Nobyembre

Kon usa ka nga kag-anak, buligi an imo mga anak nga mag-andam hin mga komento nga angayan ha ira edad. May mga panahon nga an seryoso nga mga butang sugad han mga problema ha pag-asawa o isyu ha moral an ginhihisgotan ha pag-aram, pero posible gud nga may usa o duha nga parapo nga puydi komentohan hin bata. Buligi liwat an imo mga anak nga masabtan kon kay ano nga bangin diri hira pirme tawagon kon naalsa hira han ira kamot. An pagsaysay hini makakabulig ha ira nga diri masubo kon iba an tawagon imbes nga hira. (1 Tim. 6:18) Kita ngatanan makakag-andam hin makaparig-on nga mga komento nga magdadayaw kan Jehova ngan magdadasig ha aton mga igkasi-Kristiano. (Prob. 25:11) Bisan kon ha pana-panahon puydi ta ig-istorya hin halipot an aton mismo eksperyensya, dapat naton likyan an pirme pag-istorya parte ha aton kalugaringon. (Prob. 27:2; 2 Cor. 10:18) Lugod, naniningkamot kita nga pirme magpokus kan Jehova, ha iya Pulong, ngan ha iya katawohan sugad nga grupo.​—Pah. 4:11. w23.04 24-25 ¶17-18

An gugma importante basi magpabilin nga nagmamata ngan matipigan an aton maopay nga panhunahuna. (Mat. 22:​37-39) An gugma ha Dios nabulig ha aton nga padayon nga magsangyaw bisan pa han problema nga bangin atubangon ta tungod hito. (2 Tim. 1:​7, 8) Tungod kay hinigugma ta liwat adton diri nag-aalagad kan Jehova, nagpapadayon kita ha pagsangyaw, ngan nagsasangyaw pa ngani pinaagi ha telepono ngan surat. Diri kita nawawad-an hin paglaom nga maabot an panahon nga magbabag-o an mga tawo ngan magbubuhat han tama. (Ezek. 18:​27, 28) Hinigugma ta liwat an aton mga igkasi-Kristiano. Iginpapakita ta an sugad nga gugma pinaagi ha ‘pagdasig ngan pagparig-on ha usa kag usa.’ (1 Tes. 5:11) Pariho ha mga sundalo nga magkaupod ha pakig-away, gindadasig naton an usa kag usa. Diri ta gud tutuyoon nga masakitan an kabugtoan o bumulos ha ira. (1 Tes. 5:​13, 15) Iginpapakita liwat naton an aton gugma pinaagi ha pagrespeto ha mga nangunguna ha kongregasyon.​—1 Tes. 5:12. w23.06 10 ¶6; 11 ¶10-11

Usa nga paagi nga mapaparig-on ta an aton pagtoo amo an pagpamalandong ha lukat. An lukat naggagarantiya nga matutuman an mga saad han Dios. Kon ginhuhunahuna ta hin maopay kon kay ano nga igintagana an lukat ngan kon ano an ginkinahanglan basi maihatag ito, nagririg-on an aton pagtoo nga matutuman an saad han Dios nga kinabuhi nga waray kataposan ha mas maopay nga kalibotan. Kay ano nga makakasiring kita hito? Ano an ginkinahanglan basi maihatag an lukat? Ginsugo ni Jehova tikang ha langit an iya hinigugma nga suhag nga Anak, an iya pinakaduok nga kaupod, basi ig-anak sugad nga perpekto nga tawo. Han nakanhi hi Jesus ha tuna, gin-ilob niya an ngatanan nga klase hin kakurian. Katapos, nag-antos hiya ngan namatay ha masakit nga paagi. Daku hinduro nga kantidad an iginbayad ni Jehova! Diri gud tutugotan han aton mahigugmaon nga Dios nga mag-antos ngan mamatay an iya Anak basi la kita tagan hin mas maopay kondi halipot hinduro nga kinabuhi. (Juan 3:16; 1 Ped. 1:​18, 19) Tungod kay daku hinduro nga kantidad an iginbayad ni Jehova, sisiguruhon niya nga magkakaada kita kinabuhi nga waray kataposan ha bag-o nga kalibotan. w23.04 27 ¶8-9

May hingyap ba hi Jehova nga banhawon an mga patay? Oo. Damu nga nagsurat han Biblia an iya gin-giyahan nga irekord an iya saad nga magkakaada pagkabanhaw ha tiarabot. (Isa. 26:19; Pah. 20:​11-13) Ngan kon may iginsasaad hi Jehova, pirme niya ito gintutuman. (Jos. 23:14) Ngani, karuyag gud ni Jehova buhion an mga patay. Pansina an ginsiring han patriarka nga hi Job. Sigurado hiya nga bisan pa hiya mamatay, mahihidlaw ha iya hi Jehova ngan maruruyag nga makita hiya nga buhi utro. (Job 14:​14, 15, ftn.) Hi Jehova may sugad liwat nga kahidlaw ha ngatanan nga magsiringba niya nga namatay. Karuyag gud niya hira buhion nga mahimsog ngan malipayon. Kumusta man an binilyon nga nagkamatay nga waray magkaada oportunidad nga mahibaro han kamatuoran mahitungod kan Jehova? Karuyag liwat hira banhawon han aton mahigugmaon nga Dios. (Buh. 24:15) Karuyag niya nga magkaada hira oportunidad nga magin iya mga sangkay ngan mabuhi ha waray kataposan dinhi ha tuna.​—Juan 3:16. w23.04 9 ¶5-6

