Mamwene Oopacerya

19 Moottharelana, Akhabi aahimuleela Yezabeli itthu sootheene Eliya aapanke awe, ni moota aawiivale awe maprofeta ootheene ni espaata.* 2 Vano Yezabeli aahimuruma mutthu orowa omuleela Eliya wiira: “Amuluku ekitakhalihe, ni atepe okitakhaliha, vakhala wiira meelo ewoora ene yeela nkinrowa owiirihani etthu emosa-ru nwiirinhe anyu maprofeta awo!” 3 Eliya aahoova, nto aahivenya, otthyawa wiira oopole okumi awe. Owo aahiphiya oBeri-Xeba, muttetthe wa oYuda, omuhiya weiwo murumeyi awe. 4 Moottharelana, Eliya aahikela moothakoni, eetta mukwaha wa nihiku ntero. Nuumala ophwanya mwiri mwaamukhaani, aahikilaathi vathi va mwiri owo, onavekela okhwa. Owo aahihimya wiira: “Vaaphiyerya! Vano, khoo Yehova, mukuxeke okumi aka, okhala wiira miyo nkihiyo mutthu oolokexa waavikana amuhavinre aka”.

5 Nuumala-vo, aahimmaathi vathi wa mwiri owo mwaamukhaani. Mootutuxerya, nlaikha nimosa naahimukwata, nnamuhimeerya wiira: “Nvenye, mulyeeke”. 6 Okathi aattukhunle awe maitho awe, aahiweha wiira waamuru wawe yaahikhala ephaawu yoovilikeya yaapwehiwe vamalukuni ooviha, ni murinki wa maasi. Owo aahikhuura, owurya, onatthikela-tho wummaathi. 7 Muhoolo mwaya, nlaikha na Yehova naahitthika ekwaha ya nenli, nimukwata nnamuhimeerya wiira: “Nvenye, mulyeeke, okhala wiira mukwaha onrowa anyu khoreere orakama”. 8 Siiso, Eliya aahivenya, olya, ni owurya. Nto ikuru saaphannye awe mwaha wa yoolya ele, sahimwiiriha weetta mahiku 40 othana ni ohiyu, mpakha ophiya oHorebi, mwaako wa Muluku eekeekhai.

9 Ori ene weiwo, aahikela mukhukuni, oviriha ohiyu memmo. Vano, Yehova aahimukoha wiira: “Nyuwo Eliya, muniirani-va?” 10 Eliya aahaakhula wiira: “Kinnikhalela nthiti omurumeela Yehova, Muluku a anakhotto, okhala wiira aisarayeli aahiya nivarihano nanyu, ahaapwexakasa altaari anyu ni aawiiva maprofeta anyu ni espaata, nto miyo paahi kihanle. Vano, awo aniphavela okiiva”. 11 Masi Muluku aahihimya wiira: “Mukhume, mweemele va mwaako, ohoolo wa Yehova”. Okathi Yehova aavira awe, epheyo yuulupale ni yoowali yaanipwexakasa miyaako ni myala ohoolo wa Yehova, masi Yehova khaakhanle mweepheyoni-mmo. Nuumala epheyo, yaahikhumelela etetere, masi Yehova khaakhanle mutetereni-mmo. 12 Nuuvira etetere, waahikhumelela mooro, masi Yehova khaakhanle mmooroni-mmo. Nuumala mooro, naahiiwanyeya nsu vathi-vathi. 13 Eliya iiwaka-ru nsu nlo, aahiikhuneela owiitho ni mukhumi awe, aahikhuma, eemela vamukhora wa nikhuku nlo. Moottharelana, nsu nlo naahimukoha wiira: “Nyuwo Eliya muniirani-va?” 14 Eliya aahaakhula wiira: “Kinnikhalela nthiti omurumeela Yehova, Muluku a anakhotto, okhala wiira aisarayeli aahiya nivarihano nanyu, ahaapwexakasa altaari anyu ni aawiiva maprofeta ni espaata, nto miyo paahi kihanle. Vano, awo aniphavela okiiva”.

15 Vano, Yehova aahimuhimeerya wiira: “Mutthike, murowe woothakoni wa oDamaasiko. Okathi munrowa anyu ophiya, mwamuthanle Hazayeli, wiira okhale mwene a oSiiria. 16 Nave, mwamuthanle Yehu, musulwaawe Nimixi, wiira okhale mwene a atthu a Isarayeli. Mwamuthanle-tho Eliseyo,* mwaana a Xafati a wAbeli-Mehola, wiira okhale profeta nipuro nanyu. 17 Ole onrowa woopowa espaata ya Hazayeli, Yehu tonrowa omwiiva; nave ole onrowa woopowa espaata ya Yehu, Eliseyo tonrowa omwiiva. 18 Nlelo kookhalana alopwana 7.000 wIsarayeli, yaawo ahitonko omukokhorela Bayaali, ni ahitonko ovaha epeexo elatarato awe”.

19 Siiso, Eliya aahikhuma opuro ole, orowa okumana ni Eliseyo, mwaana a Xafati. Eliseyo iira olimaka mmatta ni ipooyi 24, seetta piili-piili. Owo aari ottuli wa ipooyi piili sookiserya. Nto, Eliya aahirowa okumana nuuwo onwariha nlaya nawe na profeta. 20 Nuumala-vo, Eliseyo aahihiya ipooyi, onamutthimakela Eliya, onamuhimeerya wiira: “Xontte, mukeemererye kaalaxerye* apaapa ni amaama, nuumala-vo kinaamoottharakani”. Eliya aahimuhimeerya wiira: “Muroweke, exeeni enrowa okiiriha wookhootthiheryani?” 21 Eliseyo aahitthika, okuxa ipooyi piili, ovaha mukuttho. Orumeelaka miri saatthukwaniwa ipooyi, aahaapeya enama, aavaha atthu, anakhuura. Nuumala-vo aahivenya, onamutthara Eliya, onapacerya onvarela muteko.