Erana Bessiya Xoossaa Yihoowa

NE DEꞌUWAN issi gitabay paccidabadan siyettii? Neeni Xoossaa xeelliyaagan eriyoobay guuttaba gidikko, hegaadan siyettiyoogee attenna. Ayssi giikko, Geeshsha Maxaafan odettida Xoossaa loytti eriyoogee gita goꞌꞌaa demissiyoogaa miilooniyan qoodettiya asay akeekiis. He goꞌꞌaa haꞌꞌikka merinawukka demmaasa.

Geeshsha Maxaafaa xaafissida Xoossaa Yihooway nuuni A eranaadan koyees. Mazamuraawee, “Ne xalaalai GODAA [“Yihoowa,” NW] gidiyoogaa, ne Ubbaappe Xoqqiya Xoossai sa7aa ubbaa haariyoogaa eti erona” yaagidi xaafiis. Nuuni A eriyoogan goꞌettiyoogaa Xoossay akeekiyo gishshawu, “Taani GODAI, ne Xoossai, nena maaddiyaabaa tamaarissiyaagaa” yaagidi yootiis. Ubbaappe Xoqqiya Xoossaa Yihoowa eriyoogan nuuni waani goꞌettiyoo?—Mazamure 83:18; Isiyaasa 48:17.

Nuuni demmiyo gita goꞌꞌaappe amaridaagee, galla galla gakkiya metuwaa genccanawu maaddiya kaaletuwaa, sintta wodiyaa xeelliyaagan mino hidootaa, qassi guuggiyaa sarotettaa. Hegaa bolli qassi, Yihoowa loytti eriyoogee, ha wodiyan kumetta alamiyan deꞌiya asaa qofissiya gita allaalletuura gayittidaagan nuussi dumma xeelay deꞌanaadan oottees. He allaalleti aybee?

Ne Deꞌiyoy Ufayssiyaagee?

Asay teknolojiyan keehi xoqqasaa gakkikkonne, ‘Ta deꞌiyoogawu halchchoy aybee? Ta wurssettay ayba gidanee? Deꞌuwawu halchchidobi aybee?’ giyoogaa mala erana koshshiyo oyshaa haꞌꞌikka oychchees. Issi uri ha oyshatuyyo aliya zaaro demmana xayikko, tumu ufayssaa demmenna. Daro asay ba deꞌuwan hegaa mala pacay deꞌiyoogaa akeekii? Jarmmanen 1997 heeran xannaꞌido xinaatee qonccissiyoogaadan, pilggido asaappe baggaa gidiyaageetuyyo darotoo woy issi issitoo deꞌuwawu halchchidobi baynnabadan siyettiyoogaa bessees. Neeni deꞌiyo heerankka hanotay hegaa mala gidana danddayees.

Issi asi ba deꞌuwan ufayttennaba gidikko, halchchanawu metootana danddayees. Daroti he pacaa kunttanawu loꞌꞌo miishshaa demissiya oosuwaa oottanawu woy duretanawu maloosona. SHin yaatinkka deꞌoy hada milatiyoogee attenna. Bantta deꞌuwan ufayttennaagaappe denddidaagan, issoti issoti hayquwaa amottoosona. Internashinal Herald Tribun giyo xuufee yootido, “zaariyoosi baynna daro aqoy deꞌiyo keettan diccidanne koyidobaa oottana danddayiya” loꞌꞌiya yelagee hanotay hegaa bessees. A ishalo duussaa deꞌikkonne, boorasawusunne hada deꞌo deꞌiyaabadan qoppawusu. Yaatiyo gishshawu, xiskkissiya xaliyaa mittada hayqqaagaasu. Bantta deꞌuwan boorasiyaanne wurssettan azzanttiya hanotan hayqqida hara asata neeni erennan aggakka.

