Paonan-o Matitipigan nga Marig-on an Aton Gugma ha Usa kag Usa?

1-2. (a) Kay ano nga nagsiring hi apostol Pablo nga an gugma amo an “pinakaimportante” nga kalidad? (b) Ano nga mga pakiana an aton hihisgotan?

HAN ginhisgotan ni apostol Pablo an pagtoo, paglaom, ngan gugma, hiya nagsiring nga “an pinakaimportante hini [nga mga kalidad] amo an gugma.” (1 Cor. 13:13) Kay ano nga nagsiring hito hi Pablo? Ha tiarabot, diri na kita kinahanglan magkaada pagtoo ha mga saad han Dios mahitungod han iya bag-o nga kalibotan o maglaom nga matutuman ito nga mga saad kay hito nga panahon nahitabo na ito. Pero kinahanglan nga pirme kita magkaada gugma kan Jehova ngan ha mga tawo. Ngani, an aton gugma ha ira padayon nga maghihilarom ha waray kataposan.

² Tungod kay pirme kita magkikinahanglan hin gugma, hisgotan ta an tulo nga pakiana. Siyahan, kay ano nga dapat naton higugmaon an usa kag usa? Ikaduha, paonan-o naton maipapakita an gugma ha usa kag usa? Ikatulo, paonan-o naton matitipigan nga marig-on an aton gugma ha usa kag usa?

KAY ANO NGA DAPAT NATON HIGUGMAON AN USA KAG USA?

3. Ano an mga rason nga dapat naton higugmaon an usa kag usa?

³ Kay ano nga importante nga higugmaon an usa kag usa? An usa han mga rason, an gugma nagpapakilala ha aton sugad nga tinuod nga mga Kristiano. Hi Jesus nagsiring ha iya mga apostol: “Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.” (Juan 13:35) Dugang pa, an pagkaada gugma ha usa kag usa nagtitipig ha aton nga urosa. Gintawag ni Pablo an gugma nga “hingpit nga bugkos han pagkaurosa.” (Col. 3:14) Pero may usa pa nga rason kon kay ano nga dapat naton higugmaon an usa kag usa. Hi apostol Juan nagsurat ha iya mga igkasi-tumuroo: “An bisan hin-o nga nahigugma ha Dios kinahanglan maghigugma liwat ha iya bugto.” (1 Juan 4:21) Kon iginpapakita naton an gugma ha usa kag usa, iginpapakita naton nga hinigugma naton an Dios.

4-5. Iilustrar kon paonan-o an aton gugma ha Dios konektado ha aton gugma ha usa kag usa.

⁴ Ha ano nga paagi an aton gugma ha Dios konektado gud ha gugma nga aton iginpapakita ha kabugtoan? Ha pag-ilustrar, pansina an koneksyon han aton kasingkasing ha iba nga parte han aton lawas. Kon gintsitsek han doktor an pulso ha aton kamot basi mahibaroan kon maluya o makusog ito, posible nga may mahibaroan hiya mahitungod han kondisyon han aton kasingkasing. Paonan-o naton maiaaplikar ini nga prinsipyo kon ginhihisgotan an gugma?

⁵ Sugad la nga mahimo mahibaroan han doktor an kahimtang han aton kasingkasing kon gintsitsek an aton pulso, mahimo liwat naton mahibaroan an kahilarom han aton gugma ha Dios pinaagi ha pag-usisa han aton gugma ha iba. Kon maobserbaran naton nga an aton gugma ha mga igkasi-tumuroo nagluya paglabay han panahon, bangin iginpapakita hito nga an aton gugma ha Dios nagluya liwat. Pero kon pirme naton iginpapakita an aton gugma ha mga igkasi-tumuroo, sinyales ito nga an aton gugma ha Dios marig-on.

6. Kay ano nga dapat kita mabaraka kon an aton gugma ha aton kabugtoan nagtitikaluya? (1 Juan 4:​7-9, 11)

⁶ Dapat kita mabaraka kon nagluya an aton gugma ha aton kabugtoan. Kay ano? Kay iginpapasabot hito nga may problema kita ha espirituwal. Ginklaro ito ni apostol Juan han ginpahinumdoman kita niya: “Hiya nga diri nahigugma ha iya bugto nga iya nakikita, diri makakahimo paghigugma ha Dios nga diri niya nakikita.” (1 Juan 4:20) Ano an leksyon hini para ha aton? Hi Jehova malilipay la ha aton kon aton ‘ginhihigugma an usa kag usa.’​—Basaha an 1 Juan 4:​7-9, 11.

