Matheyo

26 Nuumala Yesu ohimya itthu iya sotheene, aahaaleela awiixutti awe wira: 2 “Nyuwo munnisuwela wira anihala mahiku manli wira iiraneye Paasikha, nto Mwaana a mutthu onrowa ovahereriwa wira iiviwe vamwirini”.

3 Vano, makhulupale a anamukuttho ni makhulupale a ayuda, yaahithukumana vate va namukuttho muulupale, yoowo aihaniwa Kaifa. 4 Nto awo yaahiiwanana omootherya Yesu, wira anvare nuulavilavi, ni amwiive. 5 Masi, yaanihimeeryana wira: “Ohikhale okathi wa efesta, wira ohikhumelele onyakulasa eriyari ya atthu”.

6 Okathi Yesu aari awe oBethania, vatthokoni va Simoni, yoowo khalai aarina makokho,* 7 aahiphiya muthiyana mmosa, aakunxe ekarafa* ya makhura oowunkhela ni a musurukhu munceene. Nto aahipacerya omuhela Yesu mmuruni okathi aalya awe.* 8 Awiixutti awehaka-ru etthu ele, khiyaasiveliwe. Vano yaanihimya wira: “Xeeni ahalaka oyiihiwa makhura ala mahala ene? 9 Tthiri makhura ala yaamutumihiwa musurukhu munceene, akaweliwe alipa-oohaawa”. 10 Yesu, osuwelaka etthu yaalavula aya, aahiwiirela: “Xeeni munimulavula anyu siiso muthiyana ola? Ola ookiirela etthu yooreera. 11 Okathi wotheene munookhalaka ni alipa-oohaawa, masi khamunrowa okhalaka ni miyo imaara sotheene. 12 Muthiyana ola ookihela makhura, ophavelaka olokiherya erutthu aka, okathi kinrowa aka ovithiwa. 13 Kinooleelani ekeekhai wira, khula opuro onrowa aya olaleiwaka ihapari sooreera olumwenku wotheene, atthu anoolavulaka ele opanke awe muthiyana ola, wira uupuweleliweke”.

14 Vano, mmosa a arummwa 12, yoowo aihaniwa Yuda Isikaryoti, aahirowa okumana ni makhulupale a anamukuttho, 15 onahimya wira: “Munrowa okivaha exeeni koovahereryani Yesu?” Awo yaahiiwanana onvaha musurukhu 30 wa eparatha. 16 Okhuma nihiku nle, Yuda aaniphavelasa okathi wooreerela wira onvarihe Yesu.

17 Nihiku noopacerya na Efesta ya Iphaawu Soohiheliwa Eferemento, awiixutti yaahimukoha Yesu, ariki: “Muniphavela wira noolokiheryeni woowi yoolya ya Paasikha?” 18 Nto Yesu aahiira: “Murowe opooma, munomphwanya mutthu mmosa, mwamuhimeerye wira, ‘Mwiixuttihi onihimya wira: “Okathi aka ohanle ophiya. Kinrowa omulya Paasikha vatthokoni vanyu ni awiixutti aka”’”. 19 Siiso, awiixutti yaahipaka ele Yesu aarumme awe. Awo yaahimulokiherya Paasikha.

20 Vailaka-ru, Yesu aahikilaathi ohamenle ene meesa ni awiixutti awe 12. 21 Nto alyaaka siisaale, Yesu aahaahimeerya wira: “Kinooleelani ekeekhai wira, mmosa a nyuwo onookivariha”. 22 Awo yaahiriipiwa murima vanceene, anapacerya mmosa-mmosa omukoha Yesu, iiraka: “Pwiya, kiireke toko ti miyo?” 23 Yesu aahiwaakhula wira: “Ole onreryana aka vamosa mutixelani,* ti yoowo onrowa okivariha. 24 Veekeekhai, Mwaana a mutthu onoorowa, ntoko silempwale aya. Masi ootakhaliwa mutthu ole onrowa onvariha Mwaana a mutthu! Fataari mutthu owo ahaayariwe”. 25 Yuda, yoowo aahala vakhaani onvariha Yesu, aahaakhula oriki: “Rabi,* kiireke toko ti miyo?” Yesu aamwaakhunle wira: “Ti nyuwo munihimya”.