Gido shin, deꞌuwaara gayttida ubbabaa saynisee yootana danddayiyoogaa asay odishin siya eray? Saaminttan saaminttan giigiya, De Vok giyo Jarmmane gaazeexay hagaadan giis: “Saynisee yootiyoobay tuma gidikkokka, an ayyaanaabay paccees. Lodda laamee allaalle kessiyaaba milatenna, qassi kuwanttem fisikis giyo timirtteekka issitoo odobaa hara wode laammees; etappe minttettiyaabinne woppissiyaabi beettenna.” Saynissee pilggidobay deꞌuwaabaa, meretan kaalli kaalli haniyaabatanne deꞌoy baagaadan takkanaadan oottiyaabata xeelliyaagan darobaa eranawu maaddiis. SHin saynisee nuuni deꞌiyoogawu halchchoy aybakko, qassi wurssettan nuuni waananaakko yootana danddayenna. Nuuni muleera saynisiyan ammanettikko, deꞌuwaa halchchuwaa xeelliyaagan oychchiyo oyshaa zaaro demmokko. Yaatiyo gishshawu, Sudoyche Zeytung giyo gaazexay yootidoogaadan, nuussi “kaaletoy keehippe koshshees.”

Hegaa mala kaaletuwaa nuna Medhdhidaagaappe attin hara uri immenna. Asaa koyro ha saꞌan wottiday A gidiyo gishshawu, eti hagan deꞌiyo gaasuwaa I erees. Yihooway asaa medhdhidoy eti saꞌaa kumanaadaananne saꞌaa loytti oyqqanaadaana gidiyoogaa Geeshsha Maxaafay yootees. Asay haniyo ubbaban Xoossaa eeshshata, leemisuwawu, suure pirddaa, aadhdhida eratettaanne siiquwaa bessana mala merettiis. Yihooway nuna medhdhidoy aybissakko eriyo wode, nu deꞌuwaa halchchuwaa akeekoos.—Doomettaabaa 1:26-28.

Ay Oottana Danddayay?

Aadhdhida wodetun neeni, ‘Ta deꞌuwawu halchchoy aybee? Ta wurssettay ayba gidanee? Deꞌuwawu halchchidobi aybee?’ giya oyshatuyyo aliya zaaruwaa demmennan aggana danddayaasa. Geeshsha Maxaafay neeni Yihoowa loytta eranaadan minttettees. Ubba Yesuusi, “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagiis. Neeni Xoossaa ufayssiya eeshshata, ubba qassi siiquwaa bessanaadaaninne Xoossay ehiyo Mase Kawotettaa haaruwan deꞌanawu koyanaadan minttettoos. Yaatikko, ne deꞌoy ufayssiyaagaa gidana, qassi sinttanawu ammanttiya hidootay deꞌiyoogaa gidaasa. Hanno gakkanawu nena metida waanna oyshatu zaaruwaakka demmana danddayaasa.—Yohaannisa 17:3; Eranchchaa 12:13.

Hegee nena ay keena maaddana danddayii? Hansi hegaa eriyoogan goꞌettida asatuppe issuwaa.a Amarida layttappe kase, Hansi guuttaa guuttaa Xoossaa ammaniyaaba gidikkokka, he ammanoy A maaddibenna. Hansi jallissiyaabaa goꞌettees, shori baynna maccaasaara gayttees, danobaa oottees, qassi motoriyaa laaggiyoogaa dosees. I, “SHin deꞌoy hada, ufayssi baawa” yaagidi yootiis. Layttay 25 heera gidiyo wode, Hansi Geeshsha Maxaafaa akeekan nabbabidi Xoossaa eranawu kuuyiis. Hansi Yihoowa loytti eridinne deꞌuwaa halchchuwaa akeekidi, ba deꞌuwan laamettoogaappe guyyiyan Yihoowa Markka gididi xammaqettiis. Aadhdhida tammu layttawu I ubba wode haggaaziyaagaa gididi oottees. I hagaadan giidi tumaa yootiis: “Yihoowa haggaaziyoogee deꞌo oge ubbaappe aadhdhiyaagaa. Hegee aybiirakka geeddarssiyooba gidenna. Yihoowa eriyoogee taani deꞌuwaa halchchuwaa akeekanaadan maaddiis.”

Darota qofissiyaabay deꞌuwaa halchchuwaa erennaagaa xalla gidenna. Alamiyaa hanotay yaa mooretti mooretti biyo wode, daro asay keehi qofissiya haraban tuggatees.