PAONAN-O NATON MAIPAPAKITA AN GUGMA HA USA KAG USA?

7-8. Ano an pipira nga paagi nga maipapakita naton an aton gugma ha usa kag usa?

⁷ Ha Pulong han Dios, pauroutro nga makikita naton an sugo nga “higugmaon . . . an usa kag usa.” (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Pero an gugma usa nga kalidad han kasingkasing, o sulod nga pagkatawo, ngan waray tawo nga makakakita hito. Salit paonan-o naton maipapakita an aton gugma ha usa kag usa? Pinaagi han aton mga pulong ngan mga buhat.

⁸ Damu an paagi nga maipapakita naton ha aton kabugtoan nga hinigugma naton hira. Ini an pipira nga ehemplo: “Magyakan kamo han kamatuoran ha usa kag usa.” (Zac. 8:16) “Makigmurayaw ha usa kag usa.” (Mar. 9:50) Manguna kamo ha “pagpasidungog ha usa kag usa.” (Roma 12:10) “Abiabihon niyo an usa kag usa.” (Roma 15:7) “Padayon . . . nga magpasaylo ha usa kag usa.” (Col. 3:13) “Padayon nga dad-on niyo an mga dinara han usa kag usa.” (Gal. 6:2) “Padayon nga liawa niyo an usa kag usa.” (1 Tes. 4:18) “Padayon nga . . . parig-unon an usa kag usa.” (1 Tes. 5:11) “Ig-ampo an usa kag usa.”​—San. 5:16.

9. Kay ano nga an pagliaw ha iba importante nga kapahayagan han aton gugma? (Kitaa liwat an piktyur.)

⁹ Hisgotan naton an usa han mga kapahayagan han aton gugma nga gin-unabi ha nahiuna nga parapo. Uusisahon naton an sagdon ni Pablo: “Padayon nga liawa niyo an usa kag usa.” Kay ano nga an pagliaw ha iba usa nga importante nga kapahayagan han aton gugma? Sumala ha usa nga reperensya ha Biblia, an pulong nga gin-gamit ni Pablo para ha “pagliaw” nagpapasabot hin “pagtindog ha kagiliran han usa nga tawo ha pagdasig ha iya kon hiya nag-aantos hin makuri nga pagsari.” Salit pinaagi ha pagliaw ha aton igkasi-tumuroo nga nag-aantos, ginbubuligan naton hiya nga makapadayon ha pag-alagad kan Jehova. Ha kada panahon nga ginliliaw naton an usa nga bugto, iginpapakita naton nga hinigugma naton hiya.​—2 Cor. 7:​6, 7, 13.

10. Ano an koneksyon han pagpaid ngan han pagliaw?

¹⁰ An pagpaid ngan an paghatag hin pagliaw konektado gud. Ha ano nga paagi? An mapinairon nga tawo napapagios ha pagliaw ha iba ngan naniningkamot nga buligan hira. Salit ha siyahan napaid kita; katapos nagliliaw kita. Pansina kon paonan-o iginkonektar ni Pablo an pagpaid ni Jehova ha pagliaw nga Iya iginhahatag. Iginhulagway ni Pablo hi Jehova sugad nga “Amay han malumo nga kalooy ngan an Dios han ngatanan nga pagliaw.” (2 Cor. 1:3) Dinhi gin-gamit ni Pablo an mga pulong nga “malumo nga kalooy” basi ihulagway an pagpaid ha iba. Salit an Dios gintatawag nga Amay, o an gintitikangan han malumo nga kalooy, tungod han iya duro nga pagpaid ha mga tawo. Ngan ito nga pagpaid nagpapagios ha iya nga liawon kita “ha ngatanan naton nga pagsari.” (2 Cor. 1:4) Sugad la nga an tubig nga naawas tikang ha burabod naghahatag hin karepreskohan ha mga nauuhaw, hi Jehova naghahatag hin karepreskohan ngan pagliaw ha mga nanluluya. Paonan-o naton masusubad hi Jehova ha pagkaada hin pagpaid ngan ha paghatag hin pagliaw ha iba? An usa nga paagi nga aton mahihimo amo an pagkultibar hin mga kalidad nga konektado ha paghatag hin pagliaw. Ano an pipira hini nga mga kalidad?

