aHeeperi
10 Nlamulo ti eruku paahi ya itthu sooreera sinirwa, masi khahiyo etthu ene. Nto, Nlamulo* ni mikuttho saamakela ovahiwa khula mwaakha, khasinwerya owiiriha ale animukokhorela Muluku okhala oomalela. 2 Akhala wira mikuttho sanwerya waakhaliha oomalela, nto khiyaarowa-tho ovekeliwa ovaha mikuttho. Niireke awo khiyaarowa wiivahaka nthowa mwaha woosuwela wira ti anatampi? 3 Ohiya-vo, mikuttho iyo sinniwuupuxerya khula mwaakha wira aakhalana etampi, 4 maana khivaniweryaneya ephome ya inyompe saamukhaani ni ya ipuri omaliha itampi.
5 Tivo, okathi Kristu aarwiiye awe mulaponi, aahimmye wira: “‘Nyuwo khamphavenle mikuttho ni itthu soovahiwa, masi mookilokiherya erutthu. 6 Nyuwo khamweemerenrye soovaha soopahiwa, ni soovaha sa oleveleliwa itampi’. 7 Nuumala-vo, kaahihimya wira: ‘Mooneke! Miyo kihoorwa. Murooluni* moolempwa kihimmwaka miyo. Khoo Muluku, miyo kihoorwa opaka ele muniphavela anyu’”. 8 Owo onipacerya ohimyaka wira: “Nyuwo khamphavenle, nnakhala khamweemerenrye mikuttho, ni itthu soovahiwa, ni soovaha soopahiwa, ni soovaha sa oleveleliwa itampi”. Mikuttho iyo, sinivahiwa ntthariwaka Nlamulo. 9 Nto onnihimya-tho wira: “Mooneke! Miyo kihoorwa opaka ele muniphavela anyu”. Nave onnimaliha etthu yoopacerya wira okhalihe etthu ya nenli. 10 Mwaha wa “ele muniphavela anyu”, hiyo nooreerihiwa nivahiwaka erutthu ya Yesu Kristu, ekwaha emosa paahi.
11 Nave-tho, mahiku otheene khula namukuttho onnivenya wira ovareke muteko wa Muluku ni ovaheke mikuttho simosa-ru ikwaha sinceene, mikuttho seiyo sihiniwerya omaliha itampi voomalela. 12 Masi Kristu, oovaha mukuttho onittipiha itampi mahiku otheene, nave ookilaathi moono woolopwana wa Muluku. 13 Okhuma okathi owo, aanilipelela mpakha okathi Muluku aarowa awe waapweha awanani awe vathi va inawu sawe. 14 Mwaha wa mukuttho mmosa, owo ohaakhaliha oomalela mahiku otheene, otheene ale anireerihiwa. 15 Nave-tho, munepa woowaarya onninikhalela onamoona, ohimyaka wira: 16 “Yehova onihimya wira: ‘Nla ti nivarihano kinrowa aka opaka naawo, yavira mahiku awo. Kinoohela malamulo aka vamurimani vaya, ni kinoolepa mmuupuweloni mwaya’”. 17 Onnihimya-tho wira: “Nkinrowa-tho wuupuwela itampi saya, nave nkinrowa wuupuwela miteko saya sootakhala”. 18 Vano, okathi Muluku onilevelela awe itampi iya sotheene, khivanivekeliwa ovaha etthu wira sileveleliwe itampi.
19 Tivonto, axinnaka, mwaha wa ephome ya Yesu, ninniroromela ovira ephiro eniroiha nipuro noowaarya. 20 Yesu owo, oonihulela* ephiro esya ni enivaha okumi, oviraka mukortiinani, eyo piiyo, erutthu awe. 21 Nave, okhala wira nookhalana namukuttho muulupale, yoowo onaakhapelela atthu a Muluku, 22 nrowe nimwaattamele ni murima weekeekhai, ni waamini woomalela, mirima sahu sirapihiwe ene mwaha wookhalana murima* wootakhala, nave irutthu sahu sirapihiwe ene ni maasi ooreera. 23 Nilipiheryeke olaleya nlipelelo nahu nihitthikelaka ottuli, okhala wira ole onileihenrye toororomeleya. 24 Nto, nuupuwelaneke* mukina ni mukhwaawe, wira nitumereryaneke* wooniherya ophenta ni miteko sooreera, 25 nihihiyaka othukumana, ntoko akina alimalenle aya. Masi, nlipihaneke mukina ni mukhwaawe, vanceenexa vaavo nnoona ahu wira nihiku na Muluku ninnaattamela.
26 Akhala wira ninnipaka etampi voolakelela, nuumala osuwela saana ekeekhai, khuuvo-tho mukuttho oniwerya ottipiha etampi eyo. 27 Masi nlipeleleke ohukhummwa noovaka, nave nlipeleleke onanariwa onipaha ntoko mooro, weiwo onrowa waapwetexa ale aninvirikanya Muluku. 28 Khula mutthu ohiniiwelela Nlamulo na Moise, ohaana wiiviwa ohimoreliwaka ikharari, yakhumelela anamoona anli aahiiso araru. 29 Munoonela sai? Ehukhumu xeeni eniphwanela awe mutthu yoole onimunyakela Mwaana a Muluku, ni ohinivaha efaita ephome ya nivarihano yeeyo emureerinhe, nave oniveeha ni oninyohola munepa wa Muluku, yoowo onirumeela awe wira onooniherye oreera wawe murima wuulupale? 30 Tthiri, hiyo ninnimusuwela Muluku, yoowo onihimya wira: “Ti miyo kininla ikuhu; miyo kinimwaattikiherya”. Nave onihimya-tho wira: “Yehova onrowa waaphukela atthu awe”. 31 Mweekeekhai, ti vootepa woopiha omorela mmatatani mwa Muluku mukumi.
32 Tivo, muupuweleke mahiku a khalai, nuumala omwaleeliwa ni muthuko wa Muluku. Okathi owo, mwaahivilela mixankiho suulupale, hata mwaahaawa. 33 Ikwaha sikina nyuwo mwaaniveehiwa* ni ohaaxiwa vamaithoni va atthu otheene, ni ikwaha sikina mwaanihaawa vamosa ni ale yaahaaxiwa. 34 Nyuwo moowoonela othunku axinna yaari mukhatteya, nave muheemererya okuxiwa mireerelo sanyu mutteeliwe ene murima, musuwelaka wira etthu murina anyu ti yooreerexa ni khenimala.
35 Tivonto, muhihiye olipa wanyu murima,* okhala wira mwaha wa yeeyo, nyuwo munootthuveliwa vanceene. 36 Nto muhaana ovilela, wira nuumala opaka etthu Muluku oniphavela awe, mwaakhele etthu oleihenrye awe. 37 Siiso, “okathi vakhaanixa”, nto “ole onirwa onoophiya tthiri, ni khonrowa opisa”. 38 “Masi murumeyi aka naxariya, onookhala mukumi mwaha wa waamini”, nave “owo atthikela ottuli, khivanrowa okisivela”. 39 Hiyo khanihiyo atthu anitthikela ottuli wira apwetexiwe, masi na atthu nnaamini wira nikhaleke akumi.