Iitabay Gakkiyoy Aybissee?

Iitabay gakkiyo wode, qohettida uri, ‘Ha iitabay ta bolli ayssi gakkidee?’ giidi qoppiyoogaa doommees. Ha oyshawu suure zaaruwaa demmiyoogee qofan giigettidi, he metuwaa genccanawu maaddees. Metoy gakkido uri he oyshawu aliya zaaro demmana xayikko, tuggay darin hidootaa qanxxana danddayees. Leemisuwawu, Bruni bolli gakkidabaa beꞌa.

Bruna hagaadan gaasu: “Amarida layttappe kase ta guutta naꞌiyaa hayqqaasu. Taani Xoossaa ammaniyo gishshawu, heeran deꞌiya qeesee minttattanaadan koyaas. I Suzano Xoossay saluwaa efin, A haꞌꞌi saluwan kiitanchcha gidiyoogaa yootiis. I hayquwan tawu saloy saꞌay xumiis, qassi O efo gishshawu Xoossaa ixxaas.” Bruna amarida layttawu mishuwan takkaasu. “Hegaappe guyyiyan, issi Yihoowa Markkiyaa taani Xoossaa ixxana danddayiyo gaasoy baynnaagaa Geeshsha Maxaafaappe bessaasu. Yihooway Suzano saluwaa efibeenna, qassi A kiitanchcha gidukku. A harggidoy asay nagaranchcha gidiyo gishshataassa. Suzana hayquwan xiskkada, Yihooway O denttanaashin naagawusu. Asay saꞌan gannatiyan merinawu deꞌanaadan I medhdhidoogaanne hegee zaarettidi mata wode polettanaagaa eraas. Yihooway tumuppe ay mala Xoossakko taani eroogaappe guyyiyan akko shiiqaas, yaatin, ta mishoykka aggiyoogaa doommiis.”—Mazamure 37:29; Oosuwaa 24:15; Roome 5:12.

Miilooniyan qoodettiya asaa dumma dumma metoy gakkees. Hegeetuppe amaridaageeti nuna buzo xekkan gakkiya metuwaa, olaa, koshshaa woy meretay gattiyo dafaabaa gidana danddayees. Bruna iitabay gakkanaadan oottiyaagee Yihoowa gidennaagaa, asay waayettanaadan I mule halchchibeennaagaa, qassi iitabaa I mata wode xayssanaagaa Geeshsha Maxaafaappe beꞌa simmada woppaa demmaasu. Iitatettay gujji gujji biyoogee nuuni haꞌꞌi deꞌiyoy ha alamiyaa ‘wurssetta gallassawu’ malaata. Nuuni ubbay yeemottidi naagiyo gita laamee matan yaana.—2 Ximootiyoosa 3:1-5; Maatiyoosa 24:7, 8.

Xoossaa Eriyoogaa

Hansinne Bruna kase amarida ogiyan Xoossaa eroosona. Eti abaa loytti erennan A ammanidosona. SHin eti Yihoowa loytti eranawu wodiyaa bazzidi wurssettan loꞌꞌo ayfiyaa demmidosona. Eti ha wodiyan asay oychchiyo gita oyshatuyyo suure zaaruwaa demmidosona. Hegaappe denddidaagan guuggiyaa sarotettaanne sinttanaa wodiyawu ammanttiya hidootaa demmidosona. Yihoowa haggaaziya miilooniiyan qoodettiya haratu hanotaykka hegaa mala.

Yihoowa loytti eranawu abaanne I nuuppe koyiyoobaa yootiya, Geeshsha Maxaafaa akeekan nabbabiyoogaa doommana bessees. Beni deꞌida issi issi asaykka hegaadan oottiis. Giriiken, Beeriyaa gubaaꞌiyan deꞌiya Ayhudati eti siyidobay tumakkonne shaakki eranawu, “ubba gallassi Xoossaa maxaafata tamaariiddi, [PHawuloosinne Sillaasi yootido] qaalaa kumetta laamotan [ekkidoogaa]” taarikiyaa xaafenne dottore gidida Luqaasi yootiis.—Oosuwaa 17:10, 11.