11. Sumala ha Colosas 3:12 ngan 1 Pedro 3:​8, ano an iba nga mga kalidad nga kinahanglan naton kultibaron basi matipigan an gugma nga nagpapagios ha aton nga liawon an iba?

¹¹ Ano an mabulig ha aton basi matipigan an gugma nga kinahanglan naton para ‘padayon nga maliaw an usa kag usa’ kada adlaw? Kinahanglan naton kultibaron an magpakaruruyag nga mga kalidad sugad han pagpakita hin simpatiya, minagburugto nga gugma, ngan pagkabuotan. (Basaha an Colosas 3:12; 1 Pedro 3:8.) Paonan-o makakabulig ha aton ini nga mga kalidad? Kon an pagpaid ngan an konektado nga mga kalidad nagigin bahin han aton personalidad, sigurado nga mapapagios kita nga liawon adton mga nasasakit. Sugad han ginsiring ni Jesus, “kon ano an nakakapuno ha kasingkasing amo an iginyayakan han baba. An maopay nga tawo naggagawas hin mag-opay nga mga butang tikang ha iya maopay nga bahandi.” (Mat. 12:​34, 35) An pagliaw ha aton kabugtoan nga nanginginahanglan usa gud nga importante nga paagi nga maipapakita naton an aton gugma ha ira.

PAONAN-O NATON MATITIPIGAN NGA MARIG-ON AN ATON GUGMA HA USA KAG USA?

12. (a) Kay ano nga dapat kita magpabilin nga alerto? (b) Ano nga pakiana an aton yana hihisgotan?

¹² Karuyag naton ngatanan nga “padayon nga higugmaon . . . an usa kag usa.” (1 Juan 4:7) Pero importante hinumdoman naton nga hi Jesus nagpahamangno nga “magtutugnaw an gugma han kadam-an.” (Mat. 24:12) Hi Jesus waray magsiring nga an kadam-an han iya mga disipulo maundang ha pagpakita hin gugma ha usa kag usa. Pero dapat kita magpabilin nga alerto nga diri kita maimpluwensyahan han kawaray-gugma han mga tawo dinhi hini nga kalibotan. Tungod hito, hisgotan naton ini nga importante nga pakiana: Ano an mabulig ha aton nga mahibaroan kon marig-on ba an aton gugma ha kabugtoan?

13. Ano an mahimo magsari kon ano karig-on an aton gugma?

¹³ An usa nga paagi basi mahibaroan an karig-on han aton gugma amo an pag-usisa kon paonan-o naton gin-aatubang an pipira nga sitwasyon ha kinabuhi. (2 Cor. 8:8) An usa han sugad nga sitwasyon gin-unabi ni apostol Pedro: “Labaw ha ngatanan, magkaada kamo hilarom nga gugma ha usa kag usa, kay an gugma nagtatabon hin damu nga sala.” (1 Ped. 4:8) Salit an mga kaluyahan ngan pagin diri perpekto han iba mahimo magsari kon ano karig-on an aton gugma.

14. Sumala ha 1 Pedro 4:​8, ano nga klase han gugma an dapat may-ada kita? Iilustrar.

¹⁴ Hunahunaon naton hin maopay an mga pulong ni Pedro. An siyahan nga bahin han bersikulo 8 nagpapakita han klase han gugma nga dapat may-ada kita​—“hilarom nga gugma.” An pulong nga gin-gamit ni Pedro para ha “hilarom” literal nga nangangahulogan hin “gin-unat.” An ikaduha nga bahin han bersikulo nagpapakita han magigin epekto hito nga hilarom nga gugma. Gintatabonan hito an mga sala han aton kabugtoan. Maihuhulagway naton ito ha sugad hini: An gugma sugad hin nauunat nga tela nga ginkakaptan han aton mga kamot, ngan gin-uunat ito tubtob nga matabonan, diri la usa o duha nga sala, kondi an “damu nga sala.” An pagtabon nangangahulogan hin pagpasaylo. Sugad la nga an usa nga tela nakakatabon han mantsa, an gugma nakakatabon han mga kaluyahan ngan pagin diri perpekto han iba.