26 Nto elyaaka siisaale, Yesu aahikuxa ephaawu. Nuumala ovekela, aahikawanya, onaavaha awiixutti awe, iiraka: “Mukuxe, mukhuureke. Ela enithoonyerya erutthu aka”. 27 Siiso, aahikuxa ekaalisi ya eviinyu, aahivekela. Nuumala-vo, aahaavaha awiixutti awe, iiraka: “Nwuryaseke otheene anyu, 28 maana ela enithoonyerya ‘ephome aka ya nivarihano’, yeeyo enrowa omwarexiwa wira sileveleliwe itampi sa atthu anceene. 29 Masi kinooleelani wira: Nkiniwurya-tho eviinyu ela, mpakha nihiku nenlo kinrowa aka owurya ni nyuwo eviinyu esya Moomweneni mwa Tiithi aka”. 30 Nuumala wiipa isipo,* awo yaahirowa omwaako Olivera.

31 Vano Yesu aahaaleela awiixutti awe, wira: “Ohiyu ola otheene anyu munookikhootta, maana voolempwa wira: ‘Kinoomwiiva makampusi, nto ipwittipwitthi sawe sinoomwareya’. 32 Masi kahihimuxiwa, kinoohoola kirowaka oGalileya”. 33 Pedru, aahaakhula wira: “Hata otheene yoohiyakani, miyo nkinoohiyani!” 34 Yesu aahimuhimeerya wira: “Kinooleelani ekeekhai wira, ohiyu yoola, muthupi ohinatthi wiipa, nyuwo munookikhootta ikwaha tthaaru”. 35 Pedru aahimuhimeerya wira: “Tthiri miyo nkinookhoottani, hata kikhwaaka ni nyuwo”. Nave awiixutti akina otheene, yaahihimya etthu emosa-ru.

36 Nto Yesu aahirowa ni awiixutti awe nipuro naihaniwa Xeseemani, aahimeerya wira: “Mukilaathi-va, miyo kinrowa vale ovekela”. 37 Vano aahimukuxa Pedru ni anamwane anli a Zebedeyo. Okathi owo Yesu aahipacerya oriipiwa murima vanceene. 38 Nto aahaahimeerya wira: “Kooriipiwa murima vanceene, kinahala okhwa. Muhale vaava, muthipeleleke owehaweha ni miyo”. 39 Orowaka ohoolo vakhaani, Yesu aahikokhora, uuramela vathi, onavekela iiraka: “Tiithi, vaaweryaneyaka, muhiye ekaalisi* ela eviraka. Vano, ehiireye ntoko kiniphavela aka, masi yiireye ntoko muniphavela anyu”.

40 Aahitthikela vaari awiixutti awe, aaphwanya arupaka, nto aahimuhimeerya Pedru wira: “Khanwenrye owehaweha ni miyo ewoora emosa paahi? 41 Muthipeleleke owehaweha, nvekeleke voohihiyererya, wira muhimore mweehereriwaka. Murima onniphavela tthiri, masi erutthu teri yootteettheya”. 42 Nave, Yesu aahirowa ovekela ekwaha ya nenli, iiraka: “Tiithi, vaahiweryaneyeke ohiya ekaalisi* ela eviraka, weeso yiireye eniphavela anyu”. 43 Aahitthika-tho, aaphwanya awiixutti arupaka, okhala wira ikhove saahaaveliha. 44 Yesu aahaahiya, khurowa-tho ovekela ekwaha ya neeraru, ohimyaka etthu emosa-ru. 45 Nuumala-vo, aahitthikela vaari awiixutti, onaahimeerya wira: “Okathi ntoko ola, nyuwosa munoorupa ni ophumurya? Moone wira, ewoora yoophiya wira Mwaana a mutthu ovahereriwe mmatatani mwa anatampi. 46 Nvenye, nrowe. Ole onikivariha oophiya!” 47 Yesu olavulaka nlelo, aahiphiya Yuda, mmosa a arummwa 12. Owo aahirwa ni muttitthi muulupale wa atthu, waakunxe axoowa* ni ikopo. Atthu awo yaarummwale ni makhulupale a anamukuttho ni makhulupale a ayuda.