Beni Kiristtaaneti gubaaꞌe shiiquwawukka issippe shiiqoosona. (Oosuwaa 2:41, 42, 46; 1 Qoronttoosa 1:1, 2; Galaatiyaa 1:1, 2; 2 Tasalonqqe 1:1) Ha wodiyankka hanotay hegaa mala. Yihoowa Markkati asay Yihoowakko shiiqanaadaaninne Ayyo haggaaziyoogan ufayttanaadan maaddanawu giigida gubaaꞌe shiiqota issippe shiiqoosona. Ne heeran deꞌiya Yihoowa Markkatuura shiiqiyoogee hara ogiyankka nena goꞌꞌees. Asay leddan leddan ba goynniyo Xoossaa milatiyoogee attenna gishshawu, Yihoowa Markkati amarida hanotan gidikkokka, Yihoowaagaa mala eeshshaa bessoosona. Yaatiyo gishshawu, Yihoowa Markkatuura issippe shiiqiyoogee haꞌꞌikka Yihoowa loytti eranawu maaddees.—Ibraawe 10:24, 25.

Xoossaa eranawu hegaa keena baaxetiyoogee bessiyaabee? Ee bessees. Woni harabaa gidiyaakkokka neeni demmanawu baaxetiyoogee attii? Erettida atleetee ispporttiyan loohanawu ay keena daafuriyaakko qoppa. Leemisuwawu, shachchaa bolli sololiyoogan Paranssaaye olomppikiyan worqqaa meedaaliyaa daagaa ekkida, Zhan Klod Kili ispporttiyaa annaaciyan alamiyan erettida asa gidanawu oottana bessiyaabaa hagaadan yootiis: “Issi uri annaacettiyo wodeppe 10 layttaa kasetidi loohananne ubba galla hegaabaa qoppana bessees . . . Hegee laytta giddon qofankka asatettankka 365 gallassaa oottiyo ooso.” He ubba wodeenne baaxee koshshidoy geella 10 daqiiqa giddon polettiya annaaciyaassa! Yihoowa loytti eriyoogee hegaappe aaruwan, qassi adussa wodiyawu goꞌꞌiyaaba.

Minni Minni Biya Dabbotaa

Issi keehi koshshiyaabay baappe halanaadan koyiyay oonee? Ooninne koyenna. Yaanikko, neeni tumu ufayssaa xayidabadan qoppikko woy iitabay gakkiyoy aybissakko eranawu koyikko, Geeshsha Maxaafaa xaafissida Xoossaa Yihoowa loytta eranawu murtta. Abaa tamaariyoogee ne deꞌoy merinawu suuranaadan oottees.

Nuuni Yihoowabaa tamaariyoogaa aggiyo wodee deꞌanee? Daro layttawu A haggaazida asay abaa tamaaridobaaninne haꞌꞌikka abaa tamaariyo oorattaban maalaalettees. Hegaa tamaariyoogee nuna ufayssees, qassi akko kaseegaappe aaruwan shiiqanaadan maaddees. Nuunikka kaallidi deꞌiyaagaadan xaafida, PHawuloosa qofaa maayiyaageeta gidoos: “Xoossaa duretettai ai keena daroo? A hayyoinne a eratettai ai keena xoqqee? A pirddaa yootanai oonee? I ba oottiyoogaa aissi oottiyaakko oonee akeekiai? . . . ‘Godaa wozanaa eriyai oonee? A zoranau danddayiyai oonee?’”—Roome 11:33, 34.

[Miiljalee]

[Qonccissuwaa]

Asay haꞌꞌikka kaallidi deꞌiya oyshata oychchees: ‘Ta deꞌuwaa halchchoy aybee? Taani wurssettan waananee? Deꞌuwawu halchchidobi aybee?’

[Qonccissuwaa]

“Yihooway tumuppe ay mala Xoossakko taani eroogaappe guyyiyan akko shiiqaas”

[Qonccissuwaa]

“Yihoowa haggaaziyoogee deꞌo oge ubbaappe aadhdhiyaagaa. Hegee aybiirakka geeddarssiyooba gidenna. Yihoowa eriyoogee taani deꞌuwaa halchchuwaa akeekanaadan maaddiis”