Paonan-o mo mapaparig-on an imo paglaom? Kon pananglitan an imo paglaom amo an mabuhi hin waray kataposan dinhi ha tuna, basaha kon paonan-o ginhuhulagway han Biblia an Paraiso ngan pamalandonga ito. (Isa. 25:8; 32:​16-18) Hunahunaa kon ano an magigin kinabuhi ha bag-o nga kalibotan. Imadyina nga aadto ka. Kon pirme naton huhunahunaon an aton paglaom ha bag-o nga kalibotan, an aton mga problema magigin “temporaryo la ngan magaan.” (2 Cor. 4:17) Pinaagi han paglaom nga iginhahatag ha imo ni Jehova, mapaparig-on ka niya. Ginhatag na niya an imo kinahanglan basi makarawat an kusog nga tikang ha iya. Salit kon kinahanglan mo hin bulig basi matuman an usa nga toka, mailob an usa nga problema, o matipigan an imo kalipay, sinsero nga pag-ampo kan Jehova ngan pangaro han iya giya pinaagi han personal nga pag-aram. Karawata an pagparig-on han imo Kristiano nga kabugtoan. Pirme paggahin hin panahon basi pamalandungon an imo paglaom. Kon bubuhaton mo ito ‘mapaparig-on ka han daku nga gahum uyon ha mahimayaon nga pagkagamhanan han Dios basi bug-os nga makailob ka nga may pagpasensya ngan kalipay.’—Col. 1:11. w23.10 17 ¶19-20

Damu an aton rason nga pasalamatan hi Jehova ha aton pag-ampo. Puydi ta igpasalamat ha iya an bisan ano nga maopay nga butang nga may-ada kita; kay kon huhunahunaon, tikang ha iya an tagsa nga maopay nga regalo. (San. 1:17) Pananglitan, puydi ta ipahayag an aton apresasyon ha mahusay nga tuna ngan makaruruyag nga mga linarang. Puydi ta liwat igpasalamat an aton kinabuhi, pamilya, kasangkayan, ngan paglaom. Ngan karuyag naton pasalamatan hi Jehova kay gintutugotan kita niya nga magkaada presyoso nga pakigsangkay ha iya. Bangin kinahanglan ta maningkamot gud ha paghunahuna han aton mismo mga rason nga magin mapasalamaton kan Jehova. Nagkikinabuhi kita ha kalibotan nga diri mapasalamaton. An mga tawo agsob nga nakapokus ha kon ano an ira karuyag, diri ha kon ano an ira mahihimo basi maipakita an apresasyon ha kon ano an may-ada hira. Kon matapnan kita hito nga batasan, bangin an aton mga pag-ampo magin puro paghangyo na la. Basi diri ito mahitabo, kinahanglan padayon ta nga kultibaron ngan ipahayag an aton apresasyon ha ngatanan nga ginbubuhat ni Jehova para ha aton.​—Luc. 6:45. w23.05 4 ¶8-9

Sugad nga aton mahigugmaon nga Amay, diri karuyag ni Jehova nga makita kita nga nasasakit. (Isa. 63:9) Pero diri niya ginpupugngan an ngatanan naton nga problema, nga maipapariho ha mga salog o mga laga. (Isa. 43:2) Pero nagsasaad hiya nga bubuligan kita ha pag-agi hito. Ngan diri niya tutugotan nga an aton mga problema makawara han aton relasyon ha iya. Gintatagan liwat kita ni Jehova han iya gamhanan nga baraan nga espiritu basi buligan kita nga makailob. (Luc. 11:13; Fil. 4:13) Sugad nga resulta, makakasarig kita nga pirme niya ihahatag an aton ginkikinahanglan basi makapailob ngan makapabilin nga matinumanon ha iya. Ginlalaoman ni Jehova nga masarig kita ha iya. (Heb. 11:6) Usahay inaabat naton nga makuri hinduro an aton mga problema. Bangin magruhaduha pa ngani kita kon bubuligan ba kita ni Jehova. Pero an Biblia nagpapasarig ha aton nga pinaagi han gahum han Dios, ‘makakasaka kita hin pader.’ (Sal. 18:29) Salit imbes nga magruhaduha, dapat kita mag-ampo nga may bug-os nga pagtoo, nga nasarig nga babatunon ni Jehova an aton mga pag-ampo.​—San. 1:​6, 7. w23.11 22 ¶8-9

