile de netar robe pelose. Anca de catar maniere meio de passar remedi e creme nele pele querte de pei.

Cossa che te cati? La léngua del gato la ze vegnesta dela evolussion? O qualchedun la ga fata?