48 Vano, ole aarowa onvariha Yesu aahaavaha esinaale,* oriki: “Ole onrowa aka onvaha epeexo, ti yoowo. Munvareke”. 49 Nto orowaka vaari Yesu, owo aahiira: “Ihaali Rabi!”* Vano, aahinvaha epeexo. 50 Masi Yesu aahimuhimeerya wira: “Murwenleni-va?” Nto muttitthi ole waahinvara Yesu, khimukuxa. 51 Vano, mmosa a atthu ale yaari ni Yesu, aahimukumiha xoowa* awe, khumwiikittha niyaru murumeyi a namukuttho muulupale. 52 Yesu aahimwiirela so: “Mmwiixaathi xoowa* anyu nipuro aari awe, maana ale animurumeela xoowa,* animwiiviwa ni xoowa.* 53 Nyuwo munoona wira nkiniwerya onvekela Tiithi aka wira okiruuhele niinaano-va, malaikha ikonto sinceene?* 54 Vano kiira siiso, vanrowa omaliheriwa sai Soolempwa sinihimya wira itthu iya sihaana wiiraneya siisa?” 55 Okathi ene yoole, Yesu aahaaleela atthu ale oriki: “Nyuwo murwenle okivara ni axoowa* ni ikopo ntoko latarau? Khula nihiku, kaanikilaathi mutemplo kiixuttihaka, masi nyuwo khimwaakivanre. 56 Vano, itthu iya sotheene sihiiraneya wira simaliheriwe itthu silempwale ni maprofeta”. Nto awiixutti otheene yaahimuhiya, etthyawa.

57 Atthu yanvanre Yesu, yaahimuroiha wa Kaifa, namukuttho muulupale, weiwo waathukumanne aya alipa-oowiixuttiha Nlamulo ni makhulupale a ayuda. 58 Masi Pedru aanimutthara Yesu omurakamenle ene, mpakha ophiya vate va namukuttho muulupale. Nuumala ophiya, aahikilaathi ni anamuteko a vatthokoni, wira owehe etthu yaarowa wiiraneya.

59 Vano, makhulupale a anamukuttho ni eSineedrio* yotheene, yaaniphavela etthu yoomootherya Yesu, wira amwiivihe. 60 Masi awo khiyamphwanyanne etthu, nnaamwi yaakhumelenle anamoona anceene oowootha. Ohoolo waya, yaahikhumelela anli, 61 anahimya wira: “Mulopwana ola oohimya wira, ‘Miyo kinniwerya opwexa etemplo ya Muluku, ni oteka-tho, muhina mwa mahiku mararu’”. 62 Nuumala wiiwa eyo, namukuttho muulupale aaheemela, onamukoha Yesu oriki: “Nyuwo khamunaakhula etthu? Niireke khamuniiwa ele enihimya aya atthu ala?” 63 Masi Yesu aaroomaala. Nto namukuttho muulupale, aahimuhimeerya wira: “Mwaahiphaveleke onwoka Muluku mukumi, munileele ekeekhai. Niireke nyuwo mwa Kristu, Mwaana a Muluku?” 64 Yesu aahimwaakhula wira: “Ti nyuwo munihimya. Masi kinooleelani wira: Okhuma vano orowa ohoolo, munonweha Mwaana a mutthu okilanthi ene wiirimu moono woolopwana wa Muluku Oowerya, ni munonweha orwaaka mmeekuni”. 65 Vano, namukuttho muulupale aahikhera malaya awe a ota, onahimya wira: “Ola onveeha Muluku! Khinnaaphavela-tho anamoona! Nyuwo moomwiiwa onveehaka Muluku. 66 Munoonela sai?” Awo yaahaakhula ariki: “Ola oniphwanela wiiviwa”. 67 Nto, yaahimusenela owiitho ni yaahimmana. Akina yaahimmana owiitho, 68 anahimya wira: “Nyuwo Kristu, mwaari profeta, munileele ti pani oomanneni?”

69 Vano Pedru iira okilanthi ene vate, mukintaali. Nto murumeyi mmosa mwaamuthiyana aahimwaattamela, khumwiirela wira: “Nyuwo-tho mwaari ni Yesu, mugalileya!” 70 Masi Pedru aahikhootta ohoolo wa atthu otheene, iiraka: “Nkinisuwela enihimya anyu”. 71 Okathi Pedru aakhumme awe orowaka vamukhora, muthiyana mukina ahinweha, onaaleela atthu yaari vaavale oriki: “Mulopwana ola aari ni Yesu, munazarethi”. 72 Pedru aahikhootta-tho, olaphaka wira: “Miyo nkinimusuwela mulopwana ole!” 73 Nuuvira okathi vakhaani, atthu yaari vaavale yaahimwiirela Pedru, wira: “Mweekeekhai nyuwo-tho mwa mmosa a yaawo, hata elavulelo anyu, ennoosuwanyeihani”. 74 Nto Pedru aahipacerya olapha, ohimyaka wira: “Miyo nkinimusuwela mulopwana ole!” Niinaano-ru, muthupi waahiipa. 75 Pedru aahuupuwela moolumo Yesu aahimmye awe, oriki: “Muthupi ohinatthi wiipa, nyuwo munookikhootta ikwaha tthaaru”. Nuumala-vo, Pedru aahikhumela ota, onanla oriipiwe ene murima vanceene.