Maopay gud ito nga paghulagway ha tinuod nga gugma! Ini nga mga pulong usa nga pasarig ha mga mag-asawa: Puydi kamo magkaada diri napapakyas nga gugma ha usa kag usa. Nakadepende ha mag-asawa an pagkaada diri napapakyas nga gugma samtang buhi hira. Ha pag-ilustrar, an usa nga campfire mahimo la magpadayon nga naglalaga kon pirme ito susung-an. Kon papabay-an ito, an kalayo hinay-hinay nga mapaparong. Ha pariho nga paagi, an paghigugmaay han mag-asawa mahimo la magpabilin nga marig-on kon paririg-unon nira an ira relasyon. May mga panahon nga an mag-asawa mahimo umabat nga an ira gugma nagtutugnaw na, labi na kon nabubug-atan hira han kakurian ha pinansyal, problema ha kahimsog, o han presyur han pagpadaku hin mga anak. Salit basi magpadayon nga buhi “an laga ni Jah,” kinahanglan pariho nga mangalimbasog an bana ngan asawa ha pagkaada marig-on nga relasyon kan Jehova. w23.05 20-21 ¶1-3

Basi makultibar an kaisog, ano an dapat naton buhaton? An aton mga kag-anak bangin mag-aghat ha aton nga magin maisugon, pero ini nga kalidad diri nira maipapasa ha aton nga sugad hin panurundon. An pagkultibar hin kaisog maipapariho ha pag-aram hin bag-o nga skill. An usa nga paagi basi magin makarit ha usa nga skill amo an pagkita hin maopay ha mga ginbubuhat han magturutdo ngan pagsubad hito. Ha pariho nga paagi, nahibabaro kita ha pagin maisugon pinaagi ha pagkita hin maopay kon paonan-o iginpapakita han iba ini nga kalidad ngan subaron ito. Pariho kan Daniel, kinahanglan mahibaroan naton hin maopay an Pulong han Dios. Kinahanglan magkaada kita duok nga relasyon kan Jehova pinaagi ha pirme pakiistorya ha iya ngan pagsumat ha iya kon ano gud an aton inaabat. Ngan kinahanglan sumarig kita kan Jehova, kay kombinsido kita nga pirme hiya mabulig ha aton. Katapos, kon an aton pagtoo nasasarihan, magigin maisugon kita. An maisugon nga mga tawo agsob nga ginrirespeto han iba. Mahimo liwat nira mabuligan an mga tawo nga tangkod an kasingkasing nga makilala hi Jehova. Oo, may-ada kita mag-opay nga rason nga kultibaron an pagin maisugon. w23.08 2 ¶2; 4 ¶8-9

An Griego nga pulong nga iginhubad nga “siguroha” gin-gamit may kalabotan ha pagtesting ha presyoso nga mga metal. Salit angay ta siguruhon kon tinuod ba an aton nababatian o nababasa. Magigin mas importante ito ha aton samtang nagtitikahirani an daku nga kasakitan. Imbes nga basta la tumuod ha ginsisiring han iba, gin-gagamit ta an aton abilidad ha paghunahuna basi ikompara an aton nababasa o nababatian ha kon ano an ginsisiring han Biblia ngan han organisasyon ni Jehova. Kon ginbubuhat ta ito, diri kita malilimbongan han bisan ano nga propaganda o taktika han mga demonyo. (Prob. 14:15; 1 Tim. 4:1) Sugad nga grupo, maaram kita nga an katawohan ni Jehova makakatalwas ha daku nga kasakitan. Pero sugad nga indibiduwal, diri kita maaram kon ano an mahitatabo ha aton. (San. 4:14) Kondi makatalwas man kita ha daku nga kasakitan o mamatay antes hito, babalosan kita hin kinabuhi nga waray kataposan kon magpapabilin kita nga matinumanon. Hinaot magpokus kita ngatanan ha aton makalilipay nga paglaom ngan padayon nga magin andam para ha adlaw ni Jehova! w23.06 13 ¶15-16

Diri kita maaram kon paonan-o matutuman an pipira nga tagna han Biblia. (Dan. 12:​8, 9) Pero bisan kon diri naton bug-os nga nasasabtan kon paonan-o matutuman an usa nga tagna, diri karuyag sidngon nga diri na ito matutuman. Makakasiguro kita nga ipapahayag ha aton ni Jehova an kinahanglan naton mahibaroan ha husto nga panahon, sugad la han iya ginbuhat ha naglabay. Magkakaada deklarasyon han “kamurayawan ngan kasigurohan.” (1 Tes. 5:3) Sunod, aatakehon han mga gobyerno ha kalibotan an buwa nga relihiyon ngan bubungkagon ito. (Pah. 17:​16, 17) Katapos, aatakehon nira an katawohan han Dios. (Ezek. 38:​18, 19) Ito nga mga panhitabo magtutugway ngadto ha ultimo nga girra han Armagedon. (Pah. 16:​14, 16) Makakasiguro kita nga ito ngatanan hirani na matuman. Samtang waray pa ito, padayon nga ipakita naton an aton apresasyon ha aton mahigugmaon nga langitnon nga Amay pinaagi ha paghatag hin atensyon ha mga tagna han Biblia ngan pagbulig ha iba nga ito liwat an buhaton. w23.08 13 ¶19-20

