Matheyo
17 Nuuvira mahiku 6, Yesu aahimukuxa Pedru, Yakobo ni munnawe, aitthaniwa Yohani, khurowa ni yaawo paahi vamwaako woorekama. 2 Nto Yesu aahithatuwa ohoolo waya. Owiitho wawe waanaarya ntoko nsuwa, nave malaya awe a ota yaanaarya* ntoko muthuko. 3 Vano, aahikhumelela Moise ni Eliya, enavaanela ni Yesu. 4 Nto, Pedru aahimuleela Yesu wira: “Pwiya, vaareera hiyo okhala vaava. Mwaphavela, kinooteka vaava iheema tthaaru, emosa yawinyu, ekina ya Moise, nave-tho ekina ya Eliya”. 5 Nlelo Pedru olavulaka, niinaano-ru naahikhumelela neeku noowaarya, naakhuneela. Nuumala-vo, naahiiwanyeya nsu nikhumaka muneekuni-mmo, naahimya wira: “Ola Mwanaka, kinimphentexa aka, onikihakalaliha vanceene. Mmwiiweleleke yoowo”. 6 Vaiwale aya eyo, awiixutti ale yaahoova vanceene, yiipopheya vathi. 7 Vano, Yesu aahiwaattamela, aahaakwannya, aahimeerya wira: “Nvenye. Muhoove”. 8 Nuumala weemexa muru, yanwehale Yesu paahi. 9 Okathi yaakhuruwa aya vamwaako, Yesu aahaalopola awiixutti ale, iiraka: “Muhimuleele mutthu itthu iya soonale anyu, Mwaana a mutthu ohinatthi ohihimuxiwa mookhwaani”.
10 Masi, awiixutti yaahimukoha so: “Nto xeeni, alipa-oowiixuttiha Nlamulo anihimya aya wira Eliya ohaana opacerya orwa ohinatthi Kristu?” 11 Yesu aahiwaakhula oriki: “Tthiri, Eliya onimoorwa wira olokiherye itthu sotheene. 12 Nto, kinooleelani wira Eliya ohoorwa, masi ahimusuwela. Awo aamwiiriha sotheene saaphavela aya. Siiso-tho, Mwaana a mutthu onrowa ohaaxiwa ni yaawo”. 13 Vano, awiixutti yaahisuwela wira Yesu aamuhimya Yohani Mpatisa.
14 Vaaphiyale aya vaathukumanne muttitthi wa atthu, mulopwana mmosa aahimwaattamela Yesu, aahikhoroma ohoolo wawe, amuhimeerya wira: 15 “Pwiya, mummorele ikharari mwanaka mwaamulopwana, maana oniwereiwa ecili,* ni khoreere owereiwa. Onnimorela vaikho ni mmaasini ikwaha sinceene. 16 Kihaaruuhela awiixutti anyu, masi awo khawenrye ompenuxa”. 17 Yesu aahaakhula oriki: “Nyuwo atthu oohaamini ni ootakhala! Kinrowa okhala ni nyuwo mpakha silini? Kinrowa woovilelani mpakha silini? Mukiruuhele-va”. 18 Vano Yesu aahipwapwela nlaikha nle nootakhala. Nto mmiravo ole aahipenuxiwa, okhuma ewoora yeele. 19 Awiixutti yaahimwaattamela Yesu, wiiphiini, anamukoha wira: “Xeeni nihiwenrye ahu woomola nlaikha nle nootakhala?” 20 Yesu aahiwaakhula wira: “Mwaha wa waamini wanyu vakhaani. Kinooleelani ekeekhai wira, mwakhalana waamini onlikana ni enuku yaamukhaanixa,* munooruma mwaako ola wira: ‘Mukhume-va, murowe vale’. Nto mwaako owo, onookhuma, nave khiivo munrowa anyu wooceela”. 21 *——
22 Okathi Yesu aathukumanne awe oGalileya vamosa ni awiixutti awe, aahaahimeerya wira: “Mwaana a mutthu onrowa ovarihiwa ni ovahereriwa mmatatani mwa atthu. 23 Awo anrowa omwiiva, masi onrowa ohihimuxiwa nihiku na neeraru”. Awiixutti yaahiriipiwa murima vanceene.
24 Nuumala Yesu ni awiixutti awe ophiya oKafarnawu, alipa-ooliviha mpoosito wa etemplo,* yaahimwaattamela Pedru, anamukoha wira: “Niireke mwiixuttihi anyu onniliva mpoosito wa etemplo?”* 25 Pedru aakhunle wira: “Aayo, onniliva”. Masi nuumala okela mpaani, Yesu aahipacerya omukoha Pedru wira: “Simoni, munoonela sai? Mamwene a mulaponi-mu anaakhela mipoosito soovirikana sawani? Niireke anaakhela sa anaaya aahiiso sa amalapo?” 26 Okathi aakhunle awe oriki: “Sa amalapo”, Yesu aahimuhimeerya Pedru wira: “Vaari siiso, weeso anaaya khaniliva. 27 Vano, wira nihikumiherye onyakulihana, murowe ophareya mwamurihele coolo mmaasini. Ehopa enrowa anyu opacerya owatthula, muhule eyano aya, munoophwanya musurukhu mmosa wa eparatha.* Nto mukuxe musurukhu owo mwalive mpoosito wawaka ni wawinyu”.