La capacità dele sèlule cambiar par formar un bambin

Rento dela pansa dela to mama, la to vita la ga scominsià con una pìcola sèlula che la ze ciamada zigoto. El zigoto l’è una sèlula tanto pìcola che l’è fin fadiga vederla. Dopo, sucede la division de questa sèlula tante volte, e le sèlule che le vien fora le deventa de pi de 200 tipi de sèlule tanto difarente una del altra, e che le ga difarente funsion. Dopo de arquanti mesi, vien fora un bel bambin.

Pensaghe sora: El zigoto el fà una còpia del so DNA e el se spartisse in due sèlule. Cada una de queste sèlule nove anca la se spartisse in due, e tute che le vien dopo le seita a far la stessa roba. Nel scomìnsio, se pol dir che tute le sèlule che le vien fora le ze compagne, ma cada una la ga nel so DNA le informassion che ghe ocore par dopo deventar tipi difarenti de sèlule.

Dopo de una stimana de gestassion, queste sèlule le scomìnsia a cambiar e a spartirse in due grupi difarenti: arquante sèlule le ndarà formar el bambin, e altre sèlule le ndarà formar la plassenta e tuto quel che ghe ocore par el bambin cresser.

Dopo dela tersa stimana, le sèlule del grupo che ndarà formar el bambin le resta organisade in tre parte, una sora l’altra. Le sèlule dela parte de fora le ndarà cambiar par deventar el sarvel, i nervi, la boca, la pel e altre robe. Le sèlule dela parte in meso le deventarà el sangue, i ossi, i rognoni, i mùsculi e altre robe. E quele che le resta rento le deventarà i òrgani, come i palmoni, la bessiga, e tante parte del corpo che le fà la digestion.

Nela gestassion, ghen’è volte che le sèlule che le ze drio formar el bambin le càmbia de posto. Pol esser una a una o come grupo. Anca, ghen’è grupi de sèlule che le se taca par formar arquante struture, come una placa, cordoni, o struture vode par rento. Par far questo, ghe ocore tanta organisassion intrà le sèlule. Par esémpio, ghen’è una ora che le plache le se intòrcia par far pìcoli tubi che dopo i se slonga e i fà come che rami. Questo sucede in tanti posti del corpo del bambin par dopo formar el sistema sirculatòrio.

Quando un bambin el nasse con salute, vol dir che sentene de bilioni de sèlule le ze deventade el tipo giusto, nel posto giusto, e nela ora giusta.

Cossa che te cati? La capacità dele sèlule cambiar par formar un bambin la ze vegnesta dela evolussion? O qualchedun la ga fata?