Han ginhisgotan ni apostol Pablo an pagtoo, paglaom, ngan gugma, hiya nagsiring nga “an pinakaimportante hini [nga mga kalidad] amo an gugma.” (1 Cor. 13:13) Kay ano nga nagsiring hito hi Pablo? Ha tiarabot, diri na kita kinahanglan magkaada pagtoo ha mga saad han Dios mahitungod han iya bag-o nga kalibotan o maglaom nga matutuman ito nga mga saad kay hito nga panahon nahitabo na ito. Pero kinahanglan nga pirme kita magkaada gugma kan Jehova ngan ha mga tawo. Ngani, an aton gugma ha ira padayon nga maghihilarom ha waray kataposan. An gugma liwat nagpapakilala ha aton sugad nga tinuod nga mga Kristiano. Hi Jesus nagsiring ha iya mga apostol: “Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.” (Juan 13:35) Dugang pa, an pagkaada gugma ha usa kag usa nagtitipig ha aton nga urosa. Gintawag ni Pablo an gugma nga “hingpit nga bugkos han pagkaurosa.” (Col. 3:14) Hi apostol Juan nagsurat ha iya mga igkasi-tumuroo: “An bisan hin-o nga nahigugma ha Dios kinahanglan maghigugma liwat ha iya bugto.” (1 Juan 4:21) Kon iginpapakita naton an gugma ha usa kag usa, iginpapakita naton nga hinigugma naton an Dios. w23.11 8 ¶1, 3

Ha Biblia, iginpapariho an aton kinabuhi sugad nga mga Kristiano ha usa nga rumba. An mga paradalagan nga malampuson nga nakaabot ha finish line may premyo nga kinabuhi nga waray kataposan. (2 Tim. 4:​7, 8) Kinahanglan naton mangalimbasog nga padayon nga makadalagan labi na kay hirani na gud kita ha finish line. Hi apostol Pablo nag-unabi han makakabulig ha aton nga magdaog ha rumba. Ginsugo kita niya nga ‘kuhaon an ngatanan nga nakakabug-at ngan mapailubon nga dalaganon an rumba nga iginbutang ha aton atubangan.’ Karuyag ba sidngon ni Pablo nga waray dapat dad-on an usa nga Kristiano? Diri ito an iya punto. Lugod, karuyag niya ipasabot nga dapat naton kuhaon an bisan ano nga diri ginkikinahanglan. Ini nga klase hin dara mahimo makaulang ngan makapakapoy ha aton. Para makapailob, kinahanglan mahibaroan dayon naton an bisan ano nga diri ginkikinahanglan nga dara nga mahimo makapahinay ha aton ngan tanggalon ito. Pero diri naton karuyag tanggalon an mga butang nga dapat naton dad-on. Kay kon buhaton naton ito, diri kita makakapabilin ha rumba.​—2 Tim. 2:5. w23.08 26 ¶1-2

An pagin makatadunganon nabulig ha aton nga respetuhon an panhunahuna han iba. Pananglitan, may mga sister nga naruruyag mag-make-up, pero may iba liwat nga nadiri hito. May mga Kristiano nga nainom hin makahurubog nga irimnon ha kasadangan la, pero an iba nagdesisyon nga diri gud uminom hito. An ngatanan nga Kristiano karuyag magin mahimsog pero nagpipili hin iba-iba nga klase han pagtambal. Kon naghuhunahuna kita nga pirme tama an aton ginpipili ngan ginpipirit naton ito ha aton mga kakongregasyon, mahimo kita makapakdol ha iba ngan magin hinungdan han pagkabahin-bahin. (1 Cor. 8:9; 10:​23, 24) Pananglitan, imbes nga magsiring hi Jehova kon ano an angay naton igsul-ot, naghatag hiya hin mga prinsipyo nga dapat naton sundon. An aton pamado kinahanglan angayan para ha mga ministro han Dios, nga nagpapakita hin pagin makatadunganon, may kasadangan, ngan “maopay nga panhunahuna.” (1 Tim. 2:​9, 10) Salit diri naton karuyag nga makaagaw hin atensyon an aton pamado. An mga prinsipyo ha Biblia mabulig liwat ha mga tigurang nga likyan an paghimo han ira kalugaringon nga mga surundon parte ha pamado ngan estilo han buhok. w23.07 23-24 ¶13-14

Naghatag hi Jehova hin basihan basi ipakita ha aton kon paonan-o kita magkakaada makalilipay nga kabubuwason. Adton nakarawat han imbitasyon han maaringasa ngan “lurong nga babaye” nakapokus ha pag-enjoy han “matam-is” ngan patago nga mga kalipayan. Mahingangadto hira ha “kahiladman han lubnganan.” (Prob. 9:​13, 17, 18) Daku gud an kaibahan hadton nakarawat han imbitasyon han “tinuod nga kinaadman”! (Prob. 9:1) Nahibabaro kita nga higugmaon an ginhihigugma ni Jehova ngan kangalasan an iya ginkakangalasan. (Sal. 97:10) Ngan nalilipay kita nga imbitaron an iba nga magpahimulos ha “tinuod nga kinaadman.” Sugad hin ginsusugo kita nga “magtawag tikang ha higtaas nga mga lugar ha bawbaw han syudad: ‘Pakadia an bisan hin-o nga waray eksperyensya.’” Diri la para yana an mga benepisyo ha aton ngan ha mga nakarawat han imbitasyon. Nagpapadayon ito ngan naghahatag ha aton hin higayon nga “mabuhi” ha waray kataposan samtang ‘naglalakat kita hin diretso ha dalan han pagsabot.’—Prob. 9:​3, 4, 6. w23.06 24 ¶17-18