15. Kon an aton gugma ha aton kabugtoan marig-on, ano an makakaya naton buhaton? (Colosas 3:13)

¹⁵ An aton gugma ha iba dapat magin marig-on basi makapasaylo kita han pagin diri perpekto han aton mga igkasi-tumuroo—bisan kon usahay makuri gud ito buhaton. (Basaha an Colosas 3:13.) Kon nagpapasaylo kita ha iba, ginpapakita naton nga marig-on an aton gugma ngan karuyag naton nga lipayon hi Jehova. Ano pa an makakabulig ha aton basi palabyon an nakakapaaringit nga mga kinaiya ngan mga sayop han iba?

16-17. Ano pa an makakabulig ha aton basi makalimtan an gutiay nga mga sayop han iba? Iilustrar. (Kitaa liwat an piktyur.)

¹⁶ Pagpokus ha positibo nga mga kinaiya han imo kabugtoan, diri ha negatibo. Tagda ini nga pagkompara. Imadyina nga aadto ka ha usa nga pagturotarampo upod han kabugtoan. Nag-i-enjoy kamo hito nga okasyon, ngan han tikatarapos na ito, nagpiktyur kamo sugad nga grupo. Ngani, nagpiktyur kamo hin makaduha pa engkaso an siyahan nga piktyur diri maopay. Salit may tulo kamo nga piktyur. Pero ha usa hito nga piktyur, naobserbaran mo nga namusdot an usa nga brother. Ano an bubuhaton mo hito nga piktyur? Paparaon mo ito kay may duha ka pa man nga piktyur diin nahiyom an ngatanan, upod na ito nga brother.

¹⁷ Maikukompara naton an mga piktyur nga aton gin-save ha mga hinumdoman nga aton gintitipigan. Kasagaran na nga may mag-opay kita nga mga hinumdoman ha mga panahon nga kaupod naton an kabugtoan. Pero ano man kon ha usa hito nga mga panahon an usa nga bugto may ginsiring o ginbuhat nga diri maopay? Ano an hihimoon naton hito nga hinumdoman? Kay ano nga diri na la ito kalimtan pariho han aton pagpara ha usa han mga piktyur? (Prob. 19:11; Efe. 4:32) Mahimo naton makalimtan an gudtiay nga sayop han aton igkasi-tumuroo kay may-ada kita damu nga magpakalilipay nga hinumdoman han aton pakig-upod ha iya. Ito an klase han mga hinumdoman nga karuyag naton tipigan ngan pabilhan.

KON KAY ANO NGA AN GUGMA LABI NGA KINAHANGLAN YANA

18. Ano nga nangunguna nga mga punto mahitungod han gugma an aton ginhisgotan hini nga artikulo?

¹⁸ Kay ano nga karuyag naton tipigan nga marig-on an aton gugma ha usa kag usa? Sugad han aton ginhisgotan, kon nagpapakita kita hin gugma ha aton kabugtoan, iginpapakita naton nga hinigugma naton hi Jehova. Paonan-o naton iginpapahayag an aton gugma ha mga igkasi-tumuroo? An usa han aton mahihimo amo an pagliaw ha ira. ‘Padayon naton nga maliliaw an usa kag usa’ kon may pagpaid kita. Paonan-o matitipigan nga marig-on an aton gugma ha usa kag usa? Pinaagi han aton paningkamot nga pasayloon an mga sayop han iba.

19. Kay ano nga labi nga importante yana nga magpakita hin gugma ha usa kag usa?

¹⁹ Kay ano nga labi nga importante yana nga magpakita hin gugma ha usa kag usa? Pansina an rason nga iginhatag ni Pedro: “An kataposan han ngatanan nga butang hirani na. Salit . . . magkaada kamo hilarom nga gugma ha usa kag usa.” (1 Ped. 4:​7, 8) Samtang an kataposan hini nga maraot nga kalibotan nagtitikahirani na gud, ano an aton malalaoman? Mahitungod ha iya mga sumurunod, hi Jesus nagtagna: “Kangangalasan kamo han ngatanan nga nasud tungod ha akon ngaran.” (Mat. 24:9) Basi mailob an sugad nga kangalas, kinahanglan magpabilin kita nga urosa. Kon bubuhaton naton ito, mapapakyas an paningkamot ni Satanas nga magkabahin-bahin kita, tungod kay an gugma amo an “hingpit nga bugkos han pagkaurosa.”​—Col. 3:14; Fil. 2:​1, 2.