aEefeso

1 Miyo Paulo, murummwa a Kristu Yesu, ntoko Muluku oniphavela awe, kinnaalepela ale oororomeleya* anikhala wEefeso, ni animutthara Kristu Yesu moororomeleya:

2 Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.

3 Ottottopeliwe Muluku, Tiithi awe Pwiya ahu Yesu Kristu. Okhala wira na awiixutti a Kristu, owo oonivaha mareeliho otheene anikhuma wiirimu orumeelaka munepa awe. 4 Muluku oonithanla okhala oowiiraana ni Kristu, olumwenku ohinatthi opattuxiwa,* wira nikhale oowaarya ni oohittheka ohoolo wawe, mwaha wa omphenta Muluku. 5 Owo aahilakela onithanla wira onikhalihe anaawe mwa Yesu Kristu, moovarihana ni etthu yaamusivela ni aaphavela awe, 6 wira atthu amuttottopele Muluku mwaha wa omurumeela Mwanawe onimphentexa awe, ophavelaka onooniherya oreera wawe murima wuulupale. 7 Omurumeelaka mwanawe, noovahiwa yoowoopola,* wira noopoliwe itampi sahu. Aayo, itampi sahu sooleveleliwa mwaha wa ephome awe. Tthiri, oreera murima wa Muluku ti wuulupale!

8 Owo oonooniherya vaalupale oreera murima ni oonivaha miruku sotheene ni miyuupuwelo sotheene sooreera, 9 onisuwelihaka esiiri ya Muluku ya ele oniphavela awe. Eyo ennivarihana ni ele enimusivela ni elakenle awe. 10 Yoolakela awe ti okumiherya enamuna ya weettiha itthu, yeeyo enrowa wiiraneya wookiseryani wa okathi othanlale awe. Owo onoothukumanya itthu sotheene mwa Kristu: itthu siri wiirimu ni itthu siri valaponi. Aayo, mwa yoowo. 11 Hiyo nihiiraana nuuwo, nave Muluku oonithanlela waakhela etthu onileihenrye awe. Owo oolakela onithanla moovarihana ni ele oniphavela awe, maana onnipaka itthu sotheene ntoko oniphavela awe. 12 Hiyo ti nipacenrye omuroromela Kristu, nto Muluku oolakela onithanla wira ninvuwihe ni omuttottopela yoowo. 13 Masi nyuwo-tho mwaanimulipelela yoowo, nuumala wiiwa moolumo eekeekhai, eyo piiyo, ihapari sooreera sa woopoliwa wanyu. Nuumala omukupali, Muluku ohoohelani ekanyeryo orumeelaka munepa woowaarya aaleihenrye awe. Owo oopaka eyo omurumeelaka Kristu. 14 Munepa woowaarya, ori ntoko yooleiherya enooniherya wira nnimwaakhela ele Muluku onleihenrye awe. Muluku oopaka eyo ovahaka yoowoopola,* wira owoopole atthu awe, wira owo ovuwihiwe vanceene.

15 Tivonto, okhuma okathi yoole kiiwale aka omwaamini wanyu Pwiya Yesu ni waaphenta wanyu ale oororomeleya,* 16 nkinahiye omuxukhuru Muluku mwaha wa nyuwo. Nkinahiye wooromolani kaavekelaka, 17 wira Tiithi oovuwa, Muluku a Pwiya ahu Yesu Kristu, oovaheeni owerya woosuwela ni wiiwexexa itthu onooniherya awe. 18 Muluku oohula mirima sanyu, wira moone ni musuwele nlipelelo onivaha awe, vamosa ni itthu sootepa oreera aaleihenrye awe ale oororomeleya.* 19 Nave musuwele owerya wuulupale onoonihenrye awe hiyo oowaamini. Owo ohooniherya owerya iwo wuulupale, orumeelaka ikuru sawe. 20 Nave oorumeela ikuru iyo wira omuhihimuxe Kristu mookhwaani, ni oomukilaathiha moono woolopwana wiirimu. 21 Owo onvuwiha vanceene ovikana ikuvernu sotheene, okhulupale wotheene, owerya wotheene, olamulelo wotheene ni masina otheene, ohiya paahi olumwenku ola,* masi-tho ole onirwa. 22 Nave-tho, Muluku oopweha itthu sotheene vathi va inawu sa Kristu, ni oomukhaliha muhooleli* a itthu sotheene sinivarihana ni muloko, 23 yoowo ori erutthu awe, osareyale itthu sinimuhimya yoowo. Kristu owo onnimaleliha itthu sotheene.