Ano an imo inaabat kon an usa han imo katrabaho o kaeskwela nagpapakiana mahitungod han imo gintotoohan? Ginkukulba ka ba? Haros kita ngatanan sugad an inaabat. Pero an sugad nga pakiana bangin makabulig ha aton nga masabtan kon ano gud an ginhuhunahuna o gintotoohan han usa, salit magigin mas masayon para ha aton nga isangyaw an maopay nga sumat. Pero may mga panahon nga bangin magpakiana an usa tungod kay diri hiya nauyon o karuyag niya makigdiskusyon ha aton. Diri kita dapat mahipausa hito. Ha pagkatinuod, may sayop nga panhunahuna an iba parte ha aton gintotoohan. (Buh. 28:22) Dugang pa, nagkikinabuhi kita ha “kataposan nga mga adlaw,” ha panahon nga damu an “diri naruruyag ha bisan ano nga pakigsabot” ngan “mapintas” pa ngani. (2 Tim. 3:​1, 3) Bangin mahunahuna mo, ‘Paonan-o ako magigin kalmado ngan mataktika kon may karuyag makigdiskusyon parte han akon gintotoohan?’ Ano an mabulig ha imo? An pagkamalumo. An malumo nga tawo diri madagmit masina, lugod may pagpugong hiya ha kalugaringon kon may nag-aaghat ha iya nga masina o kon diri hiya sigurado kon ano an ibabaton. w23.09 14 ¶1-2

Usahay, nakakakarawat kita hin sagdon nga nagpuprotektar ha aton ha mga butang sugad han materyalismo ngan mga buruhaton nga mahimo makaaghat ha aton nga talapason an mga balaud han Dios. May kalabotan hito, nagpapahimulos kita kon ginsusunod naton an igintatagana ni Jehova nga giya. (Isa. 48:​17, 18; 1 Tim. 6:​9, 10) Sigurado, padayon nga gagamiton ni Jehova an mga tawo sugad nga iya representante ha pagtagana hin giya ha panahon han daku nga kasakitan ngan ngadto ha Usa ka Yukot ka Tuig nga Pagmando. Padayon ba naton nga susundon ito nga instruksyon? Nakadepende ito kon ano an aton reaksyon ha giya nga igintatagana ni Jehova yana. Salit pirme naton sundon an giya ni Jehova, pati na an giya tikang ha kalalakin-an nga ginpili basi magbantay ha aton. (Isa. 32:​1, 2; Heb. 13:17) Ngan samtang ginbubuhat naton ito, may-ada kita rason nga sumarig ha aton Giya, hi Jehova, nga naggigiya ha aton pahirayo ha espirituwal nga kadaot ngan tikadto ha aton destinasyon—ha kinabuhi nga waray kataposan ha bag-o nga kalibotan. w24.02 25 ¶17-18

Napahimulsan ni apostol Pablo an malipayon nga kinabuhi ha pag-alagad kan Jehova, pero damu an iya gin-atubang nga problema. Kasagaran nga higrayo an mga ginbibyahe ni Pablo, ngan diri gud masayon an pagbiyahe hadto nga panahon. Ha iya mga pagbiyahe, nakaeksperyensya hiya hin “mga peligro ha mga salog” ngan hin “mga peligro ha mga tulisan.” May mga panahon liwat nga ginkastigo hiya han mga nakontra ha iya. (2 Cor. 11:​23-27) Ngan may mga panahon nga waray apresyara han Kristiano nga kabugtoan ni Pablo an iya sinsero nga paningkamot ha pagbulig ha ira. (2 Cor. 10:10; Fil. 4:15) Ano an nakabulig kan Pablo nga padayon nga mag-alagad kan Jehova? Hi Pablo nahibaro gud parte ha personalidad ni Jehova tikang ha Kasuratan ngan ha iya mga eksperyensya. Kombinsido hi Pablo nga hinigugma hiya ni Jehova nga Dios. (Roma 8:​38, 39; Efe. 2:​4, 5) Ngan ginhigugma gud niya hi Jehova. Ginpakita niya an iya gugma kan Jehova “pinaagi ha pagserbi ngan padayon nga pagserbi ha mga baraan.”​—Heb. 6:10. w23.07 9 ¶5-6

Damu nga tawo an nauyon nga kinahanglan naton an sekular nga mga gobyerno ngan dapat naton sugton an pipira nga balaud nga iginpapatuman hinin “higtaas nga mga awtoridad.” Pero bangin diri nira sugton an mga balaud nga diri nira karuyag o inaabat nira nga diri patas. Iginpapakita han Biblia nga an mga gobyerno han tawo usa nga hinungdan han pag-antos, ginkukontrol ito ni Satanas, ngan hirani na ito bungkagon. (Sal. 110:​5, 6; Ecles. 8:9; Luc. 4:​5, 6) Nagsusumat liwat ito ha aton nga “an bisan hin-o nga nakontra ha awtoridad nakontra ha kahikayan han Dios.” An aton relatibo nga pagpasakop ha higtaas nga mga awtoridad bahin han temporaryo nga kahikayan ni Jehova basi tipigan an kahapsay. Salit dapat naton “ihatag ha ngatanan an angay ha ira,” upod na an pagbayad hin mga buhis, pagrespeto, ngan pagsugot. (Roma 13:​1-7) Bangin hunahunaon naton nga an pagsugot ha balaud diri masayon, diri patas, o magasto. Pero nasugot kita kan Jehova, ngan ginsisidngan kita niya nga sugton adton aada ha awtoridad samtang diri kita nira ginsusugo nga talapason an iya mga sugo.​—Buh. 5:29. w23.10 8 ¶9-10

Han natawo hi Samson, an mga Filisteo maraugdaog nga nagmando ha bug-os nga nasud han Israel. (Huk. 13:1) Tungod han ira mapintas nga pagmando, nag-antos gud an mga Israelita. Ginpili ni Jehova hi Samson nga ‘manguna ha pagtalwas ha Israel tikang ha kamot han mga Filisteo.’ (Huk. 13:5) Basi matuman ito, kinahanglan ni Samson sumarig kan Jehova. Ha usa nga higayon, an kasundalohan nga Filisteo inabot ha Lehi, posible ha Juda, basi dakpon hi Samson. An kalalakin-an han Juda nahadlok, salit nagdesisyon hira nga itubyan hi Samson ha mga kaaway. Gin-gapos hi Samson hin maopay han iya mga igkasi-Israelita hin duha nga bag-o nga pisi ngan gindara ha mga Filisteo. (Huk. 15:​9-13) Pero “an espiritu ni Jehova naghatag ha iya hin kusog” ngan nakabuhi hiya ha mga pisi. Katapos, “nakakita hiya hin tul-an han panga han asno nga lalakí nga bag-o pa la nga namatay,” ginpurot niya ito ngan gin-gamit ha pagpatay ha 1,000 nga lalaki nga Filisteo!—Huk. 15:​14-16. w23.09 2 ¶3-4

Hinay-hinay nga iginpahayag ni Jehova ha Biblia an iya “waray kataposan nga katuyoan.” Damu nga paagi an ginagamit ni Jehova ha pagpalampos han ngatanan nga butang para ha iya katuyoan. (Prob. 16:4) Ngan an mga resulta han mga ginbubuhat ni Jehova magpapadayon ha waray kataposan. Ano an katuyoan ni Jehova, ngan ano nga mga pagbag-o an iya ginhimo basi matuman ito? Iginsumat han Dios ha siyahan nga mga tawo an iya katuyoan para ha ira. Kinahanglan nira ‘manganak ngan magdamu, pun-on an tuna ngan kultibaron ito, ngan magkaada awtoridad ha tagsa nga buhi nga linarang’ ha tuna. (Gen. 1:28) Tungod kay nagrebelde hira Adan ngan Eva, an mga tawo nagin makasasala, bisan pa hito waray mapugngi hi Jehova ha pagtuman han iya katuyoan. Ginbag-o niya an paagi han pagtuman hito. Nagdesisyon dayon hiya nga mag-establisar hin Ginhadian ha langit nga magtutuman han iya orihinal nga katuyoan para ha mga tawo ngan ha tuna.​—Mat. 25:34. w23.10 20 ¶6-7

Mabubuligan kita ni Jehova nga diri umundang. Bangin makurian kita nga magpadayon, labi na kon may-ada kita gin-aatohan nga kaluyahan. Usahay, bangin mas makuri atohan an aton kaluyahan kay ha naeksperyensyahan ni apostol Pedro. Pero mahimo kita tagan ni Jehova hin kusog nga diri umundang. (Sal. 94:​18, 19) Pananglitan, usa nga brother an may homoseksuwal nga pagkinabuhi ha sulod hin damu ka tuig antes hiya mahibaro han kamatuoran. Ginbayaan niya hin bug-os iton imoral nga mga buhat ngan nagkinabuhi uyon ha ginsisiring han Biblia. Pero usahay nabalik an iya sayop nga mga hingyap. Ano an nakabulig ha iya nga magpadayon? Nagsiring hiya: “Ginpaparig-on kita ni Jehova.” Nagdugang hiya: “Ha bulig han espiritu ni Jehova . . . , nahibaroan ko nga posible nga padayon nga magkinabuhi ha paagi nga karuyag ni Jehova . . . Padayon ako nga ginagamit ni Jehova, ngan bisan pa han akon mga kaluyahan pirme niya ako ginpaparig-on.” w23.09 23 ¶12

Mga batan-on nga brother, diri awtomatiko nga magigin hamtong kamo nga Kristiano. Kinahanglan niyo magpili hin mag-opay nga ehemplo nga susubaron, magkultibar han abilidad ha paghunahuna, magin masasarigan, magkaada praktikal nga mga skill, ngan mangandam para ha tiarabot nga mga responsabilidad. Bangin usahay nabubug-atan ka kon ginhuhunahuna mo an mga butang nga kinahanglan mo buhaton. Pero mahimo ka maglampos. Hinumdumi nga hi Jehova naruruyag gud pagbulig ha imo. (Isa. 41:​10, 13) Syempre, bubuligan ka liwat han imo kabugtoan ha kongregasyon. Kon makab-ot mo an klase han pagkatawo nga karuyag ni Jehova para ha imo, magigin makalilipay an imo kinabuhi. Hinigugma namon kamo mga batan-on nga brother! Hinaot hura nga bendisyonan ni Jehova an iyo paningkamot yana nga magin hamtong nga Kristiano nga kalalakin-an. w23.12 29 ¶19-20

Imadyina nga aadto ka ha usa nga pagturotarampo upod han kabugtoan. Nag-i-enjoy kamo hito nga okasyon ngan nagpiktyur kamo sugad nga grupo. Ngani, nagpiktyur kamo hin makaduha pa engkaso an siyahan nga piktyur diri maopay. Salit may tulo kamo nga piktyur. Pero ha usa hito nga piktyur, naobserbaran mo nga namusdot an usa nga brother. Salit paparaon mo ito kay may duha ka pa man nga piktyur diin nahiyom an ngatanan, upod na ito nga brother. Kasagaran na nga may mag-opay kita nga mga hinumdoman ha mga panahon nga kaupod naton an kabugtoan. Pero ano man kon ha usa hito nga mga panahon an usa nga bugto may ginsiring o ginbuhat nga diri maopay? Ano an hihimoon naton hito nga hinumdoman? Kay ano nga diri na la ito kalimtan pariho han aton pagpara ha usa han mga piktyur? (Efe. 4:32) Mahihimo naton ito kay may-ada kita damu nga magpakalilipay nga hinumdoman han aton pakig-upod ha iya. Ito an klase han mga hinumdoman nga karuyag naton tipigan ngan pabilhan. w23.11 12-13 ¶16-17

An Griego nga mga pulong nga gin-gamit dinhi nagpapakita nga an pamado han Kristiano nga babaye kinahanglan magpakita hin respeto ngan konsiderasyon ha pag-abat o opinyon han iba. Proud gud kita ha aton mga hamtong nga sister nga an pamado nagpapakita hin respeto ha iba! An husto nga pagturotimbang usa pa nga kalidad nga kinahanglan kultibaron han ngatanan nga sister basi magin hamtong. Ano an husto nga pagturotimbang? Ito an abilidad nga mahibaroan an husto ngan sayop ngan buhaton an husto. Tagda an ehemplo ni Abigail. An iya bana naghimo hin maraot nga desisyon nga makakadaot gud ha iya bug-os nga panimalay. Gumios dayon hi Abigail. An iya maopay nga pagturotimbang nakatalwas hin mga kinabuhi. (1 Sam. 25:​14-23, 32-35) An husto nga pagturotimbang nabulig liwat ha aton nga mahibaro kon san-o magyayakan ngan kon san-o mahilom. Ngan nabulig liwat ito ha aton nga magin timbang ha pagpakita hin personal nga interes ha iba.​—1 Tes. 4:11. w23.12 20 ¶8-9

Ginsurat ni apostol Pablo ito nga mga pulong para ha kongregasyon ha Roma. An kabugtoan didto nahibaro na mahitungod kan Jehova ngan kan Jesus, nagkaada pagtoo, ngan nagin mga Kristiano. Salit “iginpahayag na [hira han Dios] nga matadong sugad nga resulta han pagtoo,” ngan iya gindihogan hira han baraan nga espiritu. (Roma 5:1) Oo, nagkaada hira tinuod ngan makaruruyag nga paglaom. Ha urhi nagsurat hi Pablo ha dinihogan nga mga Kristiano ha Efeso mahitungod ha paglaom nga iginhatag ha ira han Dios. Ito nga paglaom nag-uupod ha pagkarawat han “panurundon han mga baraan.” (Efe. 1:18) Ngan gin-unabi liwat ni Pablo ha mga taga-Colosas kon diin nira makakarawat an ira balos. Gintawag niya ito nga “paglaom nga iginreserba para ha iyo ha langit.” (Col. 1:​4, 5) Kon sugad, an paglaom han dinihogan nga mga Kristiano amo an pagkabanhaw ngadto ha kinabuhi nga waray kataposan ha langit, diin magmamando hira kaupod han Kristo.​—1 Tes. 4:​13-17; Pah. 20:6. w23.12 9 ¶4-5

An orihinal nga pulong para ha ‘pagbantay’ usa nga pulong nga panmilitar ngan nagpapasabot ito hin mga sundalo nga nagbabantay ha syudad basi magin talwas tikang ha pag-atake. An mga residente ha gwardyado nga syudad nakaturog hin murayaw, kay maaram hira nga may mga sundalo nga nagbabantay ha mga ganghaan. Ha pariho nga paagi, kon an kamurayawan han Dios nagbabantay han aton mga kasingkasing ngan hunahuna, nagigin kalmado kita, kay maaram nga talwas kita. (Sal. 4:8) Sugad han kahimtang ni Hana, bisan kon an aton sitwasyon diri dayon magbag-o, magkakaada la gihapon kita kamurayawan. (1 Sam. 1:​16-18) Ngan kon kalmado kita, agsob nga mas masayon para ha aton nga makapanhunahuna hin maopay ngan makahimo hin maaramon nga mga desisyon. Ano an mahimo naton buhaton? Kon may problema ka, tawaga an bantay, siring pa. Paonan-o? Pag-ampo tubtob nga maabat mo an kamurayawan han Dios. (Luc. 11:9; 1 Tes. 5:17) Kon naatubang ka hin krisis, padayon nga mag-ampo, ngan maieksperyensyahan mo an kamurayawan ni Jehova kay nagbabantay ito ha imo kasingkasing ngan hunahuna.​—Roma 12:12. w24.01 21 ¶5-6

Basi mabaraan an ngaran han iya Amay, gin-ilob ni Jesus an tagsa nga pag-torture, pag-insulto, ngan pakaraot nga gin-akusar ha iya. Maaram hiya nga ginsugot niya an iya Amay ha ngatanan nga butang; waray hiya angay ikaawod. (Heb. 12:2) Maaram liwat hiya nga direkta hiya nga gin-aatake ni Satanas hiton makuri nga panahon. (Luc. 22:​2-4; 23:​33, 34) Sigurado nga naglaom hi Satanas nga mabubungkag niya an integridad ni Jesus; pero napakyas gud hiya! Ginpamatud-an gud ni Jesus nga hi Satanas duro kabuwaon ngan hi Jehova may-ada maunungon nga mga surugoon, nga padayon nga nagtitipig han ira integridad bisan ha pinakamakuri nga mga pagsari! Karuyag mo ba mapalipay an imo nagmamando nga Hadi? Padayon nga dayawa an ngaran ni Jehova pinaagi ha pagbulig ha iba nga mahibaro mahitungod han ngatanan nga mag-opay nga kalidad han aton Dios. Kon bubuhaton mo ito, ginsusunod mo an mga pitad ni Jesus. (1 Ped. 2:21) Pariho kan Jesus, ginpapalipay mo hi Jehova ngan ginpapamatud-an mo nga buwaon gud an Iya kaaway, hi Satanas! w24.02 11-12 ¶11-13

Han naglabay nga lima ka tuig, sobra usa ka milyon an nagpabawtismo sugad nga mga Saksi ni Jehova. Kon igdedikar mo an imo kalugaringon kan Jehova, ginpipili mo nga magin disipulo ni Jesu-Kristo ngan buhaton an kaburut-on han Dios, an pinakaimportante nga butang ha imo kinabuhi. Ano an nahiuupod han Kristiano nga dedikasyon? Hi Jesus nagsiring: “Kon may bisan hin-o nga naruruyag sumunod ha akon, isalikway niya an iya kalugaringon.” (Mat. 16:24) An Griego nga mga pulong nga ginhubad nga “isalikway niya an iya kalugaringon” mahimo liwat mangahulogan nga “ayaw na pagkinabuhi para ha imo kalugaringon.” Sugad nga dedikado nga alagad ni Jehova kinahanglan mo magdumiri ha bisan ano nga diri uyon ha iya kaburut-on. (2 Cor. 5:​14, 15) Nag-uupod ito ha pagdumiri ha “mga buhat han unod,” sugad han seksuwal nga imoralidad. (Gal. 5:​19-21; 1 Cor. 6:18) Ito ba nga mga restriksyon magpapakuri han imo kinabuhi? Diri, kon hinigugma mo hi Jehova ngan kombinsido ka nga an iya mga balaud para ha imo kaopayan.​—Sal. 119:97; Isa. 48:​17, 18. w24.03 2 ¶1; 3 ¶4

Iginhahatag ni Jehova an iya baraan nga espiritu hadton iya gin-uuyonan. (Mat. 12:18) Mahimo naton pakianhan an aton kalugaringon, ‘Naipapakita ko ba an pipira nga bahin han bunga han espiritu han Dios ha akon kinabuhi?’ Napapansin mo ba nga mas pasensyoso ka kay han diri mo pa kilala hi Jehova? Ha pagkamatuod, kon mas nahibabaro ka nga ipakita an bunga han espiritu han Dios, mas nagigin klaro ha imo nga may-ada ka han pag-uyon ni Jehova! An bili han lukat ginagamit ni Jehova hadton iya gin-uuyonan. (1 Tim. 2:​5, 6) Pero ano man kon naabat la gihapon kita nga diri kita gin-uuyonan ni Jehova bisan kon may-ada kita pagtoo ha lukat ngan bawtismado na? Hinumdumi diri kita pirme makakasarig ha aton kalugaringon nga pag-abat pero makakasarig kita kan Jehova. Para ha iya, matadong adton may pagtoo ha lukat ngan nagsasaad hiya nga bibendisyonan hira.​—Sal. 5:12; Roma 3:26. w24.03 30 ¶15; 31 ¶17